ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ସ୍ୱାସ୍ଥ୍ୟସେବା ଏବଂ ଔଷଧ କ୍ଷେତ୍ରରେ ସହଯୋଗ ଲାଗି ଭାରତ ଓ ଇରାନ ମଧ୍ୟରେ ସହଯୋଗ ବୁଝାମଣାପତ୍ରକୁ ମଞ୍ଜୁରି ମିଳିଛି । 17 ଫେବୃଆରୀ, 2018 ରେ ଇରାନ ରାଷ୍ଟ୍ରପତିଙ୍କ ଭାରତ ଗସ୍ତ ଅବସରରେ ଏହି ବୁଝାମଣାପତ୍ର ସ୍ୱାକ୍ଷରିତ ହୋଇଥିଲା ।

ବୁଝାମଣାପତ୍ର ଦ୍ୱାରା ଦୁଇ ଦେଶ ମଧ୍ୟରେ ସହଯୋଗକୁ ପ୍ରୋତ୍ସାହନ ମିଳିବ ଏବଂ ଉଭୟ ଦେଶ ମଧ୍ୟରେ ଦ୍ୱିପାକ୍ଷିକ ସମ୍ପର୍କ ମଜଭୁତ ହେବ ।

ବୁଝାମଣାପତ୍ରର ପରିସର ମଧ୍ୟରେ ନିମ୍ନଲିଖିତ ସହଯୋଗ କ୍ଷେତ୍ର ରହିଛି :

1. ଚିକିତ୍ସକ ଏବଂ ଅନ୍ୟ ସ୍ୱାସ୍ଥ୍ୟ ପେସାଦାରଙ୍କ ପ୍ରଶିକ୍ଷଣ କାର୍ଯ୍ୟକ୍ରମରେ ଅଭିଜ୍ଞତାର ଆଦାନପ୍ରଦାନ ।
2. ମାନବ ସମ୍ବଳ ବିକାଶରେ ସହାୟତା ଏବଂ ସ୍ୱାସ୍ଥ୍ୟ ସୁବିଧାର ପ୍ରତିଷ୍ଠା ।
3. ଔଷଧ, ଚିକିତ୍ସା ଉପକରଣ ଏବଂ ପ୍ରସାଧନ ଅଧିନିୟମ ଏବଂ ତତସମ୍ବନ୍ଧୀୟ ସୂଚନାର ଆଦାନପ୍ରଦାନ ।
4. ଚିକିତ୍ସା ଗବେଷଣା, ନୂଆ ପ୍ରଯୁକ୍ତି ଏବଂ ଜ୍ଞାନ ଆଧାରିତ ପଦକ୍ଷେପ କ୍ଷେତ୍ରରେ ସହଯୋଗ ।
5. ଜନ ସ୍ୱାସ୍ଥ୍ୟ, ନିରନ୍ତର ବିକାଶ ଲକ୍ଷ୍ୟ ଏବଂ ଅନ୍ତର୍ଜାତୀୟ ସ୍ୱାସ୍ଥ୍ୟ ସହଯୋଗ, ଏବଂ
6. ଆପୋସ ଭାବେ ନିର୍ଦ୍ଧାରଣ କରାଯାଇଥିବା ଅନ୍ୟ କ୍ଷେତ୍ରରେ ସହଯୋଗ ।

ସହଯୋଗର ବିସ୍ତ୍ରୁତ ବିବରଣୀ ଉପରେ ସ୍ପଷ୍ଟତା ତଥା ଏହି ବୁଝାମଣାପତ୍ରର କାର୍ଯ୍ୟାନ୍ୱୟନ ଲାଗି ଏକ କାର୍ଯ୍ୟକାରୀ ଗୋଷ୍ଠୀ ଗଠନ କରାଯିବ ।

**********