ভারতকী প্রধানমন্ত্রী

ঙসি মফম অসিদা তিনবীরিবা পুম্নমকপু য়াইফ পাওজেল পীজরি। তিনবীরিবা পুম্নমক ভারতকী মীপুম খুদিংমক্তা য়ুম ফংহন্নবা পুৱারি ওইনা হোৎনরিবা অসিদি মরুওইবা স্তেকহোলদরশিংনি।

থা অমগী মনুংদা অনিরকশুবা ওইনা ঐহাক্না হাউজিং সেক্তরগী মীয়ামগা লোয়ননা ৱারি শান্নজনবা খুদোংচাবা ফংজরে। মসিনা মিদল ক্লাসকী মীওইশিংনা য়ুমগী মঙলিবা মঙলান অদু মপুং ফাহন্নবা ঐখোয়না কয়া য়াম্না হকচিন্না লৌবগে হায়বদু উৎলরে অদুগা ঐহাক্না মফম অসিদা উজবদা মরূপলোই কয়া অমদি ক্রেদাইগী থৌরমদসু শরুক য়াবিখি।

মরূপশিং,

তালকতোরা স্তেদিয়মদা লৈবাক অসিগী হাউজিং সেক্তরগা মরি লৈনবা নহা ওইরিবা মরূপশিংদা হাউজিং সেক্তরবু অনৌবা ভারতকী ইনর্জী অমদি মথৌ তাবা একাউন্ত অদুদা ইনোৎ পীনবা হায়খি। মদুগীদমক লৈবাক অমদি মালেম অসিদা কন্সত্রক্সনগা মরি লৈনবা হাউজিংগা মরি লৈনবা খ্বাইদগী নৌবা তেক্নোলোজীশিং অদু শিজিন্নগদবনি। অদোমগী তেংবাংগীদমক্তা ঐখোয়গী সরকারনা খোংথাং খুদিংদা অদোমগা লোইননা চৎমিন্ননবা থৌরাং তৌরি, খোংকাপ অনি মাং থানা চৎনবসু থৌরাং তৌরি অদুগী মদুগী খ্বাইদগী চাউবা খুদমদি কন্সত্রক্সন তেক্নোলোজীগা মরি লৈনবা কনফরেন্স অসিনি।

মরূপশিং,

ঙসিগী কনফরেন্স অসি পাংথোকপগী নত্ত্রগা গ্লোবেল হাউজিং তেক্নোলোজী চেলেঞ্জগী মথৌ তাবা অদু ফাওরিবগী মরমদি লৈবাক অসিদা লৈরিবা শহরশিং অসি খোংজেল য়াংনা পাকথোক চাউথোরকপা অমদি দিবেলপ তৌরকপা অসিনি। খোংজেল য়াংনা অর্বনাইজেসন তৌরিবা লৈবাকশিংগী মরক্তা ভারতসু অমনি। খোংজেল য়াংনা অর্বনাইজেসন তৌরকপনা অনৌবা য়ুমশিংগী দরকার ওইবসু অদুক্কী মতিক হেঙ্গৎলক্লি।

মরূপশিং,

ঐখোয়গী সরকারনা হাউজিং সেক্তরগী মওং মতৌদা অহোংবা পুরক্নবগীদমক ফ্লেগশিপ মিশন তরেৎতা অমত্তা ওইনা থবক তৌরি। স্বচ্ছ ভারত অভিয়ান, প্রধান মন্ত্রী আৱাস য়োজনা, দীনদয়াল অনত্যোদয় য়োজনা, নেস্নেল অর্বান লাইবলিহুদ মিশন, ঐচ.আর.আই.দি.এ.ৱাই. অমসু অমরুৎ অসিনচিংবা মরুওইবা প্রোগ্রামশিং হৌদোকখ্রে। মসিগা লোয়ননা শহরশিংগী ত্রান্সপোর্ততা অহোংবা পুরকপা অমদি স্মার্ত সিতীগুম্বা প্রোজেক্তশিংসু চত্থরি। মসিদা অখন্নবা মীৎয়েং থমদুনা ঙসি ঐখোয়গী মাংদা তোঙান তোঙানবা জিওগ্রাফিকেল কন্দীসনশিংগী মতুং ইন্না য়ুম শাননবা শীংনবা অমা লৈরি।

মরূপশিং,

শিংনরিবশিং অসিদা অখন্নবা মীৎয়েং থমদুনা ঐখোয়গী সরকারনা কন্সত্রক্সন সেক্তরগীদমক হোলিস্তিক এপ্রোচকা লোয়ননা থবক তৌরি। য়ুম শারিবশিং অমদি য়ুম লৈরিবশিং অনিমক্তা করম্বা মখলগী খুদোংচাদবশিং লাক্লম্বগে হায়বদু খঙনা ঐখোয়না ৱারেপ লৌখি। ঐখোয়না খ্বাইদগী য়াম্না এফোর্দেবল হাউজিংদা পুক্নীং থৌগৎলি। অনিশুবদা, ঐখোয়না রিয়েল ইস্তেৎ সেক্তরগা মরি লৈনবা আইনশিং চুমথোক্লে। অহুমশুবদা, ঐখোয়না স্কীল দিবেলপমেন্তদা থবক তৌরে অমদি মরিশুবদা মসি পুম্নমক অসিগা লোয়ননা ঐখোয়না হাউজিং সেক্তরদা তেক্নোলোজীগী ফিভম ফগৎহনবদসু মীৎয়েং থমলি। ঙসিগী থৌরম অসিসু মদুগী শরুক অমনি। অমদি প্রগতিগী মীফম অমদা ঐহাক্না মন্ত্রালয়শিংবু গ্লোবেল চেলেঞ্জ প্রোসেস পায়খৎনবা ৱাফম থমখি। ঙসি গ্লোবেল হাউজিং তেক্নোলোজী চেলেঞ্জ, ইন্দিয়াগী খুত্থাংদা ময়াম পুম্নমক মফম অসিদা পুল্লিবা অসিদা ঐহাক নুংঙাইবা ফাওই।

মরূপশিং,

ঐখোয়গী লৈবাক অসিদা মীওই কয়া অমদি মখোয় মশাগী ওইবা ময়ুম লৈজদবা অসিদা ঐহাক্না অৱাবা অমদি নুংঙাইতবা ফাওরি। ঐখোয়না প্রধান মন্ত্রী আৱাস য়োজনাগী মওংদা ফিভম অসি ৱারোইশিন পুরক্নবা থবক তৌরি। ২০২২ ফাওবদা ভারতমচা খুদিংনা পক্কা য়ুম অমমম লৈবা অসি ঐহাক্কী মংলান্নি। ঐখোয়না সরকার পায়বা মতমগী মনুংদা য়ুম কোতি ১.৩ হেন্না হান্ননা শাখ্রে। মদু মমাংগী সরকারনা শুপ্নতংগী য়ুম লাখ ২৫ খক্তমক শারমখি। ঐখোয়গী থবক অসি ফক্লাং মরি শাবনা লোয়দ্রি। ঐখোয়না য়ুমশিং অসিবু ঈশিংগী কনেক্সন, মৈগী কনেক্সন, উজ্জ্বলা কনেক্সন অমদি অতোপ্পা অসিগুম্লবা খুদোংচাবশিং ফংহল্লি। হৌখিবা চহী মরি মখায়দা য়ুমশিংগী ক্বালিতী অমদি য়ুমগী পাক চাউবসু হেঙ্গৎহল্লে। অদুবু মদুগীদমক তৌগদবা কয়া অমা লৈরি, ঐহাক্না প্রাইভেৎ সেক্তরগী তেংবাং থিরি। ঐখোয় পুন্না থবক তৌমিন্নদুনা ঐখোয়গী কেপাসিতীশিং হেঙ্গৎহল্লসি অমদি লাইরবদগী লাইরবশিংবু মতেং পাংগদবা করিগুম্বা খরা তৌরসি।

মরূপশিং,

সরকারগী পোলিসীশিংনা মরম ওইদুনা অদোম্না অতোপ্পা মতেং অমগা ফংলগনি। অখন্ননা খুঙ্গংগী লমদমশিংদা হ্যুমেন রিসোর্সকী চাউরবা পুল অমা দিবেলপ তৌরে, মখোয় য়ুম শাবগী তেক্নোলোজীগী মতাংদা খঙলবা অমদি ত্রেন তৌরবশিংনি। ঐখোয়গী সরকারনা সেক্তর অসিদা নুপীশিংগী ত্রেনিংগীদকসু কেম্পেন অমা চত্থরি। মসিগী ত্রেনিং কেম্পেন অসিগী মতুং নুপী লিশিং কয়া মিস্ত্রী ওইনা থবক তৌরি।

মরূপশিং,

অদোম্না খঙজিনবদা নুংঙাইবা ফাওগনি মদুদী আশা ইন্দিয়া হায়বদি এফোর্দেবল সস্তেনেবল হাউজিং এক্সেলেরেতরনা লোকেল ইনোভেসনশিংবু কৈথেলগী মতুং ইন্না শিন্দোকপগী মথৌ তৌরি। আশা জি.ঐচ.তি.সি.-ইন্দিয়াগী শরুক অমনি। মসিদা মুম্বাই, মদ্রাস, খরগপুর অমসুং রুরকী আই.আই.তি.দা থবক তৌরিবা ইনক্যুবেসন সেন্তর মরিদা নহাওইরিবা ইন্ত্রপ্রিনরশিং অমদি স্তার্ত-অপ ইকো-সিস্তেমগী ৱাখল্লোনশিংবু কৈথেলগী মতুং ইন্না কান্নবা ফংহন্নবা খোংজেল য়াংনা থবক তৌরি।

মরূপশিং,

অসিগুম্বা মখলগী ইনোভেসন, তেক্নোলোজী অমদি ইঞ্জিনীয়রিংদা থবক তৌরিবা মহৈরোই খরা মফম অসিদসু শরুক য়ারি খঙবদা ঐহাক নুংঙাইবা ফাওই। মফম অসিদা খন্ন-নৈনরিবশিং অসি নেস্নেল নোলেজ নেৎৱার্কতসু পীশিনগনি, মদুনা মরম ওইরগা লৈবাক্কী এজুকেস্নেল ইন্সতিত্যুৎশিংনা মসিগী কান্নবা ফংবা ঙম্লগনি। মফম অসিদা খন্নগদৌরিবা মায়োক্নরিবশিং অদু কোকহন্নবগীদমক নেৎৱর্ক অসিগী খুত্থাংদা এজুকেস্নেল ইন্সতিত্যুৎশিবুসু তাঞ্জা পীরগনি।

ময়াম পুম্নমক্না হাউজিং তেক্নোলোজীদা ভারত্তা চত্থরিবা অসিগুম্লবা অঙকপা চাংয়েং অসিগী শরুক ওইবা ঙম্নবগীদমক লাইত হাউস প্রোজেক্ত হৌদোকপগী থবক চত্থরে। গুজরাত, ঝার্খন্দ, মধ্য প্রদেশ, তামিল নাদু, ত্রিপুরা অমসুং উত্তর প্রদেশতা হৌদোক্লিবা প্রোজেক্তশিং অসিদা কন্সত্রক্সনগী অনৌবা তেক্নোলোজী পাংথোকপা য়াই। মসি অদোমগীদমক লাইব লেবোরেতরীশিংনি। মফম অসিদা অদোম্না ৱেবকাস্ত দেমোগুম্বা তেক্নোলোজীগী খুত্থাংদা লৈবাক অসিগী নহা ওইরিবা প্রোফেস্নেলশিংগা ৱারী শান্নবা ঙমহল্লি।

মরূপশিং,

জি.ঐচ.তি.সি.-ইন্দিয়া অসি ভারতকী কন্সত্রক্সন সেক্তর ইকো সিস্তেম্বু মালেমগী থাক্তা পুখৎপা য়ারবা অদুগুম্লবা প্রেৎফোর্ম অমনি। মসিগী খুত্থাংদা ঐখোয়গী চেলেঞ্জশিংগী গ্লোবেল সোলুসন অদু ঐখোয়না ফংবা ঙম্লগনি।

মরূপশিং, মসিগী কনফরেন্স অসিনা ভারতপুদি কান্নহল্লগনি, লোইননা মালেম পুম্বগী বিলদর, আর্কিতেক্ত, প্লানর্স অমদি গ্লোবেল সিভিল ইঞ্জিনীয়রিং ফর্মশিংবুসু মসিনা কান্নবা ফংহল্লগনি। ঐখোয়না অমনা অমদগী কয়া অমা তম্বা ফংলগনি।
মরূপশিং, অনৌবা ভারতকী অনৌবা বিজিনেস এনভাইরনমেন্তদা, অদোমগী সেক্তরদা চাউনা ওইথোকপা য়াবা লৈরি। লৈবাক অসিদা নিও মিদল ক্লাস খোংজেল য়াংনা শন্দোরক্লি। য়ুমগী দিমান্দ অঙকপা ফংনা হেঙ্গৎলক্লিবা মালেমগী অখন্নবা লৈবাকশিংগী মনুংদা ভারত অমা ওইরি।

দিমান্দ অসি মপুং ফাহনবা ঙম্নবা কন্সত্রক্সন্দা অনৌবা তেক্নোলোজী য়ারিবা মখৈ শিজিন্নবা ঙম্নবগীদমক ঐহাক্না ২০১৯গী এপ্রীলদগী হৌরগা ২০২০গী মার্চ ফাওবগী চহী অসিবু কন্সত্রক্সন তেক্নোলোজী চহী হায়নসু লাওথোকচরি।

মরূপশিং, মফম অসিদা ঙসি ঐহাক্না এতলাস অমা ফোংবগী খুদোংচাবসু ফংজখি। মতমগী মতুং ইন্না করম্না অহোংবা পুরকপগে হায়বদু অদোম্না খঙলুবদা অঙকপা ফাওগনি, ঐখোয়গী লৈবাক অসিদা দিজাস্তরগা মরি লৈনবা হিরম খুদিংমক এগ্রীকলচর দিপার্তমেন্তা চত্থরম্মি। অমদি চহী কয়া অমা মদু এগ্রীকলচর দিপার্তমেন্তকী শরুক ওইরম্মি, মরমদি ঐখোয়গী লৈবাক অসিদা দিজাস্তর হায়রগদি ইচাউ অমদি ইকংনা লোইরম্মি, মদুনা মরম ওইরগা এগ্রীকলচল সেক্তরগী মীওইনা মসিবু হেন্দল তৌরম্মি। ২০০১দা গুজরাত্তা য়ুহা হাখিবা অদুগী মতুংদা মসিদি য়াম্না চাউবা শিংনবা অমনি হায়বা খঙখি। মদুগী মতুং মদুদগী লৌথোক্তুনা হোম মিনিস্ত্রীদা পীখি। চাউনা মফম হোংদোকখিবগী খুদম অমা অতলজীগী সরকারগী মতমদা পাংথোকখি। ২০০১দা গুজরাত্তা য়ুহা হাখিবা অদুগী মতুং থৌদোক থোকখ্রবা মতুং করিগুম্বা খরা তৌবগী মাংওইননা লৈবাক অসিনা মদুগীদমক থৌরাং তৌদুনা লৈগদবনি হায়বা খঙবা ঙমখি। কন্সত্রক্সনগা মরি লৈনবা কনাগুম্বা অমা হেক্তনা বিলদিং শাবা খক্তা নত্তনা পাইপলাইন তিংলিবশিংনা, গ্যাসকী পাইপলাইন তিংবসু এতলাস অসিদা মীৎয়েং থম্দুনা ইশাগী প্রোজেক্ত অদু পায়খৎপীয়ু। অদোম অদোমগী কম্পেনীদা এতলাস অসিদা নুমীৎ নিনী-নিনীগী ৱার্কসোপ পাংথোকপীয়ু।

অমুক হন্না ঐহাক্না ময়াম পুম্নমকপু কনফরেন্স অসিগীদমক হন্না-হন্না য়াইফ পাওজেল পীজরি।

হন্না-হন্না থাগৎচরি।