ಪಿಎಂಇಂಡಿಯಾ

ಗೌರವಾನ್ವಿತರೇ,

ಮಾನ್ಯರೇ,

ಎಲ್ಲರಿಗೂ ನಮಸ್ಕಾರ!

17ನೇ ಬ್ರಿಕ್ಸ್ ಶೃಂಗಸಭೆಯ ಅತ್ಯುತ್ತಮ ಸಂಘಟನೆಗಾಗಿ ಅಧ್ಯಕ್ಷ ಲೂಲಾ ಅವರಿಗೆ ನಾನು ನನ್ನ ಹೃತ್ಪೂರ್ವಕ ಕೃತಜ್ಞತೆಯನ್ನು ವ್ಯಕ್ತಪಡಿಸುತ್ತೇನೆ. ಬ್ರೆಜಿಲ್‌ನ ಕ್ರಿಯಾತ್ಮಕ ಅಧ್ಯಕ್ಷತೆಯಲ್ಲಿ, ನಮ್ಮ ಬ್ರಿಕ್ಸ್ ಸಹಕಾರವು ಹೊಸ ಆವೇಗ ಮತ್ತು ಚೈತನ್ಯವನ್ನು ಪಡೆದುಕೊಂಡಿದೆ. ನಾವು ಪಡೆದ ಶಕ್ತಿಯು ಕೇವಲ ಎಸ್ಪ್ರೆಸೊ ಅಲ್ಲ; ಇದು ಡಬಲ್ ಎಸ್ಪ್ರೆಸೊ ಶಾಟ್! ಇದಕ್ಕಾಗಿ, ಅಧ್ಯಕ್ಷ ಲೂಲಾ ಅವರ ದೃಷ್ಟಿಕೋನ ಮತ್ತು ಅವರ ಅಚಲ ಬದ್ಧತೆಯನ್ನು ನಾನು ಶ್ಲಾಘಿಸುತ್ತೇನೆ. ಭಾರತದ ಪರವಾಗಿ, ಬ್ರಿಕ್ಸ್ ಕುಟುಂಬದಲ್ಲಿ ಇಂಡೋನೇಷ್ಯಾ ಸೇರ್ಪಡೆಗಾಗಿ ನನ್ನ ಸ್ನೇಹಿತರಾದ ಅಧ್ಯಕ್ಷ ಪ್ರಬೋವೊ ಅವರಿಗೆ ನನ್ನ ಹೃತ್ಪೂರ್ವಕ ಅಭಿನಂದನೆಗಳು ಮತ್ತು ಶುಭಾಶಯಗಳನ್ನು ತಿಳಿಸುತ್ತೇನೆ.

ಸ್ನೇಹಿತರೇ,

ಜಾಗತಿಕ ದಕ್ಷಿಣವು ಆಗಾಗ್ಗೆ ದ್ವಿಮುಖ ಮಾನದಂಡಗಳನ್ನು ಎದುರಿಸಿದೆ. ಅದು ಅಭಿವೃದ್ಧಿ, ಸಂಪನ್ಮೂಲಗಳ ವಿತರಣೆ ಅಥವಾ ಭದ್ರತೆಗೆ ಸಂಬಂಧಿಸಿದ ವಿಷಯಗಳ ಬಗ್ಗೆಯಾಗಲಿ, ಜಾಗತಿಕ ದಕ್ಷಿಣದ ಹಿತಾಸಕ್ತಿಗಳಿಗೆ ಸರಿಯಾದ ಪ್ರಾಮುಖ್ಯತೆಯನ್ನು ನೀಡಲಾಗಿಲ್ಲ. ಹವಾಮಾನ ಹಣಕಾಸು, ಸುಸ್ಥಿರ ಅಭಿವೃದ್ಧಿ ಮತ್ತು ತಂತ್ರಜ್ಞಾನ ಪ್ರವೇಶದಂತಹ ವಿಷಯಗಳ ಕುರಿತು ಜಾಗತಿಕ ದಕ್ಷಿಣವು ಸಾಮಾನ್ಯವಾಗಿ ಸಾಂಕೇತಿಕ ಸನ್ನೆಗಳನ್ನು ಮಾತ್ರ ಪಡೆಯುತ್ತದೆ.

ಸ್ನೇಹಿತರೇ,

20ನೇ ಶತಮಾನದಲ್ಲಿ ನಿರ್ಮಿಸಲಾದ ಜಾಗತಿಕ ಸಂಸ್ಥೆಗಳಲ್ಲಿ ಮಾನವಕುಲದ ಮೂರನೇ ಎರಡರಷ್ಟು ಜನರಿಗೆ ಇನ್ನೂ ಸರಿಯಾದ ಪ್ರಾತಿನಿಧ್ಯವಿಲ್ಲ. ಇಂದಿನ ಜಾಗತಿಕ ಆರ್ಥಿಕತೆಯಲ್ಲಿ ಪ್ರಮುಖ ಪಾತ್ರ ವಹಿಸುವ ಅನೇಕ ದೇಶಗಳಿಗೆ ಇನ್ನೂ ನಿರ್ಧಾರ ತೆಗೆದುಕೊಳ್ಳುವ ವೇದಿಕೆಯಲ್ಲಿ ಸ್ಥಾನ ನೀಡಲಾಗಿಲ್ಲ. ಇದು ಕೇವಲ ಪ್ರಾತಿನಿಧ್ಯದ ಬಗ್ಗೆ ಅಲ್ಲ, ಇದು ವಿಶ್ವಾಸಾರ್ಹತೆ ಮತ್ತು ಪರಿಣಾಮಕಾರಿತ್ವದ ಬಗ್ಗೆಯೂ ಆಗಿದೆ. ಜಾಗತಿಕ ದಕ್ಷಿಣವಿಲ್ಲದೆ, ಈ ಸಂಸ್ಥೆಗಳು ಸಿಮ್ ಕಾರ್ಡ್ ಹೊಂದಿರುವ ಮೊಬೈಲ್ ಫೋನ್‌ನಂತಿವೆ ಆದರೆ ನೆಟ್‌ವರ್ಕ್ ಇಲ್ಲ. ಅವು ಸರಿಯಾಗಿ ಕಾರ್ಯನಿರ್ವಹಿಸಲು ಅಥವಾ 21 ನೇ ಶತಮಾನದ ಸವಾಲುಗಳನ್ನು ಎದುರಿಸಲು ಸಾಧ್ಯವಾಗುತ್ತಿಲ್ಲ. ಅದು ಪ್ರಪಂಚದಾದ್ಯಂತ ನಡೆಯುತ್ತಿರುವ ಸಂಘರ್ಷಗಳಾಗಲಿ, ಸಾಂಕ್ರಾಮಿಕ ರೋಗ, ಆರ್ಥಿಕ ಬಿಕ್ಕಟ್ಟುಗಳು ಅಥವಾ ಸೈಬರ್ ಅಥವಾ ಬಾಹ್ಯಾಕಾಶದಲ್ಲಿ ಉದಯೋನ್ಮುಖ ಸವಾಲುಗಳಾಗಲಿ, ಈ ಸಂಸ್ಥೆಗಳು ಪರಿಹಾರಗಳನ್ನು ನೀಡಲು ವಿಫಲವಾಗಿವೆ.

ಸ್ನೇಹಿತರೇ,

ಇಂದು ಜಗತ್ತಿಗೆ ಹೊಸ ಬಹುಧ್ರುವೀಯ ಮತ್ತು ಅಂತರ್ಗತ ವಿಶ್ವ ಕ್ರಮದ ಅಗತ್ಯವಿದೆ. ಇದು ಜಾಗತಿಕ ಸಂಸ್ಥೆಗಳಲ್ಲಿ ಸಮಗ್ರ ಸುಧಾರಣೆಗಳೊಂದಿಗೆ ಪ್ರಾರಂಭವಾಗಬೇಕಾಗುತ್ತದೆ. ಈ ಸುಧಾರಣೆಗಳು ಕೇವಲ ಸಾಂಕೇತಿಕವಾಗಿರಬಾರದು, ಆದರೆ ಅವುಗಳ ನಿಜವಾದ ಪರಿಣಾಮವೂ ಗೋಚರಿಸಬೇಕು. ಆಡಳಿತ ರಚನೆಗಳು, ಮತದಾನದ ಹಕ್ಕುಗಳು ಮತ್ತು ನಾಯಕತ್ವದ ಸ್ಥಾನಗಳಲ್ಲಿ ಬದಲಾವಣೆಗಳಿರಬೇಕು. ನೀತಿ ನಿರೂಪಣೆಯಲ್ಲಿ ಜಾಗತಿಕ ದಕ್ಷಿಣದ ದೇಶಗಳು ಎದುರಿಸುತ್ತಿರುವ ಸವಾಲುಗಳಿಗೆ ಆದ್ಯತೆ ನೀಡಬೇಕು.

ಸ್ನೇಹಿತರೇ,

ಬ್ರಿಕ್ಸ್‌ನ ವಿಸ್ತರಣೆ ಮತ್ತು ಹೊಸ ಪಾಲುದಾರರ ಸೇರ್ಪಡೆಯು ಕಾಲಕ್ಕೆ ತಕ್ಕಂತೆ ವಿಕಸನಗೊಳ್ಳುವ ಅದರ ಸಾಮರ್ಥ್ಯವನ್ನು ಪ್ರತಿಬಿಂಬಿಸುತ್ತದೆ. ಈಗ, ನಾವು ವಿಶ್ವಸಂಸ್ಥೆ ಭದ್ರತಾ ಮಂಡಳಿ ಸೆಕ್ಯುರಿಟಿ ಕೌನ್ಸಿಲ್, ವಿಶ್ವ ವ್ಯಾಪಾರ ಸಂಸ್ಥೆ (ಡಬ್ಲ್ಯುಟಿಒ) ಮತ್ತು ಬಹುಪಕ್ಷೀಯ ಅಭಿವೃದ್ಧಿ ಬ್ಯಾಂಕ್‌ಗಳಂತಹ ಸಂಸ್ಥೆಗಳನ್ನು ಸುಧಾರಿಸುವ ಅದೇ ದೃಢಸಂಕಲ್ಪವನ್ನು ಪ್ರದರ್ಶಿಸಬೇಕು. ತಂತ್ರಜ್ಞಾನವು ಪ್ರತಿ ವಾರ ವಿಕಸನಗೊಳ್ಳುವ ಕೃತಕ ಬುದ್ಧಿಮತ್ತೆಯ ಯುಗದಲ್ಲಿ, ಜಾಗತಿಕ ಸಂಸ್ಥೆಗಳು ಸುಧಾರಣೆಯಿಲ್ಲದೆ ಎಂಬತ್ತು ವರ್ಷಗಳನ್ನು ಕಳೆಯುವುದು ಸ್ವೀಕಾರಾರ್ಹವಲ್ಲ. 20 ನೇ ಶತಮಾನದ ಟೈಪ್‌ರೈಟರ್‌ಗಳಲ್ಲಿ 21 ನೇ ಶತಮಾನದ ಸಾಫ್ಟ್‌ವೇರ್ ಅನ್ನು ಚಲಾಯಿಸಲು ಸಾಧ್ಯವಿಲ್ಲ!

ಸ್ನೇಹಿತರೇ,

ಭಾರತವು ಯಾವಾಗಲೂ ಸ್ವಹಿತಾಸಕ್ತಿಯನ್ನು ಮೀರಿ ಮಾನವೀಯತೆಯ ಹಿತಾಸಕ್ತಿಗಾಗಿ ಕೆಲಸ ಮಾಡುವುದನ್ನು ಕರ್ತವ್ಯವೆಂದು ಪರಿಗಣಿಸಿದೆ. ಎಲ್ಲಾ ವಿಷಯಗಳಲ್ಲಿ ಬ್ರಿಕ್ಸ್ ದೇಶಗಳೊಂದಿಗೆ ಕೆಲಸ ಮಾಡಲು ಮತ್ತು ನಮ್ಮ ರಚನಾತ್ಮಕ ಕೊಡುಗೆಗಳನ್ನು ನೀಡಲು ನಾವು ಸಂಪೂರ್ಣವಾಗಿ ಬದ್ಧರಾಗಿದ್ದೇವೆ. 

ಎಲ್ಲರಿಗೂ ಮತ್ತೊಮ್ಮೆ ತುಂಬಾ ಧನ್ಯವಾದಗಳು.

ಹಕ್ಕು ಸ್ವಾಮ್ಯ- ಇದು ಪ್ರಧಾನಮಂತ್ರಿ ಅವರ ಭಾಷಣದ ಅಂದಾಜು ಅನುವಾದ. ಮೂಲ ಭಾಷಣವನ್ನು ಹಿಂದಿಯಲ್ಲಿ ಮಾಡಲಾಗಿದೆ.

*****