ପିଏମଇଣ୍ଡିଆ

ରେଳବାଇ କ୍ଷେତ୍ରରେ ବୈଷୟିକ ସହାୟତା ଲାଗି ଗତ 31 ଜାନୁଆରୀ, 2017ରେ ଭାରତୀୟ ରେଳବାଇ ଏବଂ ଇଟାଲୀର ଫେରୋଭି ଡେଲୋ ଷ୍ଟାଟୋ ଇଟାଲୀଆନୋ ଏସପିଏ ସହିତ ଏକ ବୁଝାମଣାପତ୍ର (ଏମଓୟୁ) ସ୍ୱାକ୍ଷରିତ ହୋଇଥିଲା । ଯାହାକୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ବସିଥିବା କେନ୍ଦ୍ର କ୍ୟାବିନେଟ୍ ବୈଠକରେ ଅନୁମୋଦନ ମିଳିଛି ।

ଏହି ଏମ୍ଓୟୁ କାର୍ଯ୍ୟକାରୀ ହେବା ଦ୍ୱାରା ସୁରକ୍ଷା, କୁଶଳତା ଏବଂ ସ୍ଥିରତାକୁ ପ୍ରୋତ୍ସାହନ ଦେବା ଲାଗି ରେଳବାଇ କ୍ଷେତ୍ରରେ ଦେଖାଦେଇଥିବା ସଦ୍ୟ କ୍ରମୋନ୍ନତି ଏବଂ ଜ୍ଞାନର ଆଦାନପ୍ରଦାନ ଲାଗି ଭାରତୀୟ ରେଳବାଇକୁ ଭିତ୍ତିଭୂମି ସହଯୋଗ ଯୋଗାଇଦେବ । ଏହାଦ୍ୱାରା ସୂଚନା ଆଦାନପ୍ରଦାନ, ବିଶେଷଜ୍ଞଙ୍କ ବୈଠକ, ସେମିନାର, ବୈଷୟିକ ଗସ୍ତ ଏବଂ ମିଳିତ ଭାବେ ନିଆଯାଇଥିବା ସହଯୋଗ ନିଷ୍ପତ୍ତି ଏବଂ ପ୍ରକଳ୍ପଗୁଡ଼ିକୁ କାର୍ଯ୍ୟକାରୀ କରାଯାଇପାରିବ ।

ଟ୍ରେନ୍ ଚଳାଚଳକୁ ଅଧିକ ସୁରକ୍ଷିତ କରିବା ଦିଗରେ ଆବଶ୍ୟକ ପଦକ୍ଷେପ ଏବଂ ଭାରତୀୟ ରେଳବାଇର ସୁରକ୍ଷା ଅଡିଟ୍ ଦିଗରେ ଏହା ସହାୟକ ହେବ ।

ସେଫଟି ଇଂଟେଗ୍ରିଟି ଲେଭଲ-4(ଏସଆଇଏଲ୍-4) ପର୍ଯ୍ୟନ୍ତ ଅତ୍ୟାଧୁନିକ ଟେକ୍ନୋଲଜି ଆଧାରିତ ସୁରକ୍ଷା ସରଞ୍ଜାମଗୁଡ଼ିକର ମୂଲ୍ୟାଙ୍କନ ଏବଂ ପ୍ରାମାଣିକତା ପ୍ରଦାନ କରାଯିବା ସମ୍ଭବ ହୋଇପାରିବ । ଅତ୍ୟାଧୁନିକ ସିଗ୍ନାଲ୍ ବ୍ୟବସ୍ଥା ଏବଂ ଟ୍ରେନ୍ ନିୟନ୍ତ୍ରଣ ବ୍ୟବସ୍ଥା ଲାଗି ସୁରକ୍ଷାକୁ ଗୁରୁତ୍ୱ ଦେଇ ତାଲିମ ପରିଚାଳନା ଓ ଉଭୟ ପକ୍ଷ ଦ୍ୱାରା ନିର୍ଦ୍ଧାରିତ କ୍ଷେତ୍ରରେ ସହଯୋଗକୁ ଏହି ଏମ୍ଓୟୁ ପ୍ରୋତ୍ସାହିତ କରିବ ।

ସୂଚନାଯୋଗ୍ୟ ଯେ ଫେରୋଭି ଡେଲୋ ଷ୍ଟାଟୋ ଇଟାଲୀଆନୋ ଏସପିଏ ହେଉଛି ଇଟାଲୀର ରେଳବାଇ ପରିଚାଳନା ଏବଂ ଏହି କ୍ଷେତ୍ରରେ ଜଡ଼ିତ ଥିବା ଏକ ଶିଳ୍ପାନୁଷ୍ଠାନ । ଏହା ଇଟାଲୀ ସରକାରଙ୍କ ରାଜସ୍ୱ ମନ୍ତ୍ରଣାଳୟ ଅଧୀନରେ ଥିବା ଏକ ସଂସ୍ଥା ।

ରେଳ ସେବା କ୍ଷେତ୍ରରେ ବିକାଶ ଲକ୍ଷ୍ୟ ନେଇ ବୈଷୟିକ ସହାୟତା ଏବଂ ସହଯୋଗ ଲାଗି ଭାରତ ସରକାରଙ୍କ ରେଳ ମନ୍ତ୍ରଣାଳୟ ବିଭିନ୍ନ ଦେଶର ସରକାର ଏବଂ ଜାତୀୟ ରେଳବାଇ ସହିତ ବୁଝାମଣାପତ୍ର ସ୍ୱାକ୍ଷର କରିଛନ୍ତି ।