ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি মতম লোইদুনা পোথারগদবা রাজ্য সভাগী মেম্বর পুম্নমকপু মখোয়না লৌবীখিবা থৌদাংশিং অদুগীদমক্তা থাগৎপা ফোংদোকখ্রে, অমসুং মখোয়গী তুংগী য়াইফনবগীদমক য়াইফ-পাউজেল পীখ্রে।

হাউসতগী পোথারগদবা মেম্বরশিংনা হৌজিক্তি খুন্নাইগী থবক-থৌরমদা হেন্না কনবা থৌদাং লৌরগনি হায়না রাজ্য সভাদা পীখিবা মহাক্কী ৱারোলদা প্রধান মন্ত্রীনা থাজবা পীখি। মেম্বর পুম্নমক্কী অখন্নবা মরু ওইবা অমমম লৈরি, অমদি মখোয়গী ওইবা মওং অদুদা থৌদাং লৌরি হায়না মহাক্না ফোংদোকখি। মেম্বরশিংনা জাতি অসিগী তুংগী য়াইফনবগীদমক মখোয়গী অঙম্বা থাক্তা হোৎনবিরম্মি হায়না মহাক্না মখা তাখি। মখোয়না লৌবিরম্বা থৌদাং অদু জাতি অসিনা কৈদৌনুংদা কাওররোই হায়না মহাক্না ফোংদোকখি। সেনিয়র মেম্বরশিংগা লোয়ননা অপ্পর হাউস অসি চাংদম্নিঙাই লৈতনা মরু ওইবা অমা ওইরি হায়না প্রধান মন্ত্রীনা ফোংদোকখি। পোলিসী শেমগৎপদা মসিনা মরু ওইবা থৌদাং অমা লৌরি হায়না মহাক্না মখা তাখি। প্রধান মন্ত্রীনা মতম লোইরবা এম পি কয়াবু মখোয়না লৌবিরম্বা থৌদাংশিং অদুগা লোয়ননা অখন্ননা পনখি। মতম কুইনা পন্দুনা লৈরক্লবা ত্রিপল তলাক্কী ৱারেপ লৌরকপা মতমদা মতম লোইরবা মেম্বরশিংনা শরুক য়াবা ফংদবা অসি লাইবক থিবনি হায়না প্রধান মন্ত্রীনা ফোংদোকখি। পর্লিয়ামেন্ত অমসুং পি এম ওগী থোংশিং মখোয়গীদমক্তা মতম পুম্নমক হাংদুনা লৈগনি হায়না মতম লোইরবা মেম্বরশিং অদুগী মফমদা প্রধান মন্ত্রীনা থাজবা পীখি।