ভারতকী প্রধানমন্ত্রী

মসিগী শেংলবা থৌরম দিৱালী অসিদা ময়াম পুম্নমকপু ঐহাক্না থম্মোয় শেংনা য়াইফ-পাউজেল পীজরি। অমসুং ছতী মৈয়াগী থৌরম লাক্কদৌরিবা অসিদা, ঐহাক্না ময়াম পুম্নমকপু য়াইফ-পাউজেল পীজরি। ময়াম পুম্নমকপু ঐহাক্না য়াইফ-পাউজেল পীজরি।

ইন্দিয়া তুদে গ্রুপকী চেয়রমেন অমসুং এদিতর-ইন-চীফ, শ্রী অরুন পুরী জী, এগ্রিকলচরেল সাইন্তিস্তশিং, এগ্রিকলচর-ওন্ত্রপ্রিন্যুওরশিং, লৌমীশিংগী মরুপশিং অমসুং থৌরম অসিদা শরুক য়ানবা লৈবাক শিনবা থুংবদগী লাকপা ইকাই খুম্নরবা মীথুংলেনশিং, নুপীশিং অমসুং নুপাশিং।

অহানবদা, ঐহাক্না ইন্দিয়া তুদে গ্রুপপু মসিগী ইনোভেতিব ইনিসিয়েতিব অসিগীদমক্তা থম্মোয় শেংনা থাগৎপা ফোংদোকচরি। লৈবাক অসিনা স্বচ্ছতাগী কেম্পেন হৌদোকপা মতমদা ইন্দিয়া তুদে গ্রুপনা য়াম্না থৱায় য়াওনা শরুক য়াখি। হৌজিক অদোম্না কিসান মেলা অসি শীনখ্রে, অমসুং মদুদা নুমিৎ নিনি মপুং ফানা কত্থোকখ্রে। মসি য়াম্না পোজিতিব ওইবা অহৌবা অমনি। ঐনা ময়াম পুম্নমকপু থাগৎচরি। অমসুং অরুন জীনা য়াম্না ফজনা হিন্দী ঙাংই, মসিগীদমক হন্না হন্না থাগৎপা ফোংদোকচরি।

মরুপশিং,

লৈবাক অসিদা কুহ্মৈগী ফিভম অমা লৈরিঙৈ মতম অসিদা থৌরম অসি পাংথোক্লি। নুমিৎ নিনি নৎত্রগা হুমনিগী মমাংদা, ঐখোয়না দিৱালীগী কুহ্মৈ পাংথোকখি, অমসুং হৌজিক্তি ঐখোয়গী অকোইবদা ছথ মহা পর্বকী ইথিল ঙাক্তা ঙাইরে। ছাথকী কুহ্মৈ অসি লৌউ-শিংউগী পুন্সিগা য়াম্না নক্না মরী লৈনৈ, অমসুং ঐখোয়গী লৈবাক অসিদা কুহ্মৈ অয়াম্বনা লৌউ-উবা অমসুং লৌউ-শিংউগা মরী লৈনৈ। বিহু, পোঙ্গল, ওনম, বৈশাখী, সরহুল, পোলা অসিগুম্বা কুহ্মৈ কয়া অসি লৌউ-শিংউগা মরী লৈনৈ। অতোপ্পা ৱাহৈ অমদা হায়রগদি, লৌউ-শিংউ অসি ঐখোয়গী নাৎ, ঐখোয়গী চৎনবী অমসুং ঐখোয়গী খুন্নাইগী পুন্সিগী য়ুম্ফম্নি।

মরুপশিং,

লাল কিলাদগী ঐহাক্না বিক্সিত ভারতকী শক্তিগী তুংলমচৎকী মতাংদা ৱা ঙাংখি। মসিগী মনুংদা লৌউ-শিংউ অসি মরুওইবা ইচেল অমনি। লৌউ-শিংউবু চাউখৎহন্দনা, লৌউ-শিংউবু হেন্না হৈ-শিংবা ওইহন্দনা অমসুং লৌমীশিংবু মপাঙ্গল কনখৎহন্দনা বিক্সিত ভারত অমা শেম্বা ঙম্লোই। মরম অসিনা অসিগুম্বা লৌমীশিংগী কনফরেন্সশিং অসি হেন্না মরু ওইরক্লি।

মরুপশিং,

লৌউ-শিংউ অমসুং লৈবাক অমগী চাউখৎপগী মরী অসি মরুওইবা ৱাফম অনিদগী খঙবা ঙম্মী। হন্দক্তা, মালেমগী বেঙ্কনা লায়রবা কাংলুপকী মতাংদা থিজিনবা অমা থোকখি, অমসুং মসি মালেম শীনবা থুংনা খন্ন-নৈনরি। মসিদা হায়রি মদুদি চহি ১২-১৩গী মনুংদা, ভারতকী লায়রবা মীওই করোর ৫০না লায়রবা মায়থিবা পীবা ঙমখ্রে। খুঙ্গংশিংদা লায়রবা মশিং য়াম্না হন্থরে হায়নসু পনখি। মসিনা তাক্লিবদি অপীকপা লৌমী অমসুং লৌউ-শিংউগী শিন্মী মশিং য়াম্না লায়রবদগী থোরকপা ঙমখ্রে। হৌজিক অসি য়েংউ। হৌখিবা চহি তরা অসিদা, ভারতকী লৌউ-শিংউগী গ্রোথ রেৎ অসি চাদা ৪গী মথক্তা লৈরি। মসি নীংতম্লবা মতুংদগী লৈবাক অসিগী লৌউ-শিংউগী সেক্তরনা চহি তরাগী মনুংদা অহানবা ওইনা চাংচত্তা চাদা ৪ হেনবগী গ্রোথ রেৎ অমা ফংখিবা অহানবা মতমনি। অমসুং হায়রিবা মতম অসিগী মনুংদা, খুঙ্গংগী লায়রবা মীওই কয়া অমা লায়রবা মায়থিবা পীবা ঙমখ্রে। অদুবু লাইবক থিবদি, ন্যুজ কভরেজকী এঙ্গলশিং অমসুং এজেন্দাশিংগী লাংদা থুরিবা মীওইশিংনা লৈবাক অসিগী মায়পাকপা অসি উবা ফংদ্রে।

মরুপশিং,

লৌউ-শিংউগী লমদা থবক তৌরিবা মীওইশিং অমসুং লৌউ-শিংউগা মরী লৈনবা অখঙ-অহৈশিংনা লৌউ-শিংউগী পোলিসী অমসুং পাম্বৈশিংদা লেপ্তনা অহোংবা পুরকপা হায়বসি করম্না মথৌ তাবগে হায়বদু খঙই। লৈবাক অসিগী লৌমীশিংনা লৈবাক অসিগী মহৈ-মরোং ৱেয়রহাউসশিং থনহনবা ঙম্বনা মরম ওইরগা চহি কয়া লৈঙাক পায়রম্বা মীওইশিং অদু নুংঙাইনা লৈখি। অদুবু মদুগী মতুংদা লৌমীশিংনা করি ফংবগে? মহৈ-মরোংগী ৱেয়রহাউসশিং থলহনবা খক্তনা মপুং ফাদে। মতমগী মতুং ইন্না, মালেম অসি হোংলকখি, কৈথেলশিং হোংলকখি, মীশিংগী মথৌ তাবশিং হোংলকখি, চানবগী চৎনবী হোংলকখি, নুংশিৎ হোংলকখি, অমসুং তেক্নোলোজী হোংলকখি। অসিগুম্বা অহোংবশিং অসিগা লোয়ননা, ঐখোয়না ঐখোয়গী লৌমীশিংবু অনৌবা মওংদা শক্তি পীনবা মথৌ তাই। অদুবু মমাংদদি, মসিদসু মীৎয়েং চংলমখিদে।

মরুপশিং,

হৌখিবা চহি তরা অসিদা, লৈবাক অসিনা খোঙজেলশিং অসিগা মান্নবা খোঙথাংশিং লৌখৎখি, অমসুং মসিগী মহৈশিং অসি ঐখোয়গী পুম্নমক্কী মমাংদা লৈরি। ঙসিদি, ভারতনা চহি খুদিংগী লুপা করোর লাখ মরিগী চাংদা লৌউ-শিংউগী পোত্থোকশিং এক্সপোর্ত তৌরি, অমসুং হায়রিবা শেনফম অসিনা ঐখোয়গী লৌমীশিংগী ইনকম হেনগৎহল্লি। ঙসিদি, ভারতনা শঙ্গোম পুথোকপদা মালেমদা নম্বর ৱান ওইরে। ঙসিদি, ভারতনা হৱাই পুথোকপদা নম্বর ৱান ওইরে। ভারত অসি জুত পুথোকপদা নম্বর ৱান ওইরি। ভারতনা চেং পুথোকপদসু নম্বর ৱান ওইরে। এহু পুথোকপদা মালেমদা অনিশুবনি। মসিনা লশিং, উহৈ-ৱাহৈ, অমসুং মনা-মশিং পুথোকপদা অনিশুবদা লৈ। ঙা পুথোকপদা ভারতনা অনিশুবদা লৈরি, অমসুং ভারত অসি মালেমগী খ্বাইদগী চাউবা মিল্লেৎ পুথোকপা লৈবাক অমসু ওইরি। মসি স্তেতিস্তিক্স খক্তা নত্তে। মখোয়না ভারতকী লৌমীশিংগী তৌবা ঙম্বগী চাং কয়া য়াম্না হেনগৎলকখি হায়বদু উৎলি।

মরুপশিং,

ভারতকী লৌমীশিংগী চাউখৎনবগীদমক অতোপ্পা ৱাফম অমগা মথৌ তাই। মখোয়না গেহু, চেং অমসুং চুগুম্বা ত্রেদিস্নেল মহৈ-মরোংশিংদা খক্তদা মখা পোনবগী তঙাইফদবা লৈতে। ঐহাক্না অমুক্কা হন্না হায়জরি, লৌমী ওইরিবা ঐখোয়গী ইচিল-ইনাওশিং অসি গেহু, চেং অমসুং চু খক্তদা মখা পোল্লোইদবনি। মরম অদুনা, সরকার অসিনা অতোপ্পা মহৈ-মরোংশিং অমসুং লৌউ-শিংউগা মরী লৈনবা অতোপ্পা থবক থৌরমশিংদা মীৎয়েং থম্লি। ঐহাক্না ইন্দিয়া তুদে গ্রুপতা করিগুম্বা অমা নীংশিংহনগে। ‘রিভোলুসন’, ‘ক্রান্তি’ হায়বা ৱাহৈ অসি ইন্দিয়া তুদে গ্রুপনা অখন্ননা পাম্মি। মরম অদুনা, হৌজিক ঐনা রিভোলুসন খরগী মরমদা ঙাংগনি।

মরুপশিং,

মতম অমদা লৈবাক অসিনা গ্রীন রিভোলুসনগী খুত্থাংদা চানবা চিঞ্জাক পুথোকপদা মশা-মরোমদোম লেপচবগী মায়কৈদা পুৱারী ওইরবা খোঙথাং অমা লৌখি। মদুগী মতুংদা, ৱাইৎ রিভোলুসননা ভারতপু মালেমগী খ্বাইদগী চাউবা শঙ্গোম পুথোকপা লৈবাক ওইহনখি। ঙসি ঐহাক্না অদোমদা মসিগী খোঙচৎ অসি মতৌ করম্না মশক থোকপা খোঙজেল য়াংনা মাংলোমদা চংশিল্লিবগে হায়বদু উৎলিবা অতোপ্পা মশীং খরা পীজগে। হৌখিবা চহি তরা অসিদা, ভারতকী শঙ্গোম পুথোকপা অসি চাদা ৭০ হেনগৎলে, চাদা ৭০। য়েরুম পুথোকপা অসিসু চাদা ৯০ গী ময়াদা হেনগৎলে, চাদা ৯০। অমসুং করিগুম্বা ঐখোয়না ব্লু রিভোলুসনগী মতাংদা হায়রবদি, ভারতকী ঙাগী পোত্থোক অসি দিকেদ অমদা শরুক অনি হেনগৎলে। স্বীৎ রিভোলুসনগী খুত্থাংদা বিকিপ্পিংগী লমদা অনৌবা খুদোংচাবা কয়া অমা থোরক্লি। খোইহী পুথোকপা অসি তন ৮০দগী তন ১৫০দা হেনগৎলে। হোর্তিকলচরদসু, ভারতকী পোত্থোক অসি তন মিলিয়ন ২৮০দগী তন মিলিয়ন ৩৫০ হেনখ্রে।

মরুপশিং,

ঐখোয়না হায়রিবা রিভোলুসনশিং অসি হেন্না চাউবা ঈৎয়েং অমগা লোয়ননা শম্নহল্লকপা মতমদা, লৈবাক অসিগী লৌমীশিংগীদমক ইনকমগী সোর্স কয়া অমা শেমগৎলি। অমসুং মসি লৌউ-শিংউগী তুংলমচৎকীদমক য়াম্না মরু ওই। ঐহাক্না অদোমদা অতোপ্পা খুদম অমা পীজগে। অতোপ্পা রিভোলুসন অমা, সোলর পাৱর রিভোলুসন। মসিগী রিভোলুসন অসিনা চিঞ্জাক পুথোক্লিবা অসি ইনর্জী পুথোক্লিবা অমা ওইহনখ্রে। পি.এম.-কুসুম স্কিমগী মখাদা, সোলর পাম্প লাখ ১২রোমদি হান্ননা য়েন্থোকখ্রে। মসিনা লৌমীশিংগী ইলেক্ত্রিসিতী বিল হন্থহল্লি, অমসুং লৌমীশিংনা মখোয়গী লৌবুকশিংদা সোলর প্লান্তশিং ইনস্তোল তৌদুনা শেন্দোং লৈবা হৌখ্রে। পোত্থোক পুথোকপগা লোয়ননা, ঐখোয়না প্রদক্তিবিতী অমসুং লৌমীশিংগী শেন্দোংদা মীৎয়েং থম্লি।

মরুপশিং,

হন্দক্তা ঐহাক্না সরকারগী মকোক ওইরকপা চহি ২৫ মপুং ফারকখ্রে। ঐহাক গুজরাতকী মুখ্য মন্ত্রী ওইরিঙৈ মতমদসু লৌউ-শিংউবু মোদর্নাইজ তৌনবা লেপ্পা লৈতনা থবক তৌরি। মতম অদুদা, ঐহাক্না লৌউ-শিংউগী ওইবা অচৌবা কুহ্মৈশিং হৌদোকখি। ঐহাক্না নীংশিংলি মদুদি মে অমসুং জুন থাদা, সেলসিয়স দিগ্রী ৪০-৪৫গী তেম্পরেচরদা, লৌউ-শিংউগী সাইন্তিস্তশিং, লৌউ-শিংউগী এক্সপর্ত, অমসুং প্রোগ্রেসিব ফার্মর চাম্মরোম্না পুনখি। ঐখোয়না কিসান রথশিং শেমগৎলি অমসুং মখোয়দা চৎলি। ঐখোয়না খুঙ্গংশিং অমসুং লমশিংদা চৎলম্মি। ঐখোয়না লৌমীশিংগী লৌবুকশিংদা চৎলম্মি অমসুং মখোয়গা হকথেংননা ৱারী শানরম্মি। লমদম অদুদা করম্বা মখলগী লৈহাও লৈবগে, ঈশিং করম্না ফংবগে, করম্বা মহৈ-মরোংশিং অদু ফজনা হৌবা ঙম্বগে, করম্বা ফার্মিংগী মথৌ তাবগে, অসিগুম্বা হীরম খুদিংমক লৌমীশিংগা হকথেংননা খন্ন-নৈনরমগনি। সাইন্তিস্তশিংগী লেবোরেতরীশিংদা লৈরিবা লৌশিং অসি লৌমীশিংগী লৌবুকশিংদা হকথেংননা য়ৌহন্নবা ঐখোয়না হোৎনখি। অতোপ্পা ৱাহৈ অমদা হায়রবদা, ঐখোয়না লেব তু লেন্দগী ৱাখল্লোনগা লোয়ননা মাংলোমদা চংশিল্লি, অমসুং গুজরাতকী লৌমীশিংনা মসিগী কান্নবা ফংলি।

মরুপশিং,

ঐহাক্কী গুজরাতকী মতমগী এক্সপরিয়েন্স অসি কেন্দ্র সরকারদা লাক্লবা মতুংদা য়াম্না কান্নখি। ২০১৪দা লৈবাক অসিদা লৈহাও চাংয়েং তৌনবা লেবোরেতরী চাম্মা খক্তমক লৈরম্মি। ঙসিদি মখোয়গী মশীং অসি ৮,৪০০ হেনখ্রে। মেদিকেল সাইন্সতা পেথোলোজী লেবোরেতরীশিং পাকথোক চাউথোক্লকপগুম্না, ঙসিদি লৈহাও চাংয়েং তৌনবা লেবোরেতরীশিংসু পাকথোক চাউথোক্লি। ঙসিদি, লৈবাক শিনবা থুংনা কৃষি বিজ্ঞান কেন্দ্র ৭৫০ হেন্না লৈরে। শাশিংবু লাইনা-লাইচৎশিংদগী ঙাকথোকপদা ঐখোয়না মরুওইবা পীরি। ফুত এন্দ মাউথ দিজিজদগী শা-ষনশিং ঙাকথোক্নবা, লৌমীশিংগী শা করোর ৮ হেনবদা লেম্না ভেক্সিনেসন তৌখ্রে। কোবিদকী মতমদা, ঐখোয়না লেম্না ভেক্সিনশিং পীখি, অমসুং মসি মীপুম খুদিংমক্না নীংশিংলি। অদুবু মসি মোদীনি; মহাক্না শা-ঙাশিংদা ফাওবা লেম্না ভেক্সিনশিং পীরি।

মরুপশিং,

অয়াম্বা মতমদা, অরিবা মওংশিং ঙাক্না চৎপা মীওই খরনা ঐখোয়গী খুঙ্গংশিংদা পাক-শন্না তেক্নোলোজী শীজিন্নবা অসি ওইথোক্লোই হায়না থাজৈ। নামো দ্রোন দিদীশিংনা অসিগুম্বা মীওইশিং অসি অরানবনি হায়বা উৎখ্রে। মতম অমদা, দ্রোন দিদী পুম্নমক্কা ভিদিও কনফরেন্সিংগী খুত্থাংদা ৱারী শানরিঙৈদা ঐহাক্না ঝারখন্দগী খুঙ্গংগী মচানুপী অমগা ৱারী শানখি। মহাক্না ঐঙোন্দা হায়খি, “হৌজিক ঐগী থাক অসি হোংখ্রে।” ঐনা হংখি, “করিগীদমক্তা?” মহাক্না হায়খি, “খুঙ্গং পুম্নমক্না ঐবু পাইলোৎ হায়না কৌই, অমসুং ঐগী ইনাওনুপানা ঐবু পাইলোৎ ববী হায়না কৌই।” ইশাগী ইকাই খুম্নবা কয়া য়াম্না হেনগৎলমগনি খল্লু। হৌজিক্কী ওইনা, নমো দ্রোন দিদিশিংনা দ্রোনশিংবু ফর্তিলাইজর অমসুং পেস্তিসাইদশিং স্প্রে তৌবদা শীজিন্নরি। হৌজিক মখোয়গী শীজিন্নবগী লমসু পাকথোক চাউথোকহল্লে।

মরুপশিং,

ঙসিগী ভারতনা এগ্রিকলচরদা ইঞ্জিনীয়রিংগী থৌদাংসু পাকথোক চাউথোকহল্লি। ঐখোয়গী লৌউ-শিংউগী সাইন্তিস্তশিং, ইঞ্জিনীয়রশিং অমসুং নহারোলশিংনা লৌউ-শিংউগী মমল হন্থহন্নবা অসিগুম্বা খুৎলাইশিং অমসুং মেছিনশিং পুন্না পুথোক্লি। মফম খরদা, সিজিং অমসুং মহৈ-মরোং তানবগী থবক অসি লায়থোকহন্নবগীদমক মেছিনশিং পুথোক্লে। অমসুং ঐহাক্না মরু ওইনা মফম অসিদা লৈরিবা ইন্দস্ত্রীগী মীওইশিং, লৌমীশিংগীদমক খুৎলায় পুথোকপদা য়াওরিবা মীওইশিং, ঐখোয়গী স্তার্তঅপ ফাউন্দরশিংদা হায়জবা পাম্মি মদুদি হৌজিক্তি অদোম্না শাবা খুৎলায় খুদিংমক সোলর ইনর্জীনা পাৱর তৌগদবনি, মরমদি ঐখোয়না ফার্ম খুদিংদা সোলর ইনর্জী পুশিল্লি। মালেম পুম্বনা হৌজিক্তি ইলেক্ত্রিক ভেহিকলগী মায়কৈদা চংশিল্লকপগুম্না, ঐহাকসু লৌউ-শিংউগী খুৎলাই মখল খুদিংমক নুমিৎ মঙালদগী পাৱর ফংহনবগী মায়কৈদা চংশিল্লি। অমসুং ঐহাক্না মসিগী মাইকৈ অসিদা য়াম্না কন্না হোৎনরি। অদুবু ঐহাক্না এম.এস.এম.ই.শিং অমসুং অপীকপা ইন্দস্ত্রী পুম্নমকপু মসিদা মীৎয়েং চংনবা হায়জনীংই। মসি য়াম্না চাউবা রিভোলুসনগী লম অমা ওইগদৌরিবনি। মসি খক্তা নত্তনা, সেন্সরদা য়ুম্ফম ওইবা, এ.আই. তেক্নোলোজীগা লোয়ননা খুৎশিন্নবা, লৌমীশিংদা অশেংবা ঈ-পাউ পীবা ঙম্বা অমসুং অপীকপা লৌমীশিংদা ফাওবা শেল চঙদবা তেক্নোলোজী অসি হৌজিক শেমগৎলক্লি। হৌজিক মোবাইল ফোনগী খুত্থাংদা সোইল তেস্ত তৌনবগী থৌরাংশিং শেমগৎলি। নহাক্না মোবাইলদা য়ুম্ফম ওইবা দিভাইস অদুদা লৈহাও খরা থম্মি, অমসুং নহাক্কী ফোন অদুনা নহাক্কী লৈহাও অদু করম্বা মহৈ-মরোংগীদমক্তা চুনবগে হায়বদু মশক খংদোকপা, হার কয়া য়াম্না মথৌ তাবগে অমসুং করি মখলগী হার মথৌ তাবগে হায়বা রিপোর্ত অমা খুদক্তা ফংহল্লি। অতোপ্পা ৱাহৈদা হায়রগদি, অহোংবা কয়া য়াম্না থুনা লাক্লিবগে হায়বদু য়েংবীয়ু। ঙসিদি, এগ্রিকলচরেল ইঞ্জিনীয়রিংদগীনা এগ্রি-স্তার্ত-অপ ফাওবদা, ভারত অসি খুদোংচাবশিংনা থল্লি। ঐখোয়না ঐখোয়গী ফুদ প্রোভাইদরশিংবু এগ্রি-ওন্ত্রপ্রিন্যুওরশিং, হায়বদি লৌউ-শিংউগী ওন্ত্রপ্রিন্যুওরশিং ওইহনগদবনি। হৌজিক লৈবাক শীনবা থুংনা ভেল্যু এদিসন অসি মতৌ করম্না পোত্থোক পুথোকপা মফমদা পাংথোকপা য়াবগে হায়বগী মতাংদা থবক য়াম্না খোঙজেল য়াংনা চত্থরি।

মরুপশিং,

হৌখিবা চহি খরা অসিদা, অপীকপা লৌমীশিংনা সরকারগা লোয়ননা থবক তৌমিন্নদুনা, এফ.পি.ও. ১০,০০০গী অচৌবা নেৎৱার্ক অমা শেমগৎলে, হায়বদি, ফার্মর প্রোদ্যুসর ওর্গনাইজেসনশিং। মসিনা অপীকপা লৌমীশিংগী কাংলুপশিংবু ভেল্যু ক্রীএতর ওইহল্লি অমসুং মখোয়বু ফুদ-প্রোসেসিং বিজিনেসকা শম্নহল্লি। গুজরাত্তা ঐহাক্কী মতমদগী থোকখিবা থৌদোক অমা ঐহাক্না নীংশিংলি। গুজরাত্তা ঐখোয়না জ্যোতিগ্রাম য়োজনা হৌদোকখি। ঐখোয়না লৌউ-শিংউগী ফিদরশিং অসি য়ুমগী ফিদরশিংদগী তোখায়না থমখি অমসুং লৌমীশিংদা য়ারিবমখৈ ইলেক্ত্রিসিতী মশিং য়াম্না পীনবা হৌখি। মসিনা লৌমীশিংদা য়াম্না কান্নবা পীখি। গান্ধীনগরগী মনাক্তা মীওই অয়াম্বনা মোরোক পাম্বী থারিবা খুঙ্গংশিং লৈ। অদুবু মফম অদুদা লৈরিবা লৌমীশিংনা খুদোংচাদবা অমা মায়োক্নখি। পোত্থোক হেনগৎলক্লবদি মমল হন্থগনি, অমসুং পোত্থোক হন্থরক্লবদি শেন্দোং হন্থগনি। মখোয়না ফীভম অনিমক্তা অৱাবা কয়া মায়োক্নখি। করিগুম্বা মোরোক মশিং য়াম্না পুথোক্লবদি, মখোয়না য়োনবা ফংলমদে। অদুবু জ্যোতিগ্রাম য়োজনাগী খুত্থাংদা ইলেক্ত্রিসিতী লাক্লবা মতুংদা, মখোয়না মোরোকশিংবু মোরোক অঙাংবগী পাউদরদা ওন্থোকপা হৌখি। মখোয়না পাউদর অদু পেকেজতা হানখি, এদভর্তাইজ তৌখি, পেকেজ অদুদা মশক নাইবা মীওইশিংগী ফোতোশিং হাপখি, অমসুং অচৌবা স্কেল অমদা চিলি পাউদর য়োনবা হৌখি। হায়রিবা ভেল্যু এদিসন অসিগী খুত্থাংদা, মখোয় অসি য়াম্না মায় পাকপা শেন্থোক লৈবা মীওইশিং ওইরকখি। মমাংদা, মখোয়না মখোয়গী মোরোক্কীদমক চুনবা মমল অমত্তা ফংবা ঙম্লমদে, অদুবু হৌজিক্তি মখোয়গী পোত্থোকশিং অসি ব্রান্দ অমা ওইরে। মসিনা তাক্লি মদুদি অপীকপা ফিভম খুদিংমক্তা মীৎয়েং চংলকপা মতমদা করি তৌবা য়াবগে হায়বসিনি। অপীকপা লৌমীশিংবু এক্সপোর্ত মার্কেৎশিংগা শম্নহন্নবা হোৎনরিবা অসিসু খোঙজেল য়াংনা মাংলোমদা চংশিল্লি।

মরুপশিং,

ঐখোয়গী পোলিসী অমসুং ঐখোয়গী পান্দমদি ময়েক শেংই। লৌউ-শিংউবনা লৌমীশিংদা অৱাবা ওইহল্লোইদবনি হায়বসি ঐখোয়গী মরুওইবা ৱাফম্নি। লৌমীশিংগীদমক মমল হোংবা ফর্তিলাইজরশিং ফংহন্নবা, লৈবাক অসিনা হৌখিবা চহি ১২দা লুপা করোর লাখ ১৬ চাদিং তৌখ্রে। মরুপশিং, মসি য়াম্না চাউবা মশিং অমনি। লুপা করোর লাখ ১৬ অসি লৈবাক কয়াগী চহিগী বজেৎদগী হেন্না ওইরি। ইরান অমসুং গল্ফকী লৈবাকশিংদা হৌজিক লান চত্থরিবা অসিগী মরক্তা, ভারতকী লৌমীশিংদা লুপা ৫০০০গী দি.এ.পি. ফর্তিলাইজরগী বেগ অমা লুপা ১,৩০০ খক্তদা ফংহল্লি। ইন্তর্নেস্নেল মার্কেত্তা লুপা ৩,০০০ চংগদবা য়ুরিয়াগী বেগ অমবু ভারতকী লৌমীশিংদা লুপা ৩০০দগী হন্থনা পীরি।

মরুপশিং,

ঐহাক্না হীরম অমগা হায়জবা পাম্মি, অমসুং ঐহাক্না মসিগী মতাংদা মমাংদসু হায়ক্রে। অদোমগী নেৎৱার্ক্কীদমক, ঐহাক্না ঙসি হায়গদৌরিবা অসি অখন্নবনি।

মরুপশিং,

নোংচুপ থংবা এসিয়াদা লানগী ফিভম হেনগৎলকপা মতমদা, ক্রুদ ওইলগী মমল দোল্লর ৭০দগী বেরেল অমদা দোল্লর ১২২ ফাওবা চয়োল খরগী মনুংদা হেনগৎখি। মতম অদুদা, ভারতসু অচৌবা শিংনবগা মায়োক্নখি। ভারত অসি দিজলগী মমল অসি য়ামদ্রবদা লিতর অমদা লুপা ৫০ হেনগৎহনগদৌরিবা ফিভম অমদা লৈরম্মি। লিতর অমদা লুপা ৫০ হেনগৎহনবগী তঙাইফদবা লৈরে। মতম অদুদা সরকারনা লৌমীশিংগী কান্ননবগীদমক ৱারেপ লৌখি। ঐখোয়না ৱারেপ লৌখি মদুদি ইন্তর্নেস্নেল মার্কেতশিংদা থোকলিবা চৈথেং অসিনা মরম ওইদুনা লাকপা শিংনবশিং অসি নাগরিকশিং অমসুং লৌমীশিংগী মথক্তা য়ৌহল্লোই। সরকারনা দিজলগী মমল লিতর অমদা লুপা ৭ খক্তদা হেনগৎহনখি, অদুগা মথৌ তাবা হেনগৎলকপা অসি লুপা ৫০ ওইরম্মি। সরকার মশামক্না লিতর অমদা লুপা ৪৩গী পোৎলুম অমা পুখি। য়ুম্লোন্নরিবা লৈবাকশিংদসু, দিজলগী মমল অসি চাদা ৪০দগী ৫০ ফাওবা হেনগৎখি। অদুবু মসি ভারত্তা থোকখিদে। মদুদগী ঙসি ফাওবদা, সরকারনা থা খুদিংগী লুপা করোর ১৪,০০০ মাংলি। থা খুদিংগী। অদুম ওইনমক ঐখোয়না লৈবাক অসিগী লৌমীশিংদা অৱাবা নংহনখিদে। লৌমীশিংগী য়াইফ-থৌরাং অসি খ্বাইদগী মরুওইবা ওইরকপা মতমদা, সিতিজন দেবো ভাবকী ৱাখল্লোন লৈরকপা মতমদা, অসিগুম্বা সেন্সিতিব ওইবা ৱারেপশিং লৌই।

মরুপশিং,

লৈবাক অসিগী কান্নবশিংগী মতাংদা খন্ন-নৈনবগী মরক্তা, হৌজিক ফাওবদা নেগেতিব হেদলাইন অমত্তা থোরকপা ঙমদ্রিবা অসিদা ঐহাক্না থাজবা থম্লি মদুদি অজতাক্কী মীয়াম্না অঙকপা পোক্লমগনি। মরম অদুনা হৌজিক ঐখোয়না হেদলাইন অমা ওইবা য়াবা করিগুম্বা খরা খন্ন-নৈনগদবনি। হৌজিক ফাওবদা, ঐহাক্না লৈবাক অসিগী মরমদা ঙাংখি, অমসুং মসিনা মীদিয়াগী মীৎয়েং য়াম্না চীংশিনখিদে। হৌজিক ঐহাক্না ৱাথোকশিংগী মরমদা ঙাংলগে।

মরুপশিং,

হৌজিক্কী মতমদা, মীওই খরনা মখোয়গী পোকেৎশিংদগী সংবিধান লৌথোকই। লৈবাক অসিনা মখোয়না করি তৌরিবগে হায়বদু য়াম্না ফজনা খঙই। লৈবাক অসিগী সংবিধান অমসুং দেমোক্রেসী অসি মখোয়গী পোকেৎতা লৈ হায়না মখোয়না খল্লি। মখোয়না শক্তি পাইদ্রবসু, মখোয়না শক্তি পাইবগী মোন্দ্রং শান্নরি। অদুবু হায়রিবা মীওইশিং অসি লৈঙাক পায়রিঙৈদা, মখোয়গী থবকশিং অসি করম্না তৌবগে? ঐহাক্না অপীকপা থৌদোক অমা লিজগে।

মরুপশিং,

মতম অমদা মীদিয়াগী মীওইশিংনা খ্বাইদগী ফবা রাজ্যশিংবু রেঙ্কিং তৌনরম্মি হায়বসি অদোম্না নীংশিংবা য়াই। শেন্মিৎলোনগা মরী লৈনবা রেঙ্কিং অমদা, গুজরাতনা নম্বর ৱান রেঙ্কিংদা লৈরম্মি অমসুং মতম অদুদা ঐহাক গুজরাতকী মুখ্য মন্ত্রী ওইরম্মি। গুজরাতপু নম্বর ৱান রেঙ্কিং পীখিবা ইন্সতিত্যুসন অদুগী মমিং অসি ভারতকী হান্নগী প্রধান মন্ত্রী অমগী মিংদা থোনখি। হিন্ত পীজরে, মখা তাবদি মমিং নশানা থিজরো। রেঙ্কিং অসি লৈবাক অসিগী খ্বাইদগী ইকাই খুম্নবা ইকনোমিস্তশিংগী মরক্তগী পাঙথোকপা রিসর্চতা য়ুম্ফম ওইখি। অদুবু দিল্লীদা লৈঙাক পায়রিবা মীওইশিংনা গুজরাতনা শকখঙবা ফংলকপা অদু পামখিদে। মখোয়না রিসর্চ তৌরিবা মীওইশিংদা অসিগুম্বা মওং অসি মখা চত্থবা য়ারোই হায়না ফোর্মেল ওইনা পাউতাক পীখি। মতম অদুদগী হৌনা মখোয়গী অয়াবা য়াওদনা রিপোর্ত অমত্তা ফোঙবা য়ারোই হায়না মখোয়না হায়খি।

মরুপশিং,

মতম অদুগী ফিভম অদু অদুনি, অমসুং ঙসিদি হায়রিবা মীওইশিং অসিনা তোলরেন্স অমসুং দেমোক্রেসিগী মতাংদা লেকচরশিং পীরি। অমসুং মসি করম্বা মতমদা থোকখিবগে? মদুগী মতুংদা করি থোকখি? অদোম্না থিজিল্লগা ইশামক্না অকুপ্পা মরোলশিং অদু ফংগনি। হৌজিক ঐহাক্না ঐহাক্কী ৱাফমশিং লোইশিনজগে।

মরুপশিং,

লৈবাক অসিগী লৌমীশিংনা হৌখিবা চহিশিংদা ফংখিবা মায় পাকপা অসি চীংনবা লৈতনা শীংথানীংঙাই ওইখি। বিক্সিত ভারত অমা শেমগৎনবা, ঐখোয়না হৌজিক ঐখোয়গী হোৎনরিবশিং অসি হেন্না পাকথোক চাউথোকহনগদবনি। ঐখোয়না লৌমীশিং চাউখৎপা, খুঙ্গংশিং চাউখৎপা, অমসুং লৌউ-শিংউগী লম অসি মোদর্ন অমসুং শেন্দোং লৈবা ওইগদবা তুংলমচৎ অমা শেমগদবনি। ঐহাক্না থাজবা থম্লি মদুদি মফম অসিদা পাংথোক্লিবা খন্ন-নৈনবশিং অসিনা লৈবাক অসিদা কান্নবা পীগনি। সরকারনা মফম অসিদগী ফংবা খ্বাইদগী ফবা সজেসনশিং অমসুং সোলুসনশিংদা থবক তৌগনি। অমসুং ঙসি ঐহাক অদোমগী মরক্তা লাক্লবনিনা, ঐহাক্না অদোমদা আপিল অমা তৌবা পাম্মি। হৌরকপদা, অঞ্জনা জীনা মহাক্কী হৌদোক ৱারোলদা হায়খি মদুদি লৌমীশিং অসি অন্নাদাতা অমসুং ইমা পৃথিবীগা মরী লৈনৈ। ঐহাক্না ঐহাক্কী লৌমী ইচিল-ইনাওশিংদা হংনীংবদি: ঐখোয়না তশেংনা ঐখোয়গী ইমা পৃথিবী অসিবু ঙাক-শেনবীবরা? ইশানা ইশাদা পুকচেল শেংনা ৱাহংশিং হংবিয়ু। কেমিকেলশিং কা হেন্না শীজিন্নদুনা ঐখোয়না ইমা পৃথিবীবু মাংহল্লিবা মওং, অ,সিং ঐখোয়না মহাক্কী মচাশিংনি। ঐখোয়না ইমা অসিবু ঐখোয়গী মীৎমাংদা উন-উনা হাৎতোক্লি। করিগুম্বা ঐখোয়না মতম চানা থবক পায়খৎত্রবদি, করিগুম্বা ঐখোয়না ইমা পৃথীবি অসি ঙাকথোক্নবা হোৎনবা তৌদ্রবদি, ঙসিদি ঐখোয়বু য়োকপীরিবা ইমা অসি কনবা ঙমদবা য়াই। অসিগুম্বা ফিভম অসি থোক্লকপা য়াই। মরম অদুনা সরকারনা নেচরেল ফার্মিংদা মরুওইবা পীরি। মহৌশাগী ওইবা লৌউ-পথাপতা চাংয়েং তৌরিবা মীওইশিংনা মায় পাকপা কয়া ফংলি। ষন অমা খক্তনা একর ৩০গী লমদা মহৌশাগী ওইবা লৌউ-পথাপকীদমক মতীক চাবা হার পুথোকপা ঙম্মী। কেমিকেল ইনপুৎ অমত্তা মথৌ তাদে। অসিগুম্বা হীরম কয়া অমা ঙসি অদোম্না খন্ন-নৈনখিবা মতমদা থোক্লমগনি। মরম অদুনা, ঐহাক্না লৌমী পুম্নমক্তা হায়জরি মদুদি ঐখোয়না কেমিকেল য়াওদবা লৌউ-শিংউগী মায়কৈদা চংশিনগদবনি। ঐহাক্না ওর্গানিক ফার্মিংগী মতাংদা ঙাংদে। ঐহাক্না নেচরেল ফার্মিংগী মতাংদা ঙাংলি, অমসুং লৌমী খুদিংমক্না মসিবু লায়না শীজিন্নবা য়াগনি। ঐখোয়না কেমিকেলশিং শীজিন্নদনা থমন্দুনা ঐখোয়গী লৈহাওবু কনবা খোঙথাংশিং লৌখৎপা য়াই। ঐখোয়গী লৌমী ওইরিবা ইচিল-ইনাওশিংগী থেংনরিবা খুদোংচাদবশিংগী মরক্তা অমা হায়রগদি মখোয়না মশাগী মীৎনা করিগুম্বা অমা উদ্রিবা ফাওবা মখোয়না য়াবা ঙমদে। ৱা শাং ঙাংখ্রবসু, লৌমীশিংনা করিগুম্বা অমবু ইরাই লাইনা য়াবা নত্তে। মখোয়না মসি উরবা মতুংদা খক্তা থাজগনি। মদু নৎত্রবদি, মখোয়গী ৱাখলদা লৈরিবদি মখোয়না ধেলো পাউদর অদু হাপকদবনি, অশংবা বোতল অদু শীজিন্নগদবনি, অশংবা কন্তেনর অদু শীজিন্নগদবনি, অঙাংবা কন্তেনর অদু পুরকপা তাই, অমসুং করিগুম্বা য়ুম্লোন্নবনা বেগ অনি শীজিন্নরবদি, মখোয়নসু বেগ অনি শীজিন্নগনি; করিগুম্বা য়ুম্লোন্নবনা বেগ মরি শীজিন্নরবদি, মখোয়নসু বেগ মরি শীজিন্নগনি। অসিগুম্বা ৱাখল্লোন অসিদগী লৌমীশিংবু লৌথোকপা হায়বসি ঐখোয় পুম্নমক্কী থৌদাংনি, অমসুং মরুওইনা প্রোগ্রেসিব ফার্মশিংগী থৌদাংনি। ঐখোয়না মখোয়বু কেমিকেল য়াওদবা নেচরেল ফার্মিংগী মায়কৈদা চংশিনবদা মতেং পাংবা তাই। অহানবা থবক অসি ঐখোয়গী ইমা পৃথিবী অসি কন্নবনি। ঐখোয়গী মথৌ তাবশিং খুদিংমক ইমা অসিনা পীবা ঙম্মি। ঐখোয়না মহাকপু ঙাক-শেনবীরবদি মহাক্না ঐখোয়দা করিগুম্বা অমত্তা ৱাৎহল্লরোই। ঐখোয় ইমা পৃথিবীগী মচাশিংনি। মসিগী থৌদাং অসি মহাক্কী মচানুপা-মচানুপীশিং ওইনা পাংথোকপা অসি ঐখোয়গী থৌদাংনি। থাজবা অসিগা লোয়ননা, ঐহাক্না ময়াম পুম্নমকপু য়াইফ-পাউজেল পীজরি। ঐহাক্না ইন্দিয়া তুদে গ্রুপপুসু নুংঙাইবা ফোংদোকচরি। লাক্কদৌরিবা চহিশিংদা লৈবাক অসিবু য়াম্না মতেং পাংগদবা থবক অমা অদোম্না পায়খৎলে।

হন্না-হন্না থাগৎচরি।

খঙহঞ্জবা: মসি প্রধান মন্ত্রীগী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

*****