ପିଏମଇଣ୍ଡିଆ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି (ଗୁରୁବାର) ନୂଆଦିଲ୍ଲୀରୁ ଭିଡିଓ କନଫରେନସିଂ ଜରିଆରେ ନାଗପୁର ମେଟ୍ରୋର ଉଦଘାଟନ କରିଥିଲେ । ନାଗପୁର ମେଟ୍ରୋର 13.5 କିମି ଦୀର୍ଘ ଖପ୍ରି-ସିତାବୁଲଦି ସେକ୍ସନର ଡିଜିଟାଲ ଉଦଘାଟନ କରାଯାଇଥିଲା ।

ଏହି ଅବସରରେ ମହାରାଷ୍ଟ୍ରରେ ଦ୍ୱିତୀୟ ମେଟ୍ରୋ ସେବା ପାଇଁ ନାଗପୁରର ଜନସାଧାରଣଙ୍କୁ ଭିଡିଓ କନଫରେନସିଂ ଜରିଆରେ ପ୍ରଧାନମନ୍ତ୍ରୀ ଶୁଭେଚ୍ଛା ଜଣାଇଥିଲେ । ସେ କହିଥିଲେ ଯେ ସେ 2014ରେ ନାଗପୁର ମେଟ୍ରୋର ଆଧାରଶିଳା ରଖିଥିବାରୁ ଏହି ଅବସର ତାଙ୍କ ପାଇଁ ଅଦ୍ଭୁତ ଖୁସିର ମୂହୂର୍ତ୍ତ । ଏହି ମେଟ୍ରୋ ନାଗପୁରର ଲୋକମାନଙ୍କୁ ଉତ୍ତମ, ପରିବେଶ ଅନୁକୂଳ ଏବଂ ଅର୍ଥ ଅନୁକୂଳ ସେବା ଯୋଗାଇଦେବ ବୋଲି ସେ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଭବିଷ୍ୟତର ଆବଶ୍ୟକତାକୁ ଦୃଷ୍ଟିରେ ରଖି କେନ୍ଦ୍ର ସରକାର ଏବଂ ରାଜ୍ୟ ସରକାର ନିରନ୍ତର ନାଗପୁରର ବିକାଶ ଦିଗରେ କାର୍ଯ୍ୟ କରୁଛନ୍ତି । ସେ ଆହୁରି ମଧ୍ୟ କହିଥିଲେ ଯେ ନାଗପୁର ମେଟ୍ରୋ ଯୁବବର୍ଗଙ୍କ ପାଇଁ ନିଯୁକ୍ତି ସୁଯୋଗ ଆଣିବା ସହିତ ସହରର ବିକାଶ କ୍ଷେତ୍ରରେ ସହାୟକ ହେବ ।

ଦେଶରେ ଅତ୍ୟାଧୁନିକ ପରିବହନ ବ୍ୟବସ୍ଥା କ୍ଷେତ୍ରରେ କେନ୍ଦ୍ର ସରକାରଙ୍କର ପଦକ୍ଷେପଗୁଡିକ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ବିଗତ ସାଢେ ଚାରି ବର୍ଷ ମଧ୍ୟରେ ମେଟ୍ରୋ ପାଇଁ 400 କିମିର ପରିଚାଳନା ନେଟୱାର୍କ ନିର୍ମାଣ କରାଯାଇଛି । ସେ କହିଥିଲେ ଯେ ଦେଶରେ ଆହୁରୀ 800 କିମିର ମେଟ୍ରୋ ନେଟୱାର୍କ ନିର୍ମାଣ କାର୍ଯ୍ୟ ଜାରୀ ରହିଛି ।

ସାଧାରଣ ଗମନାଗମନ କାର୍ଡ, ଗୋଟିଏ ରାଷ୍ଟ୍ର, ଗୋଟିଏ କାର୍ଡର ଲାଭ ଉପରେ ପ୍ରଧାନମନ୍ତ୍ରୀ ଆଲୋକପାତ କରିଥିଲେ । ସେ କହିଥିଲେ ଯେ ସ୍ୱଦେଶରେ ପ୍ରସ୍ତୁତ ହୋଇଥିବା ଏହି କାର୍ଡ, ଡେବିଟ କାର୍ଡ ସହିତ ମିଶ୍ରଣ କରି ଏବଂ ଏହିଭଳି କାର୍ଡ ପ୍ରସ୍ତୁତ କରିବା ପାଇଁ ଅନ୍ୟ ଦେଶଗୁଡିକ ଉପରେ ଭାରତର ନିର୍ଭରଶୀଳତାକୁ ସମାପ୍ତ କରାଯାଇଛି । ବିଶ୍ୱରେ ବହୁତ କମ ଦେଶ ପାଖରେ ଏହିଭଳି ପରିବହନ କାର୍ଡ ଥିବା କଥା ପ୍ରଧାନମନ୍ତ୍ରୀ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ କେନ୍ଦ୍ର ସରକାର ସାମଗ୍ରିକ ଭାବେ ସମାଧାନ ପାଇଁ କାର୍ଯ୍ୟ କରିଥାନ୍ତି । ଦେଶର ସମସ୍ତ ନାଗରିକ ସୁବିଧାରେ ଜୀବନଯାପନ କରିପାରିବା ସଂକଳ୍ପ ସୁନିଶ୍ଚିତ କରିବା ପାଇଁ ସରକାର କାର୍ଯ୍ୟରତ ବୋଲି ସେ ପୁନରାବୃତ୍ତି କରିଥିଲେ ।