ভারতকী প্রধানমন্ত্রী

মফম অসিদা তিল্লিবা খুন্নাই অসিগী তোঙান–তোঙানবা শীনফমগী ইবুংঙো অমসুং ইবেম্মশিং,

ওগস্ত থা লাকপদা অশেংবা অমসুং ৱারেপ লৌবগী মতম অমা পুরক্লে। থা অসিদা লৈবাক্কীদমক মখোয়গী থৱায় কৎখ্রবা নীংতম লান্মীশিং নীংশিংবগী থৌরম পাংথোক্লি। থা অসিদা নীংতম্বা নুমিৎ খক নত্তনা অতোপ্পা কুম্মৈ কয়াসু পাংথোক্লি। লাক্কদৌরিবা কুম্মৈশিং অসিগীদমক নখোয় ময়ামদা ঐগী য়াইফা পাউজেল পীজরি।

ঐখোয়গী চৎনবীশিং, কলচর অমসুং কুম্মৈশিংদা মহৌশাগী ফিবম ঙাকশেনবা অসিনা অচৌবা মফম অমা কল্লি। ঙসিগী থৌরম অসি মহৌশাগী অকোইবগী ফিবম অমসুং অনৌবা মতমগী চৎনবীগা য়াম্না নক্নবা মরি লৈনৈ। মালেমগী বাইওফুয়েল নুমিৎতা নখোয় ময়ামদা ঐগী য়াইফা পাউজেল পীজরি।

মরূপশিং, ভারত মচা ক্রোর ১২৫গী পুন্সি মহিং ফগৎহন্নবা সরকারনা চোকথবা নাইদনা হোৎনরি অমসুং মসিগীদমক স্কিম কয়া পায়খৎলি। খুঙ্গংগী শেন–থুম ফগৎহনবা, লৌমীশিংগী শেন্থোক শরুক অনি হেনগৎহনবা, পেত্রোল, দিজল অমসুং গ্যাসগী মহুৎ ফংহনবা অমসুং মহৌশাগী অকোইবগী ফিবম কাইহন্দনা থম্বা হায়বসি সরকারনা মরুওইনা পায়খৎলিবা থবকশিংনি। পান্দমশিং অসি ফংবদা বাইওফুয়েলনা অচৌবা থৌদাং লৌগনি। ঐখোয়গী অকোইবগী ফিবম অমসুং শেন–থুম চাউখৎপদা বাইওফুয়েলনা থোং মান্নহনগনি।

মরূপশিং,

বাইওফুয়েল অসি সুপ্নগী সাইন্স অমা নত্তে, মসি ভারত খক নত্তনা মালেম পুম্নমক্তা অনৌবা ইনর্জী ফংহনগদবা লাইৱা অমনি। মহৈ–মরোংশিং, মহৈরোংগী অরেম্বশিং অমসুং অমোৎ–অকায়শিংদগী পুথোকপা ফুয়েল অদুবু বাইওফুয়েল হায়রগা খঙনৈ। মসিনা খুঙ্গং অমসুং শহরদা লৈরিবা মীওইশিংগী পুন্সিদা অহোংবা লাকহনগনি অমসুং চাউখৎহনগনি। ঙসি উৎলিবা ফিল্ম ‘আম কে আম ঔর গুথলী কে দাম’ অসিদা পোৎ অমা অনিরক শীজিন্নবা নৎত্রগা পোৎ অমা মপুং ফানা শীজিন্নবা হায়বা মমাংঙৈগী হায়নবা অদু হেন্না চেৎশিনহল্লে। মসি অরিবা ৱারী অমনি। মসি অনৌবা মওংদা অমুক শীজিন্নবনি।

বাইওফুয়েলশিং য়াম্না শীজিন্নবনা লৌমীশিংগী শেন্থোক হেনগৎহনগনি, থবক ফংবগী খুদোংচাবা হেনগৎহনগনি, লৈবাক্কী লন–থুম কনগনি অমসুং মসিনা মহৌশাগী অকোইবগী ফিবম ফগৎহনগনি।

লু–নানবা, হকচাং ফহনবা, খুঙ্গংশিংদা শক্তি পীবা অমসুং লায়রবা লৌমীশিং ফগৎহনবা হায়বসি ঐখোয়গী অচৌবা মীয়েংগী শরুক অমনি। মসিগী মথক্তা ঐখোয়গী অনৌবা শহর শেমগৎপগী নমুনাসু য়াওরি। বাইওফুয়েলনা শহরশিংদা নুংশিৎ শেংহন্দবা কনবা ঙমগনি।

মরূপশিং, ঙসি লৌমীশিং মফম অসিদা মশিং য়াম্না পুল্লি। বিঞ্জ্যান ভাবনদা লৌমীশিং পুনবা অসিমক অচৌবা পাউজেল অমনি। লৈবাক অসিগী তোঙান–তোঙানবা মফমশিংদা তোঙানবা মখলগী নোংজু থেংনরি। মফম খরদনা নোংনা ঈচাউ থোকহল্লি অমসুং খরদনা নোং তারকপা ঙাইরি। মদুগী পাউ অসি ঐখোয় লেপ্তনা য়েংলি। মফম অমদনা নোং চপ চানা চুবদগী ঐখোয় হরাওরি, অতোপ্পা মফম অমদনা চপ মান্নবা নোংজু অসিনা অৱাবা নংহল্লি।

লৈবাক অসিগী মফম অয়াম্বদা ফৌ য়াওনা কালেনগী মহৈ–মরোং অয়াম্বা হুনখ্রে হায়না ঐনা থাজৈ। নখোয়না খঙলবা অদুনি কালেন লৌরোক্কী মহৈ–মরোং ১৪গী অচংবা খরচকী শরুক ১.৫ এম এস পি পীনবা সরকারনা ৱারেপ লৌরে। ঐখোয়না লৌউ–শিংউবগী ৱারী শারকপা মতমদা, ঐখোয়না এম এস শ্বামিনাথনজী পন্দবা য়াদে। নুমিৎ ২/৩গী মমাংদা শ্বামিনাথনজীনা ইখিবা আর্তিকল অমদা লৌউ–শিংউগী লমদা সরকারনা পায়খৎলিবা থবকশিং অমসুং থৌশিলশিংগী মতাংদা য়াম্না কুপ্না ইখি। মহাক ওথোরিতীনি। মহাক্না ফজনা ইখি অমসুং থৌরাংশিং, স্কিমশিং থাগৎখি অমসুং লৌমীশিংগীদমক সরকারনা পায়খৎলিবশিং থাগৎখি।

নখোয় নশামক মুভীদা উরে মদুদি চুগা লোয়ননা কালেন লৌরোক্কী মহৈ–মরোংশিংগী এম এস পি লৌমীশিংনা মখোয়না চংখিবা খরচগী চাদা ৮০ হেন্না ফংলগনি। চহি অসিদা চুগী এম এস পি ক্বিন্তল অমদা লুপা ২০দগী ২৭৫ ফাওবা হেনগৎলে। হেনগৎলিবা শেনফম অসিদা লৌমীশিং কান্নবা য়াম্না ফংলে। মসিগী মথক্তা লৌমীশিংনা, সরকারনা চুদগী ইথানোল পুথোক্নবা হোৎনরিবা অসিদা কান্নবা য়াম্না ফংলগনি।

মরূপশিং, অতল বিহারী ভাজপেয়ীগী সরকার মতমদা চুদগী ইথানোল শুংবগী থবক অসি হৌদোক্লম্বনি। অদুবু স্কিম অসি মতম অদুদা পানবা সরকারগী মওংদা চহি কয়া পৎতুনা লৈখি। মসিগী থবক অসি থৱায় য়াওনা লৌখিদে। ২০১৪দা বি জে পিনা এন দি এগা লোয়ননা সরকার পায়রবা মতমদা চপ চাবা মওং অমা শেমখি। ইথানোল য়ানশিনবগী থৌরম অসি পায়খৎলে। ঙসিদি মসিগী স্কিম অসি রাজ্য ২৫ অমসুং য়ুনিয়ন তেরিতোরীশিংদা পায়খৎলে। হৌখিবা চহি ৪ অসিদা শিংথাবা য়ানা ইথানোল পুথোকলে। লাক্কদৌরিবা চহি ৪দা লৈবাক অসিনা ইথানোল লীতর ক্রোর ৪৫০ পুথোক্নবা পান্দম থম্লি।

মরূপশিং, ইথানোলনা লৌমীশিংদা মতেং পাংবদা নত্তনা লৈবাক অসিগী লন কয়া কনবা ঙমহল্লি। হৌখিবা চহিদা পেত্রোলদা ইথানোল য়ানশিনবদগী মপান্দগী থাউ লৈবগী লুপা ক্রোর ৪০০০ কনবা ঙমখি।

সরকারগী পান্দমদি মথং চহি ৪দা লুপা ক্রোর ১২০০০ কনবনি। মসিগী মথক্তা, মথং চহি ৪দা ঐখোয়না চুদগী ইথানোল পুথোক্তুনা লুপা ক্রোর ২০০০০ তানবা ঙমগনি। মসিগী কনবা ঙম্লিবা শেনফম অমসুং চুগী মহুৎ অমা শীনবা ঙম্লিবা অসিনা চু থাবা লৌমীশিংনা থেংনরিবা অৱাবশিং কোকহনবা ঙম্লগনি। ইথানোলনা শেন কনবা ঙম্লে। মসিগী মথক্তা ইথানোল পুথোকপনা পেত্রোলদগী ফত্তবা গ্যাস থাদোকপা হন্থহল্লগনি।

মরূপশিং, বাইওফুয়েলগা মরি লৈনবা পান্দম থম্লে। মসি খল্লোইদবা ৱাখল অমা নত্তে। অকনবা থৌশিলশিং, আইনশিং অমসুং লাল্লোংশিং শেম শারে অমসুং দাইত্ব শিন্নরে অমসুং থম্লিবা পান্দম অদু ফংনবা চাংনাইনা য়েংশিল্লগনি। ইথানোল য়াওনা বাইওফুয়েলশিং চাউখৎহন্নবা সরকারনা নেসনেল পোলিসী অমা শেম্লে। ২০২২ ফাওবদা পেত্রোদা ইথানোল চাদা ১০ ফাওবা য়ানশিন্নবা অমসুং ২০৩০ ফাওবদা চাদা ৩০ য়ানশিন্নবা সরকারনা থবক পায়খৎলি।

বাইওফুয়েলনা চু থাবা লৌমীশিংদা কান্নহনবদা নত্তনা লৈবাক অসিগী অতৈ লৌমীশিংদসু কান্নহনগনি। ইতৎ তত্তনা ঐখোয়গী গেহু, ফৌ, চুজাক, আলু অমসুং মনা–মশিং কয়া ফজনা থমদবা অমসুং নোং-চিংগী ফিবম ফত্তবদগী মাংহল্লি। মহৌশানা লৌমীশিংনা ফৎত্রবা মহৈ–মরোংশিং অদু হুন্দোকই। অদুবু হায়রিবা ফত্তবশিং অদুদগী ফাওবা ইথানোল শুংনবা ঐখোয়না ৱারেপ লৌরে।

লৌমীশিংনা থেংনরিবা অতোপ্পা ৱাফম অমগা লৈরি। নোং-চিংগী ফিবম্না মরম ওইদুনা লৌমীশিংনা মখোয়গী মহৈ–মরোং অদু ফজবা মগুন লৈবা মওংদা য়োনবা ঙমদ্রি। হায়রিবা পোৎথোকশিং অদু মীয়াম্না লৈনীংদে। দুকান ফম্বশিংনসু পোৎথোক অদু লৈনীংদে। মরম অদুনা নোং-চিংগী ফিবম ফত্তবগী অৱাবা লৌমীশিংনা পুবা তাবনি। অদুবু কৈথেলদা য়োনবদা শিৎত্রবা চাবা য়াদ্রবা মহৈ–মরোংগী পোৎথোকশিং অদু ইথানোল পুথোকপদা শীজিন্নবা য়াই। ঐখোয়না চপ চাবা থৌশিল অমা শেম্লবা মতমদা, ঐবু থাজবীয়ু, লৌমীশিংনা পুথোকপা মহৈ–মরোং মরু অমত্তা লেম্না মাংলোই। লৌমীশিংনা ফংগদবা থৌনা অদু নহাক্না খনবা য়াই।

মরূপশিং, নেসনেল পোলিসীগী মখাদা, লৈবাক শীনবা থুংনা পায়খৎকদবা স্কিম অমা শেম্লে, মদুনা ইমুংগী অমোৎপশিং নত্তনা লৌবুক্কী লেমহৌবশিং অমসুং শা–ষনগী মথিদগী ফুয়েল শুংবা য়াগনি। য়ুমথোং খুদিং অমসুং লৌবুক্তগী পুথোক্লিবা লফোই মকুশিং ফুয়েল শুংবদা শীজিন্নবা য়াই।

মসিগী মথক্তা, ইথানোল অসি নাপী অমসুং ৱাদগী শুংবা য়াই। অৱাং–নোংপোক অমসুং ত্রাইবেলগী মফমশিংদা ৱা হৌরি। অসিগুম্বা ফিবম অসিদা, মখোয়গী শেন–থুমগী ফিবম ফগৎহন্নবা মসিনা ৱা থাবশিংগী কান্নবা ফংহনগনি।

মরূপশিং,

মহৈ–মরোং লোকখ্রবা মতুংদা লেমহৌবা অসি লৌমীশিংদা অচৌবা খুদোংচাদবা অমনি। মহৈ–মরোং লোকখ্রবা মতুংদা লেমহৌবা অসি য়াম্না কান্নবা অমনি অদুবু মসি শীজিন্নবগী মতাংদা খঙবা ৱাৎপদগী মৈ থাদোক্তুনা মাঙহল্লি। মসি লম লৈহাও কাহনবদা য়াম্না কান্নবা লেমহৌখাক অমনি অমসুং ঐখোয়গী মাংদা মৈ থাদোক্তুনা মাঙহল্লি। পঞ্জাব অমসুং হরিয়ানাগী লৌমীশিংনা চাংনাইনা মৈ থাদোকপা ঐনা থেংনরে। মসি অচৌবা অমাংবা অমনি।

চরু মৈ থাদোকপা অসিনা লৈবাক–লৈহাও ফৎহন্দে অমসুং নুংশিৎ শেংহন্দে। মরম অদুনা চরুদগী ইথানোল শুংনবগী থবক পায়খৎপা য়াবরা হায়বা য়েংনবা খন্নরি। মসিনা য়ারবদি চরু অসিনা শেন ফংনবগী লম্বী অমা ওইরগনি। মসিনা নুংশিৎ শেংহন্দবা হন্থহনবদা নত্তনা লৌমীশিংগী শেন্থোক হেনগৎহনবদা মতেং ওইরগনি।

মরূপশিং, বাইওমাসতগী বাইওফুয়েল ওন্থোক্নবা সরকারনা য়াম্না চাউনা শেল থাদরি। লুপা ক্রোর লিশিং ১০ চংনা অনৌবা রিফাইনরী ১২ লিংখৎনবা থৌরাং অমা লৈরি। রিফাইনরী অমদা মীওই ১০০০–১৫০০ থবক ফংহনগনি। হায়বদি, রিফাইনরীশিং  অসি থবক হৌরকপা মতমদা মীওই লাখ ১.৫ থবক ফংহনগনি। মসিগী মথক্তা ষন্থীদগী ফুয়েল শুংনবা স্কিম অমা পায়খৎনবা থৌরাং তৌরি।

মমাংগী বজেৎতা ঐখোয়না গোবর্ধন য়োজনা কৌবা স্কিম অমা হৌদোকখিবা অদু নখোয় খঙলমগনি। গোবর্ধন য়োজনাগী মখাদা লৈবাক অসিগী জিলা অমমমদা বাইওগ্যাস প্লান্ত অমমম লিংখৎকনি। হৌজিক ফাওবদা প্লান্ত ৭০০ লিংখৎলে অমসুং তুংদা মখা তানা লিংখৎলকখিগনি। মসিদা লৌমীশিং অমসুং সেল্ফ হেপ্ল গ্রূপশিংগা থবক তৌমিন্নরি।

মরূপশিং,

গোবর্ধন, বন ধন অমসুং জন ধন য়োজনাদগী লায়রবশিং, লৌমীশিং অমসুং ত্রাইবেলশিংনা অহেনবা শেন্থোক ফংবা ঙম্লি। নহাক্কী মহৈ–মরোংশিং খক নত্তনা ষন্থী, চরু, অমোৎ–অকায় অমসুং খুদিংমক ফজনা শীজিন্ননবা ঐখোয়না থবক পায়খৎলি।

মসিগী মথক্তা, উমংদা ফংলিবা পাম্বীশিং অমসুং উহৈ–ৱাহৈশিংদগী নখোয়না অহেনবা শেন ফংবা য়াই। নাকেন্থা মতমদা উনাশিং কেনবা নখোয় উরমগনি অমসুং মদুনা ফুত ১/২ ৱাংনা পৈদুনা লৈরমগনি। মসি শেন ফংনবগী লম্বী অমনি। মসি ফত্তবদগী শেন ওন্থোক্নবা খোঙজং অমনি। মসিনা শ্বচ্ছ ভারত মিশন্দা অপনবা পীরি মরমদি মসিগী ফত্তবা অসিনা মোৎহন্নবগী মরম অমা ওইরি।

মরূপশিং, খোঙজং অসিগী তেক্নিকশিং পুথোকপদা স্তার্ত–অপশিংগা লোয়ননা ঐখোয়গী সাইন্তিসশিং অমসুং নহারোলশিংনা অচৌবা মতেং পাংলি। ঙসিগী থৌরম অসিদা ঐনা নখোয় খুদিংমক থাগৎচরি। মসিগী তেক্নিক অসি ফগৎহন্নবা নখোয়না চোকথবা নাইদনা হোৎনরি অদুবু লম অসিদা পায়খৎকদবা থবক য়াম্না লৈরি। খুদম ওইনা, মহৈ–মরোংগী পোৎথোকসু য়াম্না ফংগদবা অমসুং মগুন লৈবা অমসুং মরাং কাইনা বাইওফুয়েল পুথোকপা ঙমগদবা মহৈ–মরোং খনবা দরকার ওইরি। মসি থবক ওইনা পাংথোক্নবা অনৌবা স্তার্ত–অপশিংগী ইন্ত্রপ্রিনরশিং অমসুং মীয়ামগা অনৌবা তেক্নোলোজী শীজিন্নদুনা পুন্না থবক তৌমিন্নবা দরকার ওইরি।

ঐখোয়গী ইনঞ্জিনীয়রিং কোলেজশিং, আই আই তিশিং অমসুং পোলিতেক্নিকশিংদা বাইওফুয়েলগী কোর্স হাপ্নবা মীৎয়েং থমগদবনি হায়না ঐনা চেৎনা থাজৈ। কে ভি কেশিংগী খুৎথাংদা লৌমীশিংদা বাইওফুয়েলগী মরমদা ফজনা খঙহনগদবনি। লৈবাক অসিদা পাংথোকপা লৌউ–শিংউবগী মেলাশিংদা বাইওফুয়েলদা পান্দম থমদুনা লৌমীশিংদা বাইওফুয়েলগী মরমদা ফজনা খঙহনগদবনি।

মরূপশিং, শহরশিং নান্না থম্বদা য়াম্না মরুওইরিবা অসি অমোৎপশিং লোইশিনবা অসিনি। খোংবালগী অমসুং উদ্যোক্কী অমোৎপশিংদগী ইনর্জী পুথোকপগী তেক্নোলোজী ফগৎহন্নবা সরকারনা থবক পায়খৎলি। অপীকপা শহর অমদা চা য়োনবা নুপা অমগী ৱারী ঐ আর্তিকল অমদা থেংনখ্রে, মহাক্না খোঙবাল ময়াদা চা য়োল্লম্মি। মহৌশানা চাগা মরি লৈনবা ৱাফমশিংদা ঐগী পুক্নীং চিংশিল্লি। নুপা অদুদা ৱাখল অমা লাক্লম্মি। মহৌশানা অমোৎপা খোঙবালদগী নমথিবা মনম থাদোরকই। মহাক্না কোন অমা মখুন অমা হুৎতোক্লগা মথক মখা ওন্থোক্লগা মদুদা পাইপ অমা থিংজিল্লম্মি। অমোৎপদগী থোরকপা গ্যাস অদু পাইপ অদুনা মহাক্কী চা লোনফম অদু ফাওবা পুরকখি। গ্যাস অদু মহাক্কী চা লোনবদা শীজিন্নখি। মসি অচম্বা তেক্লোলোজী অমনি।

নোংমা ঐ গুজরাত্তা চৎলম্মি অমসুং ঐখোয়গী গারী মমাংদা স্কুতর অমা থৌরম্মি। মীওই অদুগী স্কুতরদা অচৌবা ত্রেক্তর ত্যুব অমা পুরম্মি। মদু নুংশিৎ পীক থল্লম্মি। নহাক্না খল্লগা য়েংউ, কনাগুম্বা অমনা অসিগুম্বা অচৌবা ত্রেক্তর ত্যুব অমা স্কুতর অমদা পুবা মতমদা গারীশিংনা তুংলোমদগী থেংলকপা কিগনি। ঐ ঙক্লম্মি। মহৌশানা মী অমনা অহাংবা ত্যুব পুই অমসুং কোন্না নুংশিৎ হাল্লি। মদু ঐনা থিংগনি।

ঐখোয়না গারীদগী কুমথরগা নুপা অদুদা মহাক্না তৌরিবা অদু করিনো হায়না হংলম্মি অমসুং করিগী মতৌ অসুম্না ত্যুব পুরিবনো হায়না হংখি। মহাক শোকপা য়াই। মহাক্না হায়খি, মহাক লৌবুক্তা চৎলিবনি। ঐনা মঙোন্দা মরম হংখি। মহাক্না হায়খি, য়ুমগী অমোৎপশিং অমসুং শা–ষনগী মথি – ময়ুংদগী মহাক্কী ময়ুমদা মহাক্না বাইওগ্যাস প্লান্ত অমা লিংখৎলি হায়খি। গ্যাস অদুনা মহাক্কী লৌবুক্কী পম্পদা শীজিন্নগনি। ঐখোয়গী লৈবাক্কী লৌমীশিংগী তৌবা ঙম্বশিং খন্দুনা য়েংউ অমসুং খুঞ্জাশিংনা অনৌবা চাংয়েং কয়া পায়খৎলি।

স্তার্ত–অপশিং পায়খৎলিবা মীওইশিংনা মসিগী ৱাখল্লোন অসি লৌশিন্নবা ঐনা তকশিল্লি। করিগুম্বা মতমদা ঐখোয়না অচৌবা কোলেজশিংদা ফংদবা ৱাখলশিং লৈবাক অসিগী লৌমীশিংদগী ফংবা য়াওই। মসিগী ৱাফম অসি থবক খুদিংমক্তা শীজিন্নবা ঐখোয়গী অপাম্বনি।

ঙসিদি ঐখোয় অচৌবা স্কিম বি–৩গী থবক তৌরি। বি–৩ হায়বগী ৱাহন্থোক্তি বাইওমাস, বাইওফুয়েল অমসুং বাইওইনর্জীনি। ইথানোলগী মথক্তা অমোৎ–অকায়দগী বাইও–সি এন জি পুথোক্নবা থৌরাং তৌরি। পেত্রোল অমসুং দিজলদগী নুংশিৎ শেংহন্দবা কোকহন্নবা লৈবাক অসিগী গারীশিংদা সি এন জি শীজিন্নবা পুক্নীং থৌগৎলি। হৌজিক ঐখোয়না মপান লৈবাক্তগী সি এন জি লৈরি। মপান্দগী লৈবা হন্থনবা ঐখোয়না হোৎনরি। শহরশিং খক নত্তনা খুঙ্গংগী মফমশিংদা সি এন জিগী গারী থৌগদবা মতম অদু ইকুই কুদ্রে।

মরূপশিং,

ঙসিদি প্লাস্তিক্কী অমোৎপশিং অমসুং অমনবা রবর তয়ারশিং অসি অচৌবা অৱাবা অমা ওইরি। হায়রিবা পোৎলমশিং অসি হৌজিক লম্বী শেম্বদা শীজিন্নরে। ইমুংগী অমোৎপশিং লম্বী শেম্বদা শীজিন্নবা য়াবরা হায়বগী মতাংদা থিজিনবগী থবক চৎথরি।

ঐনা সোসিয়েল মীদিয়াদা অফ্রিকাগী লৈবাক অমগী লায়রবা মীয়ামগী থবক অমা উখ্রে। মখোয়না মখোয়গী খুঙ্গংদগী ফত্তবা প্লাস্তিকশিং অদু খোমজিল্লম্মি অমসুং তুরেলদা পুথরম্মি। অদুদগী মখোয়না প্লাস্তিক অদু মৈ থারম্মি অমসুং লৈঙোইগা য়ানশিন্নরম্মি। মদুদগী মখোয়না ব্লোকশিং শেম্লম্মি অমসুং মশিং য়াম্না য়োল্লম্মি। থবক অসিদা নুপী সেল্ফ হেল্প গ্রূপশিং য়াওরম্মি। মখোয়না অমোৎপা শেংদোকপদা নত্তনা মদুদগী অনৌবা পোৎ অমা শারগা কৈথেলদা য়োল্লম্মি।

অকোইবগী ফিবম অমসুং চাউখৎপা অনি অসি থোং মান্ননবা সরকারনা হোৎনরি। ঐখোয়না অকোইবগী ফিবম অমসুং চাউখৎপা অনি অসি থোং মান্ননা চৎমিন্নবগী ৱাফম হৌদোরকপা মতমদা মৈ অসি য়াম্না মরুওইবা অমনি। মৈ পুথোকপা অমসুং শীজিন্নবা অসিনা অকোইবগী ফিবমদা হকথেংননা অকাইবা থোকহল্লি।

হৌজিক ঐখোয়না মৈ পুথোক্নবা মহৌশাগী কোয়লা অমসুং নেচরেল গ্যাসকী মথক্তা নুমিৎকী মৈশাগী মৈ পুথোক্নবা কন্না থবক পায়খৎলি। ঐখোয়না ইন্তর্নেসনেল সোলর এলাইন্সগী মতেংনা ভারত খক নত্তনা মালেম শীনবা থুংনা সোলর ইনর্জী চাউখৎনবা হোৎনরি।

লৌউবদা সোলর পম্পশিংদগী হৌরগা উদ্যোগ অমসুং ওফিসশিংদা ঙসি সোলর ইনর্জী শীজিন্নবা অঙকপা মওংদা হেনগৎলক্লি। মসিগী মথক্তদা য়ুম অমসুং ওফিসশিংদা এল ই দি লাইত শীজিন্নবদগী মৈ কনবা ঙম্লে। হৌজিক লৈবাক অসিগী রেলৱে স্তেসনশিংদা এল ই দি লাইতশিং ঙানবদা ঐ হরাওই। মখোয়গী থবক হৌজিক লোইশিল্লে।  হৌজিক রেলৱেগী বিল্দিং খুদিংমক অমসুং রেলৱেগী ক্বাতরশিংদা এল ই দি বল্বশিং থান্নবা পান্দম থম্লি। ঐখোয়না এল ই দি লাইত্তা পুক্নীং থৌগৎলি। শ্বচ্ছ ভারত অমসুং শ্বাস্থ ভারত মিশন অসি অকোইবগী ফিবমগা মরি লৈনৈ।

মসিগী থবক অসিদা মৈখু চেন্দবা চাকশঙ লৈহন্নবা পান্দম থম্লি। ঙসি ঐনা থাগৎলি মদুদি লায়রবা ইমুং ক্রোর ৫গী ইমাশিং অমসুং ইচলশিং মৈখুদগী নীংতম্লে।

অসিগুম্বা থবক অসি ভারতনা অতেনবা মতমগী মনুংদা পাংথোকপা অসি অঙকপা অমনি। ভারতকী অপুনবা মীশিং অসি ক্রোর ১২৫নি অমসুং ইমুং ক্রোর ২৫-২৬নি। মসিগী ইমুং ক্রোর ২৫-২৬গী মনুংদা ইমুং ক্রোর ৫ অতেনবা মতমগী মনুংদা গ্যাস কন্নেক্সন ফংলে।

মরূপশিং,

ঙসি লৌমীশিং, তেক্নিসিয়ানশিং অমসুং সরকারগী ওফিসিয়েলশিংনা বাইওফুয়েল অমসুং মসিনা অহোংবশিং পুরক্নবা পুন্না থবক তৌমিন্নগনি। লৌমীশিংনা নুমিৎ খুদিংগী থেংনরিবা খুদোংচাদবশিং নখোয়না ৱা খন্নগদবনি। ভারত মচা ক্রোর ১২৫গী দরকার ওইবা ইনর্জী ফংনবা অমসুং লৌউবা অসি শেন্দোং লৈনবা ঐখোয়না পাউতাক কয়া ফংগনি হায়না ঐনা থাজৈ।

সুপ্নগী সরকার খক্তনা হোৎনরগা বাইওফুয়েলগী লমদা অচৌবা অওনবা পুরকপা ঙম্লোই। মহৈরোয়শিং, ওজাশিং, সাইন্সতিসশিং অমসুং উদ্যোক্কী মীওইশিং পুন্না শরুক য়াদুনা অচৌবা খোঙজং অমা শেমগৎপা ঐখোয়না দরকার ওইরি।

মফম অসিদা শরুক য়ারিবা রাজ্যশিংগী মীহুৎশিংদা ঐনা তকশিল্লি মদুদি, খুঙ্গং খুদিংদা বাইওফুয়েলগী কান্নবা ফংহন্নবা লনাই ওইবা থাক্তদা হোৎনবীয়ু। ঙসি মালেম অসিনা ৱার্ল্দ বাইওফুয়েল নুমিৎ পাংথোক্লি। বাইওফুয়েলগী লমদা ভারতনা থবক কয়া পায়খৎলি অমসুং মালেমগী শাবা হেনগৎলক্লিবা অসিদা থাজবা পীরি। ভারতনা লৌখৎলিবা খোঙথাংশিং অসিদা ঙসিদি মালেম্না য়ানরে।

ঙসিদি মালেম্না ভারতকী থৌশিল অমসুং থৌরাংশিং কুপ্না য়েংনরি অমসুং ঙসি হোৎনরিবা অসিনা অনৌবা থৌনা পীগনি, অনৌবা মাইওন তাক্কনি অমসুং থবক খুমাং চাউশিনগনি। মসিগী মাই পাক্লবা থৌরাং অসিগীদমক ঐনা ময়াম্বু থম্মোয় শেংনা থাগৎচরি।

অদোম্বু থাগৎচরি !