ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ସଂସଦର ସମ୍ମିଳନୀ କକ୍ଷରେ ସମ୍ବିଧାନ ଦିବସ ପାଳନ ନିମନ୍ତେ ଅନୁଷ୍ଠିତ ଏକ ଉତ୍ସବରେ ଯୋଗଦାନ କରିଛନ୍ତି । ଏହି ଅବସରରେ ଦୁଇଟି ପୁସ୍ତକ- ‘ଭାରତୀୟ ସମ୍ବିଧାନର ସଂଶୋଧିତ ସଂସ୍କରଣ’ ଓ ‘ସମ୍ବିଧାନ ନିର୍ମାଣ’ର ଉନ୍ମୋଚନ କରାଯାଇଥିଲା ।

ଏହି ଉତ୍ସବରେ ନିଜର ବକ୍ତବ୍ୟ ରଖି ପ୍ରଧାନମନ୍ତ୍ରୀ କହିଥିଲେ, ୨୦୧୫ରୁ ନଭେମ୍ବର ୨୬କୁ ସମ୍ବିଧାନ ଦିବସ ରୂପେ ପାଳନ କରାଯାଇଆସୁଛି । ସେ କହିଥିଲେ ଯେ ପିଢୀ ପରେ ପୀଢ଼ି ସମ୍ବିଧାନ ସହିତ ଭଲ ଭାବେ ପରିଚିତ ହେବା ଉଚିତ ଓ ସାମ୍ପ୍ରତିକ ପ୍ରସଙ୍ଗରେ ଏହାର ଉପଯୋଗ କରିବା ଉଚିତ । ପ୍ରଧାନମନ୍ତ୍ରୀ ମତ ଦେଇଥିଲେ ଯେ, ଯେତେବେଳେ ସମ୍ବିଧାନ କଥା ପଡ଼େ, ସେତେବେଳେ ଆମେ ବାବାସାହେବ ଆମ୍ବେଦକରଙ୍କୁ ମନେ ପକାଇଥାଉ । ଆମେ ସମ୍ବିଧାନର ତତ୍ତ୍ୱ ସହ ଜଡ଼ିତ ହେବା ଏବଂ ଆମର ଅଧିକାର ଓ କର୍ତ୍ତବ୍ୟବୋଧ ମଧ୍ୟରେ ସନ୍ତୁଳନ ରକ୍ଷା କରିବା ଆବଶ୍ୟକ । ସମ୍ବିଧାନର ଗୁରୁତ୍ୱ ସମ୍ବନ୍ଧରେ ଆଲୋକପାତ କରି ପ୍ରଧାନମନ୍ତ୍ରୀ କହିଛନ୍ତି, ନଭେମ୍ବର ୨୬ ବ୍ୟତିରେକ ଜାନୁଆରୀ ୨୬ (ଜନରାଜ୍ୟ ଦିବସ)କୁ ପାଳନ କରାଯାଇ ପାରିନଥାନ୍ତା । ଦୁର୍ନୀତି ଓ କଳାଧନ ବିପକ୍ଷ ସଂଗ୍ରାମରେ ସାଧାରଣ ନାଗରିକ ଆଜି ଜଣେ ସୈନିକ ସାଜିଛି । ଅର୍ଥ ବିନିମୟ ପାଇଁ ଯଥା ସମ୍ଭବ ଡିଜିଟାଲ ପଦ୍ଧତିର ବ୍ୟବହାର ପାଇଁ ସେ ଜନସାଧାରଣଙ୍କୁ ଉତ୍ସାହିତ କରିଥିଲେ । ଏହାଫଳରେ ସ୍ୱଚ୍ଛତା ବୃଦ୍ଧି ପାଇବ ବୋଲି ସେ ମତ ଦେଇଥିଲେ । ସେ ନିଶ୍ଚିତ କରିଥିଲେ ଯେ, ପ୍ରତ୍ୟେକ ବ୍ୟକ୍ତି ତାର ଅର୍ଥ ବ୍ୟୟ କରିବା ନେଇ ଅଧିକାର ରହିଛି ଏବଂ କେହି ତାଠାରୁ ତାର ଅର୍ଥକୁ କାଢି ନେଇପାରିବେ ନାହିଁ ବୋଲି ପ୍ରଧାନମନ୍ତ୍ରୀ କହିଥିଲେ ।