ಪಿಎಂಇಂಡಿಯಾ

ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಇಂದು ಹೊಸದಿಲ್ಲಿಯಲ್ಲಿ ‘ಸೆಮಿಕಾನ್ ಇಂಡಿಯಾ 2026’ (SEMICON India 2026) ಅನ್ನು ಉದ್ಘಾಟಿಸಿದರು. ಈ ಕಾರ್ಯಕ್ರಮವನ್ನು ಉದ್ದೇಶಿಸಿ ಮಾತನಾಡುತ್ತಾ ಮತ್ತು ಇದರ ಐದನೇ ಆವೃತ್ತಿಯ ಮಹತ್ವವನ್ನು ಉಲ್ಲೇಖಿಸುತ್ತಾ, ಪ್ರಧಾನಮಂತ್ರಿಯವರು ಭಾಗವಹಿಸುತ್ತಿರುವ ಎಲ್ಲರಿಗೂ ಆತ್ಮೀಯ ಶುಭಾಶಯಗಳನ್ನು ಕೋರಿದರು. ಶೃಂಗಸಭೆಯಲ್ಲಿ ಪಾಲ್ಗೊಳ್ಳಲು ಭಾರತಕ್ಕೆ ಆಗಮಿಸಿದ ಅಂತಾರಾಷ್ಟ್ರೀಯ ಪ್ರತಿನಿಧಿಗಳಿಗೆ ಅವರು ವಿಶೇಷ ಕೃತಜ್ಞತೆಯನ್ನು ವ್ಯಕ್ತಪಡಿಸಿದರು. “ವಿದೇಶಗಳಿಂದ ಭಾರತಕ್ಕೆ ಆಗಮಿಸಿರುವ ಅತಿಥಿಗಳಿಗೆ ನಾನು ವಿಶೇಷ ಸ್ವಾಗತವನ್ನು ಕೋರುತ್ತೇನೆ,” ಎಂದು ಶ್ರೀ ಮೋದಿ ನುಡಿದರು.

‘ಸೆಮಿಕಾನ್ ಇಂಡಿಯಾ’ (Semicon India) ಆರಂಭ ಮತ್ತು ‘ವಿಶ್ವಕರ್ಮ ದಿವಸ’ದ ನಡುವೆ ಪ್ರಬಲವಾದ ಸಾಮ್ಯತೆಯನ್ನು ಗುರುತಿಸಿದ ಪ್ರಧಾನಮಂತ್ರಿಯವರು, ನಿರ್ಮಾಣ ಮತ್ತು ಸೃಜನಶೀಲತೆಯ ವಿಷಯದಲ್ಲಿ ದೇಶಕ್ಕಿರುವ ಶತಮಾನಗಳಷ್ಟು ಹಳೆಯ ಪರಂಪರೆಗೆ ಗೌರವ ಸಲ್ಲಿಸಿದರು. ಸಾಂಪ್ರದಾಯಿಕ ಸೃಜನಶೀಲ ಶಕ್ತಿಯನ್ನು 21ನೇ ಶತಮಾನದ ತಂತ್ರಜ್ಞಾನ ಮತ್ತು ದೂರದೃಷ್ಟಿಯೊಂದಿಗೆ ಸಂಯೋಜಿಸುವ ಸುಂದರವಾದ ಕಾಕತಾಳೀಯತೆಯತ್ತ  ಅವರು ಬೆಟ್ಟು ಮಾಡಿದರು. “ಇದು ‘ಆತ್ಮನಿರ್ಭರ ಭಾರತ’ ಮತ್ತು ‘ವಿಕಸಿತ ಭಾರತ’ದ ನಿರ್ಮಾಣಕ್ಕೆ ಸ್ಫೂರ್ತಿಯಾಗಿದೆ,” ಎಂದು ಶ್ರೀ ಮೋದಿ ಪ್ರತಿಪಾದಿಸಿದರು.

ಕಳೆದ 15 ದಿನಗಳಲ್ಲಿ ದೇಶವು ಸಾಧಿಸಿದ ತ್ವರಿತ ಪ್ರಗತಿಯನ್ನು ಒತ್ತಿಹೇಳಿದ ಪ್ರಧಾನಮಂತ್ರಿಯವರು, ಪ್ರಮುಖ ಮೈಲಿಗಲ್ಲುಗಳನ್ನು ಪಟ್ಟಿ ಮಾಡಿದರು; ಇವುಗಳಲ್ಲಿ ‘ಗ್ಲೋಬಲ್ ಫಿನ್‌ಟೆಕ್ ಫೆಸ್ಟ್’ನಲ್ಲಿ ಸರ್ವವ್ಯಾಪಿ ಹಣಕಾಸು ಸೇರ್ಪಡೆಯ ಕುರಿತಾದ ಚರ್ಚೆಗಳು, 3,000 ಕಿಲೋಮೀಟರ್ ಉದ್ದದ ಸರಕು ಸಾಗಣೆಗಾಗಿಯೇ ಮೀಸಲಾದ ಕಾರಿಡಾರ್‌ನ (Dedicated Freight Corridor) ಕಾರ್ಯಾರಂಭ ಮತ್ತು ತ್ರೈಮಾಸಿಕ ಜಿಡಿಪಿ (GDP) ಬೆಳವಣಿಗೆಯಲ್ಲಿನ ಬಲವಾದ ಶೇ. 7.8ರಷ್ಟು ಏರಿಕೆ ಸೇರಿದ್ದವು. ದೇಶದ ಆರ್ಥಿಕ ವಿಶ್ವಾಸಾರ್ಹತೆ ಹೆಚ್ಚುತ್ತಿರುವುದಕ್ಕೆ  ಸಾಕ್ಷಿಯಾಗಿ, ಜಪಾನಿನ ಕ್ರೆಡಿಟ್ ರೇಟಿಂಗ್ ಏಜೆನ್ಸಿಯೊಂದು ಇತ್ತೀಚೆಗೆ ದೇಶದ ಸಾರ್ವಭೌಮ ರೇಟಿಂಗ್ ಅನ್ನು ಮೇಲ್ದರ್ಜೆಗೇರಿಸಿರುವುದನ್ನೂ ಅವರು ಎತ್ತಿ ತೋರಿಸಿದರು. “ಇದರರ್ಥ, ಒಂದು ಕಡೆ ಭಾರತದ ಆರ್ಥಿಕತೆಯು ಬೆಳೆಯುತ್ತಿದೆ ಮತ್ತು ಇನ್ನೊಂದು ಕಡೆ ಭಾರತದ ಮೇಲಿನ ಜಗತ್ತಿನ ವಿಶ್ವಾಸವೂ ಹೆಚ್ಚುತ್ತಿದೆ,” ಎಂದು ಶ್ರೀ ಮೋದಿ ಅಭಿಪ್ರಾಯಪಟ್ಟರು.

ಭಾರತದ ಆತಿಥ್ಯದಲ್ಲಿ ಇತ್ತೀಚೆಗೆ ನಡೆದ ಬ್ರಿಕ್ಸ್ (BRICS) ಶೃಂಗಸಭೆಯ ರಾಜತಾಂತ್ರಿಕ ಯಶಸ್ಸನ್ನು ಸ್ಮರಿಸಿದ ಪ್ರಧಾನಮಂತ್ರಿಯವರು, ‘ನವದೆಹಲಿ ಘೋಷಣೆ’ಯ ಸರ್ವಾನುಮತದ ಅಂಗೀಕಾರವು ಅಂತರರಾಷ್ಟ್ರೀಯ ಒಮ್ಮತದ ಪ್ರತಿಬಿಂಬವಾಗಿದೆ ಎಂದು ಪ್ರತಿಪಾದಿಸಿದರು. ಈ ಐತಿಹಾಸಿಕ ರಾಜತಾಂತ್ರಿಕ ಸಾಧನೆಯು ದೇಶದ ಮೇಲಿರುವ ಜಾಗತಿಕ ಸಮುದಾಯದ ದೃಢವಾದ ನಂಬಿಕೆಯನ್ನು ಪುಷ್ಟೀಕರಿಸುತ್ತದೆ ಎಂದು ಅವರು ಒತ್ತಿ ಹೇಳಿದರು. “ಇದು ಭಾರತದ ಮೇಲಿರುವ ವಿಶ್ವದ ವಿಶ್ವಾಸಕ್ಕೆ ಮತ್ತೊಂದು ಪ್ರಮುಖ ಸಾಕ್ಷಿಯಾಗಿದೆ,” ಎಂದು ಶ್ರೀ ಮೋದಿ ಅವರು ಅಭಿಪ್ರಾಯಪಟ್ಟರು.

2022ರಲ್ಲಿ ‘ಸೆಮಿಕಾನ್ ಇಂಡಿಯಾ’ (Semicon India) ಆರಂಭವಾದಾಗಿನಿಂದ ಅದರ ವಿಕಾಸದ ಹಾದಿಯನ್ನು ಅವಲೋಕಿಸಿದ ಪ್ರಧಾನ ಮಂತ್ರಿಯವರು, ಆರಂಭಿಕ ನೀತಿ ಚರ್ಚೆಗಳಿಂದ ಹಿಡಿದು ಯೋಜನಾ ರೂಪಿಸುವಿಕೆ, ಪ್ರಾಯೋಗಿಕ ಉತ್ಪಾದನಾ ಘಟಕಗಳು (ಪೈಲಟ್ ಲೈನ್‌ಗಳು) ಮತ್ತು ಅಂತಿಮವಾಗಿ ವಾಣಿಜ್ಯಿಕ ಉತ್ಪಾದನೆಯ ಆರಂಭದವರೆಗಿನ ಪ್ರಗತಿಯನ್ನು ವಿವರಿಸಿದರು. ಮೊಹಾಲಿ ಮತ್ತು ಸೂರತ್‌ನಲ್ಲಿನ ಎರಡು ಹೊಸ ಘಟಕಗಳಲ್ಲಿ ವಾಣಿಜ್ಯಿಕ ಉತ್ಪಾದನೆಗೆ ಚಾಲನೆ ನೀಡುವುದರ ಜೊತೆಗೆ, ಈ ಪ್ರಯತ್ನಗಳ ಫಲವಾಗಿ ಚಿಪ್‌ಗಳು ಈಗ ಜಾಗತಿಕ ಗ್ರಾಹಕರನ್ನು ತಲುಪುತ್ತಿರುವುದನ್ನು ಅವರು ಕೊಂಡಾಡಿದರು. “ಈಗ ಭಾರತದ ಘಟಕಗಳಲ್ಲಿ ತಯಾರಾದ ನಮ್ಮ ಚಿಪ್‌ಗಳು ದೇಶದ ಹಾಗೂ ವಿಶ್ವದ ಗ್ರಾಹಕರನ್ನು ತಲುಪಲು ಪ್ರಾರಂಭಿಸಿವೆ,” ಎಂದು ಶ್ರೀ ಮೋದಿ ಅವರು ಹೇಳಿದರು.

ಸೆಮಿಕಂಡಕ್ಟರ್ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸುವುದರಲ್ಲಿರುವ ಅಪಾರ ಸಂಕೀರ್ಣತೆಯನ್ನು ಗುರುತಿಸಿದ ಪ್ರಧಾನ ಮಂತ್ರಿಯವರು, ದಾಖಲೆ ಸಮಯದಲ್ಲಿ ಚಿಪ್ ವಿನ್ಯಾಸ, ಉಪಕರಣಗಳ ಉತ್ಪಾದನೆ ಮತ್ತು ಪರೀಕ್ಷಾ ಸಾಮರ್ಥ್ಯಗಳಲ್ಲಿ ಪರಿಣತಿ ಸಾಧಿಸಲು ಅಗತ್ಯವಿದ್ದ ಸಹಯೋಗದ ಪ್ರಯತ್ನವನ್ನು ಶ್ಲಾಘಿಸಿದರು. ಈ ತ್ವರಿತ ತಾಂತ್ರಿಕ ಪ್ರಗತಿಯನ್ನು ಸಾಧ್ಯವಾಗಿಸಿದ ಪಾಲುದಾರಿಕೆಯ ಹಿಂದಿರುವ ಪ್ರಸ್ತುತ ಉದ್ಯಮದ ನಾಯಕರನ್ನು ಅವರು ‘ಭದ್ರ ಬುನಾದಿಯ ಸ್ತಂಭಗಳು’ ಎಂದು ಬಣ್ಣಿಸಿದರು. “ನೀವು ಭಾರತದ ಈ ಯಶಸ್ಸಿನ ಸ್ತಂಭಗಳು, ನೀವು ಪಾಲುದಾರರು,” ಎಂದು ಶ್ರೀ ಮೋದಿ ದೃಢವಾಗಿ ನುಡಿದರು.

ಈ ವಲಯದ ನಿರಂತರ ಪ್ರಗತಿಯ ವೇಗವನ್ನು ವಿವರಿಸಿದ ಪ್ರಧಾನಮಂತ್ರಿಯವರು, ‘ಟೇಪ್-ಔಟ್’ (tape-out) ಪರಿಕಲ್ಪನೆಯನ್ನು ಹಾಗೂ ಸರ್ಕಾರವು ಯಾವುದೇ ವಿರಾಮವಿಲ್ಲದೆ ಮುಂದಿನ ತಾಂತ್ರಿಕ ಆವೃತ್ತಿಯತ್ತ ಹೇಗೆ ನಿರಂತರವಾಗಿ ಒತ್ತು ನೀಡುತ್ತಿದೆ ಎಂಬುದನ್ನು ವಿವರಿಸಿದರು. ಅವರು ಸೆಮಿಕಂಡಕ್ಟರ್ ಮಿಷನ್‌ನ ಬೃಹತ್ 13.5 ಶತಕೋಟಿ ಡಾಲರ್ ಮೌಲ್ಯದ ಎರಡನೇ ಹಂತವನ್ನು ಘೋಷಿಸಿದರು ಮತ್ತು ಅಂತರರಾಷ್ಟ್ರೀಯ ಕಂಪನಿಗಳು, ಸ್ಟಾರ್ಟಪ್‌ಗಳು ಹಾಗೂ ವಿನ್ಯಾಸ ಸಂಸ್ಥೆಗಳ ನಡುವಿನ ಸಹಯೋಗಕ್ಕೆ ಅನುವು ಮಾಡಿಕೊಡುವ ಹೊಸ ನಿಯಂತ್ರಕ ಸುಧಾರಣೆಗಳನ್ನು ಉಲ್ಲೇಖಿಸಿದರು. “ನಿಮ್ಮ ಯೋಜನೆಗಳ ಯಶಸ್ಸಿಗಾಗಿ ಭಾರತ ಸರ್ಕಾರವು ಅಗತ್ಯವಿರುವ ಎಲ್ಲ ಕ್ರಮಗಳನ್ನೂ ಕೈಗೊಳ್ಳುತ್ತಿದೆ,” ಎಂದು ಶ್ರೀ ಮೋದಿ ದೃಢಪಡಿಸಿದರು.

ದೃಢವಾದ ದೇಶೀಯ ಪೂರೈಕೆ ಸರಪಳಿಯ ಕುರಿತಾದ ತಮ್ಮ ದೃಷ್ಟಿಕೋನವನ್ನು ವಿವರಿಸುತ್ತಾ, ಪ್ರಧಾನ ಮಂತ್ರಿಯವರು ‘ಫ್ಯಾಬ್‌ಲೆಸ್’ (fabless) ಕಂಪನಿಗಳನ್ನು ಪೋಷಿಸುವುದು, ಬೌದ್ಧಿಕ ಆಸ್ತಿಯನ್ನು ಸೃಷ್ಟಿಸುವುದು ಮತ್ತು ಕೃತಕ ಬುದ್ಧಿಮತ್ತೆ (AI) ಆಧಾರಿತ ಮೂಲಸೌಕರ್ಯಕ್ಕಾಗಿ ಸಿಲಿಕಾನ್ ಫೋಟೋನಿಕ್ಸ್ ಅನ್ನು ಸಂಯೋಜಿಸುವುದರ ಮಹತ್ವವನ್ನು ಒತ್ತಿ ಹೇಳಿದರು. ಅನುಮೋದನೆಗೊಂಡಿರುವ ಹನ್ನೆರಡು ಯೋಜನೆಗಳು ಮತ್ತು ಹೆಚ್ಚುತ್ತಿರುವ ಬೇಡಿಕೆಯು ಒದಗಿಸಿರುವ ಸುವರ್ಣಾವಕಾಶಗಳನ್ನು ಸದುಪಯೋಗಪಡಿಸಿಕೊಳ್ಳುವಂತೆ ಅವರು ಉಪಕರಣಗಳು, ರಾಸಾಯನಿಕಗಳು, ಅನಿಲಗಳು ಮತ್ತು ಕಚ್ಚಾ ವಸ್ತುಗಳ ವಲಯದ ನಾಯಕರಿಗೆ ಕರೆ ನೀಡಿದರು. “ಸಂಪೂರ್ಣ ಪರಿಸರ ವ್ಯವಸ್ಥೆಯು ಒಟ್ಟಾಗಿ ಬೆಳೆಯಬೇಕೆಂದು ನಾವು ಬಯಸುತ್ತೇವೆ,” ಎಂದು ಶ್ರೀ ಮೋದಿ ಪ್ರತಿಪಾದಿಸಿದರು.

ಭಾರತದ ಜನಸಂಖ್ಯಾ ಲಾಭದ (demographic dividend) ಕಾರ್ಯತಂತ್ರದ ಅನುಕೂಲವನ್ನು ಉಲ್ಲೇಖಿಸಿದ ಪ್ರಧಾನ ಮಂತ್ರಿಯವರು, ಎಂಜಿನಿಯರಿಂಗ್ ಕ್ಷೇತ್ರದಲ್ಲಿನ ಅಪಾರ ಪ್ರತಿಭೆ ಮತ್ತು ನಿರ್ದಿಷ್ಟವಾಗಿ ಚಿಪ್ ವಿನ್ಯಾಸಕ್ಕಾಗಿ ರೂಪಿಸಲಾದ ವ್ಯಾಪಕ ಕೌಶಲ್ಯ ಅಭಿವೃದ್ಧಿ ಉಪಕ್ರಮಗಳ ಕುರಿತು ಮಾತನಾಡಿದರು. ವಿದ್ಯಾರ್ಥಿಗಳಿಂದ ವಿಶೇಷವಾಗಿ ವಿನ್ಯಾಸಗೊಳಿಸಲಾದ ಚಿಪ್‌ಗಳನ್ನು ಸ್ವೀಕರಿಸಿದ ಬಗ್ಗೆ ಅವರು ಹೆಮ್ಮೆಯಿಂದ ಪ್ರಸ್ತಾಪಿಸಿದರು ಹಾಗೂ ಒಂದು ಲಕ್ಷ ಎಂಜಿನಿಯರಿಂಗ್ ವಿದ್ಯಾರ್ಥಿಗಳಿಗೆ ತರಬೇತಿ ನೀಡುವ ಸರ್ಕಾರದ ಮಹತ್ವಾಕಾಂಕ್ಷೆಯ ಗುರಿಯನ್ನು ಪುನರುಚ್ಚರಿಸಿದರು; ಈ ಪೈಕಿ ಈಗಾಗಲೇ 70,000 ವಿದ್ಯಾರ್ಥಿಗಳಿಗೆ ತರಬೇತಿ ನೀಡಲಾಗಿದೆ. “ಇಷ್ಟೊಂದು ದೊಡ್ಡ ಪ್ರಮಾಣದ ಪ್ರತಿಭೆಯ ಲಭ್ಯತೆಯು, ಒಂದು ರೀತಿಯಲ್ಲಿ, ನಿಮ್ಮೆಲ್ಲರಿಗೂ ಚಿನ್ನದ ಗಣಿಗಿಂತ ಕಡಿಮೆಯೇನಲ್ಲ,” ಎಂದು ಶ್ರೀ ಮೋದಿ ಅಭಿಪ್ರಾಯಪಟ್ಟರು.

ದೇಶೀಯ ಮತ್ತು ಅಂತಾರಾಷ್ಟ್ರೀಯ ಸಂಶೋಧನಾ ಕ್ಷೇತ್ರಗಳಲ್ಲಿ ತೊಡಗಿಸಿಕೊಂಡಿರುವ ಪ್ರತಿಭಾವಂತರಿಗೆ ಕರೆ ನೀಡಿದ ಪ್ರಧಾನ ಮಂತ್ರಿಯವರು, ದೇಶದೊಳಗೇ ಅತ್ಯಾಧುನಿಕ ತಂತ್ರಜ್ಞಾನಗಳನ್ನು ಅಭಿವೃದ್ಧಿಪಡಿಸುವ ಕಾರ್ಯದಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳುವಂತೆ ಯುವ ಪ್ರತಿಭೆಗಳನ್ನು ಉತ್ತೇಜಿಸಿದರು. ಸ್ಥಳೀಯ ಸಂಶೋಧನೆ ಮತ್ತು ಅಭಿವೃದ್ಧಿ ಕಾರ್ಯಗಳಿಗೆ ನೇತೃತ್ವ ವಹಿಸುವಂತೆ ಅವರು ಉದ್ಯಮ ವಲಯದ ನಾಯಕರಿಗೆ ಕರೆ ನೀಡಿದರು; ಇದು ಉದ್ಯಮಗಳು ಹಾಗೂ ದೇಶದ ಯುವಜನತೆ – ಇಬ್ಬರಿಗೂ ಪರಸ್ಪರ ಬೆಳವಣಿಗೆಯನ್ನು ಖಾತ್ರಿಪಡಿಸುತ್ತದೆ ಎಂದು ಅವರು ಪ್ರತಿಪಾದಿಸಿದರು. “ಇದರಿಂದ ಉದ್ಯಮ ವಲಯಕ್ಕೆ ಲಾಭವಿದೆ ಮತ್ತು ಭಾರತದ ಯುವಶಕ್ತಿಗೂ ಇದರಿಂದ ಬಲ ಸಿಗಲಿದೆ,” ಎಂದು ಶ್ರೀ ಮೋದಿ ಅವರು ದೃಢವಾಗಿ ನುಡಿದರು.

ಸೆಮಿಕಂಡಕ್ಟರ್ ಮಾರುಕಟ್ಟೆಯಲ್ಲಿನ ಬದಲಾಗುತ್ತಿರುವ ಸಂಕೀರ್ಣತೆಗಳ ಕುರಿತು ಮಾತನಾಡಿದ ಪ್ರಧಾನಮಂತ್ರಿಯವರು, ಕೃತಕ ಬುದ್ಧಿಮತ್ತೆಯ (AI) ಅಗಾಧ ಬೇಡಿಕೆಯು ಕೇವಲ ಟ್ರಾನ್ಸಿಸ್ಟರ್ ಗಾತ್ರದ ಮೇಲಿನ ಗಮನವನ್ನು ಬದಲಾಯಿಸಿ, ಮೆಮೊರಿ ಅಳವಡಿಕೆ ಮತ್ತು ಶಾಖ ನಿರ್ವಹಣೆ ಸೇರಿದಂತೆ ಸಮಗ್ರ ವ್ಯವಸ್ಥೆಯ ಏಕೀಕರಣದತ್ತ (holistic system integration) ಹೇಗೆ ಗಮನಹರಿಸುವಂತೆ ಮಾಡುತ್ತಿದೆ ಎಂಬುದನ್ನು ವಿವರಿಸಿದರು. ಜಾಗತಿಕ ಉತ್ಪಾದನಾ ವಲಯದ ಈ ಹೊಸ ಸವಾಲುಗಳನ್ನು ಎದುರಿಸಲು ದೇಶವು ವಿಶ್ವಾಸಾರ್ಹ ಮತ್ತು ನಿರಂತರವಾಗಿ ಸನ್ನದ್ಧವಾಗಿರುವ ತಾಣವಾಗಿದೆ ಎಂದು ಅವರು ಪ್ರತಿಪಾದಿಸಿದರು. “ಭಾರತವು ಇದಕ್ಕಾಗಿ ನಿರಂತರವಾಗಿ ಸಿದ್ಧತೆ ನಡೆಸುತ್ತಿದೆ,” ಎಂದು ಶ್ರೀ ಮೋದಿ ದೃಢಪಡಿಸಿದರು.

ಉನ್ನತ-ಕಾರ್ಯಕ್ಷಮತೆಯ ಕಂಪ್ಯೂಟಿಂಗ್‌ಗಾಗಿ ಇಂಧನ ಭದ್ರತೆಯ ನಿರ್ಣಾಯಕ ಸಮಸ್ಯೆಯನ್ನು ನಿಭಾಯಿಸುತ್ತಾ, ಪ್ರಧಾನ ಮಂತ್ರಿಯವರು ಎ.ಐ. ದತ್ತಾಂಶ ಕೇಂದ್ರಗಳಿಂದ ಉದ್ಭವಿಸುವ  ಬೃಹತ್ ವಿದ್ಯುತ್ ಅವಶ್ಯಕತೆಗಳನ್ನು ಮತ್ತು ಉತ್ಪಾದನಾ ಘಟಕಗಳಿಗೆ ನಿರಂತರ ವಿದ್ಯುತ್‌ನ ಅಗತ್ಯವನ್ನು ವಿವರಿಸಿದರು. ಸೌರ ಸಾಮರ್ಥ್ಯದಲ್ಲಿ 160 ಗಿಗಾ ವಾಟ್ ಗಿಂತ ಹೆಚ್ಚಿನ ಜಿಗಿತ, ಖಾಸಗಿ ವಲಯದವರಿಗೆ ಪರಮಾಣು ಶಕ್ತಿ ಕ್ಷೇತ್ರವನ್ನು ಮುಕ್ತವಾಗಿಸುವುದು, ಮತ್ತು ಸಣ್ಣ ಮಾಡ್ಯುಲರ್ ರಿಯಾಕ್ಟರ್‌ಗಳ ಅಭಿವೃದ್ಧಿ ಸೇರಿದಂತೆ ವಿದ್ಯುತ್ ಕ್ಷೇತ್ರದಲ್ಲಿ ರಾಷ್ಟ್ರದ ಪ್ರಬಲ ವಿಸ್ತರಣೆಯನ್ನು ಅವರು ವಿವರಿಸಿದರು. “ಆದ್ದರಿಂದ, ಭಾರತ ಇಂದು ವಿದ್ಯುತ್ ವಲಯದಲ್ಲೂ ಭಾರಿ ಹೂಡಿಕೆ ಮಾಡುತ್ತಿದೆ” ಎಂಬುದರತ್ತ  ಶ್ರೀ ಮೋದಿ ಗಮನ ಸೆಳೆದರು.

ವಿದ್ಯುತ್ ಮೂಲಸೌಕರ್ಯದ ತ್ವರಿತ ವಿಸ್ತರಣೆಯನ್ನು ಕೈಗಾರಿಕಾ ಸನ್ನದ್ಧತೆಗೆ ಜೋಡಿಸುತ್ತಾ, ಈ ಇಂಧನ ಭದ್ರತೆಯು ಸೆಮಿಕಂಡಕ್ಟರ್ ಪರಿಸರ ವ್ಯವಸ್ಥೆಗೆ ಮೂಲಭೂತ ಬಲವಾಗಿ ಕಾರ್ಯನಿರ್ವಹಿಸುತ್ತದೆ ಎಂದು ಪ್ರಧಾನ ಮಂತ್ರಿಗಳು ಪ್ರತಿಪಾದಿಸಿದರು. ಕೈಗಾರಿಕಾ ಬೆಳವಣಿಗೆಗೆ ಪೂರಕವಾದ ಪರಿಸ್ಥಿತಿಗಳನ್ನು ಕಲ್ಪಿಸಲು ಸರ್ಕಾರವು ಬದ್ಧವಾಗಿದೆ ಎಂದು ಅವರು ಸಂಬಂಧಪಟ್ಟ ಪಾಲುದಾರರಿಗೆ ಭರವಸೆ ನೀಡಿದರು. “ಸೆಮಿಕಂಡಕ್ಟರ್ ಉದ್ಯಮಕ್ಕೆ ಭಾರತವನ್ನು ಆದ್ಯತೆಯ ತಾಣವನ್ನಾಗಿ ಮಾಡುವ ನಿಟ್ಟಿನಲ್ಲಿ ನಾವು ಎಲ್ಲ ಅಗತ್ಯ ಕ್ರಮಗಳನ್ನು ಕೈಗೊಳ್ಳುತ್ತಿದ್ದೇವೆ,” ಎಂದು ಶ್ರೀ ಮೋದಿ ದೃಢಪಡಿಸಿದರು.

ಪ್ರಧಾನ ಮಂತ್ರಿಯವರು ತಮ್ಮ ಭಾಷಣವನ್ನು ಮುಕ್ತಾಯಗೊಳಿಸುವಾಗ, ದೇಶದ ಪ್ರಜಾಪ್ರಭುತ್ವ ಮೌಲ್ಯಗಳ ಹಿನ್ನೆಲೆಯಲ್ಲಿ ತಾಂತ್ರಿಕ ಕ್ಷೇತ್ರದಲ್ಲಿನ ಭಾರತದ ಧಾಪುಗಾಲಿನ ಸಾಧನೆಗಳನ್ನು ವಿವರಿಸಿದರು ಹಾಗೂ ಭಾರತೀಯ ಸಂವಿಧಾನದ 75 ವರ್ಷಗಳ ಪರಂಪರೆಯನ್ನು ನೆನಪಿಸಿದರು. ‘ಪ್ರಜಾಪ್ರಭುತ್ವದ ತಾಯಿ’ (Mother of Democracy) ಎಂದು ಕರೆಯಲ್ಪಡುವ ಭಾರತದಲ್ಲಿನ ಪ್ರಮುಖ ನಿರ್ಣಾಯಕ ಕೈಗಾರಿಕೆಯೊಂದರ ಯಶಸ್ಸು ಜಾಗತಿಕ ಪೂರೈಕೆ ಸರಪಳಿಯನ್ನೇ ಬಲಪಡಿಸುತ್ತದೆ ಎಂದು ಪ್ರತಿಪಾದಿಸಿದ ಅವರು, ಮುಂದಿರುವ ಅಪಾರ ಅವಕಾಶಗಳನ್ನು ಅನ್ವೇಷಿಸಲು ಎಲ್ಲರಿಗೂ ಆತ್ಮೀಯ ಆಹ್ವಾನ ನೀಡಿದರು. “ಭಾರತದ ಆಕಾಂಕ್ಷೆಗಳು ನಿಮ್ಮ ಮುಂದಿವೆ ಮತ್ತು ಭಾರತದಲ್ಲಿ ಸೃಷ್ಟಿಯಾಗುತ್ತಿರುವ ಹೊಸ ಅವಕಾಶಗಳು ನಿಮ್ಮನ್ನು ಸ್ವಾಗತಿಸಲು ಸಿದ್ಧವಾಗಿವೆ,” ಎಂದು ಶ್ರೀ ಮೋದಿ ಅವರು ದೃಢವಾಗಿ ನುಡಿದರು.

*****