ପିଏମଇଣ୍ଡିଆ

 ଛାତ୍ର ସଂସଦ ନିର୍ବାଚନରେ ସ୍ୱଚ୍ଛତା ପ୍ରସଙ୍ଗକୁ ଗୁରୁତ୍ୱ ଦେବା ଲାଗି ପ୍ରଧାନମନ୍ତ୍ରୀଙ୍କ ଆହ୍ୱାନ;

 ବିଶ୍ୱବିଦ୍ୟାଳୟ ପ୍ରତ୍ୟୁତ୍ପନ୍ନମତି ଓ ସୃଜନାତ୍ମକ ଚିନ୍ତାଧାରାର କେନ୍ଦ୍ର ହେଉ;

 ବିଶାଳ ଜନଶକ୍ତି ଯୋଗୁ ବିଶ୍ୱ ଦରବାରରେ ଭାରତର ଗରିମା ବଢିଛି : ପ୍ରଧାନମନ୍ତ୍ରୀ

ସେପ୍ଟେମ୍ବର 11 ତାରିଖ ଅନେକ ମହତ୍ୱ ବହନ କରେ । 1893 ମସିହା ଆଜିର ଦିନରେ ସ୍ନେହ, ପ୍ରେମ, ସମ୍ପ୍ରିତି ଓ ଭାତୃତ୍ୱଭାବର ବାର୍ତ୍ତା ସାରା ବିଶ୍ୱରେ ପ୍ରସାରିତ ହୋଇଥିଲା । 125 ବର୍ଷ ପୂର୍ବେ ମହାନ ତପସ୍ୱୀ ସ୍ୱାମୀ ବିବେକାନନ୍ଦ ଯୁବ ବୟସରେ ବିଶ୍ୱକୁ ଏକାତ୍ମବାଦର ବାର୍ତ୍ତା ଦେଇ ବିଶ୍ୱବାସୀଙ୍କ ହୃଦୟ ଜୟ କରିଥିଲେ । ଆଜି ନୂଆଦିଲ୍ଲୀର ବିଜ୍ଞାନ ଭବନଠାରେ ଏକ ଭବ୍ୟ ସମାବେଶରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏହା କହିଛନ୍ତି ।

ସ୍ୱାମୀ ବିବେକାନନ୍ଦଙ୍କ ଚିକାଗୋ ବକ୍ତୃତାର 125 ତମ ବର୍ଷ ପୂର୍ତ୍ତି ଏବଂ ପଣ୍ଡିତ ଦୀନଦୟାଲ ଉପାଧ୍ୟାୟଙ୍କ ଶତବାର୍ଷିକୀ ସମାରୋହ ପାଳନ ପାଇଁ ନୂଆଦିଲ୍ଲୀ ବିଜ୍ଞାନ ଭବନରେ ଏହି ସମାବେଶ ଆୟୋଜିତ ହୋଇଥିଲା ।

ଏଥିରେ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଯେ, ସ୍ୱାମୀ ବିବେକାନନ୍ଦ ଆମ ସମାଜରେ ବସା ବାନ୍ଧିଥିବା କୁସଂସ୍କାର ଓ କୁପ୍ରଥା ବିରୋଧରେ ଦୃଢ଼ ସ୍ୱର ଉତ୍ତୋଳନ କରିଥିଲେ । ସ୍ୱାମୀ ବିବେକାନନ୍ଦ କହିଥିଲେ ଯେ, କେବଳ ପୂଜା ପଦ୍ଧତିରେ ମଣିଷ ପରମାତ୍ମାଙ୍କର ନିକଟବର୍ତ୍ତୀ ହୋଇନଥାଏ । ଜନସେବା ହିଁ ପ୍ରଭୁ ସେବା ।

ସ୍ୱାମୀ ବିବେକାନନ୍ଦ କେବେ ହେଲେ ପ୍ରଚାର ଏବଂ ପ୍ରବଚନରେ ବିଶ୍ୱାସ କରୁନଥିଲେ ବୋଲି ପ୍ରଧାନମନ୍ତ୍ରୀ କହିଛନ୍ତି । ତାଙ୍କ ମତ, ଆଦର୍ଶ ଓ ବାଣୀର ରୂପକୁ ସାକାର କରି ଆଜି ରାମକୃଷ୍ଣ ମିଶନ ଭଳି ଅନୁଷ୍ଠାନ ଗଢ଼ିଉଠିଛି ।

ପ୍ରଧାନମନ୍ତ୍ରୀ କହିଥିଲେ ଭାରତକୁ ସବୁ ଦିଗରୁ ସ୍ୱଚ୍ଛ ରଖିବା ପାଇଁ ଅବିରାମ ଗତିରେ କାର୍ଯ୍ୟ କରୁଥିବା ବ୍ୟକ୍ତି ଓ ଅନୁଷ୍ଠାନ ହିଁ ବନ୍ଦେ ମାତରମ୍ ଭଳି ଉତ୍ସାହ, ଉଦ୍ଦୀପନା ଓ ବୈଶିଷ୍ଟ୍ୟର ପ୍ରକୃତ ପ୍ରତିଫଳନ ।  ଏବେ ବିଶ୍ୱବିଦ୍ୟାଳୟ ଗୁଡିକରେ ହେଉଥିବା ଛାତ୍ର ସଂସଦ ନିର୍ବାଚନରେ ପ୍ରଚାର ଅଭିଯାନ ବେଳେ ଛାତ୍ର ସଂଗଠନଗୁଡିକ ଶିକ୍ଷା ପ୍ରତିଷ୍ଠାନ ପରିସରରେ ସ୍ୱଚ୍ଛତା ରକ୍ଷା ପ୍ରସଙ୍ଗ ଉପରେ  ଗୁରୁତ୍ୱ ଦେବାକୁ ସେ ଆହ୍ୱାନ ଦେଇଥିଲେ । ମହିଳାମାନଙ୍କୁ ସମ୍ମାନ ପ୍ରଦର୍ଶନ କରୁଥିବା ବ୍ୟକ୍ତି ହିଁ ବାସ୍ତବରେ ବିବେକାନନ୍ଦଙ୍କ ସମ୍ବୋଧନ – “ଆମେରିକାର ଭାଇ ଓ ଭଉଣୀମାନେ” ଭଳି ଶବ୍ଦରୁ ଗୌରବ ଅନୁଭବ କରିପାରିବେ ।

ପ୍ରଧାନମନ୍ତ୍ରୀ କହିଥିଲେ ଯେ ସ୍ୱାମୀ ବିବେକାନନ୍ଦ ଏବଂ ଜାମସେଦଜୀ ଟାଟାଙ୍କ ମଧ୍ୟରେ ହୋଇଥିବା ପତ୍ରାଳାପରୁ ସ୍ୱାମୀଜୀ ଭାରତର ସ୍ୱାବଲମ୍ବନଶୀଳତା ପାଇଁ କେତେ ଉଦବିଗ୍ନ ଥିଲେ ତାହା ଜଣାପଡେ । ରାଷ୍ଟ୍ର ଗଠନ ପାଇଁ ଜ୍ଞାନ ସହ କୌଶଳର ସମାନ ଗୁରୁତ୍ୱ ରହିଛି ବୋଲି ସେ କହିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ ବର୍ତ୍ତମାନ ଜନସାଧାରଣ ଏକବିଂଶ ଶତାବ୍ଦୀକୁ ଏସିଆର ଶତାବ୍ଦୀ ବୋଲି କହୁଛନ୍ତି । କିନ୍ତୁ ଅନେକ ବର୍ଷ ପୂର୍ବେ ସ୍ୱାମୀ ବିବେକାନନ୍ଦ “ଏକ ଏସିଆ”  ଭାବନାର ବାର୍ତ୍ତା ପ୍ରଚାର କରିବା ସହିତ ବିଶ୍ୱର ବିଭିନ୍ନ ସମସ୍ୟାର ସମାଧାନ ଲାଗି ଏସିଆ ମହାଦେଶ ରାହା ଦେଖାଇବ ବୋଲି କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ପ୍ରତ୍ୟୁତ୍ପନ୍ନମତି ଭାବନା ଓ ସୃଜନାତ୍ମକ ଚିନ୍ତାଧାରାର ପ୍ରକୃତ ସ୍ଥାନ ହେଉଛି ବିଶ୍ୱବିଦ୍ୟାଳୟ । “ଏକ ଭାରତ ଶ୍ରେଷ୍ଠ ଭାରତ” ଭଳି ଉତ୍ସାହକୁ ଦୃଢ଼ିଭୂତ କରିବା ନିମନ୍ତେ ବିଶ୍ୱବିଦ୍ୟାଳୟ ପରିସରରେ ବିଭିନ୍ନ ରାଜ୍ୟର ଭାଷା ଓ ସଂସ୍କୃତିର ସୁରକ୍ଷା ଲାଗି ସମାବେଶମାନ ଆୟୋଜନ କରାଯିବାକୁ ପ୍ରଧାନମନ୍ତ୍ରୀ ଏହି ଅବସରରେ ଆହ୍ୱାନ ଦେଇଥିଲେ ।

ସେ କହିଥିଲେ ଯେ ଭାରତ ବଦଳୁଛି । ବିଶ୍ୱ ଦରବାରରେ ଭାରତର ଗରିମା ଓ ଛବି ଉଜ୍ଜଳ ହେଉଛି । ବିଶାଳ ଜନଶକ୍ତି ଯୋଗୁଁ ଦେଶର ସୁନାମ ବଢ଼ୁଛି । ଏଣୁ ନୀତି-ନିୟମ ଓ ଆଦର୍ଶ ମଧ୍ୟରେ ଚଳିଲେ ଭାରତ ବିଶ୍ୱରେ ପ୍ରଭାବ ବିସ୍ତାର କରିବାରେ ସକ୍ଷମ ହେବ ବୋଲି ପ୍ରଧାନମନ୍ତ୍ରୀ କହିଥିଲେ ।

**********