ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ସୁରଟରେ ଅତ୍ୟାଧୁନିକ ସୁବିଧା ସମ୍ପନ୍ନ ସୁପର ସ୍ପେଶାଲିଟି ହସ୍ପିଟାଲ ରସିଲାବେନ ସେୱାନ୍ତିଲାଲ ଶାହା ଭେନସ ହସ୍ପିଟାଲର ଉଦଘାଟନ କରିଛନ୍ତି । ଏହି ହସ୍ପିଟାଲରେ ରୋଗୀଙ୍କୁ ଆୟୁଷ୍ମାନ ଭାରତ ଯୋଜନା ଅଧୀନରେ ସ୍ୱାସ୍ଥ୍ୟ ସେବା ମିଳିପାରିବା ନେଇ ସେ ସନ୍ତୋଷ ବ୍ୟକ୍ତ କରିଥିଲେ ।

ଉପସ୍ଥିତ ଜନସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ ଏକ ସୁସ୍ଥ ଭାରତ ପାଇଁ ତାଙ୍କ ସରକାର କାର୍ଯ୍ୟ କରୁଛି । ସରକାରଙ୍କ ଦ୍ୱାରା ନିଆଯାଇଥିବା ଗରିବଙ୍କ ଅନୁକୂଳ ପଦକ୍ଷେପ ବିଷୟରେ ସେ ଉଲ୍ଲେଖ କରିଥିଲେ । ସେ କହିଥିଲେ ଯେ ମାତୃ ମୃତ୍ୟୁ ହାର ହ୍ରାସ ଦିଗରେ ପ୍ରଧାନମନ୍ତ୍ରୀ ସୁରକ୍ଷିତ ମାତୃତ୍ୱ ଅଭିଯାନ ଏବଂ ମିଶନ ଇନ୍ଦ୍ରଧନୁଶ ଭଳି ଯୋଜନା ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଛି ।

ଲାଲକିଲ୍ଲାରୁ ପ୍ରଧାନମନ୍ତ୍ରୀ ଘୋଷଣା କରିଥିବା ସ୍ୱଚ୍ଛତା ଅଭିଯାନକୁ ସମାଲୋଚନା କରୁଥିବା ଲୋକମାନଙ୍କୁ କଡ଼ା ଜବାବ ଦେଇ ସେ କହିଥିଲେ ଯେ ବ୍ୟାପକ ସ୍ୱଚ୍ଛତା ଅଭିଯାନ ଯୋଗୁ ଆଜି ଜନସଂଖ୍ୟାର 97% ଲୋକ ସ୍ୱଚ୍ଛ ଶୌଚାଳୟ ସୁବିଧା ପାଇପାରୁଛନ୍ତି । ପ୍ରଧାନମନ୍ତ୍ରୀ ମଧ୍ୟ ନିରାକରଣଯୋଗ୍ୟ ସ୍ୱାସ୍ଥ୍ୟ ସେବା ଉପରେ ଜୋର ଦେଇଥିଲେ ଏବଂ ସେ କହିଥିଲେ ସ୍ୱାସ୍ଥ୍ୟ କଲ୍ୟାଣ ପାଇଁ “ଯୋଗ”ର ଭୂମିକାକୁ ସାରା ବିଶ୍ୱ ଏବେ ଗ୍ରହଣ କରିଛି ।

ପ୍ରଧାନମନ୍ତ୍ରୀ କହିଥିଲେ ଯେ ଆୟୁଷ୍ମାନ ଭାରତ ଯୋଜନା ଏକ ନୂଆ ପରିଦୃଶ୍ୟ ସୃଷ୍ଟି କରିବ ଯାହା ସୁସ୍ଥ ଭାରତର ନିର୍ମାଣରେ ସହାୟକ ହେବ । 2-3 ଟାୟାର ସହରରେ ନୂଆ ହସ୍ପିଟାଲ ପ୍ରତିଷ୍ଠାରେ ଏହି ଯୋଜନା ସହାୟକ ହୋଇପାରିବ, ଯାହା ସ୍ୱାସ୍ଥ୍ୟ ସେବା କ୍ଷେତ୍ରରେ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବ ବୋଲି ସେ ଉଲ୍ଲେଖ କରିଥିଲେ । ସେ କହିଥିଲେ ଯେ ଲୋକମାନଙ୍କ ପାଇଁ ଏବେ ଅଧିକ ମାତ୍ରାରେ ଜେନେରିକ ମେଡ଼ିସିନ ଉପଲବ୍ଧ ହୋଇପାରୁଛି ଯାହା କେବଳ ଚିକିତ୍ସା ଖର୍ଚ୍ଚ ହ୍ରାସ କରୁନାହିଁ ବରଂ ଅନେକ ମୂଲ୍ୟବାନ ଜୀବନ ରକ୍ଷା କରିପାରୁଛି ।
ପ୍ରଥମେ ଆର୍ଥିକ ଦୁର୍ବଳ ବର୍ଗଙ୍କ ପାଇଁ 10% ସଂରକ୍ଷଣ ବ୍ୟବସ୍ଥାର କାର୍ଯ୍ୟାନ୍ୱୟନ ପାଇଁ ପ୍ରଧାନମନ୍ତ୍ରୀ ଗୁଜରାଟ ସରକାରଙ୍କୁ ଅଭିନନ୍ଦନ ଜଣାଇଥିଲେ ।

***