ভারতকী প্রধানমন্ত্রী

য়োর এক্সিলেন্সী, প্রধান মন্ত্রী ক্রিস্তোফর লক্সন,

ভারত অমসুং ন্যু জীলেন্দগী বিজিনেসকী লুচিংবশিং,

খুরুমজরি,

কিয়া ওরা।

ওকলন্দদা নখোয় পুম্নমক্কী মরক্তা লাকপা ফংজবা অসিদা ঐহাক নুংঙাইবা ফাওই। ভারতকীদমক্তা মহাক্কী অফবা মীৎয়েং অমসুং অচেৎপা ফিরেপ অদুগীদমক ঐহাক্না প্রধান মন্ত্রী লক্সনবু অখন্ননা থাগৎপা ফোংদোকচরি।

অদোম্না লাকপা অসিনা ন্যু জীলেন্দগী ইন্নোভেসন, এন্তরপ্রাইজ অমসুং ফ্যুচর-ওরিয়েন্তেদ ওইবা ৱাখল্লোন অদু উৎলি। ভারত মচা বিল্লিয়ন ১.৪গী অপাম্বা অমসুং পান্দম অদুগী পাউজেল পুদুনা ঐহাক অদোমগী মফমদা লাক্লি।

মরুপশিং,

মীফম অসি ভারত অমসুং ন্যু জীলেন্দগী মরক্তা লৈনরিবা মরী অসিনা মরু ওইবা তাঙ্কক অমা য়ৌরকপা মতম অসিদা পাংথোক্লি। ঙসিদি, ঐখোয়না ঐখোয়গী মরীশিং অসি স্ত্রেতেজিক পার্তনরশিপকী থাক্তা পুখৎলি। মসি দিপ্লোমেতিক্কী খক্তগী ওইবা মাইলস্তোন অমা নত্তে; মসি ঐখোয়গী মান্নবা তুংলমচৎকীদমক অনৌবা ফিরেপ অমনি।

চহি অসিদা, থা মাপনগী অতেনবা মতমগী মনুংদা লৈবাক অনিগী মরক্তা ফ্রী ত্রেদ এগ্রীমেন্ত অমা লোইশিনখি। মসিনা নখোয় পুম্নমক্কীদমক মার্কেত এক্সেস, ইনভেস্তমেন্ত, সর্ভিস, তেক্নোলোজী অমসুং তেলেন্ত মোবিলিতীগী অনৌবা খুদোংচাবশিং ফংহল্লগনি। ঐহাক্না থাজবা থম্লি মদুদি, অনৌবা ইনর্জী অমসুং থৌনাগা লোয়ননা থবক তৌরদুনা, ঐখোয়না ২০৩০ ফাওবদা ঐখোয়গী লৈবাক অনিগী ত্রেদ শরুক অনি হেনগৎহল্লগনি।

ন্যু জীলেন্দনা মথংগী চহি ১৫দা ভারত্তা বিল্লিয়ন দোল্লর ২০ ইনভেস্ত তৌনবা ৱাশক লৌরে। মসি শেল থাদবা খক্তা নত্তে, মসি ভারতকী চাউখৎ থৌরাংগী খোঙচৎতা শরুক য়াবগী অচেৎপা ৱাফম অমসু ওইরি।

মরুপশিং,

ঙসিদি, ভারত অসি মালেমগী খ্বাইদগী য়াঙনা চাউখৎলক্লিবা মরুওইবা ইকোনোমী অমা ওইরে। ঐখোয়গী চাউখৎলক্লিবা মিদ্দল ক্লাস, পাক চাউনা দিজিতেল শীজিন্নবা, অমসুং ইনফ্রাস্ত্রকচর দিবেলপমেন্তকীদমক হোৎনরিবশিং অসিনা ভারত অসি অখন্নবা গ্রোথ স্তোরী অমা ওইহল্লি।

ভারত্তা ঐখোয়না ‘রিফোর্ম, পর্ফোর্ম অমসুং ত্রান্সফোর্ম’ অসি ঐখোয়গী লৈঙাক্কী য়ুম্ফম ওইহল্লে। ঙসিদি, ভারতনা পোলিসী স্তেবিলিতী, পোলিতিকেল স্তেবিলিতী, অমসুং কন্তিন্যুতী গ্রোথ ফংলি।

মরম অসিনা ঙসি মালেমদা ঐখোয়না পীবা পাউজেল অসি ভারত অসি কৈথেল অমা খক্তা নত্তে, ভারত অসি মালেমগী চাউখৎপগী লোঞ্চপেদ অমনি।

ভারত্তা থোরক্লিবা খুদোংচাবশিং অসি করম্না শীজিন্নবা য়াবগে হায়বদু উৎনবা ঐহাক্না খুদম খরা পীজগে। লৈবাক অসিদা মেন্যুফেকচরিং হেনগৎহন্নবা ঐখোয়না প্রদক্সন লিঙ্ক ইন্সেন্তিব (পি.এল.আই.) স্কিম হৌদোক্লে। ইনিসিয়েতিব অসিগী মখাদা, ফুদ প্রোসেসিংদগী তেক্সতাইল ফাওবগী সেক্তর ১৪দা চাউরাক্না দোল্লর বিল্লিয়ন ২০গী শেনফম পীরি। ঐহাক্না নখোয় পুম্নমকপু মসিগী মেন্যুফেকচরিংগী খোঙজেল অসিগী শরুক অমা ওইনবগীদমক্তা কৌজরি।

এয়রপোর্তশিং, রিজনেল কন্নেক্তিবিতী, এয়র কার্গো অমসুং তুরিজম অসি ভারত্তা য়াম্না থুনা হেনগৎলক্লি। ঙসিদি, ভারত অসি মালেমগী খ্বাইদগী চাউবা দোমেস্তিক এভিয়েসন মার্কেতকী অহুমশুবনি। ঐখোয় পুন্না কার্গো কোরিদোরশিং শেমগৎপা, ফ্লাইৎ কন্নেক্তিবিতী হেনগৎহনবা, অমসুং জোইন্ত তুরিজম পেকেজশিং শেম্বা ঙমগনি।

কিৱি, শেম, খোহী অমসুং সীফুদশিংগীদমক পেরিসেবল কার্গো সোলুসন পুথোকপা য়াই। ন্যু জীলেন্দনা হোর্তিকলচর, দাইরী সাইন্স, অমসুং ফোরেস্ত্রীদা চাউনা এক্সপর্তিজ লৈ। ভারতনা অচৌবা কঞ্জ্যুমর মার্কেৎ, ফুদ পার্ক অমসুং এগ্রি-তেক তেলেন্তকী মপাঙ্গল লৈ। ঐখোয় পুন্না ফার্ম-তু-মার্কেৎ ভেল্যু চেন অমসুং মালেমগী ওইবা এক্সপোর্ত প্লেৎফোর্মশিং শেমগৎপা ঙমগনি।

ঙসি ভারত অসি ফিনতেককী লমদা মালেমগী লুচিংবা অমা ওইরে। মালেমগী রিএল-তাইম দিজিতেল পেমেন্তশিংগী চাদা ৫০দি ভারত্তা পাংথোক্লি। দিজিতেল পেমেন্তকী মথক্তা, ঐখোয়না গ্রীন বোন্দশিং অমসুং ব্লেন্দেদ ফাইনান্সকুম্বা হিরমশিংদসু খুমাং চাউশিনবা ঙমগনি।

ঐখোয়না স্পেস সেক্তরবু প্রাইবেৎ পার্তিসিপেসনগীদমক হাংদোক্লে। ঙসিদি ভারত্তা স্পেস স্তার্ত-অপ ৪০০ হেনখ্রে, অমসুং অমনা ‘য়ুনিকর্ন’গী থাক ফাওবা ফংখ্রে। লৈবাক অনিমক্কী কম্পনীশিংনা অপীকপা সেতলাইৎশিং, রিমোৎ সেন্সিং অমসুং মহাসাগর মোনিতরিং য়াওবা প্রোজেক্তশিংদা ভারতকী স্পেস ইকোসিস্তেমগী মনুংদা মতেং পাংমিন্নবা য়াই।

ভারত্তা, স্মার্ত সিতীজ মিসনগী মখাদা শহর ১০০দা প্রোজেক্ত ৮০০০ হেন্না পায়খৎলি। ঐখোয়না অর্বান মোবিলিতী, ৱাতর মেনেজমেন্ত, অমসুং ৱেস্ত মেনেজমেন্তগুম্বা লমশিংদা পুন্না থবক তৌমিন্নবা য়াই।

মরুপশিং,

ঐহাক্না মাওরিগী বিজিনেস লিদরশিংদা অখন্নবা য়াইফ-পাউজেল পীজরি। ভারতকী সিভিলাইজেসন অমসুং মাওরিগী চৎনবী অনিমক্না মহৌশা, কম্ম্যুনিতি অমসুং সস্তেনেবিলিতীগীদমক চাউনা ইকায় খুম্নবা উৎলি। ঐখোয়গী এফ.তি.এ.না মাওরি বিজিনেসশিংগীদমক্তা খুদোংচাবশিংদা অখন্নবা মরুওইবা পীরি। অসিগুম্বা মান্নবা ভেল্যুশিং অসি শীজিন্নদুনা, ঐখোয়না ইনক্লুসিব অমসুং সস্তেনেবল ত্রেদকী অনৌবা মোদেল অমা শেম্বা ঙমগনি।

মরুপশিং,

ঐহাক্না ঐখোয় পুন্না অচৌবা বিজিনেস রোদমেপ অমা পুন্না শেম্নবা ৱাফম থম্লি। ঐখোয়গী মপাঙ্গলশিং শীজিন্নদুনা, ঐখোয়না য়ামদ্রবদা মরুওইবা প্রোজেক্ত মঙা মশক খঙদোক্কনি অমসুং মখোয়শিং অসি মতম চানা লোইশিনবা ঙম্নবা রিভিয়ু মেকানিজম অমা লিংখৎকনি। মসি পাংথোক্লবা খক্তদা ঐখোয়না ঐখোয়গী পার্তনরশিপকী মপুং ফাবা পোতেন্সিএল অদু খঙবা ঙমগনি অমসুং লৈবাক অনিমক্কী মীয়ামগী এস্পিরেসনশিং অমসুং এক্সেপেক্তেসনশিং অদু মপুং ফাহনবা ঙমগনি।

ঐহাক্না ময়াম পুম্নমকপু ঐখোয়গা লোয়ননা খোঙচৎ অসিদা পুন্না চৎমিন্ননবা হায়জরি।

ঐখোয়গী পার্তনরশিপ অসি চাউখৎপগী প্লেৎফোর্ম অমা, ইন্নোভেসনগী থোং অমা অমসুং মালেমগী য়াইফনবা ফোর্স অমা ওইহল্লসি।

অমসুং ঐহাক্না ভারত অমসুং ন্যু জীলেন্দনা পুন্না চৎমিন্নবা অমসুং অনৌবা শক্তি অমা ওইনা থোরকপা পাম্মি।

ঐহাক্না অতোপ্পা ৱাফম অমা হায়জনীংই। অদোম্না পনখিবা অদুগুম্না, ঐখোয়না ঐখোয়গী স্পোর্তিং তাইশিংগী চহি ১০০ মপুং ফারক্লি। মসি য়াম্না মরু ওইবা থৌরম অমনি।

ঐখোয়না মসি শোইদনা পাংথোক্কনি। অদুবু চহি ৩৫গী মখাদা লৈবা অচৌবা বিজিনেস দেলিগেসন অমা ন্যু জীলেন্দদগী ভারত্তা লাকপা, অমসুং ভারতকী চহি ৩৫গী মখাদা লৈবা বিজিনেস দেলিগেসন অমনা ন্যু জীলেন্দদা চৎপগী ফীভম অমা লৈহন্নবা ঐখোয়না হোৎনবা ঙমগদ্রা?

মসিনা অনৌবা মীরোল অমা শেমগৎপদা মতেং পাংগনি। মসিগী থাজবা অসিগা লোয়ননা, ময়াম পুম্নমকপু হন্না-হন্না থাগৎচরি।

***