ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি পাকিস্তানগী প্রধান মন্ত্রী শ্রী ইমরান খান, মালদীবকী হান্নগী রাস্ত্রপতী শ্রী মোহম্মদ নশিদ অমসুং নেপালগী হান্নগী প্রধান মন্ত্রী মাধব নেপালগী মফমদগী তেলিফোনগী থোংদা হন্দক্তা পাংথোকখিবা মীখলদা মায় পাক্লকপদা নুংঙাইবা ফোংদোকপগী পাওজেলশিং ফংখি।

প্রধান মন্ত্রীনা পকিস্তানগী প্রধান মন্ত্রীবু তেলিফোন তৌরকপগী অমদি নুংঙাইবা ফোংদোরকপগীদমক থাগৎপা ফোংদোকখি। মহাক্কী সরকারগী য়ুমলোন্নবগী অহানবা পোলিসীগী পরিংদা মহাক্কী অনৌবা খোংথাংশিং নৌহৌনা নীংশিংলদুনা প্রধান মন্ত্রী মোদীনা পকিস্তানগী প্রধান মন্ত্রীবু অমত্তা ওইনা চৎমিন্নদুনা লাইরবা মুথৎনবা মমাংদা পুখৎখিবা মহাক্কী ৱাফম অদু থমখি। ঐখোয়গী লমদম অসিদা শান্তি, খোংজেল অমসুং চাউখৎপা পুরক্নবগীদমক তেংবাং পীনবা হেঙ্গৎহন্দুনা হিংশা অমসুং তেরোরিজম লৈতবা এনভাইরনমেন্ত অমা শেমগৎনবা মহাক্না অকনবা ৱাফম থমখি।

হান্নগী রাস্ত্রপতি শ্রী নশিদনা প্রধান মন্ত্রীবু মহাক্কী পুৱারী ওইনা মায় পাক্লকপদা নুংঙাইবা ফোংদোকখি অমদি হৌখিবা মতম খরা অসিদা ভারত অমসুং মালদীবকী মরক্তা লৈনরিবা মরী হেন্না চেৎশিল্লে হায়না ফোংদোকখি। লমদম অসিদা এক্সত্রিমীজকী থৌওং অমসুং রেদিকেলাইজেসনগী ফোর্স অসি থেংননবা অচেৎপা তেংবাং পীনবগী মরুওইবা অদুদা মহাক্না অকনবা ৱাফম থমখি। প্রধান মন্ত্রীনা মফমদা নুংঙাইবা ফোংদোরকপগীদমক থাগৎপা ফোংদোকখি অমদি লমদম অসিদা শান্তি, ঙাকশেল অমসুং চাউখৎ থৌরাংগীদমক লৈবাক অনিগী মরক্তা অচেৎপা, লৈবাক অনিগী কান্নগদবা অমদি হিরম খুদিংদা পুন্না থবক তৌমিন্নবা হেঙ্গৎনবা মহাক্কী ৱাফম অদু অমুক হন্না ফোংদোকখি।

শ্রী মাধব নেপালনা প্রধান মন্ত্রীবু মহাক্কী পার্তী অমসুং এলাইন্সপু লুচিংদুনা পুৱারী ওইনা চাউনা মায় পাক্লপদা নুংঙাইবা ফোংদোকখি। ভারতনা মাংজীল থাবা মালেমগী শক্তি অমগুম শাফোংলকপনা রিজন পুম্বদা চাউখৎপা পুরক্লগনি হায়না মহাক্না থাজবা থমখি। শ্রী নেপালবু মহাক্কী নুংঙাইবা ফোংদোকপা অদুগীদমক থাগৎপা ফোংদোক্লদুনা প্রধান মন্ত্রীনা ভারত অমসুং নেপালগী মরক্তা পুৱারী ওইরবা মরূপ ওইবগী অচেৎপা মরী হেন্না চেৎশিলহনবগী অপাম্বা ফোংদোকখি।