ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଲକ୍ଷ୍ନୌଠାରେ ରାମଲୀଳା ମଇଦାନରେ ଅନୁଷ୍ଠିତ ପବିତ୍ର ଦଶହରା ଉତ୍ସବରେ ଯୋଗ ଦେଇ ନିଜକୁ ଭାଗ୍ୟବାନ ମନେ କରିଛନ୍ତି । ଏଥିସହିତ ବିଜୟ ଦଶମୀ ଉପଲକ୍ଷେ ସେଠାରେ ଉପସ୍ଥିତ ରହିଥିବା ଜନସାଧାରଣ ଏବଂ ଦେଶବାସୀଙ୍କୁ ସେ ଶୁଭେଚ୍ଛା ଜ୍ଞାପନ କରିଛନ୍ତି ।

ପ୍ରଧାନମନ୍ତ୍ରୀ କହିଥିଲେ ଯେ ରାମଲୀଳା ଦେଶର ଏକ ପ୍ରାଚୀନ ପରମ୍ପରା । ଏହା ସତ୍ୟ ଉପରେ ଅସତ୍ୟର ବିଜୟ ଭାବେ ବିବେଚନା କରାଯାଏ । ଏହି ଉପଲକ୍ଷେ ପ୍ରତିବର୍ଷ ରାବଣ ପୋଡି ଉତ୍ସବ ଅନୁଷ୍ଠିତ ହୋଇଥାଏ । ଏହି ଉତ୍ସବ ପାଳନ କରିବାର ମୁଖ୍ୟ ଉଦ୍ଦେଶ୍ୟ ହେଉଛି – ବ୍ୟକ୍ତି, ସମାଜ ଓ ରାଷ୍ଟ୍ର ମଧ୍ୟରେ ଲୁକ୍କାୟିତ ମନ୍ଦ ଭାବନା ତଥା ଶକ୍ତିକୁ ପରିହାର କରି ଏକ ଆଦର୍ଶ ସମାଜ ଗଠନ କରିବା ଏବଂ ଏଥିଲାଗି ଆଜିର ପବିତ୍ର ଦିବସରେ ଅଙ୍ଗୀକାରବଦ୍ଧ ହେବା । ଏହାଦ୍ଵାରା ଆମ ଦେଶରେ ଏକ ମହାନ ପରମ୍ପରା ଓ ଆଦର୍ଶ ସୃଷ୍ଟି ହେଇପାରିବ ।

ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଥିଲେ ଯେ ଆତଙ୍କବାଦ ସମଗ୍ର ମାନବ ସମାଜର ଶତ୍ରୁ । ମର୍ଯ୍ୟାଦାପୁରୁଷ ଶ୍ରୀରାମ ହେଉଛନ୍ତି ତ୍ୟାଗ, ନିଷ୍ଠା, ଆଦର୍ଶ ଓ ସମର୍ପଣର ମୂର୍ତ୍ତିମନ୍ତ ପ୍ରତୀକ । ସେ କହିଥିଲେ ଯେ ରାମାୟଣରେ ଜଟାୟୁ ଚରିତ୍ରର ବର୍ଣ୍ଣନା ରହିଛି । ଜଟାୟୁ ସେତେବେଳେ ରାବଣର ଆତଙ୍କବାଦ ବିରୁଦ୍ଧରେ ନିର୍ଭୀକ ଭାବେ ସଂଗ୍ରାମ କରି ଅନାବିଳ ତ୍ୟାଗ ଓ ଅଦମ୍ୟ ସାହସର ପରିଚୟ ଓ ପରମ୍ପରା ସୃଷ୍ଟି କରିପାରିଥିଲା । ଆଜି ଆମେ 125 କୋଟି ଭାରତୀୟ ସେହି ପଥକୁ ଆପଣେଇ ଆତଙ୍କବାଦ ବିରୁଦ୍ଧରେ ସଂଗ୍ରାମ କରିବାର ବେଳ ଆସିଛି । ଆମେ ପ୍ରତ୍ୟେକ ବ୍ୟକ୍ତି ଯଦି ସଦାସର୍ବଦା ଜାଗ୍ରତ ରହିବା ତା’ହେଲେ ଆତଙ୍କବାଦୀଙ୍କ ମନ୍ଦ ଉଦ୍ଦେଶ୍ୟକୁ ପଣ୍ଡ କରିଦେଇପାରିବା । ବିଶ୍ଵବାସୀ ଏବେ ମିଳିତ ଭାବେ ମାନବିକତାକୁ ଆଧାର କରି ଆତଙ୍କବାଦ ବିରୁଦ୍ଧରେ ସ୍ଵର ଉତ୍ତୋଳନ କରିବା ଆରମ୍ଭ କରିଦେଇଛନ୍ତି । ପ୍ରଧାନମନ୍ତ୍ରୀ କହିଥିଲେ ଯେ ଯେଉଁମାନେ ଆତଙ୍କବାଦ ପାଇଁ ଅଭୟାରଣ୍ୟ ସୃଷ୍ଟି କରିଛନ୍ତି ସେମାନେ ମଧ୍ୟ ଆଉ ବର୍ତ୍ତି ଯାଇ ପାରିବେ ନାହିଁ ।

ସେ କହିଥିଲେ ଯେ ଆଜି ମଧ୍ୟ ଆନ୍ତର୍ଜାତିକ କନ୍ୟା ଦିବସ ପାଳନ କରାଯାଉଛି । ମାତୃ ଗର୍ଭରେ କନ୍ୟାଭୃଣ ହତ୍ୟା ଭଳି ଘୃଣ୍ୟ କାର୍ଯ୍ୟକୁ ପ୍ରତ୍ୟେକ ବ୍ୟକ୍ତି ପରିହାର କରିବା ଲାଗି ସଙ୍କଳ୍ପବଦ୍ଧ ହେବାକୁ ପ୍ରଧାନମନ୍ତ୍ରୀ ଏହି ଅବସରରେ ଆହ୍ଵାନ ଦେଇଥିଲେ ।