ପିଏମଇଣ୍ଡିଆ

ମଞ୍ଚରେ ଉପସ୍ଥିତ ମନ୍ତ୍ରିମଣ୍ଡଳର ମୋର ସହଯୋଗୀ ଶ୍ରୀମାନ ଶ୍ରୀପଦ ୟେଶୋ ନାଇକ ମହୋଦୟ, ପୁରସ୍କାର ପାଉଥିବା ସମସ୍ତ ସାଥୀ, ଆୟୁଷ କ୍ଷେତ୍ର ସହିତ ଜଡ଼ିତ ବୃତ୍ତିଗତ ଅଧିକାରୀଗଣ, ଭାଇ ଓ ଭଉଣୀମାନେ !

ଦେଶରେ ଫିଟ୍ ଇଣ୍ଡିଆ ଆନ୍ଦୋଳନର ଶୁଭାରମ୍ଭର ପର ଦିନ ହିଁ ଆୟୁଷ ଏବଂ ଯୋଗ ସହିତ ଜଡ଼ିତ କାର୍ଯ୍ୟକ୍ରମକୁ ଆସିବା ହେଉଛି ଏକ ଅଦ୍ଭୁତ ସଂଯୋଗ । ଆୟୁଷ ଏବଂ ଯୋଗ ହେଉଛନ୍ତି ଫିଟ୍ ଇଣ୍ଡିଆ ଅଭିଯାନର ବହୁତ ମହତ୍ୱପୂର୍ଣ୍ଣ ଅଂଶୀଦାର ।

ସାଥୀଗଣ,

ଆଜି ଏଠାରେ ତିନୋଟି କାର୍ଯ୍ୟକ୍ରମ ହୋଇଛି । ଦୁଇଟି ଆମ ପରମ୍ପରା, ସଂସ୍କୃତିର ପୁରସ୍କାର ଓ ସମ୍ମାନ ସହିତ ଯୋଡ଼ି ହୋଇଛି ଏବଂ ଗୋଟିଏ ସ୍ୱାସ୍ଥ୍ୟ ସୁରକ୍ଷା ଭିତ୍ତିଭୂମି ସହିତ ଜଡ଼ିତ । ଆଜି ହରିୟାଣାରେ 10ଟି ଆୟୁଷ ସ୍ୱାସ୍ଥ୍ୟ ଏବଂ ଆରୋଗ୍ୟ କେନ୍ଦ୍ରର ଶୁଭାରମ୍ଭ କରାଯାଇଛି । ଏଥିପାଇଁ ମୁଁ ହରିୟାଣାବାସୀଙ୍କୁ ବହୁତ-ବହୁତ ଶୁଭକାମନା ଜଣାଉଛି ।

ମୋତେ ଯୋଗର ସାଧକମାନଙ୍କୁ, ଯୋଗସେବା କରୁଥିବା ଲୋକଙ୍କୁ, ସମଗ୍ର ଦୁନିଆରେ ଯୋଗର ପ୍ରଚାର-ପ୍ରସାର କରୁଥିବା ସାଥୀମାନଙ୍କୁ ତଥା ସଂସ୍ଥାଗୁଡ଼ିକୁ ପୁରସ୍କାର ପ୍ରଦାନ କରିବାର ସୁଯୋଗ ମଧ୍ୟ ମିଳିଛି । ଏମାନଙ୍କ ମଧ୍ୟରେ ଇଟାଲୀ ଏବଂ ଜାପାନର ସାଥୀ ମଧ୍ୟ ଅଛନ୍ତି ଯେଉଁମାନେ ଦଶକ ଦଶକ ଧରି ଯୋଗର ପ୍ରଚାର-ପ୍ରସାରରେ ଲାଗି ପଡ଼ିଛନ୍ତି । ଏଣ୍ଟୋନିଏଟା ରୋଜ୍ଜି ମହୋଦୟା ବିଗତ 4 ଦଶକ ଧରି ସଂପୂର୍ଣ୍ଣ ୟୁରୋପରେ ସର୍ବ ଯୋଗ ଇଣ୍ଟରନେସନାଲ ସଂସ୍ଥା ମାଧ୍ୟମରେ ଯୋଗର ପ୍ରଚାର-ପ୍ରସାରରେ ଲାଗି ପଡ଼ିଛନ୍ତି । ସେହିଭଳି ଭାବେ ଜାପାନ ଯୋଗ ନିକେତନର ସମଗ୍ର ଜାପାନରେ ହଜାର ହଜାର ଯୋଗକେନ୍ଦ୍ର ରହିଛି । ଏହି ସଂସ୍ଥା ମଧ୍ୟ ବିଗତ 4 ଦଶକ ଧରି ଜାପାନକୁ ଯୋଗ ମାଧ୍ୟମରେ ନିରୋଗ ରଖିବାର ମହାନ କାର୍ଯ୍ୟ ମଧ୍ୟ କରୁଛି । ପୁରସ୍କାର ପାଉଥିବା ସମସ୍ତ ସାଥୀମାନଙ୍କୁ ମୁଁ ଶୁଭକାମନା ଜଣାଉଛି ଏବଂ ତାଙ୍କର ସଫଳତା ପାଇଁ କାମନା କରୁଛି ।

କିଛି ସମୟ ପୂର୍ବରୁ ଆୟୁଷ ପଦ୍ଧତିକୁ ସମୃଦ୍ଧ କରୁଥିବା 12ଜଣ ମହାନ ବ୍ୟକ୍ତିଙ୍କ ସମ୍ମାନାର୍ଥେ ଡାକଟିକେଟ ମଧ୍ୟ ଜାରି କରାଯାଇଛି । ଏମାନେ ହେଉଛନ୍ତି ସେହି ସାଥୀଗଣ, ଯେଉଁମାନେ ନିଜର ସଂପୂର୍ଣ୍ଣ ଜୀବନ ଲୋକମାନଙ୍କର ଉପଚାର ପାଇଁ ଲଗାଇଦେଇଛନ୍ତି ।

କେହି ଯୋଗକୁ ମାଧ୍ୟମ ଭାବେ ବାଛି ନେଇଛନ୍ତି ତ ଆଉ କେହି ଆୟୁର୍ବେଦକୁ ।

କେହି ୟୁନାନୀ ଦ୍ୱାରା ଜନସେବା କରୁଛନ୍ତି ତ ଆଉ କେହି ହୋମିଓପ୍ୟାଥି ଦ୍ୱାରା ଲୋକଙ୍କ ଜୀବନକୁ ରୋଗମୁକ୍ତ କରୁଛନ୍ତି ।

ମୁଁ ଡାକ ବିଭାଗକୁ ମଧ୍ୟ ଶୁଭକାମନା ଜଣାଇବି, କାରଣ ଭାରତରେ ଗୋଟିଏ ହିଁ ସେଟରେ 12 ଡାକଟିକେଟ ବହୁତ କମ୍ ଜାରି ହୋଇଛି । ମୋର ବିଶ୍ୱାସ ରହିଛି କି ଏହି ଡାକଟିକେଟ ଆୟୁଷ ପ୍ରତି ଦେଶବାସୀଙ୍କ ମଧ୍ୟରେ ନୂତନ ଚିନ୍ତାଧାରା ବିକଶିତ କରିବାରେ ସାହାଯ୍ୟ କରିବ ।

ଭାଇ ଓ ଭଉଣୀମାନେ,

ଆଜି ଯେଉଁ ଡାକଟିକେଟ ଜାରି କରାଯାଇଛି, ସେଥିରୁ ଗୋଟିଏ ଦିନଶା ମେହତାଙ୍କ ନାମରେ ଜାରି କରାଯାଇଛି, ଦିନଶା ମେହତା ଗାନ୍ଧିଜୀଙ୍କ ଶାରୀରିକ ଚିକିତ୍ସକ ମଧ୍ୟ ଥିଲେ ଏବଂ ପ୍ରାକୃତିକ ଚିକିତ୍ସା ପ୍ରତି ସମର୍ପିତ କାର୍ଯ୍ୟକର୍ତ୍ତା ମଧ୍ୟ ।

ଗାନ୍ଧିଜୀ କହୁଥିଲେ କି –“ପ୍ରାକୃତିକ ଚିକିତ୍ସା ଜୀବନ ଜୀଇଁବାର ହେଉଛି ଏକ ଉପାୟ, କୌଣସି ଚିକିତ୍ସାର ଉପାୟ ନୁହେଁ ।” ସେ ସମଗ୍ର ଜୀବନ ଏହିକଥା ଉପରେ ଗୁରୁତ୍ୱ ଦେଲେ ଏବଂ ପ୍ରାକୃତିକ ଚିକିତ୍ସା ପଦ୍ଧତିକୁ ଜୀବନର ଆଧାର କରିଥିଲେ ।

ସାଥୀଗଣ,

ଗାନ୍ଧିଜୀ ଯାହା ଶିଖିଥିଲେ, ତାହା ପଛରେ ଭାରତର ନିରାକରଣ ଏବଂ ରୋଗନିବାରଣ ଚିକିତ୍ସା ସହ ଜଡ଼ିତ ଏକ ସମୃଦ୍ଧ ପରମ୍ପରା ରହିଛି । ଆମ ପାଖରେ ହଜାର ହଜାର ବର୍ଷର ପୁରାତନ ସାହିତ୍ୟ ରହିଛି, ବେଦଗୁଡ଼ିକରେ ଜଟିଳ ରୋଗ ସହିତ ଜଡ଼ିତ ଚିକିତ୍ସାର ଚର୍ଚ୍ଚା ମଧ୍ୟ ରହିଛି । କିନ୍ତୁ ଦୁର୍ଭାଗ୍ୟର ବିଷୟ ଯେ ଆମେ ଆମର ଏହି ପୁରାତନ ଗବେଷଣାକୁ, ଜ୍ଞାନକୁ ଏହି ସମ୍ପତ୍ତିକୁ ଆଧୁନିକତା ସହିତ ଯୋଡ଼ିବାରେ ସେତେ ପରିମାଣରେ ସଫଳ ହୋଇପାରି ନାହୁଁ ।

ଏହି ସ୍ଥିତିକୁ ବିଗତ 5 ବର୍ଷ ଧରି ପରିବର୍ତ୍ତନ କରିବାର ପ୍ରୟାସ ଆମେ କରିଛୁ । ଏହା ମାଧ୍ୟମରେ ଆୟୁଷକୁ ଭାରତର ସ୍ୱାସ୍ଥ୍ୟସୁରକ୍ଷା ପଦ୍ଧତିର ଗୁରୁତ୍ୱପୂର୍ଣ୍ଣ ଅଂଶ ଭାବେ ରଖିବା ଉପରେ ଗୁରୁତ୍ୱ ଦିଆଯାଉଛି ।

ମୋତେ ଅବଗତ କରାଯାଇଛି ଯେ ଆୟୁଷ ପରିବାରରେ ସୋବା ରିଗ୍ପା ବ୍ୟବସ୍ଥାକୁ ମଧ୍ୟ ସାମିଲ କରାଯାଇଛି । ଆୟୁର୍ବେଦ, ଯୋଗ ଏବଂ ପ୍ରାକୃତିକ ଚିକିତ୍ସା, ୟୁନାନୀ, ସିଦ୍ଧ ଏବଂ ହୋମିଓପ୍ୟାଥି ପରେ ସୋବା ରିଗ୍ପା, ଆୟୁଷ ପରିବାରର ଷଷ୍ଠ ସଦସ୍ୟ ହୋଇଛି । ଏଥିପାଇଁ ଆପଣମାନଙ୍କୁ ବହୁତ-ବହୁତ ଅଭିନନ୍ଦନ ।

ଭାଇ ଓ ଭଉଣୀମାନେ,

ଆଜି ଯଦି ଭାରତର ଚିକିତ୍ସା ବ୍ୟବସ୍ଥାକୁ ପରିବର୍ତ୍ତନ କରିବାକୁ ହେବ ତ, ଆମକୁ ସାମଗ୍ରିକ ଚିନ୍ତାଧାରା ସହିତ କାର୍ଯ୍ୟ କରିବାକୁ ପଡ଼ିବ । ପାରମ୍ପରିକ ଏବଂ ଆଧୁନିକ ଉଭୟ ଚିକିତ୍ସା ଶକ୍ତିକୁ ସୁଦୃଢ଼ କରିବାକୁ ହେବ । ଆୟୁଷ ଏବଂ ଆଧୁନିକ ସ୍ୱାସ୍ଥ୍ୟ ସୁରକ୍ଷାର ଏକା ସହିତ, ସମାନଭାବେ ବିକାଶ ହେବ, ସେତେବେଳେ ଯାଇ ଉନ୍ନତମାନର ସ୍ୱାସ୍ଥ୍ୟ ସମାଧାନ ଆମେ ପ୍ରସ୍ତୁତ କରି ପାରିବା ।

ସାଥୀଗଣ,

ଆୟୁଷ୍ମାନ ଭାରତ ଯୋଜନା ହେଉଛି ଏହି ଚିନ୍ତାଧାରାର ପରିଣାମ । ଏଥିରେ ପ୍ରତିଷେଧକ ସ୍ୱାସ୍ଥ୍ୟ ସୁରକ୍ଷାକୁ ଧ୍ୟାନରେ ରଖି ସ୍ୱାସ୍ଥ୍ୟ ଏବଂ ଆରୋଗ୍ୟ କେନ୍ଦ୍ର ଖୋଲାଯାଉଛି ଆଉ ଅନ୍ୟପକ୍ଷରେ ଗୁରୁତର ରୋଗର ମାଗଣା ଚିକିତ୍ସା ପାଇଁ ପିଏମ୍ ଜନ ଆରୋଗ୍ୟ ଯୋଜନା କାର୍ଯ୍ୟକାରୀ କରାଯାଉଛି ।

ସ୍ୱାସ୍ଥ୍ୟ ଏବଂ ଆରୋଗ୍ୟ କେନ୍ଦ୍ର, ପ୍ରତିରୋଧ ଏବଂ ସୁଲଭ ସ୍ୱାସ୍ଥ୍ୟ ସୁରକ୍ଷାର ଏହା ହେଉଛି ଏକମାତ୍ର ଏବଂ ଅଦ୍ଭୁତପୂର୍ବ ମଡେଲ । ଏହି କେନ୍ଦ୍ରଗୁଡ଼ିକରେ ରୋଗ ନିରାକରଣର ମଧ୍ୟ ଉପାୟ ରହିଛି ଏବଂ ଚିକିତ୍ସାର ମଧ୍ୟ ବ୍ୟବସ୍ଥା ରହିଛି ।

ସାଥୀଗଣ,

ଆମେ ଯେତେବେଳେ ଦେଶରେ ଦେଢ଼ ଲକ୍ଷ ସ୍ୱାସ୍ଥ୍ୟ ଏବଂ ଆରୋଗ୍ୟ କେନ୍ଦ୍ର ଖୋଲୁଛୁ, ତ ଆୟୁଷକୁ ଭୁଲି ଯାଇ ନାହୁଁ । ସମଗ୍ର ଦେଶରେ ମଧ୍ୟ ସାଢ଼େ 12 ହଜାର ଆୟୁଷ କେନ୍ଦ୍ର ଖୋଲିବାର ଲକ୍ଷ୍ୟ ରହିଛି, ଯେଉଁଥିରୁ ଆଜି 10ଟି ଆୟୁଷ ସ୍ୱାସ୍ଥ୍ୟ ଏବଂ ଆରୋଗ୍ୟ କେନ୍ଦ୍ରର ଉଦ୍ଘାଟନ ହୋଇଛି । ଆମର ଚେଷ୍ଟା ରହିଛି ଯେ ଏଭଳି 4 ହଜାର ଆୟୁଷ କେନ୍ଦ୍ର ଚଳିତ ବର୍ଷ ପ୍ରସ୍ତୁତ ହୋଇଯାଉ ।

ସୁଲଭ ମୂଲ୍ୟରେ ଚିକିତ୍ସା କଥା କହିଲେ ଆୟୁଷ୍ମାନ ଭାରତ ଗରିବରୁ ଅତି ଗରିବ ବ୍ୟକ୍ତିଙ୍କୁ ଉନ୍ନତ ମାନର ସ୍ୱାସ୍ଥ୍ୟ ସୁରକ୍ଷା ଯୋଗାଇ ଦେବା ପାଇଁ ବିଶ୍ୱାସ ଦେଉଛି । ଆୟୁଷ୍ମାନ ଭାରତ ଯୋଜନା ମାଧ୍ୟମରେ ଯେତେ ମଧ୍ୟ ଗରିବମାନଙ୍କୁ ଏ ପର୍ଯ୍ୟନ୍ତ ମାଗଣା ଚିକିତ୍ସା ସେବା ମିଳି ସାରିଲାଣି, ସେମାନେ ଯଦି ଏହାର ପରିସର ମଧ୍ୟରେ ରହୁ ନଥାନ୍ତେ ତ ସେମାନଙ୍କୁ 12 ହଜାର କୋଟି ଟଙ୍କାରୁ ମଧ୍ୟ ଅଧିକ ଖର୍ଚ୍ଚ କରିବାକୁ ପଡ଼ି ଥାଆନ୍ତା । ଏକ ପ୍ରକାରରେ ଦେଶର ଲକ୍ଷ-ଲକ୍ଷ ଗରିବ ପରିବାରଙ୍କ 12 ହଜାର କୋଟି ଟଙ୍କା ସଞ୍ଚୟ ହୋଇଛି ।

ଆପଣମାନେ କଳ୍ପନା କରିପାରୁଥିବେ ଯେ ଯେତେବେଳେ ଆୟୁଷ୍ମାନ ଭାରତ ଭଳି ଯୋଜନା ନଥିଲା, ସେତେବେଳେ ଗରିବଙ୍କୁ ଚିକିତ୍ସା ପାଇଁ କେତେ ଅସୁବିଧାର ସମ୍ମୁଖୀନ ହେବାକୁ ପଡ଼ୁଥିଲା । ଚିକିତ୍ସାର ଖର୍ଚ୍ଚ ସେମାନଙ୍କୁ ଆହୁରି ଗରିବ କରି ଦେଉଥିଲା ।

ଭାଇ ଓ ଭଉଣୀମାନେ,

ନିରାକରଣ ଏବଂ ସୁଲଭ ଚିକିତ୍ସା ସହିତ ଦେଶରେ ଅତ୍ୟାବଶ୍ୟକ ଭିତ୍ତିଭୂମି ବିକାଶ ଦ୍ରୁତ ଗତିରେ ଚାଲୁ ରହିଛି । ଦୁଇ ଦିନ ତଳେ ହିଁ ସରକାର ସାରା ଦେଶରେ 75ଟି ନୂତନ ମେଡିକାଲ କଲେଜ ନିର୍ମାଣ କରିବାର ନିଷ୍ପତ୍ତି ନେଇଛନ୍ତି । ଦେଶର ପ୍ରତ୍ୟେକ ଜିଲ୍ଲାରେ ଗୋଟିଏ ଲେଖାଏଁ ମେଡିକାଲ କଲେଜ ନିର୍ମାଣ କରିବାର ଲକ୍ଷ୍ୟ ଆଡକୁ ଏହା ହେଉଛି ଆହୁରି ଏକ ବଡ଼ ପଦକ୍ଷେପ ।

ଏହାଦ୍ୱାରା ଗୁରୁତର ରୋଗଗୁଡ଼ିକର ଚିକିତ୍ସା ପାଇଁ ସୁବିଧା ମିଳିବାରେ ତ ବୃଦ୍ଧି ଘଟିବ, ଏହା ସହିତ ଏମବିବିଏସରେ ପ୍ରାୟ 16 ହଜାର ଆସନ ବୃଦ୍ଧି ହେବ । ନିକଟରେ ଗଠନ କରାଯାଇଥିବା ଜାତୀୟ ମେଡିକାଲ କମିସନ ଆଇନ ମଧ୍ୟ ଦେଶରେ ଡାକ୍ତରୀ ଶିକ୍ଷା ଏବଂ ଏହା ସହିତ ଜଡ଼ିତ ଭିତ୍ତିଭୂମିକୁ ସୁଦୃଢ଼ କରିବାରେ ପ୍ରଭାବଶାଳୀ ଭୂମିକା ତୁଲାଇବାକୁ ଯାଉଛି ।

ସାଥୀଗଣ,

କେବଳ ଆଧୁନିକ ଔଷଧ ହିଁ ନୁହେଁ, ଆୟୁଷର ଶିକ୍ଷାରେ ମଧ୍ୟ ଅଧିକ ଏବଂ ଉନ୍ନତମାନର ବୃତ୍ତିଧାରୀ ଆସନ୍ତୁ, ଏଥିପାଇଁ ଆବଶ୍ୟକ ସଂସ୍କାର କରାଯାଉଛି । ବିଶେଷ ଭାବେ ଯେଉଁ ପ୍ରକାରର ବୈଷୟିକ ଜ୍ଞାନକୌଶଳର ଉପଯୋଗ କରାଯାଉଛି, ତାହା ଆୟୁଷକୁ ଭବିଷ୍ୟତ ପାଇଁ ପ୍ରସ୍ତୁତ କରିବାରେ ଖୁବ ସାହାଯ୍ୟ କରିବ । ଆୟୁଷ ଗ୍ରୀଡ଼ର ଚିନ୍ତାଧାରା ମଧ୍ୟ ପ୍ରଶଂସନୀୟ । ଏହାଦ୍ୱାରା ଆୟୁଷ କ୍ଷେତ୍ର ସହିତ ଜଡ଼ିତ ଅନେକ ସ୍ଥାଣୁତାକୁ ଦୂର କରିବାରେ ସାହାଯ୍ୟ ମିଳି ପାରିବ।

ଭାଇ ଓ ଭଉଣୀମାନେ,

ଆୟୁଷ ପାଇଁ, ମେଡିକାଲ କଲେଜ ପାଇଁ ଏ ଯେଉଁ ଆଧୁନିକ ଭିତ୍ତିଭୂମି ପ୍ରସ୍ତୁତ ହେଉଛି, ତାହାର ଲାଭ ମଧ୍ୟ ହେଉଛି ବ୍ୟାପକ । ସ୍ୱାସ୍ଥ୍ୟସେବା ସହିତ ଏହା ଭାରତରେ ରୋଜଗାର ସୃଷ୍ଟି କରିବାର ବହୁତ ବଡ଼ ମାଧ୍ୟମ ସାବ୍ୟସ୍ତ ହେଉଛି ।

ବିଶେଷ ଭାବେ ଛୋଟ-ଛୋଟ ଗାଁ-ଗଣ୍ଡା, ଦ୍ୱିତୀୟ ଶ୍ରେଣୀ, ତୃତୀୟ ଶ୍ରେଣୀ ସହରର ଯୁବକ ସାଥୀମାନଙ୍କୁ ଡାକ୍ତରୀ ଓ ସ୍ୱାସ୍ଥ୍ୟକର୍ମୀ ପାଠ୍ୟକ୍ରମରେ ଶିକ୍ଷା ଘର ପାଖରେ ହିଁ ମିଳିପାରିବାର ସମ୍ଭାବନା ସୃଷ୍ଟି ହୋଇଛି ।

ନୂତନ ଡାକ୍ତରଖାନା ନିର୍ମାଣ କରାଯିବାରୁ ମେଡିକାଲ ସହିତ ଜଡ଼ିତ ସଂପୂର୍ଣ୍ଣ ଏକ ପରିସଂସ୍ଥାନ ସେଠାରେ ବିକଶିତ ହେଉଛି । ଏଥିରେ କମ୍ ପଢ଼ି-ଲେଖି ଶିଖିଥିବା ଯୁବକଙ୍କ ଠାରୁ ଆରମ୍ଭ କରି ଡିଗ୍ରୀ, ଡିପ୍ଲୋମାଧାରୀ ଯୁବକ ସାଥୀମାନଙ୍କୁ ମଧ୍ୟ ରୋଜଗାରର ନୂତନ ସୁଯୋଗ ମିଳୁଛି ।

ଭାଇ ଓ ଭଉଣୀମାନେ,

ସାଥୀଗଣ,

ଆଜି ଆମେ ଯେତେବେଳେ 5 ଟ୍ରିଲିୟନ ଡଲାର ଅର୍ଥବ୍ୟବସ୍ଥାର ଲକ୍ଷ୍ୟକୁ ନେଇ ଚାଲୁଛୁ, ସେତେବେଳେ ଆୟୁଷର ବହୁତ ବଡ଼ ଭୂମିକା ରହିବାକୁ ଯାଉଛି । ଆଗାମୀ କିଛି ବର୍ଷ ମଧ୍ୟରେ ଭାରତରେ ପ୍ରତିଷେଧକ ସ୍ୱାସ୍ଥ୍ୟସେବା ବଜାରର ମଧ୍ୟ ବ୍ୟାପକ ସଂପ୍ରସାରଣ ହେବାକୁ ଯାଉଛି । ଏହା ହେଉଛି ଏକ ବହୁତ ବଡ଼ ସୁଯୋଗ ।

ଆମକୁ ଆମର ପ୍ରତିଷେଧକ ସ୍ୱାସ୍ଥ୍ୟସେବା ବ୍ୟବସ୍ଥାକୁ ସମଗ୍ର ଦୁନିଆ ପାଇଁ ଏକ ଆକର୍ଷକ ବ୍ରାଣ୍ଡ ଭାବେ ବିକଶିତ କରିବାକୁ ହେବ । ଦୁନିଆର 17 ଦେଶ ସହିତ ଆମେ ବୁଝାମଣା କରିଛୁ, ଏବେ ଆମେ ଏଥିରେ ଆହୁରି ଗତି ଆଣିବାର ଆବଶ୍ୟକତା ରହିଛି ।

ସାଥୀଗଣ,

ଆଜି ତ ଯୋଗ ସମଗ୍ର ବିଶ୍ୱରେ ଜୀବନର ଏକ ପ୍ରମୁଖ ଅଂଶ ହୋଇଯାଇଛି । ବିଗତ 5 ବର୍ଷ ମଧ୍ୟରେ ଅନ୍ତରାଷ୍ଟ୍ରୀୟ ଯୋଗ ଦିବସରେ ସାରା ଦୁନିଆରେ ଯୋଗ ପାଇଁ ଯେଉଁ ଉତ୍ସାହ ଦେଖାଦେଇଛି ତାହା ଅଦ୍ଭୁତପୂର୍ଣ୍ଣ । ଆଜି ଯୋଗ ଆରୋଗ୍ୟ ସହିତ ଦୁନିଆକୁ ଭାରତ ସହିତ ଯୋଡ଼ିବା ପାଇଁ ମଧ୍ୟ ବହୁତ ବଡ଼ ମାଧ୍ୟମ ହୋଇଛି ।

ଏବେ ଆମକୁ ଯୋଗ ବ୍ୟତୀତ ଆୟୁଷର ଅନ୍ୟାନ୍ୟ ସୁବିଧା ସବୁକୁ ସମଗ୍ର ଦୁନିଆରେ ପହଞ୍ଚାଇବା ପାଇଁ ପ୍ରୟାସ କରିବାର ଅଛି ।

ସାଥୀଗଣ,

ନିଜର ପୁରୁଣା ପରମ୍ପରାଗୁଡ଼ିକୁ ଭୁଲିଯିବାକୁ ଦେବା ଆଉ ପୁଣି ଅନ୍ୟ କେହି କହିଦେବେ ତ ତାକୁ ପୁଣି ନୂତନ ଢଙ୍ଗରେ ଶିଖିବା, ଏହି ଅଭ୍ୟାସକୁ ମଧ୍ୟ ଆମମାନଙ୍କୁ ବଦଳାଇବାକୁ ପଡ଼ିବ ।

ମୁଁ ଆପଣମାନଙ୍କୁ ଉଦାହରଣ ଦେଉଛି ।

ଆଜି ଆମେ ଦେଖୁଛୁ କି ଯେଉଁ ଭୋଜନକୁ ଆମେ ଛାଡ଼ିଦେଲୁ, ତାକୁ ଦୁନିଆ ଆପଣେଇବାକୁ ଆରମ୍ଭ କରିଦେଇଛି । ଯଅ, ମାଣ୍ଡିଆ, କନ୍ଦମୂଳ, ବାଜରା, ସୁଆଁ, ଏଭଳି ଅନେକ ଶସ୍ୟ କେବେ ଆମର ଖାଦ୍ୟପେୟର ଅଂଶ ହେଉଥିଲା । କିନ୍ତୁ ଧୀରେ-ଧୀରେ ଏହା ଆମ ଭୋଜନ ଥାଳିରୁ ଅନ୍ତର୍ଦ୍ଧ୍ୟ।ନ ହେବାକୁ ଲାଗିଲା । ଏହି ଖାଦ୍ୟ-ପାନୀୟ ଉପରେ ଦାରିଦ୍ର୍ୟର ଛାପ ଲଗାଇ ଦିଆଗଲା ।

ଏବେ ଆମେ ଦେଖୁଛୁ କି ଏହି ପୋଷକ ଆହାରର ଚାହିଦା ସାରା ଦୁନିଆରେ ରହିଛି । ଆଜିକାଲି ଆମେ ଯେତେବେଳେ ଅନ୍ ଲାଇନ୍ ସପିଂ ପୋର୍ଟାଲକୁ ଯାଉଛୁ ତ ଅଧିକାଂଶ ସମୟରେ ଆଶ୍ଚର୍ଯ୍ୟ ହୋଇଯାଉଛୁ । ଯେଉଁ ଶସ୍ୟକୁ କେହି ମାଗଣାରେ ମଧ୍ୟ ନେବାକୁ ଚାହୁଁ ନଥିଲେ, ତାହାର କିଲୋ ଶହ ଶହ ଟଙ୍କା ଦରରେ ବିକ୍ରି ହେଉଛି ।

ସାଥୀଗଣ,

ଏବେ ସମୟ ଆସିଯାଇଅଛି କି ପୋଷକର ଏହି ଗନ୍ତାଘରକୁ ପୁଣି ଥରେ ଭର୍ତ୍ତି କରାଯାଉ । ଦେଶକୁ ବାଜରା(ମିଲେଟ) ବିପ୍ଳବ ଉପରେ କାର୍ଯ୍ୟ କରିବାକୁ ହେବ । କୃଷକ ବାଜରା ଉତ୍ପାଦନ କରନ୍ତୁ ଏବଂ ଖାଦ୍ୟ ପ୍ରକ୍ରିୟାକରଣ ସହିତ ଜଡ଼ିତ ଆମର ଉଦ୍ୟୋଗ ସେଥିରୁ ଏଭଳି ଆକର୍ଷକ ଉତ୍ପାଦକ ସୃଷ୍ଟି କରନ୍ତୁ, ଯାହା ପ୍ରତ୍ୟେକ ପିଢିଙ୍କୁ ପସନ୍ଦ ଆସୁ ଏବଂ ତାଙ୍କର ଖାଦ୍ୟପେୟର ଏକ ଅଂଶ ମଧ୍ୟ ହେଉ ।

ଗୁରୁତ୍ୱପୂର୍ଣ୍ଣ କଥା ହେଉଛି ଏହା କି ବାଜରା ପ୍ରତ୍ୟେକ ପ୍ରକାରର ମାଟିରେ ବଢ଼ିଥାଏ ଏବଂ ପାଣି ମଧ୍ୟ କମ୍ ଆବଶ୍ୟକ କରିଥାଏ । ଅର୍ଥାତ ଭାରତ ପାଖରେ ଏକ ବହୁତ ବଡ଼ ଲାଭ ରହିଛି । ଆମେ ସମଗ୍ର ଦୁନିଆ ପାଇଁ ବାଜରା ଉତ୍ପାଦନ କରିପାରିବା ।

ଏହାଦ୍ଵାରା ପ୍ରତିଷେଧକ ସ୍ୱାସ୍ଥ୍ୟସେବା ବ୍ରାଣ୍ଡ ଭାବେ ଭାରତର ନାମ ମଧ୍ୟ ହେବ, ମାନବତାର ସେବା ମଧ୍ୟ ହେବ ଏବଂ କୃଷକଙ୍କର ଆୟ ମଧ୍ୟ ବଢ଼ିବ ।

ଭାଇ ଓ ଭଉଣୀମାନେ,

ଆୟୁଷର ଆଉ ଏକ ଦିଗ ରହିଛି ଯାହା ଉପରେ ଆମକୁ ଗମ୍ଭୀରତାର ସହିତ କାର୍ଯ୍ୟ କରିବାର ଆବଶ୍ୟକତା ରହିଛି । ଭାରତରେ ମେଡିକାଲ ପର୍ଯ୍ୟଟନ ନିରନ୍ତର ବୃଦ୍ଧି ପାଇବାରେ ଲାଗିଛି । କିନ୍ତୁ ଏବେ ମଧ୍ୟ ଏଥିରେ ବହୁତ ବ୍ୟାପକ ପରିସର ରହିଛି । ମେଡିକାଲ (ଡାକ୍ତରୀ) ଏବଂ ମେଡିଟେସନ୍ (ଧ୍ୟାନ)ପାଇଁ ଯାହା ମଧ୍ୟ ଜରୁରି ଭିତ୍ତିଭୂମି ରହିଛି, ତାହାକୁ ରାଜ୍ୟ ସରକାରଙ୍କ ସାହାଯ୍ୟରେ ପ୍ରସ୍ତୁତ କରାଯାଉଛି ।

ମୋର ଆୟୁଷ ମନ୍ତ୍ରଣାଳୟକୁ ବିଶେଷ ଭାବେ ଅନୁରୋଧ ରହିବ ଯେ ଭିନ୍ନ-ଭିନ୍ନ ମନ୍ତ୍ରଣାଳୟ ଏବଂ ବିଭାଗଙ୍କ ସହିତ ଏ ବିଷୟରେ ଯୋଗାଯୋଗ କରିଚାଲନ୍ତୁ । ମେଡିକାଲ ପର୍ଯ୍ୟଟନକୁ ଆମେ ଦେଶର ପ୍ରତ୍ୟେକ ଅଞ୍ଚଳକୁ ନେଇଯିବା, ବିଶେଷ ଭାବେ ଉତ୍ତର-ପୂର୍ବାଞ୍ଚଳରେ ଏଥିପାଇଁ ଅନେକ ସମ୍ଭାବନା ରହିଛି ।

ସାଥୀଗଣ,

ଏ ସମସ୍ତ ପ୍ରୟାସ ଯେତେବେଳେ ଆମେ ସାମୁହିକ ଭାବେ କରିବା ତ ଆମର ପାରମ୍ପରିକ ଚିକିତ୍ସା ପଦ୍ଧତି ଦ୍ୱାରା ଏକବିଂଶ ଶତାବ୍ଦୀର ଭାରତ, ନୂତନ ଭାରତ ସୁସ୍ଥ ମଧ୍ୟ ହେବ ଏବଂ ସମୃଦ୍ଧି ମଧ୍ୟ ଆସିବ । ଶେଷରେ ଆଉ ଥରେ ପୁଣି ସମସ୍ତ ପୁରସ୍କାର ବିଜେତାଙ୍କୁ ଶୁଭକାମନା ଜଣାଉଛି ।

ଆପଣ ଦେଶ ଏବଂ ଦୁନିଆକୁ ଫିଟ୍ ରଖିବା ଦିଗରେ ଏହିଭଳି ଭାବେ କାମ କରିଚାଲନ୍ତୁ, ଏହି କାମନା ସହିତ ଆପଣମାନଙ୍କୁ ବହୁତ-ବହୁତ କୃତଜ୍ଞତା ଜ୍ଞାପନ କରୁଛି ।

ଧନ୍ୟବାଦ!

**************