ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦିଲ୍ଲୀସ୍ଥିତ ବାସଭବନରେ ଆଜି (10.09.2016) ସୋମନାଥ ଟ୍ରଷ୍ଟ ବୋର୍ଡର ବୈଠକ ଅନୁଷ୍ଠିତ ହୋଇଯାଇଛି । ଟ୍ରଷ୍ଟ ବୋର୍ଡର ଅଧ୍ୟକ୍ଷ ଶ୍ରୀ କେଶୁଭାଇ ପଟେଲ ଅସୁସ୍ଥତା ଯୋଗୁଁ ଯୋଗ ଦେଇପାରିନଥିବାରୁ ଶ୍ରୀ ଏଲ.କେ.ଆଡଭାନୀ ବୈଠକରେ ଅଧ୍ୟକ୍ଷତା କରିଥିଲେ । ଏଥିରେ ପ୍ରଧାନମନ୍ତ୍ରୀ ଶ୍ରୀ ମୋଦୀଙ୍କ ସମେତ ଅନ୍ୟତମ ଟ୍ରଷ୍ଟି ଶ୍ରୀ ହର୍ଷବର୍ଦ୍ଧନ ନିଓତିୟା, ଶ୍ରୀ ପି.କେ.ଲାହେରି ଏବଂ ଶ୍ରୀ ଜେ.ଡି.ପରମାର ଅଂଶଗ୍ରହଣ କରିଥିଲେ ।

ବୋର୍ଡ ପକ୍ଷରୁ ନୂତନ ଭାବେ ନିଯୁକ୍ତ ଟ୍ରଷ୍ଟି ଶ୍ରୀ ଅମିତଭାଇ ଶାହଙ୍କୁ ବୈଠକରେ ସ୍ଵାଗତ କରାଯାଇଥିଲା ।

ବୈଠକରେ ଅଂଶଗ୍ରହଣ କରି ପ୍ରଧାନମନ୍ତ୍ରୀ ସୋମନାଥ ମନ୍ଦିରକୁ ଏକ ଐତିହ୍ୟ ତୀର୍ଥସ୍ଥଳ ଓ ପର୍ଯ୍ୟଟନ କେନ୍ଦ୍ରରେ ପରିଣତ କରିବା ଉପରେ ଗୁରୁତ୍ଵ ଦେଇଥିଲେ । ସୋମନାଥ ମନ୍ଦିରକୁ ଅଧିକରୁ ଅଧିକ ଭକ୍ତଙ୍କୁ ଆକୃଷ୍ଟ କରିବା ଦିଗରେ ହତାକୁ ନିଆଯାଇଥିବା ପ୍ରକଳ୍ପଗୁଡିକର ଅଗ୍ରଗତି ନେଇ ଟ୍ରଷ୍ଟ ବୋର୍ଡ ବୈଠକରେ ସମୀକ୍ଷା କରାଯାଇଥିଲା । ମନ୍ଦିରକୁ ଏକ କୋଟି ଯାତ୍ରୀ ଆସିବାର ସମ୍ଭାବନାକୁ ଦୃଷ୍ଟି ଦେଇ ଆଧୁନିକ ଭିତ୍ତିଭୂମି ନିର୍ମାଣ ଓ ଏହି ଐତିହ୍ୟସ୍ଥଳୀର ସାମଗ୍ରିକ ବିକାଶ ଉପରେ ଟ୍ରଷ୍ଟିମାନେ ଗୁରୁତ୍ଵ ଦେଇଥିଲେ । ଏବେ ସାମାଜିକ ଗଣମାଧ୍ୟମରେ ସୋମନାଥ ମନ୍ଦିରର 20 ଲକ୍ଷରୁ ଅଧିକ ଅନୁଗାମୀ ଭକ୍ତ ରହିଛନ୍ତି ।

ପ୍ରଧାନମନ୍ତ୍ରୀ ପ୍ରତ୍ନତାତ୍ତ୍ୱିକ ଉତଖନନ ମାଧ୍ୟମରେ ହଜିଯାଇଥିବା ଐତିହାସିକ ସଂପର୍କକୁ ପ୍ରତିଷ୍ଠା କରିବା ଲାଗି ପରାମର୍ଶ ଦେଇଥିଲେ । ଭବିଷ୍ୟତ ପର୍ଯ୍ୟଟନ ଯୋଜନାରେ ହାଇ-ଟେକ ମେରାଇନ ଓ ଭରଚୁଆଲ ରିଆଲିଟି ସୋ କୁ ସ୍ଥାନିତ କରିବା ଉପରେ ସେ ଜୋର ଦେଇଥିଲେ । ସେହିପରି ସୋମନାଥ ମନ୍ଦିର ଅଞ୍ଚଳରେ ସିସିଟିଭି ପର୍ଯ୍ୟବେକ୍ଷଣ ନେଟୱାର୍କ ପ୍ରତିଷ୍ଠା କରିବାକୁ ସେ ପ୍ରସ୍ତାବ ଦେଇଥିଲେ ।

ଭାରତ ସରକାରଙ୍କ ସ୍ଵର୍ଣ୍ଣ ମୁଦ୍ରାକରଣ ସ୍କିମ ଅଧୀନରେ ସୋମନାଥ ଟ୍ରଷ୍ଟ ଛଅ କିଲୋଗ୍ରାମ ସୁନା ଜମା ରଖିବାକୁ ବୈଠକରେ ନିଷ୍ପତ୍ତି ନିଆଯାଇଥିଲା ।