ভারতকী প্রধানমন্ত্রী

ঙসি প্রধান মন্ত্রী শ্রী নরেন্দ্র মোদীনা ভিদিও কনফরেন্সকী খুৎথাংদা লৈবাক্কী মীয়ামদা ৱা ঙাংখ্রে। মহাক্না ৱা ঙাংবদা, প্রধান মন্ত্রীনা হায়খি মদুদি নুমিৎ খরনি অসিদা ভারতকী মপাঙ্গল অমসুং খাংবা কনবা লৈবাক অসিনা উবা ফংলে। ভারতকী মীয়ামগি মহুৎ শীন্দুনা মাইথিবা পীবা ঙমদ্রবা লৈবাক অসিগী আর্মদ ফোর্সশিং, ইন্তিলিজেন্স এজেন্সিশিং অমসুং সাইন্তিস্তশিং থাগৎপা ফোঙদোকচরি। ওপরেসন সিন্দুরগী পান্দমশিং ফংনবা ভারতকী থৌনা ফরবা লান্মীশিংনা অঙকপা থৌনা উৎখি, মখোয়গী থৌনা অদু থাগৎপা ফোঙদোকচরি। লাম্বা লৈতবা থৌনা অসি লৈবাক অসিগী ইমা, ইচল অমসুং ইচানুপী খুদিংমক্ত কৎথোকচরি।

এপ্রিল ২২ দা পেহেলগামদা তেরোরিস্তশিংনা তমথিনা লান্দারকখিবা অদু য়ানিংদবা ফোঙদোক্লদুনা, প্রধান মন্ত্রীনা হায়খি মদুদি থৌদোক আসিনা লৈবাক অসি অমসুং মালেম অনিমক থম্মোয় কায়হল্লে। মীচমশিং মখোয়গী ইমুং-মনুং অমসুং অঙাংশিংগী মমাঙদা মখোয়গী লাইনিং হংলবা মতুংদা মখোয়গী লম কোয়বা লাকপদা তমথিনা হাৎখিবা অসি তেরর মশক তাকখিবা থৌওং অমনি। মসি তমথিরবা থবক অমা ওইবা খক নত্তনা লৈবাক অসিদা নুংশিন্না হিংমিন্নরিবা অসি থুগায়নবা হোৎনবা থবক অমনি। তেরোরিজমগী মায়োক্ত লৈবাক শীনবা থুংনা, মীওই খুদিংমক, কাংলুপ খুদিংমক, খুন্নাইগী ফুরুপ খুদিংমক অমসুং রাজনিতি দল খুদিংমক লৈখি, তেরোরিজমগী মথক্ত অকনবা থবক লৌখৎনবা অমতা ওইনা লাউখি। তেরোরিস্তশিং হাৎনবা সরকারনা আর্মদ ফোর্সশিং নিংতম্বা মপুংফানা পীরে। লৈবাক অসিগী নুপীশিংগী ইকায়খুম্নবা মাঙহন্নবা হোৎনখিবগী ফলশিং হোজিক মখোয়না মপুংফানা ফংলে।

প্রধান মন্ত্রীনা হায়খি ওপরেসন সিন্দুর শুপ্নগী মমিং অমা খক নত্তে, মসি ভারতমচা মিল্লিয়ন কয়াগী পুক্নিংগী ইহুলশিংগী মমি অমনি। মে ৬-৭ দা মালেম্না উখিবা ওপরেসন সিন্দুর অসি অচুম্বা ৱায়েন ফংনবা অচেৎপা ৱাশক অমনি। ভারতকী আর্মদ ফোর্সশিংনা পাকিস্তান্দা লৈরিবা তেরোরিস্তশিংগী লোৎফমশিং অমসুং ত্রেনিং সেন্তরশিংদা লান্দাখি, অকনবা শাফু অমা পীখি। ভারতনা অসিগুম্বা অকনবা থবক অমা লৌখৎলক্কনি হায়বা তেরোরিস্তশিংনা কৈদৌঙৈদা খনখিদে, অদুবু লৈবাক্কী থবক্না হান্নবা হায়বা পান্দম অসিনা লৈবাক অসি লমজিংদুনা লৈবাক অসিনা অমতা ওইনা লেপ্পা মতমদা, অচেৎপা ৱারেপশিং লৌখি অমসুং অকনবা শাফুশিং পীখি। ভারতকী মিসাইলশিং অমসুং দ্রোনশিংনা পাকিস্তান্দা লৈবা তেরোরিস্তশিংগী মফমশিং মাঙহনবা খক নত্তনা মখোয়গী মোরেলশু মাংহনখি। বাহাৱালপুর অমসুং মরুদকে অসি মালেমগী তেরোরিজমগী সেন্তরশিং ওইনা থবক তৌরিবনি, মফমশিং অসিগা য়ু.এস গী ৯/১১ থৌদোক, লন্দন তুবদা বোম্ব পোকখায়হনখিবা অমসুং ভারত্ত চহি কয়া তেরোরিস্তশিংগী থৌদোকশিংগা শম্নরি। ভারতকী নুপীশিংগী ইকায়খুম্নবা মাঙহন্নবা তেরোরিস্তশিংনা হোৎনরকপদগী, ভারতনা তেররগী হেদক্বার্তরশিং মাঙহল্লে। চহি কয়া ভারতকী মায়োক্ত থবক তৌরকখিবা মশক নাইবা মীওইশিং য়াওনা তমথিরবা তেরোরিস্ত ১০০ হেন্না ওপরেসন অসিদা হাৎখ্রে। ভারতকী মায়োক্ত শিংনরকপা মীওইশিং অথুবা মতমদা হাৎখ্রে।

প্রধান মন্ত্রী মোদীনা হায়খি মদুদি ভারতনা খুৎ চুম্না অমসুং য়াম্না কন্না লান্দাখিবশিং অদুদা পাকিস্তান য়াম্না শাওখি, লৈবাক অসি নিংবা কাইখি। মসিদগী পাকিস্তান্না মালেম্না তেরোরিজমগী থেংনরিবা অসি শরুক য়াবগী মহুত্ত- লৈবাক অসিনা ভারতকী স্কুলশিং, কলেজশিং, গুরুদ্বাৱারশিং, লাইশঙশিং অমসুং মীচমশিংগী য়ুমশিং অমসুং মিলিতরি বেজশিংদা খুৎ থারকখি। মসিগী থবকশিং অসিনা পাকিস্তান অসি কয়া য়াম্না খুদোংথিনিঙাই ওইবগে হায়বা খঙলে, ভারতনা অফবা এয়র দিফেন্স সিস্তেমশিংগী মমাঙদা লৈবাক অসিগী দ্রোনশিং অমসুং মিসাইলশিং চরুগুম নিংখায়খি, মখোয় অতিয়াদা মাঙহনখি। পাকিস্তান্না ভারতকী ঙমখৈশিংদা লান্দানবা হোৎনরিঙৈদা, ভারতনা পাকিস্তানগী ময়াইদা অকনবা শাফু অমা পীখি। ভারতকী দ্রোনশিং অমসুং মিসাইলশিংনা খুৎ য়াম্না চুম্না কাপশিনখি, মতম কয়াগী মমাঙদগী মখোয়না চাউথোকচরিবা পাকিস্তানগী এয়রবেজশিং মাঙহনখি। ভারতনা লান্দাবা হৌখিবা অহানবা নুমিৎ হুমনিদা, লৈবাক অসিনা থাজবগী ৱাংমদা পাকিস্তান অমাং-অতা থেংনখি। ভারতনা য়াম্না কন্না লান্দারকপদগী, পাকিস্তান্না লাল লেপ্নবা লম্বীশিং থিরকখি, লাল ফাদনবা মালেমগী লৈবাকশিংদা হায়জখি। অমাং-অতা য়াম্না থোক্লবা মতুংদা, মে ১০ গী মতুংদা পাকিস্তানগী মিলিতরিনা ভারতকী দি.জি.এম.ওদা পাউ ফাওরকখি। মতম অদুদা, ভারতনা মাঙজৌননা য়াম্লবা তেরোরিস্ত ইনফ্রাস্ত্রকচরশিং মাঙহনখ্রে, মরুওইবা মিলিতেন্তশিং হাৎখ্রে অমসুং পাকিস্তানগী তেরর হবশিং উৎ ওনহনখ্রে। লৈবাক অসিনা তেরোরিস্তকী থবকশিং অমসুং ভারতকী মায়োক্ত মিলিতরিগী থবকশিং লেপকনি হায়না পাকিস্তান্না থাজবা পীখি। ৱারোল অসিদগী, ভারতনা ফিবম অসি হন্না য়েংশিনখি অমসুং পাকিস্তানগী তেরোরিস্তশিং অমসুং মিলিতরি ইন্সতোলেসনশিংগী মথক্ত লৈবাক অসিনা লান্দাবা মতম খর লেপ্নবা ৱারেপ লৌরে। লেপ্লিবা অসিনা ৱারোইশিন পুরকপা নত্তে- লাক্লিবা নুমিৎ খরনি অসিদা ভারতনা মখা তানা পাকিস্তানগী খোঙথাং খুদিংমক য়েংশিনগনি, লৈবাক অসিগী তুংগী থবকশিংগা লৈবাক অসিনা পীখিবা থাজবশিংগা চানবরা হায়বা য়েংগনি।

প্রধান মন্ত্রীনা হায়খি মদুদি ভারতকী আর্মদ ফোর্সশিং- লান্মী, নেভি, এয়র ফোর্স, বি.এস.এফ অমসুং পেরামিলিতরি ফোর্সশিং মিকুপ নাহুম শিংনা লৈরি, মতম পুম্নমক্ত লৈবাক অসি ঙাক-শেল্লি। ওপরেসন  সিন্দুর অসি তেরোরিজম থেংন্নবা হৌজিক ভারতকী লেংদ্রবা থৌশিল ওইরে, ভারতকী লাল্লোংদা অহোংবা অমা লাক্লে। ওপরেসন অসিনা অনৌবা থাক অমা শেম্লে, তেরোরিজম থেংন্নবা অনৌবা চৎনবী অমা ওইরে। ভারতকী সেকুরিতিগী মরুওইবা ৱারেপ অহুমদি; অহানবদা, তেরোরিস্ত অমনা ভারত্ত খুৎ থারকপদা ভারতনা অকনবা মওংদা খুৎ হনগনি। ভারতনা তেরর হবশিংদা লান্দাগনি। অনিশুবদা ন্যুক্লিয়ার ব্লেকমেল খাংদুনা লৈথোক্লোই; ন্যুক্লিয়ারগী কিহল্লকপদা ভারতনা মাই লৈদুনা চেল্লোই। কিহন্দুনা তেরোরিস্তশিংনা থবক তৌরকপদা য়াম্না কন্না লান্দাগনি। অহুমশুবদা, তেরর য়োকখৎলিবশিং অমসুং তেরোরিস্তশিংগী মরক্ত খেন্নবা অমতা লৈতে; ভারতনা মখা তানা তেরোরিস্তশিং অমসুং মখোয় চঙজফম পীরিবা সরকারশিং তোঙান তোঙান্না উরোই। ওপরেসন সিন্দুর মনুংদা, মালেম্না পাকিস্তানগী ফত্তবা শক্তম অদু অমুক হন্না উরে- তেরোরিস্তশিংগী অরোইবা মথৌ-মঙম পাংথোকপদা পাকিস্তানগী মিলিতরি ওফিসিএলশিং ফোঙনা শরুক য়াখি, লৈঙাক্না শৌগৎপা তেরোরিজমগী থবকশিংদা পাকিস্তান শরুক য়াই হায়বা খুদম ফংলে। শিংনরকপা খুদিংমক্তগী লৈবাক অসিগী মীয়াম ঙাকথোক্নবা ভারতনা মখা তানা অকনবা থবকশিং পায়খৎকনি।

প্রধান মন্ত্রীনা হায়খি মদুদি লালফমদা ভারতনা পাকিস্তান মপুংফানা মাইথিবা পীরে অমসুং লৈবাক অসিগী লান্মীগী শক্তিদা ওপরেসন সিন্দুরনা অনৌবা মাইওন অমা পীরে। লৈকংলা অমসুং চীংগী লাল্লোং অনিমক্ত ভারত শিংথাবা য়ানা থবক পায়খৎলে অমসুং অনৌবা যুগকী লালদা মাঙজিল থাবা ঙম্লে। ওপরেসন অসিগী মনুংদা, ভারত্ত শাবা ঙাক-শেনগী খুৎলায়শিং ফজনা শীজিন্নবা য়ারে হায়বা ফজনা খঙবা ঙম্লে। ২১শুবা চহিচাগী লাল্লোংগী মাইথিবা পীবা ঙমদবা ফোর্স অমা ওইনা ভারতনা শাবা ঙাক-শেনগী খুৎলায়শিং থুংলবা হৌজিক মালেম্না উরে।

মখল খুদিংমক্কী তেরোরিজম থেংনবদা ভারতকী অপুনবা অসিনা খ্বাইদগী কনবা মপাঙ্গলনি। হৌজিক লালগী যুগ নত্তে, হৌজিক তেরোরিজমগী মতমশু নত্তে। তেরোরিজমগী মায়োক্ত খাংদুনা লৈথোক্তবা হায়সি হেন্না ফবা অমসুং অশোই-অঙাম লৈতবা মালেম অমগী গরেন্তিনি হায়না প্রধান মন্ত্রীনা লাউথোকখি।

প্রধান মন্ত্রীনা হায়খি পাকিস্তানগী মিলিতরি অমসুং সরকারনা লেপ্তনা তেরোরিজম শৌগৎতুনা লাক্লি, অসিগুম্বা থবকশিংনা পাকিস্তান মশা মরোমদোমগী মাঙজবা ওইরক্কনি। করিগুম্বা পাকিস্তান্না হিংবা পাম্লবদি, লৈবাক অসিনা মসিগী তেরর ইনফ্রাস্ত্রচরশিং মাঙহনগদবনি- মসি নত্তনা শান্তি পুরক্নবা লম্বী লৈতে। তেরর অমসুং ৱারি শানবা পুন্না পাংথোকপা য়ারোই, তেরর অমসুং ললোন-ইতিক পুন্না লৈমিন্নবা য়ারোই অমসুং ঈ অমসুং ঈশিং পুন্না চেনমিন্নবা য়ারোই। পাকিস্তানগা ৱারি শানবা তেরোরিজম খক্তদা মীৎয়েং থমগনি অমসুং পাকিস্তানগা ৱারি শানবা খুদিংমক পাকিস্তান-ওক্কুপাইদ কাস্মির (পি ও কে) দা য়ু্‌ম্ফম ওইগনি।

বুদ্ধ পুর্নিমা থৌরমদা ভগবান বুদ্ধগী পাউতাকশিং নিংশিংলদুনা, প্রধান মন্ত্রীনা হায়খি শান্তি পুরক্নবা লম্বী অদু থৌনানা লমজিংগদবনি। মীওইবা খুন্নাইনা শান্তি অমসুং নুংঙাই-য়াইফবা মাইকৈদা চঙশিনগদবনি, ভারতমচা খুদিংমক চিংলেম্না হিংগদবনি অমসুং বিকসিত ভারত অমগী মঙলান মঙফাওনহনগদনি। ভারতকীদমক শান্তি পুরক্কদবনি, লৈবাক অসি মপাঙ্গল কনহনগদবনি অমসুং দরকার ওইরকপা মতমদা, মপাঙ্গল শীজিন্নগদবনি। হন্দক্কী থৌদোকশিং অসিনা লৈবাক অসিগী অচুম্বা ফিদমশিং ঙাক্নবা ভারতকী ৱাশক অদু উৎলে। ভারতকী আর্মদ ফোর্সশিংগী থৌনা অমুক হন্না ইকায়খুম্নবা উৎচরি অমসুং ভারতকী মীয়ামগী থৌনা অমসুং অপুনবা ইকায়খুম্নবা উৎচরি।

****