ಪಿಎಂಇಂಡಿಯಾ

12 ಸೆಪ್ಟೆಂಬರ್ 2026 ರಂದು 18ನೇ ಬ್ರಿಕ್ಸ್ ಶೃಂಗಸಭೆಯ ನೇಪಥ್ಯದಲ್ಲಿ, ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಘನತೆವೆತ್ತ ಶೇಖ್ ಖಾಲಿದ್ ಬಿನ್ ಮೊಹಮ್ಮದ್ ಅವರೊಂದಿಗೆ ಸಮಾಲೋಚನೆ ನಡೆಸಿದರು.

ಬಲವಾದ ರಾಜಕೀಯ, ಸಾಂಸ್ಕೃತಿಕ, ವಾಣಿಜ್ಯ, ಇಂಧನ ಮತ್ತು ಜನರ ನಡುವಿನ ಸಂಬಂಧಗಳ ಮೇಲೆ ನಿರ್ಮಿಸಲಾದ ಭಾರತ-ಯುಎಇ (UAE) ಸಮಗ್ರ ಕಾರ್ಯತಂತ್ರದ ಪಾಲುದಾರಿಕೆಯ ಮಹತ್ವವನ್ನು ಉಭಯ ನಾಯಕರು ಪುನರುಚ್ಚರಿಸಿದರು. ಜನವರಿ 2026 ರಲ್ಲಿ ಯುಎಇ ಅಧ್ಯಕ್ಷರಾದ ಘನತೆವೆತ್ತ ಶೇಖ್ ಮೊಹಮ್ಮದ್ ಬಿನ್ ಜಾಯೆದ್ ಅಲ್ ನಹ್ಯಾನ್ ಅವರು ಭಾರತಕ್ಕೆ ನೀಡಿದ ಯಶಸ್ವಿ ಭೇಟಿ ಮತ್ತು ಮೇ 2026 ರಲ್ಲಿ ಪ್ರಧಾನ ಮಂತ್ರಿಯವರು ಯುಎಇಗೆ ನೀಡಿದ ಭೇಟಿಯನ್ನು ಅವರು ಈ ಸಂದರ್ಭದಲ್ಲಿ ಸ್ಮರಿಸಿದರು.

ಭಾರತದ ಅಧ್ಯಕ್ಷತೆಯಲ್ಲಿ ಬ್ರಿಕ್ಸ್‌ನಲ್ಲಿ ಯುಎಇಯ ಸಕ್ರಿಯ ಮತ್ತು ರಚನಾತ್ಮಕ ಭಾಗವಹಿಸುವಿಕೆಯನ್ನು ಪ್ರಧಾನ ಮಂತ್ರಿಯವರು ಶ್ಲಾಘಿಸಿದರು. ಭಾರತದ ಅಧ್ಯಕ್ಷತೆಯ ಅವಧಿಯಲ್ಲಿ ಬ್ರಿಕ್ಸ್‌ನಲ್ಲಿ ಕಂಡುಬಂದ ಸಕಾರಾತ್ಮಕ ಫಲಿತಾಂಶಗಳನ್ನು ನಾಯಕರು ಸ್ವಾಗತಿಸಿದರು; ಅಲ್ಲದೇ, ಹಂಚಿಕೆಯ ಹಿತಾಸಕ್ತಿಗಳು ಮತ್ತು ಆದ್ಯತೆಗಳನ್ನು ಮುನ್ನಡೆಸಲು ಹಾಗೂ ಬ್ರಿಕ್ಸ್ ಸಹಕಾರವನ್ನು ಮತ್ತಷ್ಟು ಬಲಪಡಿಸಲು ಈ ವೇದಿಕೆಯ ಮೂಲಕ ಎರಡೂ ದೇಶಗಳು ನಿಕಟವಾಗಿ ಕೆಲಸ ಮಾಡುವುದನ್ನು ಮುಂದುವರಿಸಲು ಒಪ್ಪಿಕೊಂಡರು.

ವಿವಿಧ ಕ್ಷೇತ್ರಗಳಲ್ಲಿ ದ್ವಿಪಕ್ಷೀಯ ಸಂಬಂಧಗಳು ಸಾಧಿಸಿರುವ ಪ್ರಗತಿಯನ್ನು ನಾಯಕರು ಗುರುತಿಸಿದರು. ಭಾರತದ ಒಡಿಶಾದಲ್ಲಿ 11.5 ಬಿಲಿಯನ್ ಅಮೆರಿಕನ್ ಡಾಲರ್ ಮೌಲ್ಯದ ಸಮಗ್ರ ‘ಗ್ರೀನ್‌ಫೀಲ್ಡ್’ ಅಲ್ಯೂಮಿನಿಯಂ ಯೋಜನೆಯ ಅಭಿವೃದ್ಧಿಯಲ್ಲಿ ಹೂಡಿಕೆ ಮಾಡಲು ಯುಎಇಯ ‘ಇಂಟರ್ನ್ಯಾಷನಲ್ ಹೋಲ್ಡಿಂಗ್ ಕಂಪನಿ’ (IHC) ಪ್ರಕಟಿಸಿರುವ ನಿರ್ಧಾರವನ್ನು ಅವರು ಸಕಾರಾತ್ಮಕವಾಗಿ ಗಮನಿಸಿದರು; ಇದು ಭಾರತದ ಅತಿದೊಡ್ಡ ಸಮಗ್ರ ಅಲ್ಯೂಮಿನಿಯಂ ಹೂಡಿಕೆಯಾಗಿದೆ. ಈ ಯೋಜನೆಯು ಒಡಿಶಾವನ್ನು ಜಾಗತಿಕ ಅಲ್ಯೂಮಿನಿಯಂ ಉತ್ಪಾದನಾ ಕೇಂದ್ರವನ್ನಾಗಿ ರೂಪಿಸುವ ನಿರೀಕ್ಷೆಯಿದೆ.

ಪರಸ್ಪರ ಪ್ರಯೋಜನಕ್ಕಾಗಿ ಭಾರತ-ಯುಎಇ ಪಾಲುದಾರಿಕೆಯನ್ನು ಮತ್ತಷ್ಟು ಆಳಗೊಳಿಸುವಲ್ಲಿ, ಯುಎಇಯ ಹೊಸ ಸಾರ್ವಭೌಮ ಹೂಡಿಕೆ ನಿಧಿಯಾದ ‘ಎಲ್-ಇಮಾದ್’ (L’Imad) ವಹಿಸಬಹುದಾದ ಪ್ರಮುಖ ಪಾತ್ರವನ್ನು ನಾಯಕರು ಗುರುತಿಸಿದರು. ರಕ್ಷಣೆ, ಬಾಹ್ಯಾಕಾಶ, ಪರಮಾಣು ಶಕ್ತಿ, ತಂತ್ರಜ್ಞಾನ ಮತ್ತು ನಾವೀನ್ಯತೆ ಸೇರಿದಂತೆ ಕಾರ್ಯತಂತ್ರದ ಮತ್ತು ಉದಯೋನ್ಮುಖ ಕ್ಷೇತ್ರಗಳಲ್ಲಿ ಎರಡೂ ದೇಶಗಳ ನಡುವಿನ ಸಹಕಾರವನ್ನು ಹೆಚ್ಚಿಸುವ ಅವಕಾಶಗಳ ಬಗ್ಗೆಯೂ ಅವರು ಚರ್ಚಿಸಿದರು.

ಈ ಭೇಟಿಯು ನಿಯಮಿತ ನಾಯಕತ್ವ-ಮಟ್ಟದ ಸಂವಹನದ ಸಂಪ್ರದಾಯವನ್ನು ಹಾಗೂ ಭಾರತ ಮತ್ತು ಯುಎಇ ನಡುವಿನ ದೀರ್ಘಕಾಲೀನ ಸಂಬಂಧಕ್ಕೆ ಆಧಾರವಾಗಿರುವ ಪೀಳಿಗೆಯ ನಿರಂತರತೆಯನ್ನು ಪುನರುಚ್ಚರಿಸಿತು.

*****