ভারতকী প্রধানমন্ত্রী

য়োর এক্সিলেন্সী, প্রধান মন্ত্রী,
লৈবাক অনিমক্কী মীহুৎশিং,
মীদিয়াগী মরুপশিং,
খুরুমজরি!
 

মহাক্কী অহানবা ভারত খোঙচৎতা প্রধান মন্ত্রীবু তরাম্না ওকপদা ঐহাক নুংঙাইবা ফাওই।

মসি মহাক্কী ভারতকী অহানবা খোঙচৎনি, অদুবু মহাক্না ভারতকা মতম শাংনা মরী লৈন্দুনা লাকখি। মহাক্না চহি কয়া এন্তৱের্পকী মেয়র ওইনা থবক তৌখি অমসুং মতম পুম্নমক্তা এন্তৱের্পকী অচৌবা ভারতকী কাংলুপ অমসুং ভারত-বেলজিয়ম দাইমন্দ ললোন-ইতিকপু মতেং পাংখি।

মরুপশিং,

ভারত-বেলজিয়ম মরীগী হৌরকফম অসি পুৱারীদা য়াম্না মনুং হঞ্জিন্না লৈখ্রে। অহানবা মালেমগী লাঞ্জাওগী মতমদা বেলজিয়মদা লৈরিবা ভারতকী লান্মী লিশিং কয়াগী থৌনা অমসুং কত্থোকপা অসি ঐখোয়গী অমত্তা ওইবা মেমোরীগী মরুওইবা শরুক অমনি।

ঙসিদি, দেমোক্রেতিক ভেল্যুশিং, মার্কেত ইকোনোমী, অমসুং মীয়ামগী মরক্তা লৈনরিবা অচেৎপা মরীনা ঐখোয়বু মহৌশাগী ওইবা পার্তনর ওইহল্লি।

মরুপশিং,

চহি তরাগী মমাংদা ঐহাক্না বেলজিয়মদা চৎপগী খুদোংচাবা ফংখি অমসুং হৌখিবা চহি তরা অসিদা ঐখোয়গী পার্তনরশিপ অসিনা চাউনা খুমাং চাউশিল্লকপদা ঐহাক্না য়াম্না নুংঙাইবা ফাওই।

ঙসিদি, ঐখোয়গী কোওপরেসনগী স্কোপ অসি ত্রেদিস্নেল সেক্তরশিংদগী হেন্দোক্তুনা দিফেন্স অমসুং ক্লিন ইনর্জীগুম্বা স্ত্রেতেজিক এরিয়াশিংদা পাকথোক চাউথোক্লে। ঐখোয়না জোরাৱর তেঙ্কগুম্বা এদভান্স দিফেন্স ইক্বিপমেন্তদা পুন্না থবক তৌমিন্নরি। অন্ধ্র প্রদেশকী কাকিনাদা, ঐখোয়না মালেমগী খ্বাইদগী চাউবা গ্রীন এম্মোনিয়া প্রোজেক্ত অমা শেমগৎলি।

মরুপশিং,

ঙসিদি, মালেম অসি অচৌবা অওনবা কয়া থোক্লিবা মতম অমা ওইরি। মালেমগী মফম কয়াদা লানগী থৌদোকশিং অসি লেপ্তনা থোক্লি। চিঞ্জাক ওইগেরা, ফ্যুএল ওইগেরা, নৎত্রগা সপ্লাই চেন ওইগেরা, সেক্তর খুদিংমক্না খুদোংচাদবশিংনা শোকহল্লি।

অসিগুম্বা শীংনবনা থল্লবা ফিভম অসিদা, ভারতকী শেন্মিৎলোনগী খোঙজেল অসি লেপ্তনা হেনগৎলক্লি। ঐখোয়না হৌখিবা ক্বার্তরদা ৭.৮%গী গ্রোথ অমা রেকোর্দ তৌখি। ঙসিদি, ভারতকী চাউখৎপগী ৱারী অসি মালেমগীদমক থাজবা অমসুং অনৌবা খুদোংচাবগী সোর্স অমা ওইরক্লি।

মরুপশিং,

চহি অসিগী হৌরকপদা ঐখোয়না পুৱারী ওইরবা ভারত-য়ুরোপিয়ন য়ুনিয়ন ফ্রী ত্রেদ এগ্রীমেন্ত অমা লোইশিনখি। মালেমগী খ্বাইদগী চাউবা দেমোক্রেতিক শক্তিশিংগী মরক্তা লৈনরিবা অসিগুম্বা মমাংদা অমুক্তা ওইখিদ্রিবা কোওপরেসন অসিনা মালেমগী তংদু লৈতাবা, চাউখৎপা অমসুং পুন্না চাউখৎপা পুরকপদা অনৌবা ইনোৎ অমা পীরগনি।

ভারতকী লেপ্পা লৈতবা শেন্মিৎলোনগী খুমাং চাউশিল্লকপা অমসুং মসিগী এগ্রীমেন্ত অসিনা ঐখোয়গী শেন্মিৎলোনগী মরীশিংদা অনৌবা লম্বী অমা হাংদোক্লে। ঙসিদি, ঐখোয়না ওইথোকপা য়াবশিং অসি কংক্রিৎ ওইবা মহৈ ওইনা ওন্থোক্নবা মরুওইবা খোঙথাং কয়া অমা লৌখৎলে।

মরুপশিং,

বেলজিয়ন কম্পেনীশিংগীদমক, ঐখোয়না ভারত্তা ইনভেস্তমেন্ত ফাস্ত-ত্রেক মেকানিজম অমা লিংখৎলে। ঐখোয়না ইন্দিয়া-বেলজিয়ম বিজিনেস ফোরম অসি চাং নাইনা পাংথোক্নবা ৱারেপ লৌরে। ঐখোয়না লৈবাক অনিমক্কী ফাইনান্সিএল, ফিনতেক অমসুং রেগ্যুলেতরী ইন্সতিত্যুসনশিংগী মরক্তা কোওর্দিনেসন মপাঙ্গল কনখৎহল্লগনি।

মসিগী খোঙথাং পুম্নমক্কী খুত্থাংদা, লাক্কদৌরিবা চহি মঙা অসিদা ঐখোয়না লৈবাক অনিগী ওইবা ললোন-ইতিক শরুক অনিদা হেনগৎহন্নবা পান্দম থম্লি।

মরুপশিং,

দিফেন্স অমসুং সেক্যুরিতী কোওপরেসন অসি ঐখোয়গী মরীগী মরুওইবা য়ুম্বী অমনি। ঙসি ঐখোয়না লৈবাক অনিগী মরক্তা মিলিতরী একচেঞ্জ অমসুং ত্রেনিং কোওপরেসন হেনগৎহন্নবা য়ানখি।

ঐখোয়গী সরকারশিং অমসুং দিফেন্স ইন্দস্ত্রীশিংগী মরক্তা তৌনরিবা এগ্রীমেন্তশিংনা দিফেন্স কো-দিবেলপমেন্ত অমসুং কো-প্রদক্সনগী অনৌবা খুদোংচাবশিং ফংহল্লগনি। ঐখোয়না ঐখোয়গী এজেন্সীশিংগী মরক্তা ইন্তেলিজেন্স শেয়র তৌবা অমসুং ক্রাইম থেংনবদা মতেং পাংনবা মখা তানা মপাঙ্গল কনখৎহল্লগনি।

মরুপশিং,

ক্লিন ইনর্জীগী তুংলমচৎ অমসুং থাজবা য়াবা সপ্লাই চেনশিং অসি ঐখোয়গী অপুনবা প্রাইওরিতিশিংনি। ঙসি খুৎয়েক পীনখিবা রিন্যুএবল ইনর্জীগী এম.ও.য়ু. অসিনা ঐখোয়গী সস্তেনেবিলিতী কোওপরেসনদা অনৌবা ইনোৎ পীগনি। ক্রিতিকেল মিনরেলশিংদা, ঐখোয়না প্রোসেসিং অমসুং রিসাইক্লিংদা মতেং পীনবা হেনগৎহন্নবা ৱারেপ লৌরে।

সেমিকন্দক্তরগী লমদা বেলজিয়মগী এক্সপর্তীস অমসুং ভারতকী স্কেল অসি অমগা অমগা মতেং পাংনরি। মসিগী মাইকৈ অসিদা, ঐখোয়না বেলজিয়মগী আই.এম.ই.সি. ইন্সতিত্যুৎ অসি ভারতকী সেমিকন্দক্তর ইকোসিস্তেমগা শম্নহন্নবা পুন্না থবক তৌমিন্নগনি।

মরুপশিং, মী অমগা মী অমগগী মরক্তা লৈনরিবা মরী অসি ঐখোয়গী মরীগী খ্বাইদগী চাউবা মপাঙ্গলনি। ঙসি, ঐখোয়না ঐখোয়গী স্তার্ত-অপশিংগী মরক্তা মরী মপাঙ্গল কনখৎহন্নবা অমসুং মেরিতাইম সেক্তরদা কেপাসিতী বিল্দিং হেনগৎহন্নবা য়ানখি।

ঐখোয়না য়ুনিভর্সিতী অমসুং রিসর্চ কোওপরেসনসু মপাঙ্গল কনখৎহল্লগনি। অমসুং, তেলেন্ত মোবিলিতীদা মতেং পাংনবা, ঐখোয়না অথুবা মতমদা “মাইগ্রেসন অমসুং মোবিলিতী পার্তনরশিপ এগ্রীমেন্ত” অমা লোইশিনগনি।

মরুপশিং,

ঙসি ঐখোয়না রিজনেল অমসুং গ্লোবেল দিবেলপমেন্তগী মতাংদা কুপ্না খন্ন-নৈনখি। ভারত অমসুং বেলজিয়ম অনিমক্না লো, দাইলোগ অমসুং দিপ্লোমেসীদা থাজবা থম্লি।

য়ুক্রেন ওইগেরা নৎত্রগা নোংচুপ এসিয়া ওইগেরা, ঐখোয়না লান অথুবদা লোইশিনবা অমসুং শান্তি অমুক হন্না পুরক্নবা হোৎনরিবা পুম্নমক অসি শৌগৎলি। অমসুং তেরোরিজমবু মসিগী মওং-মতৌ পুম্নমক্তা মুত্থৎপা অসি ঐখোয়গী অপুনবা ফিরেপ অমনি।

য়োর এক্সলেন্সী,

মমাং থাদা বেলজিয়ম অমসুং নেদর্লেন্দসনা হোকী ৱার্ল্দ কপ পুন্না য়ুম্বু ওইখি। ঐহাক্না অদোমবু মসিগী গ্রান্দ ৱর্ল্দ কপ অসি মায় পাক্না পাংথোকপগীদমক নুংঙাইবা ফোংদোকচরি। ঐহাক্না ঐখোয়গী শান্নরোইশিংবু মখোয়গী কন্না হোৎনবগী অমসুং মখোয়গী পর্ফোর্মেন্সকীদমক থাগৎপা ফোংদোকচরি।

দাইমন্দশিংনা মতম কয়াদগী ভারত অমসুং বেলজিয়মগী মরক্তা লৈনরিবা মরী অসি শম্নহল্লি। ঙসিদি, ঐখোয়না পুৱারীগী ওইবা মরী অসিবু অনৌবা অমসুং হেন্না মপুং ফাবা মরী অমদা ওন্থোক্লি।

ঙসিগী খন্ন-নৈনবনা ঐখোয়গী নাকল অনিগী মরীদা অনৌবা পন্দুপ অমা হৌরক্লগনি হায়না ঐনা থাজবা থম্লি। ঐহাক্না অমুক্কা হন্না অদোম অমসুং অদোমগী মীহুৎ কাংবুবুসু ভারত্তা তরাম্না ওকচরি।

অদোমবু হন্না-হন্না থাগৎচরি।

খঙহঞ্জবা: মসি প্রধান মন্ত্রীগী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

****