ପିଏମଇଣ୍ଡିଆ

ଆଜି ଲଦାଖରେ କେତେକ ପ୍ରମୁଖ ବିକାଶ ପ୍ରକଳ୍ପର ଉଦ୍‌ଘାଟନ କରାଯାଇଛି; ଏହି ପ୍ରକଳ୍ପଗୁଡ଼ିକ ଯାତାୟାତକୁ ସୁଗମ କରିବା ସହ ବିଦ୍ୟୁତ୍‌ ଭିତ୍ତିଭୂମିକୁ ସୁଦୃଢ଼ କରିବ, ଜଳ ଉପଲବ୍ଧତା ବୃଦ୍ଧି କରିବ ଏବଂ ଆମର ପ୍ରାଚୀନ ଐତିହ୍ୟର ସଂରକ୍ଷଣକୁ ନୂଆ ଗତି ଦେବ:ପ୍ରଧାନମନ୍ତ୍ରୀ

ଲଦାଖର ନୂତନ ପିଢ଼ି ଉପରେ ଆମର ବିଶେଷ ଧ୍ୟାନ ରହିଛି; ଏଠାକାର ଯୁବପିଢ଼ି ଗୁଣାତ୍ମକ ଶିକ୍ଷା ପାଇବା ସହ ନୂଆ ପ୍ରଯୁକ୍ତିବିଦ୍ୟା ଶିଖିବାର ସୁଯୋଗ ପାଇବା ଉଚିତ, ଏଥିପାଇଁ ସେମାନଙ୍କୁ ଅନ୍ୟ ସହର ଉପରେ ନିର୍ଭର କରିବା ଉଚିତ ନୁହେଁ; ଏହି ଉଦ୍ଦେଶ୍ୟରେ ଲେହରେ ଏକ ବୃହତ୍‌ ଉତ୍କର୍ଷ କେନ୍ଦ୍ର ନିର୍ମାଣ କରାଯାଉଛି:ପ୍ରଧାନମନ୍ତ୍ରୀ

ନୂଆ କ୍ରୀଡ଼ା ନୀତି ମାଧ୍ୟମରେ ଲଦାଖର କ୍ରୀଡ଼ା ପ୍ରତିଭାଙ୍କୁ ବିକଶିତ କରିବା ପାଇଁ ଉଦ୍ୟମ କରାଯାଉଛି; ସ୍ଥାନୀୟ ଯୁବପିଢ଼ିଙ୍କୁ ଉନ୍ନତ ପ୍ରଶିକ୍ଷଣ ଓ ସୁବିଧା ଯୋଗାଇ ଦେବାକୁ ଆମେ ପ୍ରୟାସ କରୁଛୁ, ଯାହାଦ୍ୱାରା ସେମାନେ ଜାତୀୟ ଓ ଅନ୍ତର୍ଜାତୀୟ ସ୍ତରରେ ନୂଆ ଶିଖର ଛୁଇଁପାରିବେ:ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଭିଡିଓ କନ୍‌ଫରେନ୍ସିଂ ଜରିଆରେ ଲଦାଖରେ ପ୍ରାୟ ୩,୩୫୦ କୋଟି ଟଙ୍କା ବ୍ୟୟରେ ନିର୍ମିତ ପାଞ୍ଚଟି ପ୍ରମୁଖ ବିକାଶମୂଳକ ପ୍ରକଳ୍ପର ଉଦ୍‌ଘାଟନ ଏବଂ ଲୋକାର୍ପଣ କରିଛନ୍ତି। ଭର୍ଚୁଆଲ୍‌ ମାଧ୍ୟମରେ ଏହି କାର୍ଯ୍ୟକ୍ରମରେ ଯୋଗଦେଇ ସେ ଏହି ଅଞ୍ଚଳର ବିକାଶରେ ଏକ ନୂଆ ଅଧ୍ୟାୟ ଯୋଡ଼ିଛନ୍ତି। ଏସବୁ ପ୍ରକଳ୍ପ ଯାତାୟାତକୁ ସୁଗମ କରିବ, ବିଦ୍ୟୁତ୍‌ ଓ ଜଳ ଉପଲବ୍ଧତାରେ ଉନ୍ନତି ଆଣିବ ଏବଂ ପ୍ରାଚୀନ ଐତିହ୍ୟର ସଂରକ୍ଷଣ କରିବ। ଜାନ୍‌ସ୍କାରରେ ତୁଷାରପାତ ମଧ୍ୟରେ ଲୋକମାନେ ତ୍ରିରଙ୍ଗା ଉଡ଼ାଇ ଉତ୍ସାହର ସହ ଏହି କାର୍ଯ୍ୟକ୍ରମକୁ ପାଳନ କରୁଥିବା ଦୃଶ୍ୟକୁ ପ୍ରଧାନମନ୍ତ୍ରୀ ପ୍ରଶଂସା କରିଥିଲେ। ଏହି କଷ୍ଟକର ପ୍ରକଳ୍ପଗୁଡ଼ିକୁ ସଫଳତାର ସହ ସମ୍ପାଦନ କରିଥିବା ଯନ୍ତ୍ରୀ, ଶ୍ରମିକ, ସ୍ଥାନୀୟ କର୍ମଚାରୀ ଏବଂ ସୀମା ସଡ଼କ ସଂଗଠନ (ବିଆର୍‌ଓ)ର କର୍ମଚାରୀମାନଙ୍କୁ ସେ କୃତଜ୍ଞତା ଜଣାଇଥିଲେ। “ଏହି ପ୍ରକଳ୍ପଗୁଡ଼ିକ ପାଇଁ ମୁଁ ଲଦାଖର ସମସ୍ତ ଜନସାଧାରଣଙ୍କୁ ହୃଦୟରୁ ଅଭିନନ୍ଦନ ଜଣାଉଛି,” ବୋଲି ଶ୍ରୀ ମୋଦୀ କହିଥିଲେ।

ଲେହଠାରେ କୁଶୋକ ବକୁଲା ରିନ୍‌ପୋଚେ ବିମାନବନ୍ଦରର ଟର୍ମିନାଲ୍‌ ପାଇଁ ପୂର୍ବରୁ ଶିଳାନ୍ୟାସ କରିଥିବା କଥା ମନେ ପକାଇ ପ୍ରଧାନମନ୍ତ୍ରୀ ଏହାର ଉଦ୍‌ଘାଟନ କରି ଖୁସି ବ୍ୟକ୍ତ କରିଥିଲେ। ୬୫୦ କୋଟି ଟଙ୍କା ବ୍ୟୟରେ ନିର୍ମିତ ଏହି ଟର୍ମିନାଲ୍‌ ବିମାନ ଚଳାଚଳ କ୍ଷମତାକୁ ତିନିଗୁଣ ବୃଦ୍ଧି କରିବ। ଏହାଦ୍ୱାରା ବାର୍ଷିକ ଯାତ୍ରୀ ପରିଚାଳନା କ୍ଷମତା ୧୦ ଲକ୍ଷରୁ ୩୫ ଲକ୍ଷକୁ ବୃଦ୍ଧି ପାଇବ। ପ୍ରତିକୂଳ ଜଳବାୟୁକୁ ଦୃଷ୍ଟିରେ ରଖି ଏହି ଟର୍ମିନାଲ୍‌ରେ ସୌରଶକ୍ତି ସହ ଭୂତାପୀୟ ଶକ୍ତିର ବ୍ୟବହାର କରାଯାଇଛି। ଏ ଦୃଷ୍ଟିରୁ ଏହା ଭାରତର ପ୍ରଥମ ଏଭଳି ଟର୍ମିନାଲ୍‌ର ମାନ୍ୟତା ପାଇଛି। ଏହା ସ୍ଥାନୀୟ ପର୍ଯ୍ୟଟନକୁ ପ୍ରୋତ୍ସାହିତ କରିବା ସହ ପରିବେଶ ସୁରକ୍ଷା ଓ ଭିତ୍ତିଭୂମି ବିକାଶ ମଧ୍ୟରେ ସମନ୍ୱୟ ରକ୍ଷା କରିବ। “ସ୍ଥାନୀୟ ପରିବେଶର ସମ୍ପୂର୍ଣ୍ଣ ସୁରକ୍ଷା କରି ଲଦାଖରେ ଆଧୁନିକ ଭିତ୍ତିଭୂମିର ବିକାଶ କରିବା ଆମର ଉଦ୍ୟମ,” ବୋଲି ଶ୍ରୀ ମୋଦୀ କହିଥିଲେ।

ଆଞ୍ଚଳିକ ସଂଯୋଗର ରଣନୈତିକ ଓ ଆର୍ଥିକ ଗୁରୁତ୍ୱ ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ ୨,୫୦୦ କୋଟି ଟଙ୍କା ବ୍ୟୟରେ ନିର୍ମିତ ନିମୁ–ପଦୁମ–ଦାର୍ଚା ସଡ଼କକୁ ଦେଶବାସୀଙ୍କ ଉଦ୍ଦେଶ୍ୟରେ ଲୋକାର୍ପଣ କରିଥିଲେ। ଏହି ସଡ଼କ ଯୋଗୁଁ ଯାତ୍ରା ସମୟ ୧୨ ଘଣ୍ଟାରୁ ହ୍ରାସ ପାଇ ମାତ୍ର ୩ ଘଣ୍ଟା ହେବ। ଏହା କେବଳ ଯାତ୍ରୀଙ୍କ ସମୟ ବଞ୍ଚାଇବ ନାହିଁ, ବରଂ ସ୍ଥାନୀୟ ବାଣିଜ୍ୟ ଓ ବ୍ୟବସାୟକୁ ମଧ୍ୟ ଗୁରୁତ୍ୱପୂର୍ଣ୍ଣ ପ୍ରୋତ୍ସାହନ ଯୋଗାଇବ। “ଏହି ସଡ଼କ ବାଣିଜ୍ୟ ଓ ବ୍ୟବସାୟ କ୍ଷେତ୍ରରେ ମଧ୍ୟ ବହୁତ ସହାୟକ ହେବ,” ବୋଲି ପ୍ରଧାନମନ୍ତ୍ରୀ କହିଥିଲେ।

ଶ୍ରୀନଗର-ଲେହ ବିଦ୍ୟୁତ୍‌ ପରିବହନ ଲାଇନ୍‌ର ପୂର୍ବ ଉଦ୍‌ଘାଟନ ପରେ ପ୍ରଧାନମନ୍ତ୍ରୀ ହାନୁ ଜଳବିଦ୍ୟୁତ୍‌ ପ୍ରକଳ୍ପ ଏବଂ ଏହା ସହ ଜଡ଼ିତ ବିଦ୍ୟୁତ୍‌ ପରିବହନ ବ୍ୟବସ୍ଥାକୁ ଲୋକାର୍ପଣ କରିଥିଲେ। ଏଥିସହ ପୁଗା ଉପତ୍ୟକାରେ ଚାଲିଥିବା ଆଧୁନିକ ବିଦ୍ୟୁତ୍‌ ଉତ୍ପାଦନ ପ୍ରକଳ୍ପଗୁଡ଼ିକ ସମ୍ପର୍କରେ ମଧ୍ୟ ସେ ଉଲ୍ଲେଖ କରିଥିଲେ। ନିର୍ଭରଯୋଗ୍ୟ ବିଦ୍ୟୁତ୍‌ ଯୋଗାଣ ଗ୍ରାମାଞ୍ଚଳର ଜୀବନଯାପନରେ ପରିବର୍ତ୍ତନ ଆଣିଥାଏ। ଏହା ଘରକୁ ଆଲୋକିତ କରିବା ସହ ପିଲାମାନଙ୍କ ଶିକ୍ଷା, ସ୍ୱାସ୍ଥ୍ୟସେବା ଏବଂ କ୍ଷୁଦ୍ର ଉଦ୍ୟୋଗଗୁଡ଼ିକର ବିକାଶରେ ସହାୟକ ହୁଏ। “ଏହାଦ୍ୱାରା ପ୍ରତ୍ୟେକ କ୍ଷେତ୍ର ଉପକୃତ ହେବ,” ବୋଲି ଶ୍ରୀ ମୋଦୀ କହିଥିଲେ।

ଉଚ୍ଚ ପାର୍ବତ୍ୟ ଅଞ୍ଚଳରେ କୃଷିକୁ ସୁଦୃଢ଼ କରିବା ଏବଂ ଜଳ ସୁରକ୍ଷା ସୁନିଶ୍ଚିତ କରିବା ଉପରେ ଗୁରୁତ୍ୱ ଦେଇ ପ୍ରଧାନମନ୍ତ୍ରୀ ‘ଅମୃତ ହିମ ସରୋବର’ ପ୍ରକଳ୍ପ ଅଧୀନରେ ନିର୍ମିତ ୪୦ଟି ଜଳାଶୟକୁ ସ୍ଥାନୀୟ ଜନସାଧାରଣଙ୍କ ଉଦ୍ଦେଶ୍ୟରେ ଲୋକାର୍ପଣ କରିଥିଲେ। କୃଷି କାର୍ଯ୍ୟର ଗୁରୁତ୍ୱପୂର୍ଣ୍ଣ ସମୟରେ ଏହି ଜଳାଶୟଗୁଡ଼ିକ କୃଷିଭିତ୍ତିକ ଅର୍ଥନୀତିକୁ ସହାୟତା ଯୋଗାଇବା ପାଇଁ ନିର୍ମାଣ କରାଯାଇଛି। ସେ କହିଥିଲେ “ଆବଶ୍ୟକ ସମୟରେ କୃଷକମାନଙ୍କୁ ଜଳସେଚନ ପାଇଁ ଏହି ଜଳାଶୟଗୁଡ଼ିକ ଜଳ ଯୋଗାଇବାରେ ସହାୟକ ହେବ” ।

୨୦୧୯ରେ ଲଦାଖ କେନ୍ଦ୍ରଶାସିତ ଅଞ୍ଚଳ ହେବା ପରଠାରୁ ସେଠାରେ ହୋଇଥିବା ବ୍ୟାପକ ଭିତ୍ତିଭୂମି ବିକାଶ ସମ୍ପର୍କରେ ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ। ସେ କହିଥିଲେ ଯେ, ଲଦାଖରେ ସଡ଼କ ନେଟୱର୍କ ୧,୮୦୦ କିଲୋମିଟରରୁ ବୃଦ୍ଧି ପାଇ ୪,୦୦୦ କିଲୋମିଟରରୁ ଅଧିକ ହୋଇଛି। ବଡ଼ ସେତୁ ସଂଖ୍ୟା ୧୯ରୁ ବୃଦ୍ଧି ପାଇ ପ୍ରାୟ ୭୫ରେ ପହଞ୍ଚିଛି। ହେଲିପ୍ୟାଡ୍‌ ସଂଖ୍ୟା ୭ରୁ ବୃଦ୍ଧି ପାଇ ୪୦ରୁ ଅଧିକ ହୋଇଛି। ସେହିପରି ଟ୍ୟାପ୍‌ ଯୋଗେ ଜଳ ଯୋଗାଣ ସୁବିଧା ପାଉଥିବା ପରିବାର ସଂଖ୍ୟା ୩.୫ ପ୍ରତିଶତରୁ ବୃଦ୍ଧି ପାଇ ପ୍ରାୟ ୯୯ ପ୍ରତିଶତରେ ପହଞ୍ଚିଛି। ହସ୍ପିଟାଲ୍‌ରେ ଶଯ୍ୟା ସଂଖ୍ୟା ଦ୍ୱିଗୁଣିତ ହୋଇଛି। ଏଥିସହ ନିର୍ମାଣାଧୀନ ଜୋଜିଲା ସୁଡ଼ଙ୍ଗ ସବୁ ଋତୁରେ ଜାତୀୟ ସଡ଼କ ସଂଯୋଗ ସୁନିଶ୍ଚିତ କରିବ ବୋଲି ସେ କହିଥିଲେ। “ଆଜି କେନ୍ଦ୍ର ସରକାରଙ୍କ ପାଇଁ ଲଦାଖର ବିକାଶ ସର୍ବୋଚ୍ଚ ପ୍ରାଥମିକତା,” ବୋଲି ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଥିଲେ।

ଆଞ୍ଚଳିକ ସମୃଦ୍ଧିର ନୂଆ ସମ୍ଭାବନା ସୃଷ୍ଟି କରିବା ପାଇଁ ଲକ୍ଷ୍ୟଭିତ୍ତିକ ପଦକ୍ଷେପ ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ ଲଦାଖରେ ଶୀତକାଳୀନ ପର୍ଯ୍ୟଟନ ଓ ଦୁଃସାହସିକ ପର୍ଯ୍ୟଟନକୁ ସକ୍ରିୟ ଭାବେ ପ୍ରୋତ୍ସାହିତ କରାଯାଉଥିବା କହିଥିଲେ। ଏଥିସହ ‘ଭାଇବ୍ରାଣ୍ଟ ଭିଲେଜେସ୍‌’ କାର୍ଯ୍ୟକ୍ରମ ଅଧୀନରେ ୪୦ରୁ ଅଧିକ ସୀମାନ୍ତ ଗ୍ରାମର ଉନ୍ନତିକରଣ କରାଯାଉଛି। ଏହାଦ୍ୱାରା ତୃଣମୂଳ ସ୍ତରରେ ଆର୍ଥିକ କାର୍ଯ୍ୟକଳାପକୁ ଗତି ମିଳିବ। “ଏହା ଦୂରଦୂରାନ୍ତରେ ଥିବା ଗ୍ରାମଗୁଡ଼ିକରେ ମଧ୍ୟ ନିଯୁକ୍ତି ସୁଯୋଗ ସୃଷ୍ଟି କରୁଛି,” ଶ୍ରୀ ମୋଦୀ କହିଥିଲେ।

ପର୍ଯ୍ୟଟନ ଓ ଆଧୁନିକ କୃଷି କ୍ଷେତ୍ରରେ ଦ୍ରୁତ ଅଭିବୃଦ୍ଧି ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ, ଲଦାଖରେ ସ୍ଥାନୀୟ ହୋମ୍‌ଷ୍ଟେ ସଂଖ୍ୟା ପ୍ରାୟ ୧୫୦ରୁ ବୃଦ୍ଧି ପାଇ ୩,୦୦୦ରେ ପହଞ୍ଚିଛି। ସେହିପରି ସୁରକ୍ଷିତ ଚାଷ ପଦ୍ଧତିକୁ ନିରନ୍ତର ପ୍ରୋତ୍ସାହନ ଦିଆଯାଉଥିବାରୁ ସମଗ୍ର ଅଞ୍ଚଳରେ ୧୧,୦୦୦ଟି ଗ୍ରିନ୍‌ହାଉସ୍‌ କାର୍ଯ୍ୟକ୍ଷମ ହୋଇଛି। “ଏହାଦ୍ୱାରା କୃଷକଙ୍କ ଆୟ ବୃଦ୍ଧି ପାଇଁ ନୂଆ ସମ୍ଭାବନା ସୃଷ୍ଟି ହୋଇଛି,” ଶ୍ରୀ ମୋଦୀ କହିଥିଲେ।

ଦୀର୍ଘଦିନ ଧରି ରହିଥିବା ନ୍ୟାୟିକ ସୁବିଧା ସମ୍ପର୍କିତ ଆଞ୍ଚଳିକ ଦାବି ଉପରେ ଆଲୋକପାତ କରି ପ୍ରଧାନମନ୍ତ୍ରୀ ଘୋଷଣା କରିଥିଲେ ଯେ, ଚଳିତ ବର୍ଷ ଅଗଷ୍ଟ ମାସରେ ଲଦାଖରେ ହାଇକୋର୍ଟର ଏକ ଖଣ୍ଡପୀଠ ପ୍ରତିଷ୍ଠା ପାଇଁ ସରକାର ଆନୁଷ୍ଠାନିକ ଅନୁମୋଦନ ଦେଇଛନ୍ତି। ଏହି ଗୁରୁତ୍ୱପୂର୍ଣ୍ଣ ଆବଶ୍ୟକତା ପୂରଣ ହେବା ଦ୍ୱାରା ପ୍ରଶାସନିକ କାର୍ଯ୍ୟ ସହ ନାଗରିକଙ୍କ ପାଇଁ ଆଇନଗତ ସେବା ପାଇବା ପ୍ରକ୍ରିୟା ମଧ୍ୟ ସହଜ ହେବ। “ଏହାଦ୍ୱାରା ପ୍ରଶାସନ ସହ ନ୍ୟାୟ ବ୍ୟବସ୍ଥା ମଧ୍ୟ ଲୋକଙ୍କ ପାଖରେ ସହଜରେ ପହଞ୍ଚିପାରିବ,” ଶ୍ରୀ ମୋଦୀ କହିଥିଲେ।

ହୋଟେଲ, ରେସ୍ତୋରାଁ, ହୋମ୍‌ଷ୍ଟେ ଏବଂ ସ୍ଥାନୀୟ ହସ୍ତଶିଳ୍ପ କ୍ଷେତ୍ରରେ ଆଧୁନିକ ବ୍ୟବସାୟର ବିକାଶ ପାଇଁ ଡିଜିଟାଲ୍‌ ସଂଯୋଗର ଗୁରୁତ୍ୱ ଉପରେ ଆଲୋକପାତ କରି ପ୍ରଧାନମନ୍ତ୍ରୀ ଲଦାଖର ଦୁର୍ଗମ ଅଞ୍ଚଳଗୁଡ଼ିକରେ ଭାରତନେଟ୍‌ ଏବଂ ଉଚ୍ଚଗତି ଇଣ୍ଟରନେଟ୍‌ ସେବାର ସମ୍ପ୍ରସାରଣ ସମ୍ପର୍କରେ କହିଥିଲେ। ଇ-ଶାସନର ସୁବିଧା, ଯୁବପିଢ଼ିଙ୍କ ପାଇଁ ଅନ୍‌ଲାଇନ୍‌ ଶିକ୍ଷା ଏବଂ ସ୍ଥାନୀୟ ଉଦ୍ୟୋଗୀଙ୍କୁ ବିଶ୍ୱ ବଜାର ସହ ଯୋଡ଼ିବା ପାଇଁ ନିରନ୍ତର ଉଦ୍ୟମ କରାଯାଉଛି। ଶ୍ରୀ ମୋଦୀ କହିଥିଲେ “ଆଜି ଅନ୍‌ଲାଇନ୍‌ ବ୍ୟବସାୟ ଆୟର ନୂଆ ସମ୍ଭାବନା ଖୋଲୁଛି” ।

ଯୁବପିଢ଼ିଙ୍କୁ ଉଚ୍ଚଶିକ୍ଷା ପାଇଁ ଅନ୍ୟ ସହରକୁ ଯିବାକୁ ନ ପଡ଼ିବା ଏବଂ ସେମାନଙ୍କୁ ଶିକ୍ଷା କ୍ଷେତ୍ରରେ ସଶକ୍ତ କରିବା ଉପରେ ଗୁରୁତ୍ୱ ଦେଇ ପ୍ରଧାନମନ୍ତ୍ରୀ ଲେହଠାରେ ଏକ ବୃହତ୍‌ ଉତ୍କର୍ଷ କେନ୍ଦ୍ର ନିର୍ମାଣ ସମ୍ପର୍କରେ ଉଲ୍ଲେଖ କରିଥିଲେ। ଏଥିସହ ଆଇଆଇଟି ଜମ୍ମୁ ଓ ଆଇଆଇଏମ୍‌ ଜମ୍ମୁର ଉପଗ୍ରହ କ୍ୟାମ୍ପସ୍‌ ପ୍ରତିଷ୍ଠା ପାଇଁ ପ୍ରସ୍ତାବ ଉପରେ ମଧ୍ୟ ଅଗ୍ରଗତି ହେଉଛି। ଏହି ପ୍ରମୁଖ ଶିକ୍ଷାନୁଷ୍ଠାନଗୁଡ଼ିକ ଲଦାଖର ଛାତ୍ରଛାତ୍ରୀଙ୍କୁ ନିଜ ଅଞ୍ଚଳରେ ରହି ଉନ୍ନତ ଗବେଷଣା ଓ ଆଧୁନିକ ପ୍ରଯୁକ୍ତିବିଦ୍ୟା ସମ୍ପର୍କିତ ଦକ୍ଷତା ହାସଲ କରିବାର ସୁଯୋଗ ଦେବ। “ଲଦାଖର ଯୁବପିଢ଼ି ନିଜ ଅଞ୍ଚଳରେ ହିଁ ଉଚ୍ଚଶିକ୍ଷା, ଗବେଷଣା ଓ ନୂଆ ଦକ୍ଷତା ହାସଲ ପାଇଁ ଉନ୍ନତ ସୁଯୋଗ ପାଇପାରିବେ,” ବୋଲି ଶ୍ରୀ ମୋଦୀ କହିଥିଲେ।

ବରଫ ହକି, ଶୀତକାଳୀନ କ୍ରୀଡ଼ା ଏବଂ ପର୍ବତାରୋହଣ କ୍ଷେତ୍ରରେ ଲଦାଖର ଯୁବପିଢ଼ି ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିବାରୁ ପ୍ରଧାନମନ୍ତ୍ରୀ ସେମାନଙ୍କର ପ୍ରତିଭାକୁ ସ୍ୱୀକୃତି ଦେଇଥିଲେ। ଆଞ୍ଚଳିକ କ୍ରୀଡ଼ା ପ୍ରତିଭାର ବିକାଶ ପାଇଁ ଲଦାଖର ନୂଆ କ୍ରୀଡ଼ା ନୀତି କାର୍ଯ୍ୟକାରୀ ହେବାକୁ ସେ ସ୍ୱାଗତ କରିଥିଲେ। ସ୍ଥାନୀୟ କ୍ରୀଡ଼ାବିତ୍‌ମାନେ ବିଶ୍ୱସ୍ତରରେ ଉତ୍କର୍ଷ ହାସଲ କରିବା ପାଇଁ ସେମାନଙ୍କୁ ବିଶ୍ୱସ୍ତରୀୟ ପ୍ରଶିକ୍ଷଣ ସୁବିଧା ଯୋଗାଇ ଦେବାକୁ ସରକାର ପ୍ରତିଶ୍ରୁତିବଦ୍ଧ ବୋଲି ସେ କହିଥିଲେ। “ସ୍ଥାନୀୟ ଯୁବପିଢ଼ିଙ୍କୁ ଉନ୍ନତ ପ୍ରଶିକ୍ଷଣ ଓ ସୁବିଧା ଯୋଗାଇ ଦେବାକୁ ଆମେ ପ୍ରୟାସ କରୁଛୁ, ଯାହାଦ୍ୱାରା ସେମାନେ ଜାତୀୟ ଓ ଅନ୍ତର୍ଜାତୀୟ ସ୍ତରରେ ନୂଆ ଶିଖର ଛୁଇଁପାରିବେ,” ପ୍ରଧାନମନ୍ତ୍ରୀ କହିଥିଲେ।

ସ୍ଥାନୀୟ କାରିଗର ଓ କୃଷକମାନଙ୍କ ଅସାଧାରଣ କାରିଗରୀ ଦକ୍ଷତାର ପ୍ରଶଂସା କରି ପ୍ରଧାନମନ୍ତ୍ରୀ କହିଥିଲେ ଯେ, ସେ ଲଦାଖରେ ପ୍ରସ୍ତୁତ ସାମଗ୍ରୀକୁ ଉପହାର ଭାବେ ଦେବାକୁ ପସନ୍ଦ କରନ୍ତି। ସେ ଜର୍ମାନୀର ଚାନ୍‌ସେଲର, ସ୍ୱିଡେନର ପ୍ରଧାନମନ୍ତ୍ରୀ ଏବଂ କିର୍ଗିଜସ୍ତାନର ରାଷ୍ଟ୍ରପତିଙ୍କୁ ମଧ୍ୟ ଲଦାଖର ଉତ୍ପାଦ ଉପହାର ଦେଇଥିବା କହିଥିଲେ। ସେ ସି ବକ୍‌ଥର୍ଣ୍ଣ ଫଳ, ହସ୍ତଶିଳ୍ପ, ଜିଆଇ ମାନ୍ୟତାପ୍ରାପ୍ତ ଖୁରମା, ଉଚ୍ଚ ପାର୍ବତ୍ୟ ଅଞ୍ଚଳରେ ବାଣିଜ୍ୟିକ ଫୁଲଚାଷ ଏବଂ ଚାଙ୍ଗ୍‌ପା ସମ୍ପ୍ରଦାୟ ଦ୍ୱାରା ପ୍ରସ୍ତୁତ ପାରମ୍ପରିକ ପଶ୍ମିନାର ବ୍ୟାପକ ବାଣିଜ୍ୟିକ ସମ୍ଭାବନା ଉପରେ ମଧ୍ୟ ଆଲୋକପାତ କରିଥିଲେ। ପଶ୍ମିନାର ବିଶ୍ୱସ୍ତରୀୟ ପରିଚୟକୁ ସୁଦୃଢ଼ କରିବା ସହ ଆଞ୍ଚଳିକ ଉତ୍ପାଦଗୁଡ଼ିକର ବଜାର ପରିଚୟ ଓ ବ୍ରାଣ୍ଡିଂକୁ ସମ୍ପ୍ରସାରିତ କରିବା ପାଇଁ ସରକାର ସକ୍ରିୟ ଭାବେ ଉଦ୍ୟମ କରୁଥିବା ସେ କହିଥିଲେ। “ଏଠାକାର ଉତ୍ପାଦଗୁଡ଼ିକ ଯେପରି ନୂଆ ବଜାର ପାଇବେ, ଉନ୍ନତ ବ୍ରାଣ୍ଡିଂ ହେବ ଏବଂ ଏହାର ଲାଭ ସିଧାସଳଖ ଉତ୍ପାଦକଙ୍କ ପାଖରେ ପହଞ୍ଚିବ, ସେଥିପାଇଁ ଆମେ ଉଦ୍ୟମ କରୁଛୁ,” ଶ୍ରୀ ମୋଦୀ କହିଥିଲେ।

ପ୍ରାଚୀନ ବୌଦ୍ଧବିହାର, ବୌଦ୍ଧ ପରମ୍ପରା ଏବଂ ପୂଜ୍ୟ କୁଶୋକ ବକୁଲା ରିନ୍‌ପୋଚେଙ୍କ ଦ୍ୱାରା ଅନୁପ୍ରାଣିତ ପର୍ବପର୍ବାଣୀ ସହ ଜଡ଼ିତ ଅମୂଲ୍ୟ ସାଂସ୍କୃତିକ ଐତିହ୍ୟର ସଂରକ୍ଷଣ ଉପରେ ଗୁରୁତ୍ୱ ଦେଇ ପ୍ରଧାନମନ୍ତ୍ରୀ ଲେହଠାରେ ଭାରତର ପ୍ରଥମ ଶିଳାଚିତ୍ର ସଂରକ୍ଷଣ ପାର୍କର ଉଦ୍‌ଘାଟନ କରିଥିଲେ। ଐତିହାସିକ ଶିଳାଚିତ୍ରଗୁଡ଼ିକର ସୁରକ୍ଷା ପାଇଁ ଏହି ପାର୍କ ପ୍ରତିଷ୍ଠା କରାଯାଇଛି। ଏହି ଐତିହ୍ୟର ସଂରକ୍ଷଣ ଦ୍ୱାରା ଭବିଷ୍ୟତ ପିଢ଼ି ସହ ବିଶ୍ୱର ବିଭିନ୍ନ ଦେଶରୁ ଆସୁଥିବା ପର୍ଯ୍ୟଟକମାନେ ମଧ୍ୟ ଲଦାଖର ପ୍ରାଚୀନ ଇତିହାସ ସହ ଗଭୀର ଭାବେ ଯୋଡ଼ି ହୋଇପାରିବେ ବୋଲି ସେ କହିଥିଲେ। “ଦେଶ ଓ ବିଶ୍ୱର ବିଭିନ୍ନ ସ୍ଥାନରୁ ଆସୁଥିବା ଲୋକମାନେ ମଧ୍ୟ ଲଦାଖର ସମୃଦ୍ଧ ଇତିହାସ ସହ ପରିଚିତ ହୋଇପାରିବେ,” ବୋଲି ଶ୍ରୀ ମୋଦୀ କହିଥିଲେ।

ନିଜର ଅଭିଭାଷଣ ଶେଷ କରିବା ସହ ପ୍ରଧାନମନ୍ତ୍ରୀ ଲଦାଖର ବିକାଶ ଯାତ୍ରାକୁ ନେଇ ଗଭୀର ଆଶା ବ୍ୟକ୍ତ କରିଥିଲେ। ସାମୂହିକ ପ୍ରୟାସ ଦ୍ୱାରା ଏହି ଅଞ୍ଚଳକୁ ବିକାଶର ନୂଆ ଶିଖରରେ ପହଞ୍ଚାଇବା ସମ୍ଭବ ବୋଲି ସେ ଆସ୍ଥା ପ୍ରକଟ କରିଥିଲେ। ନୂତନ ଭିତ୍ତିଭୂମି ପ୍ରକଳ୍ପଗୁଡ଼ିକ ପାଇଁ ସେ ଲଦାଖବାସୀଙ୍କୁ ପୁଣିଥରେ ଅଭିନନ୍ଦନ ଜଣାଇବା ସହ ପାରମ୍ପରିକ ଶୁଭେଚ୍ଛା ଜଣାଇଥିଲେ। “ଆମେ ସମସ୍ତେ ମିଶି ଲଦାଖକୁ ବିକାଶର ନୂଆ ଶିଖରରେ ପହଞ୍ଚାଇବା,” ବୋଲି ପ୍ରଧାନମନ୍ତ୍ରୀ କହିଥିଲେ।

TKM