ভারতকী প্রধানমন্ত্রী

কম্মনৱেল্থ গেমসতা তকমান ফংলবশিংগী মফমদা প্রধান মন্ত্রী শ্রী নরেন্দ্র মোদীনা নুংঙাইবা ফোংদোকখ্রে।

ৱেৎলিফতরশিংগী মফমদা নুংঙাইবা ফোংদোক্লদুনা প্রধান মন্ত্রীনা হায়খি, “সনাগী তকমান ফংলকপদা রাগালা ভেনকৎ রাহুলগীদমক চাউথোকচরি। ঐখোয়গী ৱেৎলিফতরশিংনা থোইদোক হেন্দোক্না মায় পাক্লকপা অসিনা নহা কয়াবু ৱেৎলিফতিংদা হোৎননিংবা ফাওহল্লগনি।

ৱেৎলিফতিং মশান্নদা নুপীগী কিলোগ্রাম ৬৯গী কাংলুপ্তা সনাগী তকমান লৌরকপগীদমক ভারত পুম্বনা পুনম য়াদবকী মফমদা নুংঙাইবা ফোংদোক্লি। ৱেৎলিফতিংগী মায়কৈদা মহাক্না কৎথোক্লিবা অসি তশেংনা থাগৎনীংঙাইনি।”

শুতরশিংগী মফমদা নুংঙাইবা ফোংদোক্লদুনা প্রধান মন্ত্রীনা হায়খি, “ঐখোয়গী শুতরশিংনা কম্মনৱেল্থ গেমস ২০১৮দা মখোয় মশাবু মশক তাকচরি। মনু ভাকরনা মহাক্কী অঙকপা ফোর্ম অদু মখা তানা থম্দুনা নুপীগী মিতর ১০গী এয়ার পিস্তোল ইভেন্ততা সনাগী তকমান অমা ফংলে। মহাক্কী মফমনা নুংঙাইবা ফোংদোকচরি।

নুপীগী মিতর ১০গী এয়ার পিস্তোল ইভেন্তা হীনা সিদ্ধুনা লুপাগী তকমান ফংলকপা অদুনা হেন্না নুংঙাইবা ফাওহল্লে। মহাক্কী মফমদা নুংঙাইবা ফোংদোকচরি অমসুং মহাক্কী তুংদা য়াইফবা ওইনবা য়াইফ পাউজেল পীজরি।

আশা চাউনা লৈরিবা শুতর রবি কুমারনা নুপাগী মিতর ১০গী এয়ার রাইফল ইভেন্তা শেঞ্জেংগী তকমান অমা ফংলে। ভারত মচা পুম্নমক্না মহাক্কী মায় পাক্লকপা অসিদা চাউথোকচরি। নহা ওইরিবা শুতর অসিনা শান্ন-খোৎনবগী মায়কৈদা অচৌবা থৌদাং য়ারি।”