ভারতকী প্রধানমন্ত্রী

দিল্লী য়ুনিভর্সিতীগী সেন্তিনরী সেলেব্রেশন অসিদা শরুক য়ারিবা লৈবাক অসিগী এজুকেশন মন্ত্রী, শ্রী ধর্মেন্দ্র প্রধান জী, দি.য়ু.গী ভাইস চান্সেলর, শ্রীমান হোগেশ সিং জী, প্রোফেসরশিং, ওজাশিং অমসুং ঐগী নহা ওইরিবা মরুপশিং। নখোয় ময়াম্না ঐহাকপু চেবাউ পীরকপা মতমদা, মতম অদুদা ঐহাক্না নখোয়গী মফম অসিদা শোইদনা লাক্কনি হায়না লেপখি। অমসুং মফম অসিদং লাকপা হায়বসি ঐগি ইমুং-মনুংশিংগী মরক্তা লাকপগা পাংখক্নি।

হৌজিক ঐখোয়না দিল্লী য়ুনিভর্সিতীগী মালেম অদুবু খঙনবগীদমক্তা মসিগী চহি চামা শুরবা ফিলম অসি য়েংলি। মসিদা লেংবীরক্লিবা অচৌ-অশাং ময়াম অসি উবদা দিল্লী য়ুনিভর্সিতীনা করি খুদোল তৌরম্বগে হায়বদু খঙবা ঙমগনি। মসিদা খরা অমদি ঐগী মাংদা ফম্লি, মখোয়শিং অসি ঐহাক্না মহৈরোই ওইরিঙৈ মতমদগী খঙলকখি, অদুবু হৌজিক্তি মখোয় য়াম্না চাউবা মী অমা ওইরে।  অমসুং ঐহাক্না থাজখি মদুদি ঙসি মফম অসিদা ঐহাক লাক্লবদি ঐগী অরিবা মরুপশিং অসিগা উননবগী খুদোংচাবা অদু শোইদনা ফংগনি অমসুং ঐহাক্না ফংলি।

মরুপশিং,

দি.য়ু.গী মহৈরোই অমহেক্তা ওইসনু, কোলেজ ফেস্ত  অদু ইশাগী কোলেজতা ওইগেরা নত্রগা অতোপ্পা কোলেজতা ওইগেরা, মদুদা খ্বাইদগী মরু ওইবা ৱাফমদি উপাই অমা তৌদুনা ফেস্ত অদুদা শরুক য়াবা হায়বসিনি। ঐগীদমক্তশু মসি অদুগুম্বা তাঞ্জা অদুনি। ঙসি দিল্লী য়ুনিভর্সিতীগী চহি ১০০ শুবগী সেলেব্রেশন পাংথোকপা অসিদা ঐহাক য়াম্না হরাওই, অদুনা অসিগুম্বা নুংঙাই-য়াইদবা ফিভম অসিদা ঐহাক্না নখোয় ময়ামগী মরক্তা তিনব্নবগী তাঞ্জা অদু ফংলরে। অমসুং মরুপশীং, কেম্পসতআ লাকপগী নুংঙাইবা অসি নখোয়না নখোয়গী কলীগশিং অদুগা লোইননা লাকপা মতমদনি। মরুপ অনিনা মালেম পুম্বগী ৱারি, ইজরেলদগী হৌরগা থা ফাওবা অমত্তা চিথদনা ৱারি কয়া অমা  শুনরদুনা চৎখি।  করম্বা ফিলম য়েংঙগে… ও.তি.তি.দা মদুগী সিরিজ অদু নুংঙাইবনি… মদুগী রীল অদু য়েংলব্রা নত্রগা য়েংদ্রিব্রা.. আরে ৱারি লোইবা নাইদে। ৱারি-ৱাতাই শানবা অদুদা হৌখিবা ৱারি কয়া অমা খঙখি, অমসুং য়াম্না নুংঙাইবা কয়া অমসু খঙবা ঙমখি।

মরুপশিং,

ঙসিগি থৌদোক অসি মরম অমদগী য়াম্না হেন্না মরু ওই। লৈবাক অসিনা নিংতম্বগী চহি ৭৫ শুবগী অমৃত মাহোতসব পাংথোকপা মতম অসিদা দি.য়ু.না মখোয়গী চহি ১০০ মপুং ফাররে। লৈবাক অমহেক্তা ওইসনু , মখোয়গী য়ুনিভর্সিতীশিং, মখোয়গী এজুকেস্নেল ওর্গনাইজেশন অদুনা মখোয়গী মাইপাকপশিং অদুগী ময়েক লারবা প্রমান্নি। দি.য়ু.নশু চহি ১০০গী খোংচৎ অসিদা পুৱারি ওইরবা মাইলস্তোন কয়া অমা লেখি! মসিদা প্রোফেসর কয়া অমা, মহৈরোই কয়া অমা  অমসুং অতোপ্পা মীওই কয়া অমগা মরি লৈনরি। অমরোমদা হায়রগা, দিল্লী য়ুনিভর্সিতী অসি য়ুনিভর্সিতী অমা ওইবদা নত্তে মসি ইহৌ অমনি।  য়ুনিভর্সিতী অসিনা মীকুপ খুদিং মমল লৈনা হিংখি। য়ুনিভর্সিতী অসিনা মিকুপ খুদিংদা মীহুল হাপখি। ঐহাক্না মসিগী পুৱারি ওইরবা থৌরম অসিদা য়ুনিভর্সিতীগী প্রোফেসর অমসুং পুম্নমক, মহৈরোই খুদিংমক অমসুং এলুম্নিবু থমোই শেংনা নুংঙাইবা ফোংদোক্লি।

মরুপশিং,

ঙসি থৌরম অসিগী খুত্থাংদা মফম অসিদা অনৌবা অমসুং অরিবা মহৈরোইশিংনা উনরি। মসিদা শোইদনা ইনৌদা-নৌদুনা লৈরবা ৱারি কয়া অমা শানরমগনি। নোর্থ কেম্পসকী মীশিংগীদি কমলা নাগর, হদসন লাইন অমসুং মুখর্জী নাগরগা মরি লৈনবা ৱারিশিং, সাউথ কেম্পসকী মীওইশিংগীদমক্তা সত্য নিকেতনগী থৌদোকশিং, নহাক্কী পাস আউত চহি অমহেক্তদা ওইবা য়াই অদুবু দি.য়ু.গী কাংবু অনি হেক উনবদা ৱারি শানবদা পুং কয়া অমা হৌখিবা খঙহৌদে! মসি ময়াম অমগী মরক্তা দি.য়ু.না চহ ১০০ অসিদা মখোয়গী ৱাখল্লোনশিং অদুবু কাইদনা থম্লবদি মখোয়গী ভেল্যুশিং অদুবুশু কাইদনা থম্লমগনি হায়না থাজৈ। “নিস্থা ধৃতি সত্যম”, য়ুনিভর্সিতীগী মোত্তো অসিনা মহৈরোই খুদিংমক্কী পুন্সিদা লমজিং মৈরা ওইরি।

মরুপশিং,

ঐখোয়গী অসোমদা অউম্না হায়নৈ-

গ্যান-ৱানেন সুখৱান,গ্যান-ৱানেন জীৱতি।

গ্যান-ৱানেৱ বলৱান, তস্মাত গ্যান-ময়ো ভৱ।।

মসিনা হায়রিবসি, লৌশিং লৈবা মীনা নুংঙাই, কল্লি। অমসুং লৌশিং লৈবা মীনা তশেংনা মাইপাকই। মরম অদুনা ভারত্তা নালন্দাগুম্বা য়ুনিভর্সিতী লৈরিঙৈ মতমদা, ভারতনা নুংঙাই-য়াইফবগী খ্বাইদগী অৱাংবা থাক্তা লৈরম্মি। ভারত্তা তক্সিলাগুম্বা ইনস্তিত্যুশনশিং লৈরিঙৈ মতমদা, ভারতকী সাইন্সনা মালেম অসিবু লমজিংখি। ভারতকী  চাউখৎলবা এজুকেশন সীস্তেম অদুনা ভারতকী নুংঙাই-য়াইফবগী খুদম্নি।

মতম অসি মালেম অসিগী অপুনবা জি.দি.পি.দা ভারতকী শিয়র য়াম্না চাউনা য়াওরিঙৈ মতম অদুনি। অদুবু, মীনাই নাইথাং ওইবগী চহি কয়া অমগী মতম অদুদা ঐখোয়গী মহৈ-মশিংগী মন্দিরশিং, এজুকেশনগী সেন্তরশিংবু মাং তাকহনখি। অমসুং ভারতনা মহাক্কী মহৈ-মশিংগী ঈচেল অদু লেপখিবা মতমদা, ভারতকী গ্রোথশু লেপখ্রে।

মতম শাংনা মীনাই নাইথাং ওইরুরবা মতুংদা লৈবাক অসি নিংখা তমখি। মতম অসিদা, নিংখা তম্বগী ৱাখল্লোন অদুবু শক্তম অমা পীবদা ভারতকী য়ুনিভর্সিতীশিংনা য়াম্না মরু ওইবা থৌদাং লৌখি। মসিগী খুত্থাংদা নহা ওইরিবা মীরোল অমা থোরকখি, মখোয়না মতম অদুগী মতম অদুবু মায়োক য়াবা ঙমখি। দিল্লী য়ুনিভরসিতীশু হায়রিবা মুবমেন্ত অসিগী অচৌবা সেন্তর অমা ওইখি। দি.য়ু.গী মহৈরোই খুদিংমক, কোর্স অমহেক্তগী ওইসনু, মখোয়না মখোয়গী ইনস্তিত্যুশন অসিগী মরু য়ৌনা খঙলমগনি। হৌখিবা মতমগী ৱাখল্লোন অসিনা ঐখোয়গী হিংবগী মওং অসিবু শাওং-শক্তম পীরি,  ঐখোয়গী ৱাখল্লোনশিং অদুগী য়ুমফম ঐম্মি, অমসুং তুংদা লাক্কদবা মতমশিং অদুগী ভিজন অদুবু হেন্না চাউথোকহল্লি।

মরুপশিং,

মীওই অমা ওইসনু নত্রগা ইনস্তিত্যুশন অমা ওইসনু, মখোয়গী ফিরেপ অদুনা লৈবাক অসিগীদমক্তআ ওইবা মতমদা, মখোয়গী মাইপাকপা অদুনা লৈবাক অসিগী মাইপাকপগা  লেং মান্ননা চৎলি। মতম অমদা দি.য়ু.দা কোলেজ ৩ খক্তমক লৈরম্মি অদুবু হৌজিক্তি কোলেজ ৯০দগীশু হেন্না লৈখ্রে। মতম অমদা ভারতকী শেন্মিৎলোনগী ফিভম মারাই চাইথরম্মি, ঙসিদি মালেম অসিগী তোপ ৫ ইকোনোমিশিংগী মনুং চনখ্রে। ঙসি দি.য়ু.দা তম্বা নুপামচাশিংগা চাংদম্নবদা নুপীমচাশিংগী মশিংনা য়াম্না হেল্লি। অসুম্না লেবাক অসিদশু জেন্দর রেসিওদা য়াম্না চাউনা অহোংবা লাকখ্রে। হায়বদি, মহৈ-মশংইগী ইনস্তিত্যুশনশিংগী মরুনা য়াম্না লুরিবমখৈ, লৈবাক অদুগী মশাশিং অদুনা অদুগী মতিক ৱাংঙি। মরম অদুনা তুংদা লাক্কদবা মতমশিংগীদমক্তা য়ুনিভর্সিতী অমসুং লৈবাক অসিগী ফিরেপশিং অদুগা অমত্তা ওইবা হায়বসি য়াম্না মথৌ তাই, ইন্তর-কনেক্সন লৈহনবা য়াম্না তঙাইফদে।

চহি ২৫গী মতুংদা, লৈবাক অসিনা নিংখা তম্বগী চহি ১০০ মপুং ফারবা মতমদা, দিল্লী য়ুনিভর্সিতীনা লিংখৎখিবগী চহি ১২৫ মপুং ফারগনি। মতম অদুদা লৈরম্বা পান্দম অদুনা নিংখা তম্বনি অদুগা হৌজিকক্না ঐখোয়গী পান্দম অসি ২০৪৭ ফাওবদা মপুং ফানা চাউখৎপা লৈবাক অমা ওইহনবনি। মমাংগী চহি চাগী অহুমশুবা দেকেদতা, করিগুম্বা ঐখোয়না মমাংগী চহি চাগী পুৱারি মিৎয়েং তারবদি, মমাংগী চহি চাগী অহুমশুবা দেকেদতা নিংতম লানদা অনৌবা খোংজেল অমা হাপখি। হৌজিক হন্দক্কী চহি চা অসিগী অহুমশুবা দেকেদতা ভারতকী চাউখৎ-থৌরাংগী খোংচত্তা অনৌবা খোংজেল অমা হাপ্লগনি। ঙসি লৈবাক শিনবা থুংনা মশিং য়াম্লবা য়ুনিভর্সিতী, কোলেজশিং ঐম্লি। হৌখিবা চহি খরদা আই.আই.তি., আই.আই.এম., এন.আই.তি. অমসুং এ.আই.আই.এম.এস.গুম্বা ইনস্তিত্যুশনশিং অসিগী মশিংদা লেপ্তনা হেনগৎলকপা থেংনখি। মসিগী ইনস্তিত্যুশনশিং অসিনা অনৌবা ভারত অমগী বিল্দিং ব্লোকশিং ওইরি।  

মরুপশিং,

এজুকেশন হায়বসি তাপী-তম্বীবা খক্কী থৌওং নত্তে, মসি তম্নবগী থৌওংশুনি। মতম কয়া শাংনা এজুকেশনগী ফোকস অসি মহৈরোইশিংদা করি তম্বীগদগে হায়বসিদা ওইখি। অদুবু ঐখোয়না ফোকস অদুবু হোংদোক্তুনা মহৈরোইশিংনা করি তম্বা পাম্বগে হায়বসিদা হেন্না মিৎয়েং থমখি। নখোয় ময়াম্না লৌরিবা অপুনবা থৌদাং অদুনা অনৌবা নেস্নেল এজুকেশন সীস্তেম অমা শেমগৎলক্লে। হৌজিক্তি মহৈরোইশিংনা মখোয়না অপাম্বা মওংদা অমসুং অপাম্বা হিরম অদুবু খন্দুনা তম্বগী খুদোংচাবা ফংলে।

এজুকেশনগী ওইবা ইনস্তিত্যুশনশিংগী ক্বালিতী হেন্না লৈহন্নবগীদমক্তা ঐখোয়না লেপ্তনা থবক তৌরি। ইনস্তিত্যুতশিংবু  কমপিতিতিব ওইহন্নবগীদমক্তা ঐখোয়না নেস্নেল ইনস্তিত্যস্নেল রেঙ্কিং ফ্রেমৱার্ক হৌদোরকখ্রে। মসিনা লৈবাক শিংনবা থুংনা লৈরিবা ইনস্তিত্যুশনশিংবু মোতিভেশন অমা ফংহল্লি। ঐখোয়না ইনস্তিত্যুশনশিং অসিগী ওতোনোমীবু এজুকেশনগী ক্বালিতীগা মরি লৈনহল্লি।

মরুপশিং,

এজুকেশনগী ফ্যুদরিস্তিক সীস্তেমশিং অমসুং ফিরেপশিং অদুগ ফল ওইনা ঙসি ভারতকী য়ুনিভর্সিতীশিংনা মালেম শিনবা থুংনা মশক খঙবা হেনগৎলক্লে।  ২০১৪দা ক্যু.এস. ৱার্ল্দ রেঙ্কিংদা ভারতকী য়ুনিভর্সিতী ১২ খক্তমক য়াওরম্মি, অদুবু ঙসিদি মসিগী মশিং অসি ৪৫ ওইখ্রে।

ঐখোয়গী এজুকেশন ইনস্তিত্যুতশিংনা মালেম অসিদা মশাগী ওইবা তোঙান-তোঙানবা মিংচৎ পুরক্লি। ঐখোয়গী ইনস্তিত্যুশন্না ক্বালিতী এজুকেশন, স্তুদেন্ত ফেকল্তী রেসিও, অমসুং রেপ্যুতেশনদা অহোংবা পুরক্লি। অমসুং মরুপশিং, নখোয়না খঙই মদুদি হায়রিবশিং অসিগী খ্বাইদগী চাউবা গাইদিং ফোর্স অদু করম্বনো? মসিগী গাইদিং ফোর্স অসি- লৈবাক অসিগী নহাশিংগী শক্তিনি। হোল অসিদআ ফম্লিবা ঐখোয়গী নহাশিংগী শক্তি।

মরুপশিং,

মতম অমদা মহৈরোইশিংনা করিগুম্বা ইনস্তিত্যুত অমদা এদমিসন লৌদ্রঙৈগী মমাংদা প্লেসমেন্ত খক্তমক মরু ওইনা লৌখি। হায়বদি এদমিসন তৌবা হায়বদি দিগ্রী, অমসুং দিগ্রী হায়বদি থবক, এজুকেশন হায়বসি মসিদা লোইখি। অদুবু, হৌজিক্তি নহাশিংনা পুন্সিবু মসিদা ফাজিন-পুনশিন্দুআন তম্বা পামদে। মখোয়না করিগুম্বা খরা তৌবা পাম্মি, মখোয়গী খুবাক ময়ি মশামক্না শেম্বা পাম্মি।

২০১৪গী মমাংদা ভারত্তা স্তার্তঅপ খরা খক্তমক লৈরম্মি। ঙসিদি ভারত্তা স্তা্র্তঅপশিংগী মশিং লাখ অমা হেনখ্রে। ২০১৪-১৫গা চাংদম্নবদা ঙসিদি চাদা ৪০ হেন্না, পেতেন্ত ফাইল তৌখ্রে। পেতেন্ত ইশু তৌবগী মশিংশু শরুক ৫ থোক্না হেনখ্রে। গ্লোবল ইনোভেশন ইন্দেক্সতা ভারতনা ৮১শুবদা লৈরমখি, ৮০দগী তানা। হৌজিক্তি মদুদগী হেনগৎলক্তুনা হৌজিক্তি ৪৬ য়ৌখ্রে, হায়রিবা মফম অসি ঐখোয়না ফংখ্রে।

ঙসি নুমিৎ খরনিনিগী মমাংদা ঐহাক্না অমেরিকাগী খোংচত্তগী হল্লকখি। নখোয় ময়াম্না উরম্লগনি, ঙসি ভারতপু কয়া য়াম্না ইকাইখুম্নরে, কয়া য়াম্না চাউথোকচনিংঙাই ওইরে। মসিগী মরম করিনো, করিগীদমক্তা ঙসি ভারতনা য়াম্না চাউথোকচনিংঙাই ওইরিবা? পাউখুমদি মদুমক্নি। মরমদি, ভারতকী মতিক হেনগৎলক্লে, ভারতকী নহাশিংদা মালেম্না থাজবা হেনগৎলক্লে। খোংচৎ অসিদা ভারত অমসুং অমেরিকাগী মরক্তা ইনিসিয়েতিব ওন ক্রিতিকেল এন্দ ইমর্জিং তেক্নোলোজী  হায়বদি, আই.সি.ই.তি. দীল তৌখি। মসিগী দীল অমা অসিনা, ঐখোয়গী নহাশিংগীদমক্তা লৈকংদগী হৌরগা শুন্দ্রং ফাওবা, সেমি-কন্দক্তরদগী হৌরগা এ.আই ফাওবা, হিরম কয়ামরুম অমদা অনৌবা খুদোংচাবা পুরক্লগনি।

মমাংদা ভারতনা ফংবা ঙম্লমদবা তেক্নোলোজি অদু হৌজিক্তি ঐখোয়গী নহাশিংদা মদুগী এক্সেস ফংলগনি, মখোয়গী স্কিল দেবেলপ তৌরগনি। অমেরিকাগী মাইক্রোন, গুগলগা লোইন-লোইননা এপ্লাইদ মেতরিয়েলশিংগী কমপনীশিংনা ভারত্তা ইনভেস্তমেন্ত চাউনা তৌনবগী ফিরেপ লৌখ্রে। অমসুং মরুপশিং, তুংদা লাক্কদবা ভারত করম্না ওইরক্কনি হাববদু তাক্লিবনি, নখোয়গীদমক্তা খুদোংচাবা কয়া অমনা ঙাইদুনা লৈরি।

মরুপশিং,

ইন্দস্ত্রী ‘ফোর পোইন্ত ও’গী ইহৌশু ঐখোয়গী থোঙ্গালদা য়ৌরক্লে। ঙরাং ফাওবদা এ.আই. অমসুং এ.আর.-.ভি.আর.গি মতাংদা ঐখোয়না সাইন্স-ফিক্সন ফিলমশিংদা উখিবা অদু হৌজিক্তি ঐখোয়গী পুন্সিগী শরুক অমা ওইরে। দ্রাইৱিংদগী হৌরগা সর্জরী ফাওবা, রোবোতিক্স হৌজিক্তি নোর্মল ওইরক্লি। মসিগী সেক্তরশিং অসি নহা ওইরিবা মীরোলশিংগীদমক্তা, ঐখোয়গী মহৈরোইশিংগীদমক্তাঅনৌবা লম্বি অমা ওইরক্লি। হৌখিবা চহিশিংদা ভারতনা মশাগী স্পেস সেক্তর হাংদোকখ্রে, ভারতনা মশাঘি দিফেন্স সেক্তর হাংদোকখ্রে, ভারতনা দ্রোনগা মরি লৈনবা পোলিসীশিংদা য়াম্না চাউনা অহোংবা অমা পুরকখ্রে, হায়রিবা ফিরেপশিং অসিনা লৈবাক অসিগী নহাশিংবু মাংলোমদা কাখৎনবগী তাঞ্জা অদু পীরি।

মরুপশিং,

ভারতকী চাউখৎ খোংথাংদগী নহা লিশিং কয়া অমবু, ঐখোয়গী মহৈরোইশিংবু করম্না কান্নবা ফংলি, মসিগী নাকল অমশু লৈরি। ঙসি মালেম অসিগী মীয়াম্না ভারতপু, ভারতকী মিংচৎপু, ভারতকী সংস্কৃতিবু খঙবা পাম্লি। কোরোনাগী মতমদা মালেম অসিগী লৈবাক খুদিংমক্না মখোয়গী তঙাইফদবশিং অদুগীদমক্তা য়াম্না ৱারম্মি। অদুবু, ভারতনা মশাগী তঙাইফদবশিং অদুবু মপুং ফাহনবদা নত্তনা মসিগা লোইন-লোইননা অতোপ্পা লৈবাকশিংগীশু মতেং পাংখি।

মরম অদুনা মালেম অসিদা কঙনিংবা অমা ফাওখি, মদুদি ভারতকী করম্বা সংস্কারননো অৱাবা তারবা মতমদফাওবা সেবা তৌবগী ৱাখল্লোন পোকহল্লিবসি। ভারতকী চাউখৎলক্লিবা শক্তি, ভারতকী জি.-২০ প্রেসিদেন্সী, হায়রিবশিং অসিনা ভারতকী মতাংদআ খঙনিংবা হেনগৎহনখি। মসিদা ঐখোয়গী হভুমেনিতীগী মহৈরোইশিংগীদমক্তা তোঙান-তোঙানবা খুদোংচাবা কয়া অমা পুরক্লি। য়োগগুম্বা ঐখোয়গী সাইন্স, ঐখোয়গী সংস্কৃতি, ঐখোয়গী হরাও-কুম্মৈ, ঐখোয়গী লিতরেচর, ঐখোয়গী পুৱারি, ঐখোয়গী হেরিতেজ, ঐখোয়গী জোনরাশিং, ঐখোয়গী মথেংল-লুকোইশিং, ৱাফম খুদিংমক্তা খন্নরি। মরম অদুনা মালেম অসিদা ভারতকী মরমদা তাক্কদবা, ঐখোয়গী পোৎলমশিংবু মালেম শিনবা থুংনা য়ৌহনগদবা ভারতকী নহাশিংগী দিমান্দশু হেনগৎলক্লি। ঙসিদি দেমোক্রেসী, ইক্বালিতী অমসুং ম্যুচুৱল রেসপেক্তগূম্বা ভারতকী ভেল্যুশিং অসি মালেম অসিগীদমক্তা লৈপ্পা লৈতনা অনৌবা তাঞ্জা কয়া অমা লৈরক্লি।  লৈবাক অসিদা হিস্ত্রী, হেরিতেজ অমসুং কলচরগা মরি লৈনবা হিরমশিং অদুনশু নহাশিংগীদমক্তা ওইথোকপা য়াবা কয়া অমা লৈহনখ্রে।

ঙসি লৈবাক অসিগী তোঙান-তোঙানবা রাজ্যশিংদা ত্রাইবল ম্যুজিয়মশিং শারি। পি.এম. ম্যুজিয়মগী খুত্থাংদা নিংতম্বা ভারতকী চাউখৎ-থৌরাংগী খোংচৎ অদুবু উবা ফংগনি। অমসুং দিল্লীদা মালেম অসিগী খ্বাইদগি চাউবা হেরিতেজ ম্যুজিয়ম- ‘য়ুগে য়ুগিন ভারত’শু শাগদৌরি হায়সিগী মতাংদা খঙবদা য়াম্না নুংঙাইরমগনি। কলা, সংস্কৃতি অমসুং পুৱারিগা মরি লৈনবা নহাশিংগীদমক্তা অহানবা ওইনা পেসন ফোর প্রোফেসন শেম্নবা তাঞ্জা কয়া থোরক্লি। অসুম্না ঙসি মালেম অসিদা ভারতকী ওজাশিংগী তোঙান-তোঙানবা মিংচৎ পুরক্লি। ঐহাক্না গ্লোবল লীদরশিংগা উনবা মতমদা, মকোয়শিং অদুঈ মরক্তগী অমা নত্রগা অমনা ভারতকী ওজাশিংগা মরি লৈনবা ৱারি লি অমসুং য়াম্না চা্থোক্না ৱারি অদু লি।

নখোয়না ইনস্তিত্যুত অসিগী চহি ১২৫ শুবগ থৌরম পাংথোকপা মতমদা, নখোয়গী মশিং অদু মালেম অসিগী তোপ রেঙ্কিং য়ুনিভর্সিতীশিংগী মনুংদা ওইনবগীদমক্তা নখোয়না হেন্না হোৎনগদবনি। ফ্যুচর মেকিং ইনোভেশনশিং নখোয়গী মফম অসিদা ওইনবা, মালেম অসিগী খ্বাইদগী হেন্না ফবা আইদিয়াশিং অমসুং লুচিংবশিং নখোয়গী মফম অসিদগী থোরক্নবগীদমক্তা নখোয়না লেপ্তনা হোৎনবা মথৌ তাই।

অদুবু অহোংবা কয়া অসিগী মরক্তা, নখোয়না মপুং ফানা হোংবদি হোংখিগনু। ৱাফম খরদি অদুমক থম্বীরম্মু। নোর্থ কেম্পসকী পতেল চেস্তকী চাই…নুদলশিং…. সাউথ কেম্পসকী চানক্যাগী মোমোশিং… মখোয়গী মহাওশিং অদুবুশু হোংহন্দনবা নখোয়না হোৎনগদবনি।

মরুপশিং,

ঐখোয়না ঐখোয়গী পুন্সিদা পান্দম অমা থম্বা মতমদা, মদুগীদমক্তা ঐখোয়না মাংজৌননা হান্না ৱাখল অমসুং থৱাই-হকচাং য়াওনা শেম শাই। লৈবাক অমগী  ৱাখল অমসুং থৱাই-হকচাংবু নিংথিনা শেম-শানবগী থৌদাং অসি এজুকেশন ইনস্তিতভুতশিংনা লৌই। ঐখোয়গী অনৌবা জেনেরেশনবু ফ্যুচর রেদী ওইহন্নবা, সেলেঞ্জশিং এক্সেপ তৌনবা অমসুং ফেস তৌনবগী তেমপরামেন্ত লৈহনবা হায়বসি এজুকেশন ইনস্তিত্যুতকী ভিজন অমসুং মিসন খক্তনা ওইথোকপা ঙমগনি।

ঐহাক্না থাজৈ মদুদি, দিল্লী য়ুনিভর্সিতীনা মখোয়গী খোংচৎ অসিবু খুমাং চাউশিনহন্দুনা হায়রিবা ফিরেপশিং অসিবু শোইদনা মপুং ফাহনগনি। মসিগা লোইননা, নখোয় পুম্নকপু… হন্দক্কী চহি চা অসিগী খোংচৎপু নখোয়না খুমাং চাউশিনহল্লিবা মওং অসিদা মসিবু অমুক্কশু হেন্না শক্তি লৈনা, হেন্না মশেক-মঙাল লৈবা মওংদা, অমসুং মঙলান কয়া অমা অমসুং ফিরেপ কয়া অমগা লোইননা মাইপাকপা পুরক্নবগী লম্বি শেম্লদুনা, মাইপাকপশিংনা নখোয়গী খোংথাং খুদিং মাইপাকপা ওইরসনু, নখোয়গী পাঙ্গলনা লৈবাক অসি লেপ্তনা চাউখৎপা ওইরসনু। মসিগী থৌজাল অসিগা লোইননা নখোয় ময়াম পুম্নমকপু য়াইফ-পাউজেল পীজরি।

থাগৎচরি!

***