ভারতকী প্রধানমন্ত্রী

প্রধানমন্ত্রী শ্রী নরেন্দ্র মোদীনা ঙসি নুমীৎ য়ুংবা মতুং মালদীবকী মপাল থৌরম পুবা মন্ত্রী অমসুং রিপব্লিক অদুগী রাষ্ট্রপতিগী অখন্নবা মীহুৎ দা. মোহম্মদ অসীমগা উন্নখ্রে ।

মখোয়না ভারত অমসুং মালদীবকী মরক্তা নক্নবা য়ুম্লোন্নবা অমগুম লৈনরিবা মরি অদু খন্ন-নৈনখি মদুনা ভারত মহাসাগরদা ইতিহাস, সংস্কৃতি অমসুং মেরিতাইম ইন্তরেস্তশিং শরুক য়ামিন্নরিবা । অখন্নবা মীহুৎ দা. অসীমনা মালদীবকী ইন্দিয়া ফার্স্ত পোলিসীগী মনুংচন্না ভারতকা লোয়ননা অচেৎপা মরি অদু ঙাক্তুনা থম্নবা মালদীবকী ৱাফম অদু অমুক হন্না শোইদবনি হায়খি ।

প্রধানমন্ত্রীনা থাজবা পিখি মদুদি ভারতনা মতম পুম্নমক্তা মালদীবকী থাজনিঙাই ওইবা অমসুং নক্নবা য়ুম্লোন্নবা ওইগনি অমসুং মসিগী প্রোগ্রেস অমসুং সেক্যুরিতীদা মতেং পাংগনি ।

অখন্নবা মীহুৎ অসীমনা প্রধানমন্ত্রীবু মালদীবতা লাকপিনবা রাষ্ট্রপতি অব্দুল্লা য়মিনগী বার্তন অদু অমুক হন্না ফোংদোকখি । প্রধানমন্ত্রীনা বার্তন অদুগীদমক মফমদা অপেনবা ফোংদোকখি অমসুং মতাং চাবা অমদা লাকপদা য়াখি ।

অখন্নবা মীহুৎ অসীমনা  প্রধানমন্ত্রীগী মফমদা রাষ্ট্রপতি অব্দুল্লা য়মিনগী য়াইফ পাওজেল অদু ফোংদোকখি, প্রধানমন্ত্রীনশু মফমদা য়াইফ পাওজেল পিখি ।