ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି (12.01.2017) ଭିଡିଓ କନଫେରେନ୍ସିଙ୍ଗ ଜରିଆରେ ହରିୟାଣାର ରୋହତକଠାରେ ରାଷ୍ଟ୍ରୀୟ ଯୁବ ମହୋତ୍ସବର ଉଦ୍ଘାଟନୀ ସମାବେଶକୁ ସମ୍ବୋଧିତ କରିଛନ୍ତି ।

ପ୍ରଧାନମନ୍ତ୍ରୀ କହିଛନ୍ତି ଯେ, ଜଣେ ଯୁବ ବୟସରେ କିଭଳି ସଫଳତାର ଚରମ ସୋପାନରେ ପହଞ୍ଚି ପାରିବ ତାହା ସ୍ଵାମୀ ବିବେକାନନ୍ଦନଙ୍କ ଜୀବନୀରୁ ପ୍ରତିଫଳିତ ହେଉଛି । ଆଜି ଯୁବଗୋଷ୍ଠୀ ଯେଉଁ କର୍ତ୍ତବ୍ୟ ସମ୍ପାଦନ କରୁଛନ୍ତି ତାହା ରାଷ୍ଟ୍ରର ଭବିଷ୍ୟତକୁ ପ୍ରଭାବିତ କରିବ ବୋଲି ସେ କହିଥିଲେ ।

ଚଳିତ ବର୍ଷ ଯୁବ ମହୋତ୍ସବର ବିଷୟବସ୍ତୁ – “ୟୁଥ ଫର ଡିଜିଟାଲ ଇଣ୍ଡିଆ” ରଖାଯାଇଥିବାରୁ ସେ ସନ୍ତୋଷ ପ୍ରକାଶ କରିଥିଲେ । ସାଧାରଣ ଜନତାଙ୍କୁ ନଗଦମୁକ୍ତ କାରବାର ସମ୍ପର୍କରେ ଅଧିକରୁ ଅଧିକ ସଚେତନ କରାଇବାକୁ ସେ ଯୁବଗୋଷ୍ଠୀକୁ ପରାମର୍ଶ ଦେଇଥିଲେ । ପ୍ରଧାନମନ୍ତ୍ରୀ କହିଥିଲେ ଯେ, କଳାଧନ ଓ ଭ୍ରଷ୍ଟାଚାର ଦେଶର ପ୍ରଗତିରେ ବାଧକ ସାଜୁଛି ।

ପ୍ରଧାନମନ୍ତ୍ରୀ କହିଥିଲେ ଯେ, ପ୍ରଯୁକ୍ତି କୌଶଳର ବିଶାଳ ପ୍ରଭାବ ଯୋଗୁଁ ସମୟ ଓ ପରିସ୍ଥିତିରେ ପରିବର୍ତ୍ତନ ଘଟୁଛି । ତେଣୁ ସମୟର ଆହ୍ଵାନ ହେଉଛି – ସୃଜନଶୀଳତା, ସମଷ୍ଟିକରଣ ଏବଂ ସଂଯୋଗୀକରଣ । ପ୍ରଧାନମନ୍ତ୍ରୀ କହିଥିଲେ ଭ୍ରଷ୍ଟାଚାର ବିରୁଦ୍ଧରେ ଲଢେଇ ପାଇଁ ଯୁବଗୋଷ୍ଠୀ ପକ୍ଷରୁ ଯେଉଁ ସହଯୋଗ ଓ ସମର୍ଥନ ମିଳୁଛି ସେଥିରୁ ସେ ଦୃଢ ନିଶ୍ଚିତ ଯେ ଦେଶରେ ଏକ ସକାରାତ୍ମକ ପରିବର୍ତ୍ତନ ସମ୍ଭବପର ।