ভারতকী প্রধানমন্ত্রী

উত্তর প্রদেশকী রাজ্যপাল শ্রীমান রাম নায়ক, উত্তর প্রদেশকী মুখ্য মন্ত্রী শ্রীমান য়োগী আদিত্যনাথ, মতম পুম্নমক্তা নোক্তুনা লৈগনবা ঐহাক্কী মরূপ উপ–মুখ্য মন্ত্রী শ্রীমান কেশব প্রসাদ মৌর্য়, ইন্দস্ত্রীয়েল দিবেলপমেন্ত মন্ত্রী শ্রীমান সতিশ মহানা, রাজ্য সরকারদা মন্ত্রী ওইবীরিবা শ্রী দারী সিংহ, সংসদকী ঐহাক্কী খোংলোই অমদি প্রদেশ ভার্তীয় জনতা পার্তীগী প্রসিদেন্ত শ্রীমান মহেন্দ্র নাথ পান্দে, সংসদকী ঐহাক্কী খোংলোই ইচল নীলম সোনকর, এম.এল.এ. শ্রী অরুন অমসুং মশিং য়াম্না লেংবীরক্লিবা ঐহাক্কী নুংশিজরবা ইচল–ইচে অমসুং ইচিল–ইনাওশিং।

ঐহাক্না লাইনীংবশিংগী শেংলবা লমদম অমদি সাহিত্য জগৎতা তোঙান তোঙানবা লৌশিং মঙাল পীনবীরিবা আজমগরগী লৈবাক লৈহাও অসিবু খুরুমজরি। ঙসিদি উত্তর প্রদেশকী চাউখৎ থৌরাংদা অনৌবা পন্দুপ অমা হাপচিনবা হৌরে। নোংপোক ভারত্তা নোংপোক থংবা উত্তর প্রদেশকী চাউখ্রবা লমদম অমদা চাউখৎপগী অনৌবা গঙ্গা অমা চেল্লগনি। গঙ্গা অসি পুর্বাঞ্চল এক্সপ্রেসৱেগী মওং মতৌদা অদোম্না ফংলগনি অমদি মদুগী উরেপ–উয়ুং তম্নবগী তাঞ্জা অদু ঐহাক্না ফংজরে।

মরূপশিং, উত্তর প্রদেশ অসি মতৌ অসুম্না চাউখৎনবা, খোংজেল য়াংনা চাউখৎনবা, শোত্থরিবা লমদমশিং অদুদা অহেনবা ইনর্জী পীশিন্দুনা অতোপ্পগা মান্নহন্নবা, মায়কৈ অসোমদা থবক তৌনবা ৱারেপ উত্তর প্রদেশকী মীয়াম্না লৌগদবনি, অদোম্না লৌগদবনি, ঐখোয়দি পাউখোল্লোই ওইনা থৌদাং পাংথোকচবনি। চহি মরিগী মমাংদা উত্তর প্রদেশনা ভার্তীয় জনতা পার্তীবু চাউনা থৌজানবীদুনা কেন্দ্র সরকারদা থবক তৌনবা থৌদাং শিন্নবীখি। ঐহাকপু কাশিদগী খনবীখি অমদি মমাংগী চহিদা অদোম্না চাউখৎ খোংথাং শরুক অনি ওইহনগদবা পুৱারী ওইরবা ৱারেপ লোখি।

হৌখিবা চহি অমা অসিদা য়োগী আদিত্যনাথকী লুচীং মখাদা পায়খৎখিবা থবকশিং অদু মমাংদা অমুক্তা ওইখিদ্রিবা মতৌনি। অরানবা তৌবশিংগী ফিভম করি ওইরিবগে হায়বা অদু অদোম্না খঙবীরিবা অদুনি। ভার্তীয় জনতা পার্তীগী সরকারনা উত্তর প্রদেশতা চাউখৎ থৌরাংগী খ্বাইদগী ফবা ফিভম অদু ওইহন্নবা হোৎনরি। হৌজিক্তি মীয়ামগী শেনফম অদু মীয়ামগী য়াইফনবা চাদিং তৌরে। অসিগুম্বা অহোংবা পুরক্লিবা অসিনা উত্তর প্রদেশপু অনৌবা থাক্তা পুদুনা চৎলগনি।

ইচল–ইচে অমসুং ইচিল–ইনাওশিং, পুর্বাঞ্চল এক্সপ্রেসৱেনা উত্তর প্রদেশপু, অখন্ননা নোংপোক থংবা উত্তর প্রদেশকী আশাশিং অমদি এস্পিরেসনশিংদা অনৌবা মফম অমা ফংহল্লগনি। পুর্বাঞ্চল এক্সপ্রেসৱেদা লুপা কোতি লিশিং ২৩ হেন্না চাদিং তৌগনি। লখনৌদগী হৌরগা গাজীপুর ফাওবগী কিলোমীতর ৩৪০ শাংবা লম্বীগী মরক্তা লৈরিবা শহরশিং, নগরশিং অমসুং খুঙ্গংশিংগী শক্তম হোংলগনি। মসিদসু নত্তনা লম্বী অসি শেম্বা লোইবগা দিল্লীদগী গাজিপুর ফাওবগী অরাপ্পসু পুং কয়া তেনশিল্লগনি অমদি ত্রাফিক জামসু হন্থহল্লগনি। মদুনা অরেম্বদা মাংহল্লম্বা পেত্রোল অমদি দিজল অদু এক্সপ্রেসৱে অসি শেমলবা মতুংদা কোকহল্লগনি। অমদি লমদম অসিগী মীয়ামগী মতমসু কনবা ঙম্লগনি। লমদম অসিগী লৌমী ওইগেরা, শা–ষণ লোইবা ওইগেরা, ঐহাক্কী ফি শাবা ইচিল–ইনাও ওইগেরা, লৈবাক্কী চফু শাবগী থবক তৌবা ওইগেরা, মীপুম খুদিংমক্কী পুন্সিদা এক্সপ্রেসৱে অসিনা অনৌবা লম্বী অমা পীরগনি।

লম্বী অসি শেম্বদগী পুর্বাঞ্চলগী ইচল–ইচে অমসুং ইচিল–ইনাওশিংগী হৱাই চেংৱাই, উহৈ, মনা মশিং, শঙ্গোম অতেনবা মতমগী মনুংদা দিল্লীগী কৈথেলশিংদা য়ৌহনবা ঙম্লগনি। নাকল অমদা ইন্দস্ত্রীয়েল কোরিদোর অমগুম চাউখৎলগনি। এক্সপ্রেসৱে অসিগী নাক–য়েত্তা অনৌবা ইন্দস্ত্রীশিং লিংখৎলক্লগনি। তুংদা লমদম অসিদা মহৈ–মশিংগী সংস্থান, ইন্দস্ত্রীয়েল ত্রেনীং ইন্সতিত্যুৎ, মেদিকেল ইন্সতিত্যুৎ অসিনচিংবা সংস্থান কয়া লিংখৎলক্কদবা অদু ঐহাক্না উবা ফংলি। মসিদসু নত্তনা তুরিজমসু হেঙ্গৎহল্লগনি। মদুনা লমদম অসিগী নহাশিংবু থবক পীনবগী খুদোংচাবসু ফংহল্লগনি।

মরূপশিং, লাক্কদৌরিবা নুমীৎ খরা অসিদা গোরখপুরসু এক্সপ্রেসৱে অমনা শম্নহল্লগনি হায়না ইফমদা খঙহনবীরে। মসিদসু নত্তনা বুন্দেলখন্দসু অসিগুম্বা মখলগী এক্সপ্রেসৱে শেম্ননবা ৱারেপ লমদম অসিগী ভার্তীয় জনতা পার্তীগী সরকারনা লৌরে। লৌখৎলিবা খোংথাংশিং অসিনা উত্তর প্রদেশতা কনেক্তিবিতীবু অনৌবা থাক অমদা পুদুনা চৎলগনি। ২১ শুবা চহিচা অসিদা কনেক্তিবিতী অসি চাউখৎ থৌরাংগীদমক মরুওইবা অমা ওইরি। কনেক্তিবিতী হেঙ্গৎলক্লিবা মখৈ মফম অদুগী অপুনবা ইকোসিস্তেম অদু মশা মথন্তা চাউখৎপা হৌরকই।

ইচল–ইচে অমসুং ইচিল–ইনাওশিং, করিগুম্বা অদোম্না থবক শুবা পাম্লবা অমদি চাউখৎপগী পান্দম থম্লগদি মশা মথন্তা থবক্কী খোংজেল য়াংখৎলকই। মসিনা মরম ওইরগা হৌখিবা চহি মরি অসিদা উত্তর প্রদেশতা নেস্নেল হাইৱেগী নেতৱার্ক শরুক অনি হেঙ্গৎলে। য়েংবীয়ু, নীং তম্বা ফংলবা মতুংদগী পায়খৎখিবা থবকশিং অদু চহি মরি খক্তা ঙাইরিবা ভাজপাগী সরকারনা পাংথোক্তুনা উৎলে। হৌজিক্তি মফম অসিদা য়োগীজীগী সরকার শেম্লবা মতুংদগী খোংজেল অসি হেন্না য়াংশিল্লে।

উত্তর প্রদেশতা হাইৱে খক্তা নত্তনা ৱাতরৱে অমসুং এয়রৱেদসু থবক খোংজেল য়াংনা চংশিল্লি। গঙ্গা তুরেলদা বনারসতগী হল্দিয়া ফাওবা চৎলিবা জহাজনা লমদম অপুনবদা ইন্দস্ত্রীয়েল চাউখৎহল্লগনি। মসিদসু নত্তনা নোংথক্কী কনেক্তিবিতীদসু অখন্নবা খোংথাং লৌখৎলি। উরান য়োজনাগী খুত্থাংদা অপীকপা শহরশিংবু এয়র কনেক্তিবিতীনা শম্নহল্লে। য়োজনা অসিগী মখাদা উত্তর প্রদেশকীসু এয়রপোর্ত ১২ শেমগৎ শাগৎলে। মসিগী মথক্তা কুশী নগর অমসুং জেবরদা ইন্তর্নেস্নেল এয়রপোর্ত শেমগৎ শাগৎপগী থবক খোংজেল য়াংনা চত্থরি।  

মরূপশিং, নোংপোক্তা চাউখৎপগী নুমীৎ থোক্লক্ত্রিবা মখৈ অনৌবা ভারতকী মঙাল লংবা ৱাৎকনি। মরম অদুনা হৌখিবা চহি মরি অসিদা পুর্বাঞ্চাল, বিহার, ঝারখন্দ, নোংচুপ বেঙ্গল, অসম, অৱাং নোংপোক লমদমশিং অসিদা লম্বী–থোং, রেল, এয়রপোর্তকা মরি লৈনবা তোঙান তোঙানবা প্রোজেক্তশিংগী অয়াবা পীখ্রে। লৈবাক্কী নোংপোক থংবা শরুক অসিবু চাউখৎপগী অনৌবা কোরিদোর শেমগৎনবগী মায়কৈদা থবক তৌরি। মফমশিং অসিদা অনৌবা মেদিকেল কোলেজ, এইম্স, থবক লেপতুনা লৈরুরবা ফর্তিলাইজর ইন্দস্ত্রী অমুক হন্না মথৌ তৌহনবগী থবক পায়খৎলি। খেন্নবা অমত্তা থমদনা সবকা সাথ, সবকা বিকাস হায়বা মন্ত্র অদুগা লোয়ননা ঐখোয় মাংলোমদা চংশিল্লি। লৈবাক অসিগী পঞ্চায়ৎ খুদিংমকপু ওপ্তিকেল ফাইবরনা শম্নহনবগী থবক খোংজেল য়াংনা চংশিল্লি। হৌজিক ফাওবদা পঞ্চায়ৎ লাখ অমা হেনববু ওপ্তিকেল ফাইবরনা শম্নহল্লে।

মরুপশিং, হৌখিবা চহি মরি অসিদা প্রধান মন্ত্রী আৱাস য়োজনা অমসুং অরিবা আৱাস য়োজনাশিংবু মপুং ফানা পাংথোক্তুনা খুঙ্গংদা লৈরিবা লাইরবশিংগীদমক্তা য়ুম কোতি অমা হেন্না শাখ্রে। প্রধান মন্ত্রী গ্রামীন সরক য়োজনাগী মখাদা লৈবাক অসিগী খুঙ্গংশিংবু শম্নহনবগী থবকসু অরোইবা থাক্তা চত্থরি।

ইচল–ইচে অমসুং ইচিল–ইনাওশিং, ২১শুবা চহিচা অসিদা, ১৮শুবা চহিচাদা লিংখৎখিবা অদুগুম্লবা রাজনীতি দল অদুনা মোদীবু তানথোকখিনবা লাও–খোংবদি ঙমই, লৈবাক্কী য়াইফনবদি পাংথোকপা ঙমদে। ভাজপা সরকারনা সংসদতা আইন পুরক্তুনা মুস্লিম ইচল–ইচাশিংদা আধিকার ফংহন্নবা হোৎনখি, মখোয়না মদুদসু অপনবা পীরি। মখোয়না পাম্লিবসি তলাক অহুমলক হায়বগী চৎনবী অদু মখা চত্থদুনা মুস্লিম ইচল–ইচাশিংগী পুন্সিবু নরক ওইহনবা অদুনি। অদুবু ঐহাক্না থাজবা থম্লি মদুদি ঐহাক্না রাজনীতি দলশিং অসিবু ৱাখল তাহন্নবগীদমক হোৎনবা য়াবা পুম্নমক হোৎনগনি। মদুনা ঐখোয়গী মুস্লিম ইচল–ইচাশিংবু তলাক অহুমলক হায়বগী খুদোংচাদবা অদুদগী নানথোকপা ঙমহল্লগনি।

ইচল–ইচে অমসুং ইচিল–ইনাওশিং, অসিগুম্লবা লুচীংবশিংদগী, অসিগুম্লবা পার্তীশিংদগী চেকশিন্না লৈবা মথৌ তাই। মশাগী কান্ননবতা খনবা মীওইশিং অসিনা মীয়ামগী য়াইফনবা খন্দে। লৈবাক্কী য়াইফনবা খনবা ঙমদে। মদুমক নাকল অমরোমদা কেন্দ্র অমদি য়ু পিদা লৈরিবা ভাজপাগী সরকার অসিগীদমক্তদি লৈবাক পুম্বা ইমুং মনুংনি, লৈবাক অসিগী মীয়াম কোতি চামগা কুনমঙামক ঐখোয়গী ইমুং মনুংনি। লৌমী ওইগেরা, লাইরবা ওইগেরা, তোল্ল–তারবা ওইগেরা পুম্নমক্কী পুন্সিদা য়াইফ–নুংঙাইবা পুরক্নবা ঐখোয়গী সরকারনা লেপ্পা লৈতনা হোৎনরি।

জনধন য়োজনাগী মখাদা উত্তর প্রদেশতা চাউরাক্না লাইরবা কোতি মঙাগী বেঙ্ক একাউন্ত হাংদোক্লে। শিংগী মৈখুদগী ঙাকথোক্নবা নুপী লাখ ৮০ হেনবদা লেম্না গ্যাস সিলিন্দর পীখ্রে। থা অমগী শুপ্নগী লুপা অমা অমদি পৈসা ৯০গী নোংমগী প্রিমিয়মদা লাইরবা কোতি অমগা লাখ ৬০ হেনববু সেক্যুরিতী পীরে। হৌজিক্তি আয়ুশ্মান ভারতকী মখাদা সরকারনা হোৎনরিবা অসি লাইরবা ইমুং খুদিংবু চহি অমদা লুপা লাখ মঙা ফাওবা লেম্না লায়েংবা ফংহনবনি। হন্দক্তা সরকার অসিনা লৌমীশিংদা শকখিবা ৱাশক অদু পাংথোকখ্রে। সরকারনা খরীফকী পোত্থোক ১৪গী এম.এস.পি.দা চাউনা হেঙ্গৎহল্লে। ফৌ ওইগেরা, চুজাক ওইগেরা, চনান ওইগেরা, মাইরোংবী ওইগেরা, শগোল হৱাই ওইগেরা, মুগ ওইগেরা, নুমীৎলৈ ওইগেরা, নুঙ হৱাই ওইগেরা মখোয়গী সপোর্ত প্রাইসতা লুপা চানিদগী হৌরগা লুপা ১৮০০ ফাওবা হেঙ্গৎহল্লে।

মরূপশিং ঐখোয়গী সরকার অসিনা লৈবাক্কী, লৈবাক মীয়ামগী মথৌ তারিবা অদু খঙনা স্কিমশিং পায়খৎলি, ৱারেপশিং লৌরি। চহি কয়াদগী ঙায়রক্লবা অদুগুম্লবা ৱারেপশিং, মমাংগী সরকারনা ফাইল মরক্তা নমশিন্দুনা থমলম্লবা অদুগুম্লবা ৱারেপশিং অদু লৌবগী থবক ভার্তীয় জনতা পার্তীগী লুচীং মখাদা এন.দি.এ. সরকারনা পাংথোক্লি। লমদম অসিদা বনারসকী সারীগী কর্বারগা মরি লৈনরিবা ফি শাবা ইচল–ইচে অমসুং ইচিল–ইনাওশিংনা মমুৎ তানা খঙবীয়ু, মমাংগী সরকারনা মখোয়বু কাওথোকপীখি অদুবু সরকার অসিনা মখোয়গীদমক অনৌবা মেচিনশিং, অপিকপা শেন্দোয়দা লোন পীদুনা অনৌবা কৈথেল শেম্নবা থবক চত্থরি।

মমাং চহিদা বনারসতা ত্রেদ ফেসিলিতেসন সেন্তর হৌখ্রে। সেন্তর অসিনা ফি লোনবা অমদি ফি শারিবা পুম্নমক্কীদমক অনৌবা আশাগী মঙাল পুদুনা লাক্লি। মসিনা হেন্দিক্রাফ অমসুং খুৎনা শাবা পোত্থোক্তা পুক্নীং থৌগৎলি। য়োগী জীগী সরকারনা তেক্সতাইল সেক্তরগীদমকসু অনৌবা নীতি শেম্লে। মফম অসিদা পুথোক্লিবা পোত্থোকশিং অদুগী কৈথেল ফংহন্নবগীদমক ৱান দিস্ত্রীক্ত ৱান প্রদক্ত স্কিমদা থবক পায়খৎলি।

ইচল–ইচে অমসুং ইচিল–ইনাওশিং, মফম অসিগী অমুবা লৈবাক্কী আর্তসু মশা মথন্তনা অফবা পোত্থোক অমনি। হন্দক্তা ক্লে আর্ত বোর্দ লিংখৎনবা ৱারেপ লৌখিবা অদুগীদমক য়োগীজী অমসুং মহাক্কী তীম্বু থাগৎপা ফোংদোকচরি। মসিনা মীওই লাখ কয়াদা নৌনা থবক ফংহনবতা নত্তনা কলা অসিবুসু য়োকখৎলগনি।

পুর্বাঞ্চলগী, উত্তর প্রদেশকী ইচল–ইচে অমসুং ইচিল–ইনাও পুম্নমকপু অসিগুম্লবা মোর্দন এক্সপ্রেসৱে অসিগী থবক হৌরকপা অসিদা অমুক হন্না নুংঙাইবা ফোংদোকচবগা লোয়ননা য়াইফ–পাউজেলসু পীজরি। অসুক য়াম্না শাখ্রবা অসিদা অসুক য়াম্বা মীয়াম তীনবীরিবা অসি ময়াম্না নুংশিবীরিবা অদুগী খুদম্নি। ময়াম্না আর্শিবাদ পীবা লেংবীরক্লিবা অসিগীদমক ঐহাক্না থমোই শেংনা হন্না হন্না থাগৎপা ফোংদোকচরি।