ਪੀਐੱਮਇੰਡੀਆ

ਰਾਸ਼ਟਰਪਤੀ ਸ਼ਵਕਤ ਮਿਰਜ਼ਿਯੋਏਵ ਦੇ ਸੱਦੇ ‘ਤੇ ਮੈਂ 29-30 ਅਗਸਤ ਨੂੰ ਸਰਕਾਰੀ ਦੌਰੇ ‘ਤੇ ਤਾਸ਼ਕੰਦ ਜਾਵਾਂਗਾ। ਹਾਲ ਹੀ ਦੇ ਸਾਲਾਂ ਵਿੱਚ ਭਾਰਤ-ਉਜ਼ਬੇਕਿਸਤਾਨ ਰਣਨੀਤਕ ਭਾਈਵਾਲੀ ਵਿੱਚ ਮਹੱਤਵਪੂਰਨ ਤਰੱਕੀ ਹੋਈ ਹੈ। ਮੈਂ ਰਾਸ਼ਟਰਪਤੀ ਮਿਰਜ਼ਿਯੋਏਵ ਨਾਲ ਵਪਾਰ ਅਤੇ ਨਿਵੇਸ਼, ਡਿਜੀਟਲ ਸੰਪਰਕ, ਰੱਖਿਆ, ਊਰਜਾ ਅਤੇ ਵਿਕਸਿਤ ਭਾਰਤ ਅਤੇ ਯੰਗੀ ਉਜ਼ਬੇਕਿਸਤਾਨ ਦੇ ਸਾਡੇ ਸਾਂਝੇ ਦ੍ਰਿਸ਼ਟੀਕੋਣ ਨੂੰ ਅੱਗੇ ਵਧਾਉਣ ਲਈ ਸਹਿਯੋਗ ਨੂੰ ਹੋਰ ਡੂੰਘਾ ਕਰਨ ਬਾਰੇ ਵਿਚਾਰ-ਵਟਾਂਦਰਾ ਕਰਨ ਲਈ ਉਤਸੁਕ ਹਾਂ। ਮੈਂ ਤਾਸ਼ਕੰਦ ਸਟੇਟ ਯੂਨੀਵਰਸਿਟੀ ਆਫ਼ ਓਰੀਐਂਟਲ ਸਟੱਡੀਜ਼ ਵਿੱਚ ਸ਼ਾਸਤਰੀ ਸਮਾਰਕ ਅਤੇ ਮਹਾਤਮਾ ਗਾਂਧੀ ਕੇਂਦਰ ਦਾ ਵੀ ਦੌਰਾ ਕਰਾਂਗਾ, ਜੋ ਸਾਡੇ ਦੋਵਾਂ ਦੇਸ਼ਾਂ ਨੂੰ ਜੋੜਨ ਵਾਲੇ ਨਜ਼ਦੀਕੀ ਸੱਭਿਆਚਾਰਕ ਅਤੇ ਲੋਕ-ਦਰ-ਲੋਕ ਸਬੰਧਾਂ ਲਈ ਇੱਕ ਸ਼ਰਧਾਂਜਲੀ ਹੈ।

ਤਾਸ਼ਕੰਦ ਤੋਂ ਮੈਂ ਕਿਰਗਿਜ਼ ਗਣਰਾਜ ਦੇ ਰਾਸ਼ਟਰਪਤੀ ਮਹਾਮਹਿਮ ਸ਼੍ਰੀ ਸਦਿਰ ਜਾਪਾਰੋਵ ਦੇ ਸੱਦੇ ‘ਤੇ ਬਿਸ਼ਕੇਕ ਜਾਵਾਂਗਾ, ਜਿੱਥੇ ਮੈਂ ਮਹੱਤਵਪੂਰਨ ਸੰਗਠਨ, ਸ਼ੰਘਾਈ ਸਹਿਯੋਗ ਸੰਗਠਨ (ਐੱਸਸੀਓ) ਦੇ 25 ਸਾਲ ਪੂਰੇ ਹੋਣ ਦੇ ਮੌਕੇ ‘ਤੇ ਆਯੋਜਿਤ 26ਵੇਂ ਐੱਸਸੀਓ ਸਿਖ਼ਰ ਸੰਮੇਲਨ ਵਿੱਚ ਹਿੱਸਾ ਲਵਾਂਗਾ। ਭਾਰਤ 2017 ਤੋਂ ਐੱਸਸੀਓ ਦਾ ਸਰਗਰਮ ਅਤੇ ਰਚਨਾਤਮਕ ਮੈਂਬਰ ਰਿਹਾ ਹੈ। ਮੈਂ ਸੁਰੱਖਿਆ, ਸੰਪਰਕ ਅਤੇ ਮੌਕਿਆਂ ‘ਤੇ ਆਧਾਰਿਤ ਖੇਤਰ ਲਈ ਭਾਰਤ ਦੇ ਦ੍ਰਿਸ਼ਟੀਕੋਣ ਨੂੰ ਅੱਗੇ ਵਧਾਉਣ ਅਤੇ ਖੇਤਰ ਨੂੰ ਅੱਤਵਾਦ, ਵੱਖਵਾਦ ਅਤੇ ਕੱਟੜਵਾਦ ਦੇ ਸੰਕਟ ਤੋਂ ਮੁਕਤ ਬਣਾਉਣ ਲਈ ਹੋਰ ਮੈਂਬਰ ਦੇਸ਼ਾਂ ਨਾਲ ਮਿਲ ਕੇ ਕੰਮ ਕਰਨ ਲਈ ਉਤਸੁਕ ਹਾਂ, ਜੋ ਸਾਡੇ ਗੁਆਂਢ ਅਤੇ ਇਸ ਤੋਂ ਪਰੇ ਵੀ ਸ਼ਾਂਤੀ ਅਤੇ ਸਥਿਰਤਾ ਲਈ ਲਗਾਤਾਰ ਖ਼ਤਰਾ ਬਣੇ ਹੋਏ ਹਨ।

ਮੈਂ ਰਾਸ਼ਟਰਪਤੀ ਜਾਪਾਰੋਵ ਅਤੇ ਐੱਸਸੀਓ ਦੇ ਹੋਰ ਨੇਤਾਵਾਂ ਨਾਲ ਮੁਲਾਕਾਤ ਕਰਨ ਅਤੇ 6ਵੀਆਂ ਵਿਸ਼ਵ ਨੋਮੈਡ ਖੇਡਾਂ ਦੇ ਉਦਘਾਟਨੀ ਸਮਾਰੋਹ ਵਿੱਚ ਹਿੱਸਾ ਲੈਣ ਲਈ ਵੀ ਉਤਸੁਕ ਹਾਂ। ਇਹ ਸਮਾਗਮ ਮੱਧ ਏਸ਼ੀਆ ਦੀ ਅਮੀਰ ਜੀਵੰਤ ਵਿਰਾਸਤ ਦਾ ਜਸ਼ਨ ਹੈ, ਜਿਸ ਦਾ ਭਾਰਤ ਡੂੰਘਾ ਸਨਮਾਨ ਕਰਦਾ ਹੈ।

ਮੈਨੂੰ ਵਿਸ਼ਵਾਸ ਹੈ ਕਿ ਇਹ ਦੌਰਾ ਮੱਧ ਏਸ਼ੀਆ ਵਿੱਚ ਭਾਰਤ ਦੀਆਂ ਰਣਨੀਤਕ ਭਾਈਵਾਲੀਆਂ ਨੂੰ ਮਜ਼ਬੂਤ ਕਰੇਗਾ, ਇਸ ਖੇਤਰ ਨਾਲ ਸਾਡੇ ਸੱਭਿਅਤਾਪੂਰਨ ਜੁੜਾਅ ਨੂੰ ਹੋਰ ਮਜ਼ਬੂਤ ਕਰੇਗਾ ਅਤੇ ਸ਼ਾਂਤੀ, ਸਥਿਰਤਾ ਅਤੇ ਖੁਸ਼ਹਾਲੀ ਦੀ ਸਾਡੀ ਸਾਂਝੀ ਖਾਹਿਸ਼ ਨੂੰ ਅੱਗੇ ਵਧਾਏਗਾ। ਇਹੀ ਕਦਰਾਂ-ਕੀਮਤਾਂ ਦੁਨੀਆ ਨਾਲ ਭਾਰਤ ਦੇ ਜੁੜਾਅ ਦੇ ਮੂਲ ਵਿੱਚ ਵੀ ਹਨ।

***

ਐਮਜੇਪੀਐਸ/ਐਸਐਸ/ਐਸਟੀ