ପିଏମଇଣ୍ଡିଆ

ଶ୍ରୀ ଲକ୍ଷ୍ମଣରାଓ ଇନାମଦାରଙ୍କ ଜନ୍ମ ଶତବାର୍ଷିକୀ ଅବସରରେ ନୂଆଦିଲ୍ଲୀଠାରେ ଅନୁଷ୍ଠିତ ସହକାର ସମ୍ମିଳନୀରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଯୋଗଦାନ କରିଛନ୍ତି ।

ସମ୍ମିଳନୀକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଲେ ଯେ, ଆମ ଦେଶ ଏକ “ବହୁରତ୍ନା ବସୁନ୍ଧରା” ଯେଉଁଠାରେ କି ବିଭିନ୍ନ ବ୍ୟକ୍ତିଙ୍କର ବିଭିନ୍ନ ସ୍ଥାନରେ ଭିନ୍ନ ଭିନ୍ନ ସମୟରେ ମହାନ ଅବଦାନ ରହିଛି । ସେ କହିଲେ ଯେ ସେମାନଙ୍କ ଭିତରୁ କେତେଜଣ ପ୍ରସିଦ୍ଧି ଲାଭ କରିଛନ୍ତି ଓ ଗଣମାଧ୍ୟମରେ ସେମାନଙ୍କ ବିଷୟରେ ଚର୍ଚ୍ଚା ହୋଇଛି । କେତେଜଣ ମଧ୍ୟ ସେମାନଙ୍କ ମୂଲ୍ୟବାନ ଅବଦାନ ସତ୍ତ୍ୱେ ବିଶେଷ ପରିଚିତି ଲାଭ କରି ପାରିନାହାନ୍ତି । ପ୍ରଧାନମନ୍ତ୍ରୀ କହିଲେ ଯେ ଓକିଲ ସାହେବ-ଲକ୍ଷ୍ମଣରାଓ ଇନାମଦାର ହେଉଛନ୍ତି ଜଣେ ସେହିପରି ବ୍ୟକ୍ତି । ପ୍ରଧାନମନ୍ତ୍ରୀ ଗୁରୁତ୍ୱାରୋପ କରି କହିଲେ ଯେ ସମବାୟ ଆନ୍ଦୋଳନର ପ୍ରଥମ ନୀତି ହେଉଛି ନିଜେ ଅଜଣା ଅଶୁଣା ରହିଲେ ବି ସମସ୍ତଙ୍କୁ ଏକାଠି କରିବା । ଶ୍ରୀ ଇନାମଦାର ଏହି ନୀତିକୁ ଗ୍ରହଣ କରିଥିଲେ ।

ପ୍ରଧାନମନ୍ତ୍ରୀ 2022 ସୁଦ୍ଧା କୃଷକମାନଙ୍କ ଆୟ ଦୁଇଗୁଣା କରିବା ଓ ଗ୍ରାମୀଣ ଏବଂ ସହରାଞ୍ଚଳ ବିକାଶରେ ସନ୍ତୁଳନ ହାସଲ କରିବା ଆଦି ଲକ୍ଷ୍ୟ ସମ୍ବନ୍ଧରେ ପ୍ରକାଶ କରିଥିଲେ । ସେ କହିଲେ ଯେ ଏହି ଲକ୍ଷ୍ୟ ପୁରଣ କ୍ଷେତ୍ରରେ ସମବାୟ ଆନ୍ଦୋଳନ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବ ।

ଏବେ ମଧ୍ୟ ଗ୍ରାମାଂଚଳରେ ବହୁଭାବେ ଅକ୍ଷୁର୍ଣ୍ଣ ରହିଥିବା ସମବାୟ ଆନ୍ଦୋଳନର ଆଭିମୁଖ୍ୟକୁ ସଂରକ୍ଷିତ କରି ରଖିବା ସମ୍ବନ୍ଧରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ଶ୍ରୀ ଇନାମଦାରଙ୍କ ମନ୍ତ୍ର “ବିନା ସଂସ୍କାର, ନାହିଁ ସହକାର”କୁ ସେ ପୁଣିଥରେ ଦୋହରାଇଥିଲେ ।

ପ୍ରଧାନମନ୍ତ୍ରୀ କହିଲେ ଯେ ସମ୍ପ୍ରତି କୃଷକ ଖୁଚୁରାରେ କ୍ରୟ କରେ ଓ ପାଇକାରୀ/ହୋଲସେଲରେ ବିକ୍ରୟ କରେ । ସେ କହିଲେ ଯେ ଏହି ପ୍ରକ୍ରିୟା ବିପରୀତ ହେବା ଆବଶ୍ୟକ । ଏହାଫଳରେ ମଝି ବ୍ୟକ୍ତିଙ୍କୁ ହଟାଯାଇ କୃଷକର ଆୟକୁ ଦ୍ୱିଗୁଣିତ କରାଯାଇ ପାରିବ । ଗୋପାଳନ ସମବାୟର ଉଦାହରଣ ଦେଇ ସେ କହିଲେ ଯେ ଜନସାଧାରଣଙ୍କ ସମସ୍ୟାର ସମାଧାନ କରିପାରିବାର କ୍ଷମତା ସମବାୟ ଆନ୍ଦୋଳନ ପାଖରେ ରହିଛି । ସେ ମଧ୍ୟ କହିଲେ ଯେ ଭାରତୀୟ ସମାଜ ସହିତ ସମବାୟ ଆନ୍ଦୋଳନର ବ୍ୟବସ୍ଥା ମେଳ ଖାଇଥାଏ । ପ୍ରଧାନମନ୍ତ୍ରୀ କହିଲେ ଯେ ଲିମ୍ବ ପ୍ରଲେପିତ ୟୁରିଆ, ମହୁମାଛି ପାଳନ ଏବଂ ସାମୁଦ୍ରିକ ଘାସ ଚାଷ କ୍ଷେତ୍ରରେ ସମବାୟ ଆନ୍ଦୋଳନ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବ ।

ଏହି ଅବସରରେ ପ୍ରଧାନମନ୍ତ୍ରୀ ଦୁଇଟି ପୁସ୍ତକର ଲୋକାର୍ପଣ କରିଥିଲେ । ସେଥିମଧ୍ୟରୁ ଗୋଟିଏ ଶ୍ରୀ ଲକ୍ଷ୍ମଣରାଓ ଇନାମଦ୍ୱାରାଙ୍କ ଉପରେ ପର୍ଯ୍ୟବସିତ ଓ ଏହାର ଶୀର୍ଷକ ହେଉଛି-“ଭାରତୀୟ ସମବାୟ ଆନ୍ଦୋଳନର 9ଟି ରତ୍ନ” । ପ୍ରଧାନମନ୍ତ୍ରୀ ଏହି ଅବସରରେ ସମବାୟ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ପୁରସ୍କାର ପ୍ରଦାନ କରିଥିଲେ ।

**********