ಪಿಎಂಇಂಡಿಯಾ

ಕೇಂದ್ರ ಸಚಿವ ಸಂಪುಟದ ನನ್ನ ಸಹೋದ್ಯೋಗಿಗಳಾದ ಜ್ಯೋತಿರಾದಿತ್ಯ ಸಿಂಧಿಯಾ ಮತ್ತು ರಾಜ್ಯ ಸಚಿವರಾದ ಚಂದ್ರಶೇಖರ್ ಪೆಮ್ಮಸಾನಿ ಜಿ, ವಿವಿಧ ರಾಜ್ಯ ಸರ್ಕಾರಗಳ ಸಚಿವರೆ, ಜಿಎಸ್‌ಎಂಎ ಮಂಡಳಿಯ ಸದಸ್ಯರೆ, ಜಾಗತಿಕ ಟೆಲಿಕಾಂ ವಲಯದ ಪ್ರತಿನಿಧಿಗಳೆ, ಉದ್ಯಮ ಕ್ಷೇತ್ರದ ಮುಖಂಡರೆ ಮತ್ತು ತಜ್ಞರೆ, ದೇಶದ ವಿವಿಧ ಕಾಲೇಜುಗಳು ಹಾಗೂ ಸ್ಟಾರ್ಟಪ್‌ಗಳಿಂದ ಆಗಮಿಸಿರುವ ನನ್ನ ಯುವ ಸ್ನೇಹಿತರೆ, ಮಹಿಳೆಯರೆ ಮತ್ತು ಮಹನೀಯರೆ.

ಇಂದು ಅಕ್ಟೋಬರ್ 8 – ಭಾರತಕ್ಕೆ ಇದೊಂದು ವಿಶೇಷ ದಿನ. ನಾವು ಈ ದಿನವನ್ನು ‘ವಾಯುಪಡೆ ದಿನ’ವಾಗಿ ಆಚರಿಸುತ್ತೇವೆ. ನಮ್ಮ ಎಲ್ಲಾ ಧೀರ ವಾಯುಪಡೆ ಯೋಧರಿಗೆ ನಾನು ಗೌ ಸಲ್ಲಿಸುತ್ತೇನೆ. ವಾಯುಪಡೆ ದಿನದಂದು ದೇಶದ ಜನತೆಗೆ ಶುಭಾಶಯಗಳನ್ನು ಕೋರುತ್ತೇನೆ.

ಸ್ನೇಹಿತರೆ,

ಸಿಂಧಿಯಾ ಅವರು ಈಗಷ್ಟೇ ಹೇಳಿದಂತೆ, ಸರ್ಕಾರದ ಮುಖ್ಯಸ್ಥರಾಗಿ ದೇಶಕ್ಕೆ ಸೇವೆ ಸಲ್ಲಿಸುತ್ತಾ ನಾನು ನಿನ್ನೆ 25 ವರ್ಷಗಳನ್ನು ಪೂರೈಸಿದೆ. ನನಗೆ ಇದು ಸೇವೆಯ ಒಂದು ಸಹಜ ಮತ್ತು ನಿರಂತರ ಪಯಣ. ದೇಶದ ಪ್ರತಿಯೊಬ್ಬ ನಾಗರಿಕರಿಗೂ ಹಾಗೂ ವಿಶ್ವಾದ್ಯಂತ ಇರುವ ಭಾರತದ ಪ್ರತಿಯೊಬ್ಬ ಸ್ನೇಹಿತರೆಲ್ಲರ ಶುಭಾಶಯಗಳಿಗಾಗಿ ನಾನು ಕೃತಜ್ಞತೆ ಸಲ್ಲಿಸುತ್ತೇನೆ.

ಸ್ನೇಹಿತರೆ,

ಈ ಸಂದರ್ಭದಲ್ಲೇ ‘ಇಂಡಿಯಾ ಮೊಬೈಲ್ ಕಾಂಗ್ರೆಸ್(ಸಮ್ಮೇಳನ)’ 10 ವರ್ಷಗಳನ್ನು ಪೂರೈಸುತ್ತಿರುವುದು ಒಂದು ಕಾಕತಾಳೀಯ ಸಂಗತಿಯಾಗಿದೆ. ಈ ವರ್ಷ  ಜಿಎಸ್‌ಎಂಎ ಮಂಡಳಿಯ ಸಭೆ ಆಯೋಜನೆಗೆ ಭಾರತವನ್ನು ಆಯ್ಕೆ ಮಾಡಲಾಗಿದೆ. ವಿಶ್ವಾದ್ಯಂತದಿಂದ ಇಲ್ಲಿಗೆ ಆಗಮಿಸಿರುವ ಟೆಲಿಕಾಂ ವಲಯದ ಪ್ರತಿನಿಧಿಗಳು, ಉದ್ಯಮ ನಾಯಕರು, ತಜ್ಞರು, ಶಿಕ್ಷಣ ತಜ್ಞರು ಮತ್ತು ಸ್ಟಾರ್ಟಪ್‌ಗಳ ಪ್ರತಿನಿಧಿಗಳು ಸೇರಿದಂತೆ ನಿಮ್ಮೆಲ್ಲರನ್ನೂ ನಾನು ಸ್ವಾಗತಿಸಿ, ಅಭಿನಂದಿಸುತ್ತೇನೆ.

ಸ್ನೇಹಿತರೆ,

ಇಂದಷ್ಟೇ ನಸುಕಿನಲ್ಲಿ ಖ್ಯಾತ ನಟ ನಾನಾ ಪಾಟೇಕರ್ ಜಿ ಅವರು ನಮ್ಮ ನಡುವೆ ಇಲ್ಲ ಎಂಬ ಸುದ್ದಿ ನಮಗೆ ತಲುಪಿದೆ. ಅವರು ವೈವಿಧ್ಯಮಯ ಪಾತ್ರಗಳ ಮೂಲಕ ಪ್ರೇಕ್ಷಕರ ಮನಗೆದ್ದ ಒಬ್ಬ ಶ್ರೇಷ್ಠ ಕಲಾವಿದರಾಗಿದ್ದರು. ನಾನಾ ಪಾಟೇಕರ್ ಜಿ ಅವರು ತಮ್ಮ ಜೀವನವನ್ನು ತ್ರಿವರ್ಣ ಧ್ವಜದ ಗೌರವ, ಹೆಮ್ಮೆ ಮತ್ತು ವೈಭವಕ್ಕಾಗಿ ಮುಡಿಪಾಗಿಟ್ಟಿದ್ದರು. ಅವರು ಎಂದಿಗೂ ತಮ್ಮನ್ನು ತಾವು ಸೀಮಿತಗೊಳಿಸಿಕೊಳ್ಳಲಿಲ್ಲ. ಬದಲಿಗೆ, ಪಕ್ಷಿಯಂತೆ ಅವರು ಚಲನಚಿತ್ರ ಲೋಕದ ಆಗಸದಲ್ಲಿ ವಿಹರಿಸಿದರು. ತಮ್ಮ ಚಲನಚಿತ್ರಗಳ ಮೂಲಕ, ಅವರು ಸಮಾಜದಲ್ಲಿನ ಅವ್ಯವಸ್ಥೆ ಮತ್ತು ಅನ್ಯಾಯದ ವಿರುದ್ಧ ಪ್ರಬಲ ಧ್ವನಿ ಎತ್ತಿದರು. ಸಾಮಾಜಿಕ ಪಿಡುಗುಗಳ ವಿರುದ್ಧ ಹೋರಾಡಿದ ಅವರು ಒಬ್ಬ ನಿಜವಾದ ಕ್ರಾಂತಿಕಾರಿಯಾಗಿದ್ದರು. ಅವರ ಮಾತುಗಳು ಹರಿತವಾಗಿದ್ದವು, ಅವರ ಮೌನವೂ ಅಷ್ಟೇ ಪರಿಣಾಮಕಾರಿಯಾಗಿತ್ತು. ರಾಷ್ಟ್ರದ ವಿರುದ್ಧ ಕೆಲಸ ಮಾಡುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವುದನ್ನು ಅವರು ಸದಾ ಬೆಂಬಲಿಸುತ್ತಿದ್ದರು. ನಾನು ನಾನಾ ಪಾಟೇಕರ್ ಜಿ ಅವರಿಗೆ ಗೌರವ ನಮನಗಳನ್ನು ಸಲ್ಲಿಸುತ್ತೇನೆ. ಅವರ ಕುಟುಂಬ ಸದಸ್ಯರು ಮತ್ತು ಅಭಿಮಾನಿಗಳಿಗೆ ನನ್ನ ಸಂತಾಪ ಸೂಚಿಸುತ್ತೇನೆ.

ಸ್ನೇಹಿತರೆ,

‘ಇಂಡಿಯಾ ಮೊಬೈಲ್ ಕಾಂಗ್ರೆಸ್’ನ ಹಲವಾರು ಆವೃತ್ತಿಗಳಲ್ಲಿ ನಿಮ್ಮೊಂದಿಗೆ ಪಾಲ್ಗೊಳ್ಳುವ ಅವಕಾಶ ನನಗೆ ಸಿಕ್ಕಿದೆ. ದೂರಸಂಪರ್ಕ ವಲಯ ಮತ್ತು ಡಿಜಿಟಲ್ ಸಂಪರ್ಕ ವ್ಯವಸ್ಥೆಯು ಹೇಗೆ ವಿಕಸನಗೊಂಡಿದೆ ಎಂಬುದಕ್ಕೆ ಈ ವೇದಿಕೆಯೇ ಸಾಕ್ಷಿಯಾಗಿದೆ. 2022ರಲ್ಲಿ ಇದೇ ವೇದಿಕೆಯಿಂದ ನಾವು ದೇಶದಲ್ಲಿ 5ಜಿ ಸೇವೆ ಪ್ರಾರಂಭಿಸಿದೆವು. 2023ರಲ್ಲಿ ಭಾರತವು 5ಜಿ ಸೇವೆಯ ಆರಂಭದಿಂದ ಅದು ವ್ಯಾಪಕವಾಗಿ ತಲುಪುತ್ತಿದೆ ಎಂಬುದರ ಕುರಿತು ನಾನು ಮಾತನಾಡಿದ್ದೆ. ಇಂದು ದೇಶದ ಪ್ರತಿಯೊಂದು ಜಿಲ್ಲೆಗೂ 5ಜಿ ಸಂಪರ್ಕ ತಲುಪಿದೆ ಎಂಬುದನ್ನು ನಾವೆಲ್ಲರೂ ಕಾಣಬಹುದು. ಭಾರತದಾದ್ಯಂತ ಈಗ 5,50,000ಕ್ಕೂ ಹೆಚ್ಚು ಬೇಸ್ ಸ್ಟೇಷನ್‌ಗಳು ಕಾರ್ಯ ನಿರ್ವಹಿಸುತ್ತಿದ್ದು, 5ಜಿ ಸೇವೆಗಳನ್ನು ಒದಗಿಸುತ್ತಿವೆ. 2022ಕ್ಕೆ ಹೋಲಿಸಿದರೆ ಮೊಬೈಲ್ ಇಂಟರ್ನೆಟ್ ವೇಗವು 10 ಪಟ್ಟು ಹೆಚ್ಚಾಗಿದೆ.

ಸ್ನೇಹಿತರೆ,

2024ರ ‘ಇಂಡಿಯಾ ಮೊಬೈಲ್ ಕಾಂಗ್ರೆಸ್’ನಲ್ಲಿ ಅಂತಾರಾಷ್ಟ್ರೀಯ ದೂರಸಂಪರ್ಕ ಒಕ್ಕೂಟ(ಐಟಿಯು)ದ ಉಪಸ್ಥಿತಿಯನ್ನು ನಾವು ಕಂಡೆವು. ಆ ಸಂದರ್ಭದಲ್ಲಿ, ಡಿಜಿಟಲ್ ಜಗತ್ತಿಗೆ ಜಾಗತಿಕ ಮಾನದಂಡಗಳ ಅಗತ್ಯವಿದೆಯೇ ಎಂಬ ಬಗ್ಗೆ ನಾವು ಚರ್ಚಿಸಿದೆವು. ಕಳೆದ ವರ್ಷ, ನಾವು ‘ಇನ್ವೆಸ್ಟ್, ಇನ್ನೋವೇಟ್ ಮತ್ತು ಮೇಕ್ ಇನ್ ಇಂಡಿಯಾ’ ಹೂಡಿಕೆ, ನಾವೀನ್ಯತೆ ಮತ್ತು ಭಾರತದಲ್ಲಿ ಉತ್ಪಾದನೆ) ಕುರಿತು ಸಮಾಲೋಚನೆ ನಡೆಸಿದೆವು. ದೂರಸಂಪರ್ಕ ಕ್ಷೇತ್ರದಲ್ಲಿ ಭಾರತ ಇಂದು ಸಾಧಿಸಿರುವ ಸ್ಥಾನಮಾನಕ್ಕೆ ‘ಇಂಡಿಯಾ ಮೊಬೈಲ್ ಕಾಂಗ್ರೆಸ್’ನ ಕೊಡುಗೆ ಅಪಾರವಾಗಿದೆ. ಅನೇಕ ವರ್ಷಗಳ ಅವಧಿಯಲ್ಲಿ, ಈ ವೇದಿಕೆಯು ಭಾರತದ ಪ್ರಗತಿ ಮತ್ತು ಆಕಾಂಕ್ಷೆಗಳನ್ನು ಬಿಂಬಿಸುವ ಪ್ರಮುಖ ವೇದಿಕೆಯಾಗಿ ಹೊರಹೊಮ್ಮಿದೆ. ಆದ್ದರಿಂದ, ನಿಮ್ಮೆಲ್ಲರಿಗೂ ನಾನು ವಿಶೇಷ ಅಭಿನಂದನೆಗಳನ್ನು ಸಲ್ಲಿಸುತ್ತೇನೆ.

ಸ್ನೇಹಿತರೆ,

ಈ ವರ್ಷ ನಿಮ್ಮ ಚರ್ಚೆಗಳಿಗಾಗಿ ನೀವು “ಗಡಿಗಳಿಲ್ಲದ ವ್ಯಾಪ್ತಿ ವಿಸ್ತರಣೆ” ಎಂಬ ವಿಷಯ ಆಯ್ಕೆ ಮಾಡಿಕೊಂಡಿದ್ದೀರಿ. ಗಡಿಗಳನ್ನು ಮೀರಿ ಬೆಳೆಯುವ ಕನಸನ್ನು ನಾವು ಹೇಗೆ ನನಸಾಗಿಸಿದ್ದೇವೆ ಎಂಬ ಭಾರತದ ಅನುಭವವನ್ನು ನಿಮ್ಮೊಂದಿಗೆ ಹಂಚಿಕೊಳ್ಳಲು ನಾನು ಬಯಸುತ್ತೇನೆ.

ಸ್ನೇಹಿತರೆ,

ನಾವು ದೂರಸಂಪರ್ಕ ಕ್ಷೇತ್ರದ ಬಗ್ಗೆ ಮಾತನಾಡುವಾಗ, ಚರ್ಚೆಗಳು ಸಾಮಾನ್ಯವಾಗಿ ನೆಟ್‌ವರ್ಕ್‌ಗಳು, ಸ್ಪೆಕ್ಟ್ರಮ್ ಕುರಿತ ವಾದಗಳು, ಟವರ್‌ಗಳು, ವ್ಯಾಪ್ತಿ ಮತ್ತು ವೇಗದ ಸುತ್ತಲೇ ಕೇಂದ್ರೀಕೃತವಾಗಿರುತ್ತವೆ. ಆದರೆ ಭಾರತದ ಜನರಿಗೆ, ದೂರಸಂಪರ್ಕವು ಅದಕ್ಕಿಂತ ಹೆಚ್ಚಿನ ಅರ್ಥ ನೀಡಿದೆ. ಕಳೆದ ದಶಕದಲ್ಲಿ, ಮೊಬೈಲ್ ಫೋನ್ ಕೇವಲ ಆಧುನಿಕ ಸಂವಹನದ ಸಾಧನವಾಗಿ ಮಾತ್ರವಲ್ಲದೆ, ಉತ್ತಮ ಆಡಳಿತದ ಪ್ರಮುಖ ಸಾಧನವಾಗಿಯೂ ಹೊರಹೊಮ್ಮಿದೆ. ಇದು ನಮ್ಮ ‘ಡಿಜಿಟಲ್ ಇಂಡಿಯಾ’ ದೃಷ್ಟಿಕೋನದ ಕೇಂದ್ರಬಿಂದುವಾಗಿದೆ.

ಸ್ನೇಹಿತರೆ,

ಇಂದು ಭಾರತದಲ್ಲಿ ಡೇಟಾ ಮತ್ತು ಮೊಬೈಲ್ ಫೋನ್‌ಗಳು ಕೈಗೆಟುಕುವ ದರದಲ್ಲಿ ಲಭ್ಯವಿದ್ದು, ಬಳಕೆದಾರರ ಸಂಖ್ಯೆ ಗಣನೀಯವಾಗಿ ಹೆಚ್ಚಾಗಿದೆ ಎಂದು ನಾವು ಕೇಳುತ್ತೇವೆ. ಇವೆಲ್ಲವೂ ಸತ್ಯ. ಆದರೆ ಇದು ಹೇಗೆ ಸಾಧ್ಯವಾಯಿತು? ಇವೆಲ್ಲವನ್ನೂ ಏಕೆ ಮಾಡಲಾಯಿತು? ಇದನ್ನು ನಾವು ಅರ್ಥ ಮಾಡಿಕೊಂಡಾಗ, ಭಾರತದ ಗಮನ ಮತ್ತು ಆದ್ಯತೆಗಳು ಸ್ಪಷ್ಟವಾಗುತ್ತವೆ.

ಸ್ನೇಹಿತರೆ,

ಒಂದು ದಶಕದ ಹಿಂದೆ, ಭಾರತದಲ್ಲಿ ‘ಡಿಜಿಟಲ್ ಕಂದಕ’ ಒಂದು ದೊಡ್ಡ ಸವಾಲಾಗಿತ್ತು. ಆಧುನಿಕ ತಂತ್ರಜ್ಞಾನವು ಕೆಲವೇ ವರ್ಗದವರಿಗೆ ಸೀಮಿತವಾದ ಸೌಲಭ್ಯವಾಗಿ ಪರಿವರ್ತನೆಯಾಗಿತ್ತು. ಬೇರೆ ರೀತಿಯಲ್ಲಿ ಹೇಳುವುದಾದರೆ, ಸಂಪನ್ಮೂಲಗಳನ್ನು ಹೊಂದಿದ್ದವರು ಮಾತ್ರ ಆಧುನಿಕ ತಂತ್ರಜ್ಞಾನದ ಪ್ರಯೋಜನ ಪಡೆಯಲು ಸಾಧ್ಯವಿತ್ತು. ಭಾರತವೂ ಕೂಡ ಅದೇ ದಿಕ್ಕಿನಲ್ಲಿ ಸಾಗುತ್ತಿತ್ತು. ‘ಡಿಜಿಟಲ್ ಇಂಡಿಯಾ’ ಅಭಿಯಾನದ ಮೂಲಕ ನಾವು ಈ ಪರಿಸ್ಥಿತಿಯನ್ನು ಬದಲಾಯಿಸಲು ನಿರ್ಧರಿಸಿದೆವು. ಮೊಬೈಲ್ ಫೋನ್ ಅನ್ನು ಅದರ ಕೇಂದ್ರಬಿಂದುವನ್ನಾಗಿ ಮಾಡಿದೆವು. ಇದು ತಂತ್ರಜ್ಞಾನ ಸಾರ್ವತ್ರೀಕರಣ ಮಾಡಿದ ಒಂದು ದೊಡ್ಡ ಪ್ರಯತ್ನವಾಗಿತ್ತು. ಇದಕ್ಕಾಗಿ, ದೂರಸಂಪರ್ಕ ವಲಯದಲ್ಲಿ ಅಗತ್ಯವಿರುವ ಎಲ್ಲಾ ಸುಧಾರಣೆಗಳನ್ನು ಜಾರಿಗೆ ತರಲಾಯಿತು, ಮೂಲಸೌಕರ್ಯವನ್ನು ವಿಸ್ತರಿಸಲಾಯಿತು. ಮೊಬೈಲ್ ಫೋನ್‌ಗಳು ಮತ್ತು ಇತರೆ ದೂರಸಂಪರ್ಕ ಹಾರ್ಡ್‌ವೇರ್‌ಗಳನ್ನು ಭಾರತದಲ್ಲೇ ಉತ್ಪಾದಿಸುವಂತಾಗಲು ನಾವು ಗಮನ ಹರಿಸಿದೆವು.

ಸ್ನೇಹಿತರೆ,

ಈ ಎಲ್ಲಾ ಪ್ರಯತ್ನಗಳ ಫಲವಾಗಿ, ಸಾಮಾನ್ಯ ಭಾರತೀಯರಿಗೆ ಮೊಬೈಲ್ ಫೋನ್‌ಗಳು ಮತ್ತು ಡೇಟಾ ಹೆಚ್ಚು ಸುಲಭವಾಗಿ ಮತ್ತು ಕೈಗೆಟುಕುವ ದರದಲ್ಲಿ ಲಭ್ಯವಾದವು. ಇಂದು, ಇದು ನಮ್ಮ ನಾಗರಿಕರ ಜೀವನವನ್ನು ಸುಲಭಗೊಳಿಸುತ್ತಿದೆ. ಕೋವಿಡ್ ಅವಧಿಯಲ್ಲಿ, ಎಲ್ಲವೂ ಬಹುತೇಕ ಸ್ಥಗಿತಗೊಂಡಿದ್ದನ್ನು ನಾವು ಕಂಡೆವು. ಆದರೂ ಭಾರತದಲ್ಲಿ ಕಚೇರಿಗಳು ಕಾರ್ಯ ನಿರ್ವಹಿಸುತ್ತಿದ್ದವು, ಬ್ಯಾಂಕುಗಳು ಚಾಲನೆಯಲ್ಲಿದ್ದವು ಮತ್ತು ಶಿಕ್ಷಣ ಮುಂದುವರಿಯಿತು. ಭಾರತದ ಡಿಜಿಟಲ್ ಪರಿಸರ ವ್ಯವಸ್ಥೆಯಿಂದಾಗಿ ಇದು ಸಾಧ್ಯವಾಯಿತು. ಮೊಬೈಲ್ ಮತ್ತು ಇಂಟರ್ನೆಟ್ ಸಂಪರ್ಕವು ಶಿಕ್ಷಣ, ಆರೋಗ್ಯ ಸೇವೆ, ಪಾವತಿಗಳು ಮತ್ತು ಸರ್ಕಾರಿ ಸೇವೆಗಳಿಗೆ ನಿರಂತರ ಪ್ರವೇಶವನ್ನು ಖಾತ್ರಿಪಡಿಸಿತು. ಇಂದು, ದೂರದ ಹಳ್ಳಿಗಳು ಮತ್ತು ಹಿಂದುಳಿದ ಹಿನ್ನೆಲೆಯ ಮಕ್ಕಳು ಕೂಡ ಗುಣಮಟ್ಟದ ಜ್ಞಾನ ಪಡೆಯಬಹುದು. ಡಿಜಿಟಲ್ ಕಲಿಕೆಯು ಎಲ್ಲರಿಗೂ ಹೆಚ್ಚು ಹೆಚ್ಚು ಲಭ್ಯವಾಗುತ್ತಿದೆ.

ಸ್ನೇಹಿತರೆ,

‘ಡಿಜಿಟಲ್ ಇಂಡಿಯಾ’ದ ಪ್ರಭಾವವನ್ನು ಮತ್ತಷ್ಟು ಎತ್ತಿ ತೋರಿಸುವ ಒಂದು ಅಂಕಿಅಂಶವನ್ನು ನಾನು ಹಂಚಿಕೊಳ್ಳುತ್ತೇನೆ. ಆನ್‌ಲೈನ್ ಶಿಕ್ಷಣಕ್ಕಾಗಿ ನಮ್ಮಲ್ಲಿ ‘ದೀಕ್ಷಾ’ ವೇದಿಕೆಯಿದೆ. ಕೋವಿಡ್ ಅವಧಿಯಲ್ಲಿ 2022ರ ಜುಲೈ ವೇಳೆಗೆ, ಈ ವೇದಿಕೆಯಲ್ಲಿ 5 ಶತಕೋಟಿಗೂ ಹೆಚ್ಚು ಕಲಿಕಾ ಅವಧಿಗಳು ಮತ್ತು ಸುಮಾರು 600 ಶತಕೋಟಿ ನಿಮಿಷಗಳ ಕಲಿಕೆ ದಾಖಲಾಗಿತ್ತು. ನಮ್ಮ ಎಲ್ಲಾ ಡಿಜಿಟಲ್ ಮತ್ತು ಆನ್‌ಲೈನ್ ಶಿಕ್ಷಣ ವೇದಿಕೆಗಳಿಗೆ ಸುಮಾರು 25 ಕೋಟಿ ವಿದ್ಯಾರ್ಥಿಗಳನ್ನು ಸಂಪರ್ಕಿಸುವುದು ಈಗ ನಮ್ಮ ಪ್ರಯತ್ನವಾಗಿದೆ.

ಬೇರೆ ಮಾತುಗಳಲ್ಲಿ ಹೇಳುವುದಾದರೆ, ಸ್ನೇಹಿತರೆ,

ಟೆಲಿಕಾಂ ವಲಯದಲ್ಲಿನ ಕ್ರಾಂತಿಯು ಭಾರತೀಯ ನಾಗರಿಕರಿಗೆ ನೇರ ಪ್ರಯೋಜನ ನೀಡಿದೆ. ನಿಮಗೆ ತಿಳಿದಿರುವಂತೆ, ಭಾಷೆ ಮತ್ತು ಭೌಗೋಳಿಕತೆಯ ದೃಷ್ಟಿಯಿಂದ ಭಾರತವು ವೈವಿಧ್ಯಮಯವಾಗಿದೆ. ಅಂತಹ ವೈವಿಧ್ಯತೆಯು ಜನರ ಜೀವನದಲ್ಲಿ ಅನೇಕ ಅನನುಕೂಲತೆಗಳನ್ನು ಉಂಟುಮಾಡಬಹುದು. ಮೊಬೈಲ್ ಸಂಪರ್ಕವು ಈ ವೈವಿಧ್ಯತೆಯನ್ನು ಅನುಕೂಲವಾಗಿ ಪರಿವರ್ತಿಸಿದೆ. ಹಿಂದೆ ಹೆಚ್ಚಿನ ಬ್ಯಾಂಕುಗಳು ನಗರಗಳಲ್ಲಿರುತ್ತಿದ್ದವು, ಆಸ್ಪತ್ರೆಗಳು ನಗರ ಪ್ರದೇಶಗಳಲ್ಲಿ ಕೇಂದ್ರೀಕೃತವಾಗಿದ್ದವು, ಸರ್ಕಾರಿ ಕಚೇರಿಗಳು ಸಾಮಾನ್ಯವಾಗಿ ಬ್ಲಾಕ್ ಅಥವಾ ಜಿಲ್ಲಾ ಕೇಂದ್ರಗಳಲ್ಲಿ ಮಾತ್ರ ಲಭ್ಯವಿರುತ್ತಿದ್ದವು. ಯಾವುದೇ ಸರ್ಕಾರಿ ಸೇವೆ ಪಡೆಯಲು ಸಾಕಷ್ಟು ಸಮಯ ಮತ್ತು ಹಣದ ವ್ಯಯವಾಗುತ್ತಿತ್ತು. ಡಿಜಿಟಲ್ ಆಡಳಿತವು ಈ ಪರಿಸ್ಥಿತಿಯನ್ನು ಬದಲಾಯಿಸಿದೆ. ಇಂದು ಮೊಬೈಲ್ ಫೋನ್‌ಗಳ ಮೂಲಕ ನೂರಾರು ಸರ್ಕಾರಿ ಸೇವೆಗಳು ಲಭ್ಯವಿವೆ. ಸರ್ಕಾರದ ಸಹಾಯಧನವನ್ನು ಈಗ ನೇರವಾಗಿ ಫಲಾನುಭವಿಗಳ ಖಾತೆಗಳಿಗೆ ವರ್ಗಾಯಿಸಲಾಗುತ್ತಿದೆ. ‘ನೇರ ನಗದು ವರ್ಗಾವಣೆ’ ಮೂಲಕ, ಸುಮಾರು 50 ಲಕ್ಷ ಕೋಟಿ ರೂ. ಹಣವು ಫಲಾನುಭವಿಗಳ ಬ್ಯಾಂಕ್ ಖಾತೆಗಳಿಗೆ ನೇರವಾಗಿ ತಲುಪಿದೆ. ಇದರ ಪರಿಣಾಮವಾಗಿ, ಸುಮಾರು 5 ಲಕ್ಷ ಕೋಟಿ ರೂ. ಹಣ ಮಧ್ಯವರ್ತಿಗಳ ಸೇರುವುದು ತಪ್ಪಿದೆ. ಇದು ಸಣ್ಣ ಮೊತ್ತವಲ್ಲ. ಸುಮಾರು 5 ಲಕ್ಷ ಕೋಟಿ ರೂ. ಹಣ ದುರುಪಯೋಗವಾಗದಂತೆ ಉಳಿಸಲಾಗಿದೆ.

ಈಗ ನನಗೆ ಹೇಳಿ, ಯಾರ ಸುಲಭ ಆದಾಯ ನಿಂತುಹೋಗಿದೆಯೋ, ಅವರು ಮೋದಿಯನ್ನು ಇಷ್ಟಪಡುತ್ತಾರೆಯೇ? ನಾನು ಸರಿಯಾದ ಕೆಲಸ ಮಾಡಿದ್ದೇನೋ ಅಥವಾ ಇಲ್ಲವೋ? ಇದನ್ನು ಮಾಡಬೇಕಿತ್ತೇ ಅಥವಾ ಇಲ್ಲವೇ? ಇಂತಹ ತಪ್ಪು ಪದ್ಧತಿಗಳನ್ನು ನಿಲ್ಲಿಸಬೇಕೇ ಅಥವಾ ಬೇಡವೇ? ಅವರು ಎಷ್ಟೇ ಕೂಗಾಡಿದರೂ ಅಥವಾ ಬೊಬ್ಬೆ ಹಾಕಿದರೂ ಪರವಾಗಿಲ್ಲ. ನಾನು ದೃಢ ನಿರ್ಧಾರ ಕೈಗೊಂಡಿದ್ದೇನೆ ಮತ್ತು ಇದೇ ಹಾದಿಯಲ್ಲಿ ಮುಂದುವರಿಯುತ್ತೇನೆ.

ಹಳೆಯ ವ್ಯವಸ್ಥೆಯೇ ಮುಂದುವರಿದಿದ್ದರೆ, ಸೋರಿಕೆಯ ಕಾರಣದಿಂದಾಗಿ ಸುಮಾರು 5 ಲಕ್ಷ ಕೋಟಿ ರೂ.ನಷ್ಟು ಸರ್ಕಾರಿ ಹಣ ನಷ್ಟವಾಗಿ, ಅಂತಹ ಜನರ ಜೇಬು ಸೇರುತ್ತಿತ್ತು. ನಾವು ಇದನ್ನು ತಡೆಗಟ್ಟಿದೆವು. ಈಗ ಆ ಹಣವು ಅರ್ಹ ಫಲಾನುಭವಿಯನ್ನು ತಲುಪುತ್ತಿದೆ, ಉಳಿತಾಯವಾದ ಹಣವನ್ನು ಉತ್ಪಾದಕ ಉದ್ದೇಶಗಳಿಗಾಗಿ ಬಳಸಲಾಗುತ್ತಿದೆ.

ಸ್ನೇಹಿತರೆ,

‘ಪಿಎಂ-ಕಿಸಾನ್ ಸಮ್ಮಾನ್ ನಿಧಿ’ ಯೋಜನೆಯಡಿ ನಾವು ಈಗಾಗಲೇ ರೈತರ ಬ್ಯಾಂಕ್ ಖಾತೆಗಳಿಗೆ ನೇರವಾಗಿ 4 ಲಕ್ಷ ಕೋಟಿ ರೂ.ಗಿಂತಲೂ ಹೆಚ್ಚಿನ ಹಣ ಜಮೆ ಮಾಡಿದ್ದೇವೆ. ಈ ಹಣವನ್ನು ಪ್ರತಿ 4 ತಿಂಗಳಿಗೊಮ್ಮೆ ವರ್ಗಾಯಿಸಲಾಗುತ್ತಿದೆ. ರೈತರು ತಮ್ಮ ಮೊಬೈಲ್ ಫೋನ್‌ನಲ್ಲೇ ನೇರವಾಗಿ ಇದರ ಮಾಹಿತಿ(ಅಧಿಸೂಚನೆ) ಪಡೆಯುತ್ತಾರೆ. ಈ ಹಣವು ಕೋಟ್ಯಂತರ ಸಣ್ಣ ರೈತರನ್ನು ತಲುಪಿದೆ, ಇವರು ಹಿಂದೆ ಸಾಮಾನ್ಯವಾಗಿ ಸರ್ಕಾರದ ಯೋಜನೆಗಳ ವ್ಯಾಪ್ತಿಯಿಂದ ಹೊರಗೇ ಉಳಿದಿದ್ದರು.

ಬೇರೆ ಮಾತುಗಳಲ್ಲಿ ಹೇಳುವುದಾದರೆ, ಸ್ನೇಹಿತರೆ,

ಮೊಬೈಲ್ ಫೋನ್ ಈಗ ಕೇವಲ ಸಂವಹನ ಮಾಧ್ಯಮವಾಗಿ ಉಳಿಯದೆ, ಇದು ಪ್ರಯಾಣದ ಅಗತ್ಯವನ್ನು ಕಡಿಮೆ ಮಾಡಿದೆ, ಕಾಯುವ ಸಮಯ ತಗ್ಗಿಸಿದೆ, ವೆಚ್ಚ ಕಡಿಮೆ ಮಾಡಿದೆ ಮತ್ತು ಹೆಚ್ಚಿನ ಅನುಕೂಲ ಒದಗಿಸಿದೆ. ತಂತ್ರಜ್ಞಾನವು ನಾಗರಿಕರಿಗೆ ನೀಡಬಹುದಾದ ಅತ್ಯಂತ ದೊಡ್ಡ ಲಾಭ ಇದಾಗಿದೆ.

ಸ್ನೇಹಿತರೆ,

ಕಳೆದ ದಶಕದಲ್ಲಿ ಭಾರತದ ದೂರಸಂಪರ್ಕ ಮೂಲಸೌಕರ್ಯವು ನಿರಂತರವಾಗಿ ವಿಸ್ತರಣೆಗೊಂಡಿದೆ. ದೂರದ ಪ್ರದೇಶಗಳಲ್ಲಿ ಟವರ್‌ಗಳನ್ನು ಸ್ಥಾಪಿಸಲಾಗಿದೆ, ಆಪ್ಟಿಕಲ್ ಫೈಬರ್ ಜಾಲಗಳು ಅಭೂತಪೂರ್ವ ಪ್ರಮಾಣದಲ್ಲಿ ವಿಸ್ತರಿಸಿವೆ, ಡೇಟಾ ಕೈಗೆಟುಕುವ ದರದಲ್ಲಿ ಲಭ್ಯವಾಗಿದೆ. ಇದು ಆರ್ಥಿಕತೆಯಲ್ಲಿ ಸಂಪೂರ್ಣ ಹೊಸ ವಲಯಗಳ ಉದಯಕ್ಕೂ ಕಾರಣವಾಗಿದೆ. ಇದು ತಂತ್ರಜ್ಞಾನ, ಮನರಂಜನೆ ಮತ್ತು ಶಿಕ್ಷಣ ಕ್ಷೇತ್ರಗಳಲ್ಲಿ ಹೊಸ ಗ್ರಾಹಕರನ್ನು ಸೃಷ್ಟಿಸಿದೆ. ಅದೇ ಸಮಯದಲ್ಲಿ ಹೊಸ ಪೀಳಿಗೆಯ ಸೃಷ್ಟಿಕರ್ತರನ್ನು ಪೋಷಿಸಿದೆ. ಉದಾಹರಣೆಗೆ ಗೇಮಿಂಗ್ ಅನ್ನೇ ತೆಗೆದುಕೊಳ್ಳಿ. ಇಂದು ಭಾರತದಲ್ಲಿ 50 ಕೋಟಿಗೂ ಹೆಚ್ಚು ಜನರು ಯಾವುದಾದರೊಂದು ರೀತಿಯಲ್ಲಿ ಗೇಮಿಂಗ್ ಪರಿಸರ ವ್ಯವಸ್ಥೆಯೊಂದಿಗೆ ಸಂಪರ್ಕ ಹೊಂದಿದ್ದಾರೆ ಎಂದು ಅಂದಾಜಿಸಲಾಗಿದೆ. ಇವರಲ್ಲಿ ಹೆಚ್ಚಿನವರು ಯುವ ಭಾರತೀಯರು. 2 ಮತ್ತು 3ನೇ ಶ್ರೇಣಿಯ ನಗರಗಳ ಯುವಕರು ಕೂಡ ಇದರಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳುತ್ತಿದ್ದಾರೆ. ಅವರು ಕೇವಲ ಆಟಗಳನ್ನು ಆಡುವುದಲ್ಲದೆ, ಇ-ಸ್ಪೋರ್ಟ್ಸ್‌ನಲ್ಲಿ ಸ್ಪರ್ಧಿಸುತ್ತಿದ್ದಾರೆ, ಗೇಮಿಂಗ್ ವಿಷಯವನ್ನು ಸೃಷ್ಟಿಸುತ್ತಿದ್ದಾರೆ, ಹೊಸ ಗೇಮಿಂಗ್ ಉದ್ಯಮಗಳನ್ನು ಕಟ್ಟುತ್ತಿದ್ದಾರೆ. ಬೇರೆ ಮಾತುಗಳಲ್ಲಿ ಹೇಳುವುದಾದರೆ, ಭಾರತದಲ್ಲಿ ಮೊಬೈಲ್ ಫೋನ್ ಒಂದು ಗೇಮಿಂಗ್ ಕನ್ಸೋಲ್ ಮತ್ತು ಸೃಷ್ಟಿ ಕೇಂದ್ರ – ಎರಡೂ ಆಗಿ ಮಾರ್ಪಟ್ಟಿದೆ.

ಸ್ನೇಹಿತರೆ,

ಭಾರತದಲ್ಲಿನ ದೂರಸಂಪರ್ಕ ಕ್ರಾಂತಿಯು ವಿಷಯ ಅಥವಾ ಕಾಂಟೆಂಟ್ ಜಗತ್ತಿನಲ್ಲಿಯೂ ಇದೇ ರೀತಿಯ ಪರಿವರ್ತನೆ ತಂದಿದೆ. ಉತ್ತಮ ಮತ್ತು ವೇಗವಾದ ಸಂಪರ್ಕ ಹಾಗೂ ಕೈಗೆಟುಕುವ ದರದ ಡೇಟಾ ಸೌಲಭ್ಯವು ವೀಡಿಯೊ-ಹಂಚಿಕೆ ವೇದಿಕೆಗಳು, ಸಾಮಾಜಿಕ ಜಾಲತಾಣಗಳು ಮತ್ತು ಪ್ರಾದೇಶಿಕ ಒಟಿಟಿ ಸೇವೆಗಳನ್ನು ಹಳ್ಳಿಗಳು ಮತ್ತು ಸಣ್ಣ ಪಟ್ಟಣಗಳಿಗೂ ತಲುಪಿಸಿದೆ. ಇದರ ಪರಿಣಾಮವಾಗಿ, ಭಾಷೆಗೆ ಸಂಬಂಧಿಸಿದ ಅನೇಕ ಅಡೆತಡೆಗಳು ಮತ್ತು ಮಿತಿಗಳು ದೂರವಾಗಿವೆ. ಇಂದು ಭಾರತದಲ್ಲಿ ಕೇವಲ ವಿಷಯ ಸೃಷ್ಟಿ ಉದ್ಯಮವೇ ಸಾವಿರಾರು ಕೋಟಿ ರೂಪಾಯಿ ಮೌಲ್ಯವನ್ನು ಹೊಂದಿದೆ, ಲಕ್ಷಾಂತರ ಜನರಿಗೆ ಆದಾಯ ಅವಕಾಶಗಳನ್ನು ಒದಗಿಸುತ್ತಿದೆ. ಬೇರೆ ಮಾತುಗಳಲ್ಲಿ ಹೇಳುವುದಾದರೆ, ಮೊಬೈಲ್ ಫೋನ್ ಭಾರತದಲ್ಲಿ ವಿಷಯ ಸೃಷ್ಟಿಯನ್ನು ಸಾರ್ವತ್ರೀಕರಣಗೊಳಿಸಿದೆ.

ಸ್ನೇಹಿತರೆ,

ದೂರಸಂಪರ್ಕ ಮತ್ತು ಡಿಜಿಟಲ್ ತಂತ್ರಜ್ಞಾನವು ಇಂತಹ ನಿರ್ಣಾಯಕ ಪಾತ್ರ ವಹಿಸುತ್ತಿರುವ ಸಮಯದಲ್ಲಿ, ಅವುಗಳಿಗೆ ಸಂಬಂಧಿಸಿದ ಭದ್ರತಾ ಮಾರ್ಗಸೂಚಿಗಳನ್ನು ಬಲಪಡಿಸುವುದು ಕೂಡ ಅಷ್ಟೇ ಮುಖ್ಯವಾಗಿದೆ. ಫೋನ್‌ಗಳ ಭದ್ರತೆ ಮತ್ತು ನೆಟ್‌ವರ್ಕ್‌ಗಳ ಭದ್ರತೆಯು ನಮ್ಮೆಲ್ಲರಿಗೂ ಆದ್ಯತೆಯ ವಿಷಯಗಳಾಗಿವೆ. ಸಾಮಾನ್ಯ ನಾಗರಿಕರು ಪ್ರೋಟೋಕಾಲ್‌ಗಳು ಅಥವಾ ತಾಂತ್ರಿಕ ವಿನ್ಯಾಸದ ಬಗ್ಗೆ ಯೋಚಿಸುವುದಿಲ್ಲ, ಅವರಿಗೆ ನಂಬಿಕೆಯೇ ಅತ್ಯಂತ ಮುಖ್ಯವಾದುದು. ಅವರಿಗೆ ಕರೆ ಬಂದಾಗ, ಯಾರು ಕರೆ ಮಾಡುತ್ತಿದ್ದಾರೆ ಎಂಬುದು ಅವರಿಗೆ ತಿಳಿಯಬೇಕು. ಅವರಿಗೆ ಸಂದೇಶ ಬಂದಾಗ, ಅದು ನಿಜವೋ ಅಥವಾ ನಕಲಿಯೋ ಎಂಬುದು ಅವರಿಗೆ ತಿಳಿಯಬೇಕು. ಅವರು ಪಾವತಿ ಮಾಡುವಾಗ, ತಮ್ಮ ಹಣ ಸುರಕ್ಷಿತವಾಗಿದೆ ಎಂಬ ವಿಶ್ವಾಸ ಹೊಂದಿರಬೇಕು. ನಮೂನೆ ಅಥವಾ ಫಾರ್ಮ್ ಮೂಲಕ ತಮ್ಮ ಸ್ವವಿವರ ಒದಗಿಸುವಾಗ, ತಮ್ಮ ಮಾಹಿತಿಯು ರಕ್ಷಿಸಲ್ಪಟ್ಟಿದೆ ಎಂಬುದು ಅವರಿಗೆ ತಿಳಿದಿರಬೇಕು.

ಸ್ನೇಹಿತರೆ,

ತಂತ್ರಜ್ಞಾನವು ವಿಶ್ವಾಸ ಗಳಿಸಿದಾಗ ಮಾತ್ರ ವ್ಯಾಪಕವಾಗಿ ವಿಸ್ತರಣೆಯಾಗಲು ಸಾಧ್ಯ. ಸೈಬರ್ ವಂಚನೆ ಮತ್ತು ಸೈಬರ್ ಅಪರಾಧಗಳಿಗೆ ಯಾವುದೇ ಭೌಗೋಳಿಕ ಗಡಿಗಳಿಲ್ಲ ಎಂಬುದು ನಮಗೆಲ್ಲರಿಗೂ ತಿಳಿದಿದೆ, ಅವು ಈಗಾಗಲೇ ಗಡಿಗಳನ್ನು ದಾಟಿವೆ. ಒಂದು ದೇಶದಲ್ಲಿ ಕುಳಿತಿರುವ ವ್ಯಕ್ತಿಯು, ಮತ್ತೊಂದು ದೇಶದ ಸಹಾಯದಿಂದ 3ನೇ ದೇಶದಲ್ಲಿ ಅಪರಾಧ ಎಸಗಬಹುದು. ‘ಡೀಪ್‌ಫೇಕ್‌’ಗಳು ಎಷ್ಟೊಂದು ಗಂಭೀರ ಸವಾಲಾಗಿ ಪರಿಣಮಿಸಿವೆ ಎಂಬುದನ್ನು ಕೂಡ ನಾವು ಕಾಣುತ್ತಿದ್ದೇವೆ. ಆದ್ದರಿಂದ, ಈ ಸಮಸ್ಯೆಗಳನ್ನು ಪರಿಹರಿಸಲು ಜಾಗತಿಕ ಮಾರ್ಗಸೂಚಿ ರೂಪಿಸುವ ನಿಟ್ಟಿನಲ್ಲಿ ನಾವು ಕೆಲಸ ಮಾಡುವುದು ಅಗತ್ಯವಾಗಿದೆ. ಸರ್ಕಾರಗಳು, ತಂತ್ರಜ್ಞಾನ ಕಂಪನಿಗಳು, ಟೆಲಿಕಾಂ ಆಪರೇಟರ್‌ಗಳು ಮತ್ತು ಹಣಕಾಸು ಸಂಸ್ಥೆಗಳು ಇಂತಹ ಮಾರ್ಗಸೂಚಿಯ ಭಾಗವಾಗಬೇಕು. ಅಂತಹ ವಂಚನೆಯು ಜನರನ್ನು ತಲುಪುವ ಮೊದಲೇ ಅದನ್ನು ತಡೆಯಬಲ್ಲ ಜಾಗತಿಕ ಕಾರ್ಯವಿಧಾನ ರೂಪಿಸಲು ಒಗ್ಗೂಡಿ ಕೆಲಸ ಮಾಡುವಂತೆ ನಾನು ಜಿಎಸ್‌ಎಂಎ ಮತ್ತು ವಿಶ್ವಾದ್ಯಂತದ ಟೆಲಿಕಾಂ ಆಪರೇಟರ್‌ಗಳಿಗೆ ಕರೆ ನೀಡುತ್ತೇನೆ. ಭಾರತವು ತನ್ನ ಸ್ವಂತ ಅನುಭವಗಳಿಂದ ಬಹಳಷ್ಟನ್ನು ಕಲಿತಿದೆ, ಆ ಅನುಭವಗಳನ್ನು ಜಗತ್ತಿನೊಂದಿಗೆ ಹಂಚಿಕೊಳ್ಳಲು ಯಾವಾಗಲೂ ಸಿದ್ಧವಾಗಿದೆ.

ಸ್ನೇಹಿತರೆ,

ಈ ದಶಕದಲ್ಲಿ ಇನ್ನೂ 4 ವರ್ಷಗಳು ಮಾತ್ರ ಬಾಕಿ ಉಳಿದಿವೆ. ‘ಇಂಡಿಯಾ ಮೊಬೈಲ್ ಕಾಂಗ್ರೆಸ್’ನ ಈ ಆವೃತ್ತಿಯಲ್ಲಿ ನಡೆಯುವ ಚರ್ಚೆಗಳು ಮುಂದಿನ ದಶಕದ ಮಾರ್ಗಸೂಚಿಯನ್ನು ಬಲಪಡಿಸುತ್ತವೆ. ಈ ಮಾರ್ಗಸೂಚಿಯು ಭಾರತಕ್ಕೆ ಮಾತ್ರವಲ್ಲದೆ, ಜಾಗತಿಕ ಮೊಬೈಲ್ ಮಾರುಕಟ್ಟೆಗೂ ದಿಕ್ಸೂಚಿಯಾಗಲಿದೆ. ಕಳೆದ ಕೆಲವು ವರ್ಷಗಳಲ್ಲಿ ಭಾರತವು ಕೇವಲ ಗ್ರಾಹಕನ ಸ್ಥಾನದಿಂದ ಸೃಷ್ಟಿಕರ್ತನ ಸ್ಥಾನಕ್ಕೆ ಪ್ರಗತಿ ಸಾಧಿಸಿದೆ. ಈಗ ಭಾರತವು ಅಂತಹ ಭವಿಷ್ಯದತ್ತ ಸಾಗುತ್ತಿದೆ, ಅಲ್ಲಿ ಉತ್ಪನ್ನಗಳು ಮತ್ತು ವಿನ್ಯಾಸಗಳು ಭಾರತದಲ್ಲೇ ರೂಪುಗೊಳ್ಳುತ್ತವೆ. ಅವುಗಳ ತಂತ್ರಜ್ಞಾನ ಮತ್ತು ಬೌದ್ಧಿಕ ಆಸ್ತಿಯ ಹಕ್ಕು ಕೂಡ ಭಾರತದ್ದೇ ಆಗಿರುತ್ತದೆ. ಇದನ್ನು ಸಾಧಿಸಲು ಅಗತ್ಯವಿರುವ ಎಲ್ಲ ಪ್ರೋತ್ಸಾಹಕಗಳನ್ನು ನೀಡಲಾಗುತ್ತಿದೆ, ಅಗತ್ಯವಿರುವ ಎಲ್ಲ ಸುಧಾರಣೆಗಳನ್ನು ಕೈಗೊಳ್ಳಲಾಗುತ್ತಿದೆ. ಬೇರೆ ಮಾತುಗಳಲ್ಲಿ ಹೇಳುವುದಾದರೆ, ಟೆಲಿಕಾಂ ವಲಯದಲ್ಲೂ ಸುಧಾರಣಾ ಪ್ರಕ್ರಿಯೆಯು ವೇಗವಾಗಿ ಮುನ್ನಡೆಯುತ್ತಿದೆ. ದಶಕಗಳಷ್ಟು ಹಳೆಯದಾದ ಕಾನೂನುಗಳನ್ನು ನಾವು ಆಧುನೀಕರಿಸುತ್ತಿದ್ದೇವೆ. ದೂರಸಂಪರ್ಕ ಕಾಯ್ದೆ ಮೂಲಕ ನಾವು ಆಧುನಿಕ ನಿಯಂತ್ರಕ ಮಾರ್ಗಸೂಚಿಗಳನ್ನು ಸೃಷ್ಟಿಸಿದ್ದೇವೆ. ಎಜಿಆರ್ ಮತ್ತು ಬ್ಯಾಂಕ್ ಗ್ಯಾರಂಟಿಗಳಂತಹ ರಚನಾತ್ಮಕ ಹೊರೆಗಳನ್ನು ನಾವು ತರ್ಕಬದ್ಧಗೊಳಿಸುತ್ತಿದ್ದು, ಆ ಹೊರೆಗಳನ್ನು ಅವಕಾಶಗಳನ್ನಾಗಿ ಪರಿವರ್ತಿಸುತ್ತಿದ್ದೇವೆ. ‘ಗತಿಶಕ್ತಿ ಸಂಚಾರ್ ಪೋರ್ಟಲ್’ ಡಿಜಿಟಲ್ ಪ್ರಕ್ರಿಯೆಗಳ ಮೂಲಕ ಮಾರ್ಗದ ಹಕ್ಕು ಅನುಮೋದನೆಗಳನ್ನು ತ್ವರಿತಗೊಳಿಸಿದೆ.

ಸ್ನೇಹಿತರೆ,

ಭಾರತದ ಸೆಮಿಕಂಡಕ್ಟರ್ ಮತ್ತು ಸೆಮಿಕಂಡಕ್ಟರ್ ಉತ್ಪಾದನಾ ಪರಿಸರ ವ್ಯವಸ್ಥೆಯೂ ವೇಗ ಪಡೆದುಕೊಳ್ಳುತ್ತಿದೆ. ಈಗಾಗಲೇ 5 ಸ್ಥಳಗಳಲ್ಲಿ ವಾಣಿಜ್ಯ ಉತ್ಪಾದನೆ ಪ್ರಾರಂಭವಾಗಿದೆ. ‘ಇಂಡಿಯಾ ಸೆಮಿಕಂಡಕ್ಟರ್ ಮಿಷನ್’ನ ಮುಂದಿನ ಹಂತದಲ್ಲಿ ನಮ್ಮ ಗಮನವು ಸಂಪೂರ್ಣ ಪೂರೈಕೆ ಸರಪಳಿಯ ಮೇಲೆ ಇರುತ್ತದೆ. ಸಂಕ್ಷಿಪ್ತವಾಗಿ ಹೇಳುವುದಾದರೆ, ದೂರಸಂಪರ್ಕ ವಲಯಕ್ಕೆ ಸಂಬಂಧಿಸಿದ ಪ್ರತಿಯೊಂದು ಕ್ಷೇತ್ರದಲ್ಲೂ ಭಾರತವು ಮಹತ್ವದ ಹೆಜ್ಜೆಗಳನ್ನು ಇಡುತ್ತಿದೆ.

ಸ್ನೇಹಿತರೆ,

ಕಳೆದ ವರ್ಷಗಳಲ್ಲಿ ‘ಇಂಡಿಯಾ ಮೊಬೈಲ್ ಕಾಂಗ್ರೆಸ್’ ಬಹಳಷ್ಟು ಸಾಧನೆಗಳನ್ನು ಮಾಡಿದೆ. ಆದರೆ, ಅಭಿವೃದ್ಧಿಯ ಪಯಣವು ನಿರಂತರವಾಗಿ ಹೊಸ ಮೈಲಿಗಲ್ಲುಗಳನ್ನು ದಾಟುವ ಪ್ರಕ್ರಿಯೆಯಾಗಿದೆ. ‘ಅಭಿವೃದ್ಧಿಶೀಲ ಭಾರತ’ದಿಂದ ‘ಅಭಿವೃದ್ಧಿ ಹೊಂದಿದ ಭಾರತ’ದತ್ತ ಸಾಗುವ ಬೃಹತ್ ಸಂಕಲ್ಪ ನಮ್ಮ ಮುಂದಿದೆ. ಇದಕ್ಕಾಗಿ ನಾವು ನಮ್ಮ ಪ್ರಯತ್ನಗಳನ್ನು ನಿರಂತರವಾಗಿ ವಿಸ್ತರಿಸಬೇಕಿದೆ. ಇಲ್ಲಿ ಪ್ರದರ್ಶಿಸಲಾದ ತಂತ್ರಜ್ಞಾನಗಳು ಖಂಡಿತವಾಗಿಯೂ ತಮ್ಮದೇ ಆದ ಮಹತ್ವ ಹೊಂದಿವೆ. ಆದರೆ ಇಲ್ಲಿ ರೂಪುಗೊಂಡ ಪಾಲುದಾರಿಕೆಗಳು, ಆರಂಭವಾದ ಸಂಶೋಧನಾ ಯೋಜನೆಗಳು, ಇಲ್ಲಿಂದ ಜಗತ್ತಿಗೆ ತಲುಪಿದ ಉತ್ಪನ್ನಗಳು ಮತ್ತು ಭಾರತದಿಂದ ಹೊರಹೊಮ್ಮಿ ಮಾನವಕುಲಕ್ಕೆ ಸೇವೆ ಸಲ್ಲಿಸಿದ ನಾವೀನ್ಯತೆಗಳಿಗಾಗಿ ಐಎಂಸಿಯನ್ನು ಸ್ಮರಿಸಬೇಕು. ತಂತ್ರಜ್ಞಾನ, ಸಂಶೋಧನೆ, ಉದ್ಯಮ, ಹೂಡಿಕೆ ಮತ್ತು ಆಲೋಚನೆಗಳ ಸಂಗಮ ತಾಣವಾಗಿ ಕಾರ್ಯ ನಿರ್ವಹಿಸುವ ವೇದಿಕೆಯನ್ನಾಗಿ ನಾವು ಐಎಂಸಿಯನ್ನು ರೂಪಿಸಬೇಕು. ನೀವೆಲ್ಲರೂ ಸಂಪೂರ್ಣ ಬದ್ಧತೆಯಿಂದ ಈ ಗುರಿಯತ್ತ ಕೆಲಸ ಮಾಡುವುದನ್ನು ಮುಂದುವರಿಸುತ್ತೀರಿ ಎಂಬ ವಿಶ್ವಾಸ ನನಗಿದೆ. ಈ ನಿರೀಕ್ಷೆಯೊಂದಿಗೆ, ನಾನು ಮತ್ತೊಮ್ಮೆ ನಿಮ್ಮೆಲ್ಲರಿಗೂ ನನ್ನ ಹೃತ್ಪೂರ್ವಕ ಅಭಿನಂದನೆಗಳು ಮತ್ತು ಶುಭಾಶಯಗಳನ್ನು ಸಲ್ಲಿಸುತ್ತೇನೆ.

ತುಂಬು ಧನ್ಯವಾದಗಳು.

ಹಕ್ಕು ನಿರಾಕರಣೆ: ಪ್ರಧಾನಮಂತ್ರಿ ಅವರ ಭಾಷಣದ ಅಂದಾಜು ಕನ್ನಡ ಅನುವಾದ ಇದಾಗಿದೆ, ಅವರು ಮೂಲತಃ ಹಿಂದಿ ಭಾಷೆಯಲ್ಲಿ ಭಾಷಣ ಮಾಡಿದ್ದಾರೆ.

*****