ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি ছত্তিগরদা চৎখ্রে। জাঞ্জগির–চম্পাদা, মহাক্না থাইনদগী চৎনরক্লবা হেন্দলুম অমসুং লৌউ–শিংউগী এগজিবিসন অমা য়েংখি। মহাক্না নেস্নেল হাইৱে প্রোজেক্তশিং অমসুং পেন্দ্রা–অনুপ্পুর ৩ শুবা রেলৱে লাইনগী উরেপ–উয়ুং তমখি। প্রধান মন্ত্রীনা কেন্দ্র অমসুং রাজ্য সরকারশিংগী তোঙান তোঙানবা ৱেলফেয়র স্কিমশিংগী কান্নবা ফংলবশিংদা সর্তিফিকেৎসু য়েন্থোকখি।

অচৌবা কিসান সম্মেলন অমদা ৱা ঙাংলদুনা প্রধান মন্ত্রীনা হান্নগী প্রধান মন্ত্রী শ্রী অতল বিহারী ভাজপেয়ীবু, মহাক্না অনৌবা রাজ্য অহুম – উত্ত্রাখন্দ, ঝারখন্দ অমসুং ছত্তিসগর শেমখি হায়না নীংশিংখি। প্রধান মন্ত্রীনা হায়খি মদুদি রাজ্য পুম্নমক্না খোংজেল য়াংনা চাউখৎলক্লিবা অসি মহাক্কী চাউখৎ–থৌরাংগী মিৎয়েং অদুননি।

প্রধান মন্ত্রীনা শাফু পীরদুনা হায়খি মদুদি সরকার অসি চাউখৎপগী মাইকৈদা লাইনীং ওইরি অমসুং মীয়ামগী অনীংবা–অপাম্বা থুংহনবা পাম্মি। প্রধান মন্ত্রীনা হায়খি মদুদি ঐখোয়না মীয়ামগী পুন্সিবু লাইথোকহনবা পাম্মি।

শ্রী নরেন্দ্র মোদীনা হায়খি মদুদি সরকারনা ভোৎ বেঙ্ক নত্ত্রগা মীখলদা মাই পাক্ননবা থৌরাং শেম্বদা থাজবা থমদে। মহাক্না হায়খি মদুদি মহাক্কী পান্দমদি অনৌবা, ছত্তিসগর অমা শেম্বনি।

প্রধান মন্ত্রীনা হায়খি মদুদি সবকা সাথ, সবকা বিকাসকী মিশনগা লোইননা মাংদা চখৎলি, মসিগা লোইননা মহাক্না শাফু পীরদুনা হায়খি মদুদি কেন্দ্র সরকারনা লৌমীশিংদা কান্নবা পীগদবা মখোয়গী হক ফংহন্নবা য়াম্না কন্না হোৎনরি। প্রধান মন্ত্রীনা হায়খি মদুদি প্রধান মন্ত্রী কিসান সম্পদা য়োজনা অসি মিশন অসিদা কান্নবা পুরক্লি। প্রধান মন্ত্রীনা মসিসু হায়খি মদুদি তেক্নোলোজীগী থোংদা লৌমীশিংগী য়াইফনবগীদমক্তা থবক পাইখৎলি, মসিগী মখাদা মুদ্রা স্বাস্থ্য কার্দ অমসুং ফসল বীমা য়োজনাগুম্বা স্কিমশিংগী থোংদা লৌমীশিংদা কান্নবা ফংহল্লি।

প্রধান মন্ত্রীনা নীংশিংখি মদুদি অখন্নবা মীওই খর–খক্তমক য়াইফ–থৌরাংশিংগী কান্নবা ফংনরম্বা মতম অমা লৈরম্মি, অমসুং শেঞ্জা–থুমজানা লৈঙাকলোন অসিবু লৈখা তাহল্লম্মি। প্রধান মন্ত্রীনা শাফু পীরদুনা হায়খি মদুদি ঐখোয়না পুম্নমক্কী চাউখৎ–থৌরাংগী মতাংদা অরেপ্পা ফোংদোক্লি, কেন্দ্র সরকারনা ২০২২ ফাওবদা মীপুম খুদিংমক্কী য়ুম ফংহনবা পাম্লি।

প্রধান মন্ত্রীনা হায়খি মদুদি অমাংশঙ শাবগী থবক অসি মিশন অমগুম্না পাইখৎখি। মহাক্না হায়খি মদুদি উজ্জ্বলা য়োজনাগী মখাদা লাইরবশিংদা চাক থোংনবগীদমক গ্যাস কনেক্সন পীখি, অদুগা হৌজিক, সৌভাগ্য য়োজনাগী মখাদা য়ুমথো খুদিং মৈ ফংহনবগী থবক পাইখৎলি।