ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি নই দিল্লীদগী ভিদিও কনফরেন্সকী খুত্থাংদা নাগপুর মেত্রো লমথাখ্রে। নাগপুর মেত্রোগী কিলোমীতর ১৩.৫ শাংবা খাপ্রি-সিতাবুল্দী সেক্সন অসি দিজিতেলগী থোংদা প্লেক মায়খুম হাংদোকখি।

ভিদিও কনফরেন্সকী থোংদা মীয়াম তিনখিবা অদুদা ৱা ঙাংলদুনা প্রধান মন্ত্রীনা মহারাস্ত্রদা অনিশুবা মেত্রো সর্বিস অসিগীদমক নাগপুরগী মীয়াম্বু থাগৎপা ফোংদোকখি। মসি মহাক্কীদমক অখন্নবা মীকুপ অমনি হায়না মহাক্না হায়খি মরমদি ২০১৪দা নাগপুর মেত্রোগীদমক মহাক্না উরেপ-উয়ুং তমখি। মেত্রো অসিনা নাগপুরদা লৈরিবা মীয়ামদা হেন্না ফবা, মমল হোঙবা অমসুং এনভাইরনমেন্ত ফ্রেন্দলী ওইবা ত্রান্সপোর্তেসনগী মওং-মতৌ অমা ফংহল্লগনি হায়না প্রধান মন্ত্রীনা মখা তাখি।

কেন্দ্র সরকার অমসুং রাজ্য সরকারনা তুংদা দরকার ওইরক্কদবশিং অদু ৱাখল্লোনদা থমদুনা নাগপুরগী দিবেলপমেন্তকীদমক লেপ্পা লৈতনা থবক তৌরি হায়না প্রধান মন্ত্রীনা হায়খি। নাগপুর মেত্রো অসিনা নহাশিংগীদমক থবক ফংহন্নবগী খুদোংচাবশিং পীরগনি অমদি শহর অসি মখা তানা চাউথোকহনবদসু মতেং ওইরগনি হায়না মহাক্না মখা তাখি।

লৈবাক্কী মফম কয়াদা মোদর্ন ত্রান্সপোর্ত সিস্তেম শেমগৎপদা কেন্দ্র সরকারগী ইনিসিয়েতিবশিং শমলপ্না পল্লদুনা প্রধান মন্ত্রীনা হায়খি মদুদি হৌখিবা চহী মরি মখাই অসিদা মেত্রোগী ওপরেস্নেল নেৎৱার্ক কিলোমীতর ৪০০ শেমগৎখ্রে। লৈবাক্কী মফম কয়াদা কিলোমীতর ৮০০গী মেত্রো নেৎৱাক্তা থবক চত্থরি হায়না মহাক্না মখা তাখি।

প্রধান মন্ত্রীনা হন্দক্তা হৌদোকখিবা কমন মোবিলিতী কার্দ, ৱান নেসন-ৱান কার্দকী কান্নবশিংগী মতাংদা পনখি। মালেম অসিদা লৈবাক খরা খক্তনা ত্রান্সপোর্তেসনগীদমক অসিগুম্বা কমন মোবিলিতী কার্দ অমা লৈরি হায়না প্রধান মন্ত্রীনা মখা তাখি।