ভারতকী প্রধানমন্ত্রী
প্রধান মন্ত্রী শ্রী নরেন্দ্র মোদীনা লুচীংবা কেন্দ্রগী মন্ত্রীমন্দলনা হিদাকমনাগী পোৎথোকশিংদা অরোনবা করবার চৎথবা থিংনবা হিদাকমনা লাকশিনবদা ৱার্ল্দ হেল্ত ওর্গনাইজেসন (দবল্যু.ঐচ.ও.)গী ফ্রেমৱার্ক কনভেন্সনগী মখাদা প্রোতোকোল চৎনহন্নবা অয়াবা পীবদা য়াখ্রে। মসিনা চুরুপ অমসুং হিদাকমনা চাবা নত্রগা মৈখু চেন্দবা হিদাকমনা (এস.এল.তি.)গী মওংগী ওইবা হিদাকমনা লাকশিনবদা ৱার্ল্দ হেল্থ ওর্গনাইজেসনগী ফ্রেমৱার্ক কনভেন্সনগী আর্তিকল ১৫গী মখাদা তোবেকো কন্ত্রোল (দবল্যু.ঐচ.ও. এফ.সি.তি.সি.) অসি চৎনহল্লগনি। ভারত অসি দবল্যু.ঐচ.ও. এফ.সি.তি.সি.দা য়াওই।
অকুপ্পা ৱারোলঃ
প্রোতোকোলদা তোঙান তোঙানবা লুপগী থৌদাং লেপথোক্লি। মসিদা হায়রি মদুদি সপ্লাই চেন কন্ত্রোল তৌবগী পাম্বৈ অসি লুপ পুম্নমক্না শিজিন্নগদবনি। পাম্বৈশিং অদুদা হিদাক মনাগী পোৎথোক শাননবগী লাইসেন্স, হিদাক মনা শেম্ননবগীদমক মেচিনরী, পোৎথোক পুথোকপদা য়াওরিবা লুপশিংগীদমক্তা মতিক চাবা মেন্যুফেকচরিং, ত্রেকিং অমসুং ত্রেসিংগী থৌরাং, রেকোর্দ কিপীং অমসুং ঙাক–শেল য়াওরি। ই–কমর্স, ফ্রী–ত্রেদ জোনশিং শেমগৎপা, লোইননা ফ্রী সেল্সতা য়াওরিবা লুপশিংনা থৌরাং পাইখৎকনি।
প্রোতোকোলদা মরাল লৈরবশিং, সিজ তৌবা অমসুং সিজ তৌরবা পোৎথোকশিং মাংহনবনচিংবগী অকনবা পাম্বৈশিং হাপচিল্লি। মসিদা ই–পাউ পীথোক–পীশিন তৌনবা, অরোনবা ঙাকপা, ত্রেনিং, সাইন্তিফিক লোইননা তেক্নিকেল অমসুং তেক্নোলোজিকেল ওইবা মতাংদা তেক্নিকেলগী তেংবাং পীনবা অমসুং শরুক য়ামিন্ননবগীদমক্তা মালেমগী ওইবা তেংবাং পীনবগী থৌরাং তৌরে।
শাফুঃ
কাংলোনশিং মপাঙ্গল কলহন্দুনা হিদাকমনাগী পোৎথোক্তা অরানবা করবার তৌবা থিংবনা পাক–চাউনা হিদাকমনা লাকশিনববু মপাঙ্গল কলহনবদা মতেং ওইরগনি অমসুং মসিদগী হিদাকমনাগী পোৎথোকশিং শিজিন্নবা হন্থরগনি লোইননা মসিনা মরম ওইদুনা অনাবগী পোৎলুম হন্থহল্লগনি অমসুং হিদাকমনা শিজিন্নবনা মরম ওইদুনা শিবগী চাংসু হন্থরগনি।
অসিগুম্বা য়ান–ৱারোল ইনবা অসিনা মীয়ামগী ওইবা হকশেলদা ফৎতবা ইথিল পীরিবা হৌজিক্কী ওইবা মচৎ অসিগী মায়োক্তা থবক পাইখৎপা য়াবা থৌওংশিং ফংহল্লগনি। ভারত অসি হিদাকমনা লাকশিনবগী লমদা মকোক থোংলি অমসুং অসিগুম্বা নাতৈ চাদবা মচৎ অসিবু লাকশিন্নবা ৱার্ল্দ কস্তম ওর্গনাইজেসন য়াওনা মালেমগী লুপশিংদা ইথিল পীবা ঙমগনি।
হিদাকমনাগী মায়োক্তা পাইখৎলিবা মালেমগী ওইবা থবকশিং অসিবু মপাঙ্গল কলহনবদা হিদাকমনাগী করবার থিংজিনবগা মরি লৈনবা প্রোতোকোল অসি লম্বী তাক্লিবা অনৌবা খোংথাং অমনি অমসুং মীয়ামগী ওইবা হকশেলদা অনৌবা কাংলোনগী পাম্বৈ অমসু ওইরি। মসি হিদাকমনাগী পোৎথোক্কী অরানবা করবারগা মায়োক্নবা অমসুং মদুবু থিংবা লোইননা মালেমগী ওইবা হকশেলগী তেংবাংগীদমক্তা পাইখৎলিবা কাংলোনগী ওইবা থৌওংশিং মপাঙ্গল কলহন্নবা খুৎলাই অমনি।
য়ুম্ফমঃ
হিদাকমনা লাকশিনবদা দবল্যু.ঐচ.ও.গী ফ্রেমৱার্ক কনভেন্সন (দবল্যু.ঐচ.ও. এফ.সি.তি.সি.) অসি দবল্যু.ঐচ.ও.গী লমজিং–লমতাক মখাদা পাইখৎখিবা অহানবা মালেমগী হকশেলগী লমদা পাইখৎপা য়ান-ৱারোলনি। এফ.সি.তি.সি.গী পান্দম অসি লৈবাক্কী, লমদম অদুগী লোইননা মালেমগী থাক্তা হিদাকমনা লাকশিন্নবগীদমক্তা সপ্লাই অমসুং দিমান্দ হন্থহন্নবা পাইখৎপা পাম্বৈগী ফ্রেমৱার্ক অমা ফংহনবনি।
দবল্যু.ঐচ.ও. এফ.সি.তি.সি.গী আর্তিকল ১৫দা য়াওরিবা মরু ওইবা হিদাকমনা সপ্লাই তৌবা হন্থহনবগী লালোংদা মখল খুদিংমক্কী অরানবা করবার হায়বদি হুরান–পোৎয়োন (স্মগ্লিং), লান্না মেন্যুফেকচরিং তৌবা লোইননা পোৎশেম তৌবা য়াওনা মখল খুদিংমক্কী অরানবা করবার থিংনবা ফিরেপ লৌরি। মসিগী মতুং ইন্না প্রোতোকোল অসি শেমখি অমসুং কনফ্রেন্সতা য়াওবা লুপশিং (সি.ও.পি.)না মসিবু লৌখি। সি.ও.পি. অসি এফ.সি.তি.সি.গী গভর্নিং বোদীনি। প্রোতোকোল অসি শরুক ১০ থোক্না খাইদোক্লি মসিদা আর্তল ৪৭ য়াওই।
