ପିଏମଇଣ୍ଡିଆ

ଦେଶରେ ପ୍ରଥମ ଥର ପାଇଁ ଏକ ବେସାମରିକ ବିମାନ ଚଳାଚଳ ନୀତି ପ୍ରସ୍ତୁତ କରାଯାଇଛି । ସ୍ୱାଧୀନତା ପରେ ପ୍ରଥମ କରି ପ୍ରସ୍ତୁତ ଏହି ସମନ୍ୱିତ ବିମାନ ଚଳାଚଳ ନୀତିକୁ ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ଅନୁମୋଦନ କରାଯାଇଛି ।

ନୂତନ ବିମାନ ଚଳାଚଳ ନୀତିରେ କେତେକ ଲକ୍ଷ୍ୟ ଧାର୍ଯ୍ୟ କରାଯାଇଛି । ଯାହାକି ନିମ୍ନରେ ପ୍ରଦତ୍ତ କରାଗଲା –

1. 2022 ସୁଦ୍ଧା ଭାରତକୁ ବିଶ୍ୱର ତୃତୀୟ ବୃହତ୍ତମ ବେସାମରିକ ବିମାନ ଚଳାଚଳ ବଜାରରେ ପରିଣତ କରିବା । ଏବେ ବିଶ୍ୱରେ ଭାରତର ସ୍ଥାନ ନବମ ।

2. ଘରୋଇ ବିମାନ ଟିକଟ ବିକ୍ରି କ୍ଷେତ୍ରରେ ଅଭିବୃଦ୍ଧି 2022 ସୁଦ୍ଧା 30 କୋଟିରେ ପହଞ୍ଚାଇବା । 2015ରେ ଘରୋଇ ଟିକଟ ବିକ୍ରି 8 କୋଟି ରହିଥିଲା ।

3. ବ୍ୟବସାୟିକ ଭିତ୍ତିରେ ବିମାନ ଉଡାଣ କରୁଥିବା ବନ୍ଦରରୁ ବିମାନ ଚଳାଚଳ ହାର ଚଳିତ 2016 ରେ 77 ଥିବା ବେଳେ ତାକୁ 2019 ସୁଦ୍ଧା 127 ରେ ପହଞ୍ଚାଇବା ପାଇଁ ଲକ୍ଷ୍ୟ ରଖାଯାଇଛି ।

4. ଅବ୍ୟବହୃତ ବିମାନ ବନ୍ଦର ଗୁଡିକୁ କାର୍ଯ୍ୟକ୍ଷମ କରି ଆଞ୍ଚଳିକ ସ୍ତରରେ ବିମାନ ସେବା ଆରମ୍ଭ କରିବା ଏବଂ ପ୍ରତ୍ୟେକ ଭାରତୀୟ ଯେପରି ଘଣ୍ଟାକୁ 2500 ଟଙ୍କା ଦରରେ ବିମାନ ସେବା ପାଇପାରିବେ ସେ ଦିଗରେ ପଦକ୍ଷେପ ନେବା ।

5. ଆନ୍ତର୍ଜାତିକ ବିମାନ ସେବା ଆରମ୍ଭ କରିବା ଲାଗି ଏବେ ଅତିକମ୍ ରେ 5 ବର୍ଷ ଘରୋଇ ବିମାନ ଚଳାଚଳ ସେବାର ଅଭିଜ୍ଞତା ଜରୁରୀ ଥିବା ଆବଶ୍ୟକତାକୁ ନୂତନ ନୀତିରେ ହଟାଇ ଦିଆଯାଇଛି ।

6. କୋହଳ ଓ ଉଦାରବାଦୀ ମୁକ୍ତାକାଶ ଏବଂ କୋଡ୍ ସେର ( Code Share) ରାଜିନାମାର ଲକ୍ଷ୍ୟ ।

7. ଦକ୍ଷିଣ ଏସିଆରେ ବିମାନ ଚଳାଚଳ ହବ୍ ସୃଷ୍ଟି କରିବା ଲାଗି ଏମ୍ଆରଓ ସେକ୍ଟରକୁ ପ୍ରୋତ୍ସାହନ ପ୍ରଦାନ ।

8. 2025 ସୁଦ୍ଧା ବେସାମରିକ ବିମାନ ଚଳାଚଳ କ୍ଷେତ୍ର ପାଇଁ ଆବଶ୍ୟକ ହେଉଥିବା 3.3 ଲକ୍ଷ ଦକ୍ଷ ଓ କୁଶଳୀ କର୍ମଚାରୀଙ୍କ ଉପଲବ୍ଧତାକୁ ସୁନିଶ୍ଚିତ କରିବା ।

9. ଗ୍ରୀନ୍ ଫିଲ୍ଡ ବିମାନ ବନ୍ଦର ଓ ହେଲିକେପ୍ଟର ଉଡାଣ ସ୍ଥଳୀ ବିକଶିତ କରିବା ।

10. ବିମାନ ଚଳାଚଳ କ୍ଷେତ୍ରରେ ଇ-ପ୍ରଶାସନ, ସରଳୀକୃତ ପଦ୍ଧତି ଓ ନିୟନ୍ତ୍ରଣମୁକ୍ତ କାରବାର ଜରିଆରେ ସହଜ ବ୍ୟବସାୟ ପଦ୍ଧତିକୁ ସୁନିଶ୍ଚିତ କରିବା ।

11. ବେସାମରିକ ବିମାନ ଚଳାଚଳ କ୍ଷେତ୍ରରେ ମେକ୍ ଇନ୍ ଇଣ୍ଡିଆ କାର୍ଯ୍ୟକ୍ରମକୁ ଆପଣେଇବା

ନୂତନ ନୀତିରେ ବେସାମରିକ ବିମାନ ଚଳାଚଳ କ୍ଷେତ୍ରରେ ଭଡା ବା ଠିକା କର୍ମଚାରୀ ନିଯୁକ୍ତିକୁ ଅନୁମତି ଦିଆଯାଇ ନାହିଁ । ଗ୍ରାଉଣ୍ଡ ହେଣ୍ଡଲିଙ୍ଗ ନୀତି କ୍ଷେତ୍ରରେ ପ୍ରତିଯୋଗିତାକୁ ନୂତନ ନୀତିରେ ପ୍ରୋତ୍ସାହିତ କରାଯାଇଛି ।