ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা লুচিংবা কেন্দ্রগী মন্ত্রীমন্দলনা মুখ্য মন্ত্রী শ্রী মনোহর পার্রিকরনা গোৱাগী পনাজীদা ২০১৯গী মার্চ ১৭তা লৈখিদবদা অৱাবা ফোংদোকখ্রে। মন্ত্রীমন্দলনা লৈখিদ্রবা শ্রী মনোহর পার্রিকরবু নীংশিংলদুনা মিনিৎ অনি তুমিন্না লেপখি।

মন্ত্রীমন্দলনা ঙসি ২০১৯গী মার্চ ১৮দা দিল্লী অমদি গোৱা য়াওনা রাজ্য/য়ুনিয়ন তেরিতোরী পুম্নমক্কী কোনুংশিংদা জাতিগী ফিরাল তঙ্খায় চিংথদুনা নুমিৎ অমা জাতিগী অৱাবা ফোংদোকপদসু অয়াবা পীখ্রে।

শ্রী মনোহর পার্রিকরবু নীংশিংলদুনা মখাগী অৱাবা ফোংদোকপগী ৱারেপশিং অসি কেন্দ্রগী মন্ত্রীমন্দলনা মখা তানা অয়াবা পীখি:

“মুখ্য মন্ত্রী শ্রী মনোহর পার্রিকরনা গোৱাগী পনাজীদা ২০১৯গী মার্চ ১৭কী নুমিদাংৱাইরমদা লৈখিদবদা মন্ত্রীমন্দলনা অৱাবা ফোংদোকখ্রে। মহাক্না লৈখিদবা অসিদা লৈবাক অসিনা শক্নাইরবা অমদি থোইদোক হেন্দোকপা লুচিংবা অমা মাংজরে। মহাকপু মীচম প্রজাগী মুখ্য মন্ত্রী হায়নসু কৌনৈ।

১৯৫৫গী দিসেম্বর ১৩দা গোৱাগী মাপুসাদা পোকখিবা শ্রী পার্রিকর লোয়োলা স্কুল, মার্গাওদা মহৈ তমলকখি, তুংদা ১৯৭৮দা ইন্দিয়ন ইন্সতিত্যুৎ ওফ তেক্নোলোজীদগী মেতালর্জিকেল ইঞ্জিনীয়ারিংদা গ্রেজুয়েৎ লোইশিনখি।

রাজনিতীদা খোংদাদ্রিঙৈ মমাংদা শ্রী পার্রিকর রাস্ত্রীয় স্বয়ং সেবক (আর.এস.এস.)তা য়াওখি। মহাক নহা ওইরিঙৈ স্কুলগী অরোইবা চহীদা মুখ্য শিক্ষক (চিফ ইন্সত্রক্তর) অমা ওইখি। আই.আই.তি.দগী গ্রেজুয়েৎ লোইরবা মতুংদা মহাক্না মাপুসাদা আর.এস.এস.কী থবক থৌরম অমুক হন্না হৌদোকখি অমদি চহী ২৬ শুরকপদা সঙ্গচালক অমা ওইখি।

বি.জে.পি.গী মীহুৎ অমা ওইনা ১৯৯৪দা শ্রী পার্রিকর গোৱাগী লেজিস্লেতিব এসেমব্লীদা খনখি। ২০০০গী ওক্তোবর ২৪দা মহাক অহানবা ওইনা গৱাগী মুখ্য মন্ত্রী ওইখি অমদি ২০০২গী ফেব্রুৱরী ২৭ ফাওবা ওইখি। মদুগী মতুং ২০০২গী জুন ৩দা মহাকপু অমুক হন্না মুখ্য মন্ত্রী ওইনা খনখি অমদি ২০০৫কী ফেব্রুৱরী ২ ফাওবা সেবা তৌখি। ২০১২গী মার্চ ৯দা অহুমলকশুবা ওইনা গৱাগী মুখ্য মন্ত্রী ওইখি অমদি ২০১৪গী নবেম্বর ৮ ফাওবা মখা তানা ফম অসি পায়খি। ২০১৪গী নবেম্বর ৯দা শ্রী পার্রিকর লৈবাক অসিগী ঙাকশেল মন্ত্রী ওইরকখি অমদি ফম অসি ২০১৭কী মার্চ ১৩ ফাওবা পায়খি। ২০১৭কী মার্চ ১৪দা মহাক্না অমুক হন্না গোৱাগী মুখ্য মন্ত্রী ওইনা ৱাশক লৌখি।

শ্রী পার্রিকরবু মহাক্কী অচম্বা মওং মতৌ অমসুং থোইদোক হেন্দোকপা এদমিনিস্ত্রেতর অমগুম নীংশিংদুনা লৈহৌরগনি। মোদর্ন গোৱা শেমগৎ শাগৎপা অমদি ভারতকী আর্ম ফোর্সেসকী মোর্দনাইজেসনগা লোয়ননা এক্স–সর্বিসমেনশিংগী পুন্সি মহিং ফগৎহন্নবা মহাক্না লৌরম্বা থৌদাং অদু কৈদৌনুংদা কাওররোই।

শ্রী পার্রিকরবু আই.আই.তি. মুম্বাইনা ২০০১দা ‘দিস্তিংগুইস এলুমনস এৱার্দ’, ২০১৮দা নেস্নেল ইন্সতিত্যুৎ ওফ তেক্নোলোজী, গোৱানা ওনরেরী দোক্তরেৎ অমদি দা. এস.পি. মুখর্জী এৱার্দ লান্থোকখি। মহাক্কী মচানিপা অনি লৈহৌরি।

সরকার অমসুং জাতি পুম্বগী মায়কৈদগী লৈখিদ্রবগী ইমুং-মনুং অমসুং গৱাগী মীয়ামগীদমক মন্ত্রীমন্দলনা থম্মোই শোক্না অৱাবা ফোংদোকচরি।”