ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি গুজরাতকী কেবারিয়াদা পাংথোকপা ‘নমামি নর্মদা’ কুমহৈদা শরুক য়াখ্রে। কুমহৈ অসি গুজরাত সরকারনা দাম অসিগী ফুল রিজার্বর থাক মীতর ১৩৮.৬৮ অদু য়ৌবা ঙমখিবগীদমক পাংথোকপনি। ২০১৭দা দামগী অৱাংবা হেঙ্গৎখিবা মতুংদগী অহানবা ওইনা ঈশিংগী থাক অসি মসিগী খ্বাইদগী ৱাংবা মতোল অদু সেপ্তেম্বর ১৬কী নুমিদাং ৱাইরম য়ৌবা ঙমখি। প্রধান মন্ত্রীনা গুজরাতকী লাইফ লাইন ওইরিবা নর্মদা তুরেলগী ঈশিংবু তরাম্না ওক্নবা দাম সাইত্তা পুজাসু পাংথোকখি।

তুংদা প্রধান মন্ত্রীনা কেবরিয়াদা লৈরিবা খলবানি ইকো-তুরিজম সাইত অমসুং কেক্তস গার্দেন্দা চৎখি। কেবরিয়াগী বত্তরফ্লাই গার্দেন্দা প্রধান মন্ত্রীনা পার্ক মনুংদা কুরাক্না থল্লবা অচৌবা বাস্কেৎ অমা রিলিজ তৌখি। মহাক্না স্তেচু ওফ য়ুনিতীগা থংননবা লৈরিবা এক্তা নর্সরিদসু চৎখি। তুংদা প্রধান মন্ত্রীনা স্তেচু ওফ য়ুনিতী নাকলদা পাংথোকপা মীয়ামগী মীফম অমদা ৱা ঙাংখি।

প্রধান মন্ত্রীনা হায়খি, “সরদার সরোবর দামগী ঈশিং ইমায় মীতর ১৩৮গী মথক্তা লৈবা উবদা ঐহাক অপেনবা ফাওই। সরদার সরোবর দাম অসি গুজরাত মীয়ামগী আশাগী মৈরিনি। মসি থবক কন্না শুরিবা লৌমী লাখ কয়ানা খোইদাজবা অমনি।”

স্তেচু ওফ য়ুনিতীদা লমকোয়বা লাকপগী চাং অদু স্তেচু ওফ লিবর্তীগা চাংদম্নরদুনা প্রধান মন্ত্রীনা হায়খি, মায়খুম হাংদোকখিবা থা ১১গী মনুংদা, হৌজিক ফাওবদা লমকোয়বা লাখ ২৩ হেনবনা লৈবাক্কী মনুং মপান্দগী ঐখোয়গী সরদার পতেলগী স্তেচু ওফ য়ুনিতী অসি য়েংবা লাকখ্রে। নুমীৎ খুদিংগী চাংচৎ অমদা লমকোয়বা লিশিং নিপাল চামঙানা মফম অসিদা লাক্লি। হৌখিবা থাদা পাংথোকখিবা জম্নাস্তমি নুমীৎতা লমকোয়বা লিশিং ৩৪ হেন্না লাক্তুনা রেকোর্দ থমখি হায়না ইফমদা খংহনবিরে। চহী ১৩৩ শুরবা অমেরিকাগী স্তেচু ওফ লিবর্তী য়েংনবগীদমক নুমীৎ খুদিংগী চাংচৎতা লমকোয়বা লিশিং ১০ লাক্লি অদুবু থা ১১ খক্তমক ঙাইরিবা স্তেচু ওফ য়ুনিতীবু য়েংনবগীদমক নুমীৎ খুদিংগী চাংচৎতা লমকোয়বা লিশিং নিপাল চামঙা লাক্লিবা অসি মশানা অঙকপা অমনি।”

স্তেচু ওফ য়ুনিতী অসি লৈবাক অসিগী অহানবা গৃহ মন্ত্রীগী মপোক কুমওন নিংশিংনবগীদমক ২০১৮গী ওক্তোবর ৩১দা মীয়ামগীদমক হাংদোকখি।

প্রধান মন্ত্রীনা সরদার পতেলগী মীৎয়েং অদু ফোংদোক্লদুনা মমাং থাদা জম্মু অমসুং কশ্মীরদা সরকারনা লৌখিবা ৱারেপ অদু ভারতকী হান্নগী গৃহ মন্ত্রী সরদার পতেলদগী ইন্সপিরেসন অমনি অমসুং চহী তরাগী খুজিং কয়া লীরবা সমস্যাগী ৱারোইশিন পুরক্নবা হোৎনবা অমনি হায়না মখা তাখি। প্রধান মন্ত্রীনা হায়খি মদুদি, জম্মু-কশ্মীরগী লদাখ অমসুং কারগিলগী মরূপ লাখ কয়াগী ইচং থৌবা তেংবাংনা চাওখৎ থৌরাং অমসুং থাজবগী অনৌবা ইচেল অমা পুরকপদা ঐখোয় মায় পাকপা ঙমগনি হায়না থাজবা থম্লি।

“ভারতকী য়ুনিতী অমসুং ভারতকী মকোক থোংনবগীদমক অদোমগী সেবক অসিনা মপুং ফানা হোৎনরি। হৌখিবা নুমীৎ চামনিগী মনুংদা অচৌবা ৱারেপ কয়া অমা অমগী মতুংদা অমা লৌখ্রে অমদি অনৌবা সরকার অসিনা হান্নদগী হেন্না খোংজেল য়াংনা থবক তৌদুনা মমাংদা ফংখিবা অদুদগী হেন্না চাওবা পান্দম ফংলগনি। ”

*******