ପିଏମଇଣ୍ଡିଆ

ରେଳବାଇ କର୍ମଚାରୀମାନଙ୍କ ପାଇଁ କେନ୍ଦ୍ର ସରକାର 78 ଦିନର ଦରମା ସହ ସମାନ ଉତ୍ପାଦନ ଭିତ୍ତିକ ବୋନସ ଘୋଷଣା କରିଛନ୍ତି । ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର ମନ୍ତ୍ରୀମଣ୍ଡଳ ବୈଠକରେ ଏହି ନିଷ୍ପତ୍ତି ନିଆଯାଇଛି । ଏହି ବୋନସ 2016-17 ଆର୍ଥିକ ବର୍ଷ ନିମନ୍ତେ ସମସ୍ତ ରେଳବାଇ ଅଣଗେଜେଟେଡ କର୍ମଚାରୀମାନଙ୍କୁ ପ୍ରଦାନ କରାଯିବ । ତେବେ ଏଥିରେ ରେଳବାଇ ପୁଲିସ (ଆରପିଏଫ) ଏବଂ ଆରପିଏସଏଫକୁ ସାମିଲ କରାଯାଇ ନାହିଁ । କେନ୍ଦ୍ର ସରକାରଙ୍କ ଏହି ନିଷ୍ପତ୍ତି ଫଳରେ ରେଳବାଇର 12.30 ଲକ୍ଷ ଅଣଗେଜେଟେଡ କର୍ମଚାରୀ ଉପକୃତ ହେବେ । ଦଶହରା ପୂଜା ଛୁଟି ପୂର୍ବରୁ ରେଳ କର୍ମଚାରୀମାନଙ୍କୁ ଏହି ବୋନସ ପ୍ରଦାନ କରାଯିବ ।

ରେଳବାଇର ପରିଚାଳନା ଓ ବିଭିନ୍ନ ନିମ୍ନ ଓ ମଧ୍ୟମ ବର୍ଗରେ କାର୍ଯ୍ୟ କରୁଥିବା କର୍ମଚାରୀମାନଙ୍କ କାର୍ଯ୍ୟ ଦକ୍ଷତା ବୃଦ୍ଧି କରିବା ଲାଗି ପ୍ରୋତ୍ସାହନ ସ୍ୱରୂପ ଏହି 78 ଦିନର ଉତ୍ପାଦନ ଭିତ୍ତିକ ବୋନସ ପ୍ରଦାନ କରାଯାଉଛି । ପ୍ରକାରାନ୍ତରେ ଏହା ରେଳ ସେବା, ଗତି ଓ ନିରାପତ୍ତାକୁ ସୁନିଶ୍ଚିତ କରିବା ଦିଗରେ ସହାୟକ ହେବ । ସର୍ବାଧିକ ଜନମଙ୍ଗଳ ନୀତିକୁ ଆଧାର କରି କାର୍ଯ୍ୟ କରୁଥିବା ଭାରତୀୟ ରେଳବାଇର କର୍ମଚାରୀମାନଙ୍କ କାର୍ଯ୍ୟ ଦକ୍ଷତା ଏବଂ ଦାୟୀତ୍ୱବୋଧ ବୃଦ୍ଧି କରିବା କ୍ଷେତ୍ରରେ ବୋନସ ବ୍ୟବସ୍ଥା ବିଶେଷ ଭାବେ ସହାୟକ ହେବ ।

78 ଦିନର ଉତ୍ପାଦନ ଭିତ୍ତିକ ବୋନସ ପ୍ରଦାନ ହେତୁ କେନ୍ଦ୍ର ସରକାରଙ୍କ ଉପରେ ଅତିରିକ୍ତ 2245.45 କୋଟି ଟଙ୍କାର ଆର୍ଥିକ ବୋଝ ପଡିବ । ବୋନସ ପ୍ରଦାନ ଲାଗି ସର୍ବନିମ୍ନ ଦରମା ସିଲିଂ 7,000 ଟଙ୍କା ରଖାଯାଇଥିବା ବେଳେ ସର୍ବାଧିକ 17,951 ଟଙ୍କା ପର୍ଯ୍ୟନ୍ତ ବୋନସ ପ୍ରଦାନର ବ୍ୟବସ୍ଥା ରହିଛି ।

********