ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি আই.আই.তি. চেন্নৈদা লোইশিনখিবা পুং ৩৬কী সিঙ্গাপুর ইন্দিয়া হেকাথোন্দা মাই পাক্লবশিংদা মনা য়েন্থোকখ্রে।

অসিগুম্বা মখলগী অনিশুবা হেকাথোন অসি সিঙ্গাপুর সরকার, ভারত সরকার, আই.আই.তি. চেন্নৈ অমসুং নানয়াং তেক্নিকেল য়ুনিভর্সিতী (এন.তি.য়ু.) সিঙ্গাপুরগী মতেংনা পাংথোকখিবনি।

কুমজা ২০১৮দা সিঙ্গাপুরগী এন.তি.য়ু.দা প্রধান মন্ত্রী শ্রী নরেন্দ্র মোদীনা পুথোকখিবা ৱাখল্লোন্দা য়ুম্ফম ওইরগা অহানবা হেকাথোন হৌদোকখি

প্রধান মন্ত্রীনা মহৈরোইশিং অমসুং একাদমিক ফেতর্নিতীদা ৱা ঙাংলদুনা হেকাথোন্দা মাই পাক্লবশিংদা নুংঙাইবা ফোংদোকখি।

প্রধান মন্ত্রীনা হায়, “মরূপশা, ঐনা হেকাথোনগী মাই পাক্লবশিংদা নুংঙাইবা ফোংদোকচরি। ঐনা মফম অসিদা পুল্লরিবা নহা ওইরিবা মরূপশিং, মরু ওইনা মহৈরোই মরূপশিংগী মফমদা নুংঙাইবা ফোংদোকচরি। শিংনবশিংগা মায়োক্নবা অমসুং থবক ওইনা পাইখৎপা য়াবা পাম্বৈশিং পুথোক্নবগী অদোমগী অপাম্বা, অদোমগী থৌনা অমসুং অদোমগী থৱাই য়াওবা অসি শুপ্নগী চাংদম্নবশিং মাই পাক্ননবা হোৎনবদগী হেন্না মগুন লৈ।”

প্রধান মন্ত্রীনা হায়খি মদুদি ভারত অসি মকোক থোংবা স্তার্তঅপ ফ্রেন্দলী ইকোসিস্তেম ৩গী মনুংদা অমা ওইরে। মহাক্না হায়খি মদুদি ভারতনা হৌখিবা চহি মঙাদা ইনোবেসন অমসুং ইনক্যুবেসন্দসু অদুক্কী মতিক শাফু পীখি।

প্রধান মন্ত্রীনা হায়খি, ‘অতল ইনোবেসন মিসন, পি.এম. রিসর্স ফেলোশিপ, স্তার্তঅপ ইন্দিয়া অভিয়ানগুম্বা থৌরমশিং অসি ২১শুবা চহি চাগী ভারতকী য়ুম্বীনি, মসিনা অসিগুম্বা ভারত অমদা ইনোবেসনগী মচৎ অমা পীরি। হৌজিক ঐখোয় ঐখোয়গী মহৈরোইশিংদা চহি নৌরিঙৈদগী তরুকশুবা ক্লাসতগী মেচিন লর্নিং, আর্তিফিসিএল ইন্তিলিজেন্স, ব্লোকচেন্নচিংবা অনৌবা তেক্নিকশিংগী মরমদা খঙহন্নবা হোৎনরি। স্কুলদগী হৌরগা অৱাংবা থাক্কী মহৈ-মশিংদা রিসর্স তৌবা য়াওনা ইনোবেসনগীদমক্তা পাম্বৈ অমা ওইননবা ইকোসিস্তেম অমা শেম্নবা হোৎনরি।’

ভারতকী মাংদা তারিবা সমস্যাশিং অসিগী অরাইবা পাম্বৈ পুথোক্নবগীদমক্তা মহৈরোইশিংদা ফোংদোক্লদুনা প্রধান মন্ত্রীনা হায়খি মদুদি ভারতনা মালেম পুম্বদা, মরু ওইনা লাইরবা লৈবাকশিংদা মসিগী পাম্বৈশিং অসি ফংহনবা পাম্মি।

প্রধান মন্ত্রীনা হায়, “ঐখোয়না মরম অনিদগী ইনোবেসন অমসুং ইনক্যুবেসন্দা ইনোৎ পীরি। অহানবা মরমদি ঐখোয়না ভারতকী সমস্যাশিং অসি লোইশিন্নবা অরাইবা পাম্বৈ পাম্মি। অনিশুবা মরমদি ঐখোয়না ভারত্তা লৈদুনা মালেম অপুনবগীদমক্তা পাম্বৈ পুথোকপা পাম্মি। ‘মালেম অপুনবগীদমক্তা ভারতকী পাম্বৈ’ – মসি ঐখোয়গী পান্দম অমদি কমিৎমেন্তনি। ঐখোয়না খ্বাইদগী লাইরবা লৈবাকশিংদসু কান্নবা পীগদবা অসিগুম্বা অহোংবা পামবৈশিংসু পুথোকপা পাম্মি। ভারতকী অসিগুম্বা ইনোবেসনগী পাম্বৈ অসি লৈনীংবা লৈবাক অমা হেক্তদা লৈজরবসু অদুগুম্বা খ্বাইদগী লাইরবা অমসুং খ্বাইদগী শোৎথহৌরবশিংগীদমক্তসু ওইহনগদবনি।”

প্রধান মন্ত্রীনা ‘আই.আই.তি. – এম.’গী দাইমন্দ জুবলী অমসুং কনভোকেসনগী থৌরমদসু শরুক য়াগনি।