ପିଏମଇଣ୍ଡିଆ

ରେଳ ଏବଂ ସଡକ ପରି ପ୍ରମୂଖ ଭିତ୍ତିଭୂମିମୂଳକ କ୍ଷେତ୍ରରେ ବିଭିନ୍ନ ପ୍ରକଳ୍ପ କାର୍ଯ୍ୟର ଅଗ୍ରଗତି ସମ୍ପର୍କରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି (୩୦.୦୫.୨୦୧୬) ସମୀକ୍ଷା କରିଛନ୍ତି ।

ରେଳ କ୍ଷେତ୍ରର ସମୀକ୍ଷା ବେଳେ ୨୦୧୫-୧୬ ବର୍ଷରେ ପୁଞ୍ଜି ବିନିଯୋଗ ୯୩,୦୦୦ କୋଟି ଟଙ୍କାରୁ ଉର୍ଦ୍ଧ୍ଵ ହୋଇଥିବା ଲକ୍ଷ୍ୟ କରାଯାଇଥିଲା ଯାହା ପୂର୍ବ ବର୍ଷ ତୁଳନାରେ ଶତକଡା ୬୫ ଭାଗ ଅଧିକ ଏବଂ ଏପର୍ଯ୍ୟନ୍ତ ସର୍ବାଧିକ । ସେହିପରି ଗୋଟିଏ ବର୍ଷ(୨୦୧୫-୧୬)ରେ ୧୭୮୦ କିଲୋମିଟର ରେଳଲାଇନ୍ ନିର୍ମାଣ ଏବଂ ୧୭୩୦ କିଲୋମିଟର ରେଳଲାଇନ୍ ର ବିଦ୍ୟୁତକରଣ – ଭାରତୀୟ ରେଳ ଇତିହାସରେ ପୂର୍ବରୁ କେବେ ହୋଇନଥିଲା ।

ପ୍ରଧାନମନ୍ତ୍ରୀ ରେଳ ଷ୍ଟେସନଗୁଡିକର ପୁନଃ-ଆଧୁନିକୀରଣ କାର୍ଯ୍ୟକୁ ତ୍ୱରାନ୍ୱିତ କରାଯିବା ଉପରେ ଗୁରୁତ୍ୱ ପ୍ରଦାନ କରି ରେଳବାଇକୁ ଏ ଦିଗରେ ଉଚ୍ଚ ଲକ୍ଷ୍ୟ ରଖିବାକୁ କହିଥିଲେ । ରେଳବାଇର ଭିତ୍ତିଭୂମିକୁ ଉନ୍ନତ କରି ଏହାକୁ ବିଭିନ୍ନ କାର୍ଯ୍ୟରେ ବ୍ୟବହାର କରିବାର ଆବଶ୍ୟକତା ଉପରେ ସେ ଜୋର୍ ଦେଇଥିଲେ । ଗ୍ରମାଂଚଳରେ ରେଳକୁ କୌଶଳ ବିକାଶ କାର୍ଯ୍ୟକ୍ରମରେ ନିୟୋଜିତ କରାଯାଇପାରିବା କଥା ଦୋହରାଇ ଶ୍ରୀ ମୋଦୀ ଏହା ରେଳବାଇର ଅଣ-ଭଡା ରାଜସ୍ୱ ବୃଦ୍ଧି କରିବ ବୋଲି କହିଥିଲେ ।

ସଡକ କ୍ଷେତ୍ରରେ ୨୦୧୫-୧୬ରେ ୬୦୦୦ କିଲୋମିଟରରୁ ଉର୍ଦ୍ଧ୍ଵ ଜାତୀୟ ରାଜମାର୍ଗ କାର୍ଯ୍ୟ ସମ୍ପୂର୍ଣ୍ଣ ହୋଇଥିବା ବେଳେ ସେହି ସମୟ ମଧ୍ୟରେ ୧୦,୦୯୮ କିଲୋମିଟର ସଡକ ନିର୍ମାଣ ପାଇଁ ଚୁକ୍ତି ହୋଇସାରିଛି ବୋଲି ପ୍ରଧାନମନ୍ତ୍ରୀଙ୍କୁ ସୂଚନା ଦିଆଯାଇଥିଲା ।

ଦେଶର ବିଭିନ୍ନ ଅଂଚଳରେ ସଡକ ନିର୍ମାଣ ବିକାଶ କ୍ଷେତ୍ରରେ ବିଭିନ୍ନ ପ୍ରତିରୂପର ଅନୁଧ୍ୟାନ ସହ ଶ୍ରେଷ୍ଠ କାର୍ଯ୍ୟପଦ୍ଧତି ଅନୁସରଣ ଉପରେ ପ୍ରଧାନମନ୍ତ୍ରୀ ଗୁରୁତ୍ୱ ଦେଇଥିଲେ, ଯାହା ଫଳରେ ରାଜମାର୍ଗ ନିର୍ମାଣ କ୍ଷେତ୍ରରେ ଅଧିକ ମାତ୍ରାରେ ଘରୋଇ ପୁଞ୍ଜିନିବେଶ ହୋଇପାରିବ ।

ବିପଜ୍ଜନକ ମାର୍ଗରୁ ଅବରୋଧ ଦୂର କରିବା ଏବଂ ଟୋଲ୍ ଆଦାୟ ପାଇଁ ନବୀନତମ ଜ୍ଞାନକୌଶଳର ବ୍ୟବହାର ଉପରେ ମଧ୍ୟ ପ୍ରଧାନମନ୍ତ୍ରୀ ଗୁରୁତ୍ୱ ଦେଇଥିଲେ ।