ভারতকী প্রধানমন্ত্রী

এক্সিলেন্সীশিং
ব্রিক্স বিজিনেস কম্ম্যুনিতীগী লুচিংবশিং,
ইন্নোভেতরশিং অমসুং মরুপশিং,
খুরুমজরি!

ব্রিক্স বিজিনেস ফোরমদা ময়াম পুম্নমকপু তরাম্না ওকচরি।

চহি অসিদা ঐখোয়না ব্রিক্সকী চহি ২০শুবা মপোক কুমওন পাংথোক্লি। গ্রুপ অসি ২০০৬তা হৌদোকখিবা মতমদা, মসিদা লৈবাক মরি খক্তমক য়াওখি। ঙসিদি ব্রিক্স অমসুং মসিগী পার্তনরশিং য়াওনা ঐখোয়না লৈবাক ২১গী ইমুং অমা লৈরে।

ঙসিদি ব্রিক্স লৈবাকশিংনা মালেমগী মীশিংগী চাদা ৫০, মালেমগী জি.দি.পি.গী চাদা ৪০, অমসুং মালেমগী ললোন-ইতিক্কী চাদা ২৫ হেন্না রিপ্রজেন্ত তৌরি। মসি খক্তা নত্তে, চহি খরা অসিদা, মালেমগী জি.দি.পি. অসি চাউরাক্না শরুক ২.৫ হেনগৎলকপা মতমদা, ব্রিক্স লৈবাকশিংগী অপুনবা জি.দি.পি. অসি চাউরাক্না শরুক ৪.৫ হেনগৎলক্লি। অতোপ্পা ৱাহৈ অমদা হায়রবদা, ব্রিক্সকী শেন্মিৎলোনগী পাঙ্গল অসি মালেমগী শেন্মিৎলোনগী চাংদগী শরুক অনি হেনগৎলে।

ব্রিক্স লৈবাকশিং অসি মালেমগী ইন্নোভেসন অমসুং সোলুসনশিংগী মরুওইবা সেন্তরশিং ওইরক্লি। গ্রাসরুৎ ইনিসিএতিবতগী হৌরগা ফ্রন্তিয়র তেক্নোলোজীশিং ফাওবদা, ঐখোয়গী লৈবাক শিনবা থুংনা ইন্নোভেসনগী অনৌবা ওইথোকপা য়াবশিং শেমগৎলি। ব্রিক্সকী চাউখৎলক্লিবা স্কেল, খোঙজেল অমসুং অপাম্বা অসি ঐখোয়গী মরক্তা ময়েক শেংনা উবা ফংলি। ভারত্তা পাংথোক্লিবা ফোরম অসি খ্বাইদগী চাউবা ব্রিক্স বিজিনেস ফোরমনি।

মরুপশিং,

ভারতকী ব্রিক্স প্রসিদেন্সীগী থিমদি “বিল্দিং ফোর রিসিলিয়েন্স, ইন্নোভেসন, কোওপরেসন অমসুং সস্তেনেবিলিতী”নি।

হৌখিবা চহি ১২ অসিদা, ভারতনা মসিগী মন্ত্র অসিবু শেন্মিৎলোন অমসুং ললোন-ইতিক্কী পোলিসীগী য়ুম্ফম ওইহনখ্রে। রেসিলিয়েন্সীগী মতাংদা, ভারতনা মসিগী সপ্লাই চেনশিং অসি ইনর্জীদগী তেক্নোলোজী ফাওবদা হেন্না দাইভর্সিফাই অমসুং থাজবা য়াবা ওইহল্লে। মালেমগী তংদু লৈতাবা লৈরবসু ভারতনা মালেমদা চাউখৎপা অমসুং অচেৎপা লৈবগী থাজবা পীবা ঙমহল্লিবা অসিমক মসিগী মপাঙ্গল অসিনি।

ঐখোয়না ঐখোয়গী লম্বীশিং, রেলৱেজশিং, পোর্তশিং অমসুং এয়রপোর্তশিং য়াম্না থুনা পাকথোক চাউথোকহল্লি। মসিগা লোয়ননা ঐখোয়না স্ত্রেতেজিক সেক্তরশিং হায়বদি শিপ বিল্দিং, সেমিকন্দক্তর, ক্বান্তম তেক্নোলোজী, ক্রিতিকেল মিনরেলস অমসুং বাইওতেক্নোলোজীদা অনৌবা কেপাসিতীশিং শেমগৎলি। সেক্তরশিং অসিদা, ভারত অসি মালেমগী ললোন-ইতিক্কী অনৌবা খুদোংচাবশিংগী হাব অমা ওইনা থোরক্লি। মরম অদুনা, মেক ইন ইন্দিয়া, ইন্নোভেৎ ৱিথ ইন্দিয়া, অমসুং স্কেল ফোর দি ৱার্ল্দ।

মরুপশিং,

ঙসিদি, ভারতনা স্তার্ত-অপ রিভোলুসন অমা উবা ফংলি। স্তার্ত-অপ ২,০০,০০০ হেন্না অমসুং য়ুনিকোর্ন ১২০ হেনবনা ভারত অসি মালেমগী ওইবা সোলুসনশিংগী হব অমা ওইরক্লি। ব্রিক্স ভারত ইন্নোভেৎস এক্সপোদা অদোম্না মসি উবা ফংলগনি।

ঐখোয়গী স্তার্ত-অপশিংনা এ.আই.গী খুত্থাংদা এজুকেসন অমসুং হেল্থকেয়রদা অহোংবা পুরক্লি, গ্রীন হাইদ্রোজেন অমসুং বেত্তরীশিংদা থবক তৌরি, অমসুং দিফেন্স অমসুং স্পেসতা অনৌবা ঙমখৈশিং লান্থোক্লি। হৌজিক্তি, ব্রিক্সকী খুত্থাংদা, ঐখোয়না মালেমগী থাক্কী ইন্নোভেসনশিং অসি মালেমগী কৈথেলশিংদা পুথোক্কদবনি।

মরুপশিং,

ভারতকী ইন্নোভেসনগী ৱারীগী অতোপ্পা মশক থোকপা মগুনদি পোপুলেসন স্কেলদা ইন্নোভেসন তৌবনি। ভারতকী য়ুনিফাইদ পেমেন্ত ইন্তরফেস (য়ু.পি.আই.) না ফাইনান্সিএল ইনক্লজন অমসুং দিজিতেল ত্রাঞ্জেক্সনশিংদা অনৌবা ইথিল পীরি।

ঙসিদি, মালেমগী রিএল-তাইম পেমেন্তশিংগী ৫০%দি মসিগী তেক্নোলোজী অসিনা পাৱর তৌরি। দিজিতেল লেয়র অসিদা অনৌবা সোলুসনশিং শেমগৎনবা ঐখোয়না ইন্দস্ত্রী অমসুং স্তার্ত-অপশিংদা ওপন ইকোসিস্তেম অমা ফংহল্লে। লৈবাক কয়ানা ভারতকী মালেমগী থাক্কী ইকোসিস্তেম অসি এদোপ্ত তৌবা অসিদা ঐখোয়না চাউথোকচবা ফাওই। ব্রিক্স লৈবাকশিংগী ইন্নোভেতরশিংনা মখোয়গী লৈবাকশিংগীদমক অনৌবা সোলুসনশিং পুথোক্নবগীদমক মসিগী এক্সপিরিয়েন্স অসিদগী খুমাং চাউশিনবা ঙমগনি।

মরুপশিং,

ঙসিদি, মালেম শিনবা থুংনা ললোন-ইতিক্কী অথিংবা হেনগৎলকপগা লোয়ননা, ভারতনা শেন্মিৎলোনগী থোংশিং শেমগৎলি। ২০১৪দগী হৌনা, ঐখোয়না মালেমগী লৈবাক ৪০রোমগা লোয়ননা ফ্রী ত্রেদ এগ্রীমেন্ত তৌনখ্রে। ব্রিক্সকী মনুংদা ঐখোয়গী এপ্রোচ অসিসু মান্নৈ, অথিংবা হন্থহনবা অমসুং ললোন-ইতিক্কী খুদোংচাবশিং পাকথোক চাউথোকহনবা।

মরম অদুনা, ঐখোয়গী প্রসিদেন্সীগী মখাদা ঐখোয়না লৌউ-শিংউ, হকশেল, স্কিল অমসুং স্মার্ত গ্রিদকুম্বা লমশিংদা অনৌবা কোওপরেসন নেৎৱার্কশিং লিংখৎলে। স্তার্ত-অপশিং অমসুং এস.এম.ই.শিংবু মার্কেতশিং অমসুং ফাইনান্সকা শম্নহন্নবা ঐখোয়না ব্রিক্স ইনক্যুবেতর নেৎৱার্ক, ব্রিক্স এম.এস.এম.ই. পোর্তেল, অমসুং ব্রিক্স স্তার্ত-অপ ইন্নোভেসন ফন্দগুম্বা ইনিসিয়েতিবশিং হৌদোক্লে।

ময়াম পুম্নমক্না অসিগুম্বা কোওপরেসন ফ্রেমৱার্কশিং অসিদগী কান্নবা ফংগনি অমসুং ঐখোয়গী লৈবাকশিংগী মরক্তা ইনভেস্তমেন্ত অমসুং তেলেন্তগী আর্কচেজ মখা তানা হেনগৎহল্লগনি।

মরুপশিং,

মালেমগী ওইবা ললোন-ইতিক অসি সমুদ্রগী লম্বীশিং অসি ঙাক-শেনবা, সপ্লাই রুতশিং অসি হাংদোকপা অমসুং সমুদ্রগী হীরোইশিং অসি ঙাক-শেনবা মতমদা খক্তদা খুমাং চাউশিনবা ঙমগনি। মরম অসিনা ভারত অসি নেভিগেসনগী নীংতম্বা অমসুং সমুদ্রগী হীরোইশিংগী সেফতীগীদমক চাউনা এদভোকেত তৌরিবা অমনি।

ব্রিক্স ৱুমেনস বিজিনেস এল্লাইন্স অসিসু ঐখোয়গী ভিজনগী মরুওইবা শরুক অমনি। ঐখোয়না নুপী ওন্ত্রপ্রেন্যুওরশিংবু ঐখোয়গী গ্রোথকী ৱারী লমজিংনবা পাম্মি। ভারত্তা পাংথোকপা এল্লাইন্সকী মীফম অসিদা নুপী বিজিনেস লিদর ২০০ রোম্না শরুক য়াখিবা অসিদা ঐখোয়না য়াম্না নুংঙাইবা ফাওই।

মরুপশিং, ব্রিক্সনা মখোয়গী অহুমশুবা চহি তরাগী খুজিংদা চঙশিল্লকপদা, ঐনা ব্রিক্স বিজিনেস কাউন্সিলদা হায়জরি মদুদি… ব্রিক্স লৈবাকশিংগী মরক্তা খ্বাইদগী মরুওইবা ত্রেদ বেরিয়র ১০ মুত্থৎনবা রিপোর্ত অমা শেম্বা ঙমগদ্রা? ঐখোয়না চহি খুদিংগী ব্রিক্স স্তার্তঅপ ১০০বু ব্রিক্সকী অতোপ্পা কৈথেলশিংদা চাউখৎনবা মতেং পাংবা ঙমগদ্রা? ঐখোয়গী বিজিনেসশিংগী মরক্তা অনৌবা পার্তনরশিপ ১০০০ শেমগৎপা ঙমগদ্রা? ঐখোয়না চহি খুদিংগী ঐখোয়গী খোংজেল অসি বেঞ্চমার্ক অহুম অসিগী মাইকৈদগী য়েংশিনগদবনি।

ঐখোয়না ব্রিক্সকী পান্দমবু এক্সন অমসুং ঐখোয়গী অপুনবা শক্তিবু গ্লোবেল সোলুসনশিংদা ওন্থোক্কনি। ব্রিক্সনা মাংলোমদা চংশিনবা অমসুং মালেম অসিবু মাংলোমদা চংশিনবদা মতেং পাংবা ওইরসনু।

ময়াম পুম্নমকপু হন্না-হন্না থাগৎচরি।

*****