ভারতকী প্রধানমন্ত্রী

ইকায়খুম্নরবা, ঐগী মরুপ, রাষ্ট্রপতি পুতিন,

লৈবাক অনিমক্কী মীহুৎ কাংবুশিং,

মেদিয়াগী মরুপশিং,

খুরুমজরি!

দোব্রি দেন !

ঙসি ২৩ শুবা ইন্দিয়া-রুসিয়া সম্মিৎতা রাষ্ট্রপতি পুতিন তরাম্না ওকপদা ঐ অপেনবা পোকই। ঐখোয়গী লৈবাক অনিগী মরীশিং পুৱারি ওইনা মাইপাকপশিংগী মতম অমদা মহাক লাকপনি। চহি ২৫ গী মমাঙদা, রাষ্ট্রপতি পুতিন্না ঐখোয়গী ষ্ট্রাতেজিক পার্তনরশিপকী উরেপ-উয়ুং তমখি। চহি ১৫ গী মমাংদা, ২০১০ দা, ঐখোয়গী মরী “স্পিসিএল এন্দ প্রিভিলেজ ষ্ট্রাতেজিক পার্তনরশিপ” কী থাক্ত অমদা পুখৎখি।

হৌখিবা চহি ২৫ রোমদা, মহাক্কী লুচিংবা অমসুং পান্দমগা লোয়ননা মরী অসি মহাক্না মখা তানা য়োকখৎতুনা লাক্লি। মহাক্কী লুচিংবা মখাদা ঐখোয়গী মরীশিং অসি ফিবম খুদিংমক্ত অনৌবা থাকশিংদা পুখৎলে। মহাক্না ভারতকা লোয়ননা অচেৎপা মরুপ-মপাংগী মরী লৈনবা অমসুং মহাক্কী অচেৎপা থাজবগীদমক, ঐগী মরুপ, রাষ্ট্রপতি পুতিন ঐনা থাগৎপা ফোঙদোকচরি।

মরুপশিং,

হৌখিবা চহি ৮০ রোম অসিদা, মালেম্না অকা-অকুম কয়া থেংনখ্রে। মীওইবা খুন্নাইনা খুদোংচাদবা অমসুং অৱাবা কয়া মায়োক্নখ্রে। অদুবু, পুম্নমক অসি মায়োক্নদুনা, ভারত-রুসিয়াগী মরুপ-মপাংগী মরী লম্বী তাক্লিবা থৱান্মিচাক অমগুম্না লেংদনা লৈরি। অমনা অমবু থাজনবা অমসুং ইকায়খুম্নবদা য়ুম্ফম ওইদুনা, ঐখোয়গী মরী মতম শাংনা লৈরক্লি।

ঙসি, য়ুম্ফম অসি মখা তানা মপাঙ্গল কনখৎহন্নবা ঐখোয় মতেং পাংনবগী হিরম খুদিংমক ঐখোয়না খন্নরে। ঐখোয়গী শেন-থুমগী মতেং পাংনবা অসি অনৌবা থাকশিংদা পুখৎপা হায়বসি লৈবাক অনিমক্না মরুওইনা লৌবা অমনি। মসি থবক ওইনা পাংথোক্নবা, ২০৩০ ফাওবা ইকোনোমিক কোওপরেসন প্রোগ্রাম অমা পাংথোকপা ঐখোয়না য়ানরে। মসিনা ঐখোয়গী ললোন-ইতিক অমসুং শেন থাদবা মখল কয়া থোকহনগনি, থোঙ মান্নগনি অমসুং তুংকোইনা চৎনগনি অমসুং ঐখোয়গী মতেং পাংনবগী হিরমশিংদা অনৌবা থবকশিংসু হাপচিল্লে।

ঙসি, রাষ্ট্রপতি পুতিন অমসুং ঐ ইন্দিয়া-রুসিয়া ব্যুজিনেস ফোরম শরুক য়াগনি। মসিগী ফোরম অসিনা ঐখোয়গী ললোন-ইতিক্কী মরীশিংদা অনৌবা ইনোৎ অমা পীগনি হায়না ঐনা থাজৈ। মসিনা মপান্দা থাদোকপা, পুন্না পোৎথোক পুথোকমিন্নবা অমসুং পুন্না অনৌবা থবক পায়খৎমিন্নবদা অনৌবা খুদোংচাবা কয়া পীগনি।

য়ুরেসিয়া ইকোনোমিক য়ুনিয়নগা লোয়ননা ফ্রি ত্রেদ এগ্রিমেন্ত অথুবা মতমদা য়ানবা পুরক্নবা নাকল অনিমক্না থৱায় য়াওনা থবক পায়খৎলি। লৌউ-শিংউ অমসুং হারশিংগী হিরমশিংদা ঐখোয় চেৎনা মতেং পাংনবা অসি চীঞ্জাক ৱাৎহন্দনবা অমসুং লৌমীশিংগী য়াইফনবা য়াম্না মরুওই। মতেং পাংনবা অসি খুমাঙচাউশিনহন্দুনা, য়ুরিয়া পুথোক্নবা হৌজিক লৈবাক অনি থবক পায়খৎলিবা অসিদা ঐ অপেনবা ফাওই।

মরুপশিং,

ঐখোয়গী লৈবাক অনিগী মরক্ত চৎথোক-চৎশিন ফগৎহনবা হায়বসি ঐখোয়গী মরুওইবা অমনি। আই.এন.এস.তি.সি, নোর্থন সি রুত অমসুং চেন্নাই-ব্লাদিভোষ্টোক কোরিদোরশিংগী অনৌবা থৌনাগা লোয়ননা ঐখোয়না মাঙলোমদা চঙশিনগনি। পোলারগী ঈশিংগী শরুকশিংদা থবক তৌনবা ভারতকী হিরোয়শিং ত্রেনিং পীগদৌরিবা অসিদা ঐ অপেনবা ফাওই। মসিনা আর্তিক লমদমদা ঐখোয় পুন্না থবক তৌমিন্নবা মপাঙ্গল কনখৎহনবা খক নত্তনা ভারতকী নহারোলশিং অনৌবা থবকশিং ফংনবগী খুদোংচাবশিং পীগনি।

মসি চপ মান্ননা, জহাজ শাবদা ঐখোয় মতেং পাংনরিবা অসিনা মখা তানা মেক ইন ইন্দিয়া ফগৎহনগনি। মসি ঐখোয়গী লৈবাক অনিমক কান্নবা ফংবগী অতোপ্পা অফবা খুদম অমনি অমসুং মসিনা থবক ফংবা, স্কিলশিং অমসুং লমদম অসিদা চৎথোক-চৎশিন হেনগৎহনগনি।

ইনর্জি ফংহনবা হায়বসি ভারত-রুসিয়াগী মরীগী মপাঙ্গল কনবা অমসুং মরুওইবা য়ুম্বী অমনি। ঐখোয়গী মৈখু চেন্দবা ইনর্জি পুথোকপগী থবকশিং খুমাঙচাউশিনহনবদা সিবিল ন্যুক্লিয়ার ইনর্জিগী লমদা চহি কয়া শুরবা ঐখোয় মতেং পাংনবা অসিনা মরুওইবা থৌদাং অমা লৌরি। লৈবাক অনিমক কান্নবা ফংবা মতেং পাংনবা অসি ঐখোয়না মখা চৎথগনি।

মালেম শীনবা থুংনা মখল কয়াগী সপ্লাই চেনশিং লৈহনবদা ক্রিতিকেল মিনরেলশিংগী লমদা ঐখোয় মতেং পাংনবা য়াম্না মরুওই। মসিনা ঐখোয়না মৈখু থাংদবা ইনর্জি, অৱাংবা থাক্কী মেনুফেকচরিং অমসুং অনৌবা উদ্যোগশিংদা ঐখোয় পুন্না থবক তৌমিন্নবদা মতেং পাংগনি।

মরুপশিং,

ভারত-রুসিয়াগী মরীশিংদা নাৎকী মতেং পাংনবা অমসুং মীগা-মীগা লৈনবা মরীশিংনা অখন্নবা মফম অমা কল্লি। চহি কয়া, লৈবাক অনিমক্কী মীওইশিং নুংশিনবা, ইকায়খুম্নবা অমসুং অমনা অমবু থাজবা থম্নদুনা লাক্লি। হায়রিবা মরীশিং অদু মখা তানা মপাঙ্গল কনখৎহন্নবা ঐখোয়না অনৌবা থবক কয়া পায়খৎকনি।

ইকুই কুইদনা হন্দক, রুসিয়াদা ভারতকী অনৌবা কন্সুলেত অনি হাংদোক্লে। মসিনা ঐখোয়গী মীয়াম মরক্ত থবক তৌমিন্নবা অমসুং মখোয়গী মরীশিং মখা তানা চেৎশিনহনবদা মতেং পাংগনি। চহি অসিগী ওক্তোবরদা, ‘কালমিকিয়া’ দা ইন্তরনেসনেল বুদ্ধিষ্ট ফোরমদা ভক্ত লাখ কয়া ভগবন বুদ্ধগী শেংলবা হকচাংগী শরুকশিংগী থৌজাল ফংখ্রে।

রুসিয়াগী মীয়ামগীদমক লেম্না নুমিৎ ৩০ গী ই-ভিসা পীবা অমসুং নুমিৎ ৩০ গী পুন্না লাকপা লমকোয়বা মীওইশিংগী ভিসা ঐখোয়না হৌদোক্কদৌরিবা অসিদা ঐ অপেনবা ফাওই।

শীনফম কয়াগী মীওইশিং চৎথোক-চৎশিন তৌনবা অসিনা ঐখোয়গী মীয়াম শম্নবা খক নত্তনা লৈবাক অনিমক্ত অনৌবা মপাঙ্গল অমসুং অনৌবা খুদোংচাবশিং পীগনি। মসিগী মতেং পাংনবা অসি পুক্নিং থৌগৎনবা ঙসি য়ানচে অনি খুৎয়েক পীনবদা ঐ অপেনবা ফাওই। ঐখোয় পুন্না ভোকেসনেল ইজুকেসন, স্কিল লৈহনবা অমসুং ত্রেনিংদা থবক তৌমিন্নগনি। ঐখোয়গী মহৈরোয়শিং, অখঙ-অহৈশিং অমসুং শান্নরোয়শিংগী মরক্ত লৈবাক অমদগী লৈবাক অমদা চৎথোক-চৎশিন তৌনগনি।

মরুপশিং,

ঙসি ঐখোয়না লমদম কয়াগী অমসুং মালেমগী থৌদোক-ৱাথোকশিংসু খন্নরে। হেক হৌরকপদগী, য়ুক্রেনগী ফিবমগী মতাংদা ভারতনা লেপ্তনা শান্তিগীদমক লাউদুনা লাক্লি। হিরম অসিদা শান্তি ওইবা অমসুং তুংকোইনা চৎনবা য়াগদবা ৱারোইশিন অমা পুরক্নবা থবকশিং ঐখোয়না তরাম্না ওক্কনি। ভারতনা মতম পুম্নমক্ত মতেং পাংদুনা লাক্লি অমসুং মতেং পাংনবা মতম পুম্নমক্ত থৌরাং তৌদুনা লৈগনি।

ভারত অমসুং রুসিয়া মতম শাংনা য়াম্না নকশিন্ননা তেরোরিজমগী মথক্ত থবক পায়খৎতুনা লাক্লি। পাহালগামদা তেরোরিষ্টশিংনা লান্দারকপা নত্ত্রগা ক্রোকস সিতি হোলদা লান্দারকপা ওইবা য়াই, অসিগুম্বা থৌদোকশিংগী হৌরকফম চপ মান্নৈ। তেরোরিজম্না মীওইবা খুন্নাইগী গুনশিংদা হকথেংননা খুৎ থাই হায়না ভারতনা চেৎনা থাজৈ অমসুং মালেম্না মসিগী মায়োক্ত অমতা ওইনা লৈবা অসি ঐখোয়গী খ্বাইদগী কনবা পাঙ্গলনি।

ভারত অমসুং রুসিয়া য়ু.এন, জি-২০, ব্রিক্স, এস.সি.ও অমসুং অতোপ্পা লুপশিংদা চেৎনা মতেং পাংনরি। পুন্না থবক তৌমিন্নদুনা মাঙলোমদা চঙশিন্দুনা, হায়রিবা লুপশিং অসিদা ঐখোয় মখা তানা ৱারি শানগনি অমসুং মতেং পাংগনি।

ইকায়খুম্নরবা,

তুংদা, ঐখোয়গী মরুপ-মপাংগী মরীনা মালেমগী খুদোংচাদবশিং মায়োক্ননবা ঐখোয়না থৌনা পীগনি অমসুং মসিনা ঐখোয়গী তুংলমচৎ ফগৎহনগনি হায়না ঐনা থাজৈ।

অমুক  হন্না, ঐনা অদোম অমসুং অদোমগী মীহুৎ কাংবু ভারত্ত লাকপগীদমক ঐনা থম্মোয় শেংনা থাগৎচরি।

স্পাসিবা

দিসক্লেমর: মসি প্রধান মন্ত্রীগী ৱারোলদগী চাউরাকপা হন্দোকপনি। অশেংবা ৱারোল হিন্দীদা পীখি।

***