ভারতকী প্রধানমন্ত্রী

নেচর ক্যোর সেন্তর হাংদোক্নবা ন্যু য়োর্কতা পুল্লরিবশিং, থৌরম অসিবু ওনলাইন অমসুং তেলিবিজন্দা য়েংবীরিবশিংবু খুরুমজরি। মালেমগী য়োগ নুমিৎ অসিদা ইবেম্মশিং অমসুং ইবুংঙোশিংদা য়াইফ-পাউজেল পীজরি।

ঙসি অয়ুক ঐহাক্না হিমালয়গী চীংখোঙদা লৈবা ফজরবা দেহরাদুন শহরদা থৌরম অসি শরুক য়ানবা শিনফম কয়াগী মীওইশিংগা পুনবা অসিদা ঐ হরাওবা ফাওজৈ। হৌখিবা নুমিৎ খরনি অসিদা, মালেমগী মীয়াম্না থৌরম অসি শরুক য়াবগী ফোতোশিং ঐনা য়েংলি। শুপ্নগী চহী অহুমগী মনুংদা মসিগী থৌরম অসি মালেমগী খ্বাইদগী চাউবা ইহৌ অমা ওইরে। মসি লৈবাক কয়াদা মীয়ামগী পুন্সিগী শরুক অমা ওইরে। মসিগী নুমিৎ থৌরম পাংথোকপদগী হেন্না মসিনা কান্নবা পীরে। ভারত্তা মালেমগী য়োগগী নুমিৎ পাংথোকপগী পান্দম অহুম ঐনা পুথোক্লে। মসি অতোপ্পা লৈবাকশিংদসু পাংথোকলমগনি হায়না ঐনা খল্লি।

অহানবা, মসি মীওই মিলিয়ন কয়া মিকপ থোকহন্নবা থৌরম অমা ওইরে। য়োগনা ইথিল পীদুনা মখোয় মশামক মসিগী কান্নবা ফংলে।

অনিশুবদা, মসি মমাংদা য়োগ মশক খঙখ্রবশিংনা মখোয় মশামক অমুক হন্না কৎথোক্নবগী থৌরম অমা ওইরে।
অহুমশুবা পান্দম অসি, অফবা ৱাপাউ শন্দোকপা অসিনি। লনাই মীওই অমসুং ইন্সতিতুসন লিশিং কয়া য়োগদগী কান্নবা ফংখ্রে অমসুং ফংদ্রিবশিং হৌজিক ফংবা হৌরক্লি। মালেমগী মফম কয়াদা মালেমগী য়োগগী নুমিৎ অসি কুম্মৈ অমাগুম থৌরম পাংথোক্লে। য়োগ হায়বা ৱাহৈ অসিগী অর্থদি পুনশিনবা হায়বনি। মরম অদুনা য়োগদা থৱায় য়াওনরকপা অসি ঐঙোন্দা থাজবা অমা পোকহল্লি। য়োগ অসি মালেমগী পুনশিন্নবগী শক্তি অমা ওইরক্কনি হায়না ঐনা খল্লি।

মসিগী নেচর ক্যোর সেন্তর অসি শঙ্গানবা অদোম্না মালেমগী য়োগগী নুমিৎ খল্লকপা অসি ঐ হরাওবা পোকই। সেন্তর অসিগী থবক থৌরমশিংদা য়োগগী মচাকশিং য়াওহনগনি হায়বগী থাজবা ঐনা থম্লি।

মরূপশিং,

ভারতকী মমাংঙৈদগী লৈরক্লবা কাংলোনশিং হায়বদি য়োগ অমসুং অয়ুরবেদনা ঐখোয় হকচাং ফনা লৈবদা মতেং পাংলি। হকচাং অমসুং ৱাখলগী অশোনবশিং থেংনবদা মখোয়না মতেং পাংলি। মখোয়না লনাই মীওই অমবু চেকশিন্না অমসুং ইকায়খুম্ননা লায়েংই। মখোয়গী থৌওং অসি তহা তহাদে। মহৌশাদগী লৈরক্লবা লায়েংশিং চৎথবশিংদা মসিনা অনৌবা অহোংবা অমা পুরকই। ময়ামগী চৎনরিবা লায়েং মখল অসিদা, লাইবক থিবদি নাদ্রিঙৈদা ঙাকথোক্নবা হোৎনবগী মহুৎতা নারগা লায়েংবনা হেন্না চৎনরি। ঙসি থেংনরিবা হকশেলগী অৱাবশিং অসি কোকহন্নবা চৎনরিবা লায়েং মখলশিং অসি ঐখোয়না দরকার ওই। অদুবু মসিনা লাইনা খুদিংমক ফহনবা ঙমদে। য়োগ অমসুং অয়ুরবেদনা হৌজিক চৎনরিবা লায়েং অসিদা মতেং পাংলি হায়বা মালেমগী হকশেলগী অখঙ-অহৈশিংনা য়ানরে। লায়েং মখল অসিনা হকচাং ফনা থম্নবা অমসুং লাইনা ঙাকথোকপদা শীজিন্নরি। মসিগুম্বা শাজেল অসি শান্নবনা লনাই মীওইশিং অমসুং খুন্নাইগী ওইনা হকচাং ফহল্লি। মীওই খরনা খল্লিবা অদুগী ওন্ন-তৈনবদা, য়োগ অসি চুম্নগী শাজেল অমসুং ফিরেপ খরা অদু খক নত্তে । মসি ৱাখল, পুক্নীং অমসুং হকচাংদা কুপ্না থিজিনবা অমা চংই। মসিনা মশানা মশাবু খঙজবদা মতেং পাংলি। মসিনা খুন্নাইগী থকশি-খাসি শেমগৎলি অমসুং পুন্সিগী অফবা মগুনশিং শেমগৎলি। য়োগ অসি অরান খুভম ফংনবা নৎত্রগা অৱা-অনাদগী ঙাকথোক্নবা লম্বী তাকপীবা অরুবা ফিলোসোফী অমনি।

মরূপশিং,

ঐনা মতম চুপ্পদা থাজৈ মদুদি য়োগগী ধর্ম লৈতে। মশামক ধর্মদা থাজদবশিংনা কান্নবা ফংলবা শাজেলশিং মসিদা য়াওরি। অনৌবা মতমগী য়োগ অসিদা থায়নগী লৌশিং কয়া য়াওরি। মসিদা লমচৎ-শাজৎ, অচুম্বা ৱাখল্লোনশিং, হকচাং ফনা লৈনবা ফিরেপশিং, মন্ত্র শোনবা, গুরু অমগী পাউতাকশিং, মেদিতেসন তৌদুনা শ্বর তপ্না হোনবা অমসুং ৱাখল ফাথবা য়াওরি। য়োগনা মীওই অমগী পুন্সি মহিং হোংহল্লি, মরম অদুনা পুন্সি মহিংগা মরি লৈনবা লাইনশিং ঙাকথোকপা ঙমহল্লি। য়োগগী অখঙ-অহৈশিংগী মতুংইন্না, নুমিৎ খুদিংগী য়োগ শান্নবনা হকচাং ফহল্লি, ৱাখল নুংঙাইহল্লি অমসুং হিংবা নুংঙাইহল্লি। অকক্নবা য়োগগী শাজেল অমসুং প্রনায়ম খরনা লাইনা কয়া লাকশিনবা ঙম্মি হায়না চহি কয়াগী মমাংদগী ভারত্তা থাজনদুনা লাক্লি। মসি প্রমান তৌনবা হৌজিক মতম অসিগী সাইন্সনা খোঙ থাংজিনবা হৌরক্লে। থমোই, থোপ অমসুং ইন্দ্রোক্রাইন কয়াৎশিং য়াওনা হকচাংগী কয়াৎ কয়া মখোয়গী মথৌশিং অদু য়োগগী শাজেলশিংনা লাকশিনবা ঙম্মি হায়না সাইন্সনা উৎলে।

ঙসিদি, নোংচুপলোমগী লৈবাকশিংদা য়োগ পাম্নবা হেনগৎলক্লে। নোংচুপলোমগী লৈবাকশিংনা য়োগ অসি য়ারে হায়বসি হেনজিন্না হায়বা ওইরোই। ঐনা হায়রি মদুদি, য়ু এস এ মথন্তদা মীওই মিলিয়ন ২০ হেন্না য়োগ শানরি অমসুং চহী খুদিংগী ওইনা শান্নবা মীশিং চাদা ৫গী চাংদা হেনগৎলি। য়ু এস এ অমসুং য়ুরোপকী অনৌবা মেদিকেল ইন্সতিতুৎ কয়া লাইনা কয়া লায়েংনবা অতোপ্পা পাম্বৈ অমা ওইনা য়োগ শীজিন্নরি। য়োগগী মরমদা রিসর্স কয়া পায়খৎলে। খুদম চাংদম লৈরবা মহৌশাগী লায়েংশিং মীয়ামগী হকশেলগী থৌরমশিংদা য়াওহন্নবা ভারত সরকারনা থবক পায়খৎলি।

হৌখিবা চহিদা হৌদোকখিবা ঐখোয়গী জাতিগী হকশেলগী থৌরাং অদুদা লাইনাশিং মাংজৌননা ঙাকথোক্নবা অকনবা মীৎয়েং থম্লি। লৌনগন্দবা লাইনাশিং মাংজৌননা ঙাকথোক্নবা অমসুং লাকশিন্নবা লৈবাক শিনবা থুংবা থৌরম অমা ঐখোয়না হৌদোক্লে। ভারত অসি মালেমদা মীশিং খ্বাইদগী য়াম্বা অনিসুবা লৈবাক্নি। ঙসি পায়খৎলিবা থবকশিং অসিগী মহৈ চাবদা চহী খর চংগনি অদুবু মদুগী ফল অদু অথুবদা উগনি হায়না ঐনা খল্লি।

অরোইবদা, ঐনা অমুক হন্না হায়নীংলি মদুদি, অদোমগী নেচর ক্যোর সেন্তর অসিনা মফম অসিদা হকচাং ফনা লৈনবা লাকপশিংদা য়োগগী কান্নবশিং ফংহন্নবা থবক পায়খৎকনি। অদোমগী সেন্তরগী পান্দম অসিনা লনাই মীওইশিংগী য়াইফনবা থবক পায়খকনি হায়না ঐনা থাজৈ। মখোয়গী পান্দম অসি পুন্সি চুপ্পা নুংঙাইহনবনি। মসিগী পান্দমশিং অসি ফংনবা অচুম্বা অমসুং সাইন্তিফিক ওইবা মওংদা চংশিনগনি হায়না ঐনা খল্লি। মসিগী খোংথাং অসিগা লোয়ননা সেন্তর অসিনা য়ু এস এগী য়াম্লবা মীয়াম অসি য়োগগী কান্নবা ফংহনবদা অচৌবা থৌদাং লৌগনি। সেন্তর অসিনা হকথেংননা মীওই ৫০০ অমসুং নাকোয়ননা মীওই ১৫০০ থবক পীগনি হায়বা তাবদা ঐ হরাওবা পোকই। মসিনা খুন্নাইগী দাইত্ব লৈবা মেম্বর অমা ওইগনি। মসিগী থবক অসিগীদমক ঐনা অদোম পুম্নমকপু য়াইফ মঙ্গল-পীজরি।

অদোম্বু ঙমখৈ লৈতনা থাগৎচরি।