ভারতকী প্রধানমন্ত্রী

রেবরেন্দ দোক্তর জোসেফ মার থোমা মেত্রোপোলিতানগী ৯০শুবা মপোক কুমওনদা প্রধান মন্ত্রী শ্রী নরেন্দ্রা মোদীনা ঙসি ৱা ঙাংখ্রে। মহাক্না য়াইফ-পাউজেল পীখি, অমসুং পুন্সি শাংনা অনা অয়েক য়াওদবা ওইরসনু হায়না মহাক্না থৌনিখি।

থৌরম অসিদা ৱা ঙাংলদুনা প্রধান মন্ত্রীনা হায়খি মদুদি দোক্তর জোসেফ মার থোমানা ঐখোয়গী খুন্নাই অমসুং লৈবাক অসিগী অফবা পুরক্নবগীদমক্তা মহাক্কী পুন্সি কৎথোকখি। মহাক্না হায় “দোক্তর জোসেফ মার থোমানা মরু ওইনা মহাক্না নুপীশিংদা থৌনা হাপনবা হোৎনবা অমসুং লাইরবা মুথৎনবা পামখি। মার থোমা চর্চ অসি লোর্দখ্রিস্তকী শেবক সেন্ত থোমাসকী অৱাংবা ৱাখল্লোনশিংগা য়াম্না নক্না মরী লৈনৈ”

প্রধান মন্ত্রীনা হায় ভারতনা মতম পুম্বদা তোঙান তোঙানবা হৌরকফমশিংদগী লাকপা লাইনীং লাইশোনগী ইথিলশিংদা থোং হাংদুনা লৈ। দোক্তর জোসেফ মার থোমানা হায়বা “নোল্লুকপা হায়বা অসি অফবা গুন অমনি মসিনা অফবা থবকশিংদা মহৈ য়ালহল্লি” অসি পল্লদুনা পি.এম.না হায় মসিগী নোল্লুকপা ৱাখল্লোন অসিগা লোয়ননা মার থোমা চর্চনা ভারত মচা কয়াগী পুন্সিদা অফবা অওনবা পুরক্নবা হোৎনরি। মখোয়না হেল্থকেয়র অমসুং এজুকেসনগুম্বা লমশিংদসু অওনবা পুরক্লি। মাত থোমা চর্চনা ভারতকী নীংতমবা ফংনবা হোৎনবদা অচৌবা থৌদাং লৌখি অমসুং লৈবাক অসি পুনশিন্নবা হোৎনবদা মহাক্না মাংজিল থাখি হায়না মহাক্না ফোংদোকখি।

কোবিদ-১৯ অসি মীয়ামগী পুন্সিদা খুদোংথীবা অমা ওইরিবা হকচাংগী অনাবা খক নত্তে  মসিনা হকচাং শোক্নীংঙাই ওইরবা ঐখোয়গী পুন্সি মহিংশিংদসু মিৎয়েং চংহল্লি। মহাক্না হায়খি মালেমগী ওইবা লাইচৎ অসিনা মীওইবা খুন্নাই পুম্বা অসি ফগৎপা মথৌ তাই তাক্লি অমসুং ঐখোয়গী গ্রহ অসি ইং তপ্পা অমসুং হরাও তয়াম্বা হেনগৎনবা ঐখোয়না তৌবা য়াবা খুদিংমক তৌগদবনি। মহাক্না হায়খি কোরোনাগী লান্মীশিংগী মতেংনা ভারতনা থৌনা লৈনা কোবিদ-১৯ লান্থেংনরি।

লোকদাউন, সরকারনা লৌখৎপা খোংথাংশিং অমসুং মীয়াম্না পুন্না লান্থেংনবনা মরম ওইদুনা অতোপ্পা লৈবাকশিংদগী ভারতনা য়াম্না ফবা ফীভমদা লৈরি অমসুং ভারতকী ফগৎলকপগী চাং অসি ৱাংখৎলক্লি হায়না প্রধান মন্ত্রীনা ফোংদোকখি। মরম অসিনা ভাইরস অসিগী শাথিবগী চাং অসি খন্নরমবদগী হেন্না তারি। মহাক্না হায় কোবিদ-১৯না মরম ওইরগা ভারত্তা শিবগী চাং অসি ইতালিদা মিলিয়ন অমদা ৫৭৪  ওইবা অসিগা চাংদম্নবদা ভারতনা ১২কী মখাদা লৈ। অমেরিকা, ব্রিতেন, স্পেন অমসুং ফ্রান্সনা ভারত্তগী মশিং য়াম্না হেল্লি হায়না মহাক্না মখা তাখি। মীওই কোতি ৮৫কী ময়ুম ওইরিবা খুঙ্গং লাখ কয়া কোরোনাভাইরসনা লানশিনবা ঙমদ্রি হায়না মহাক্না ফোংদোকখি।

হৌজিক ফাওবদা মীয়ামনা লমজিংদুনা কোবিদ-১৯গী মায়োক্তা লান্থেংনবা অসিনা অফবা ফমশিং ফংবা ঙমখ্রে অমসুং ঐখোয়না লাইথোকপদি য়াদ্রি হায়না মহাক্না হায়খি। হৌজিক ঐখোয়না হেন্না চেকশিনবা তাই  অমসুং মাস্ক উপ্পা, সোসিএল দিস্তেন্সিং থম্বা ‘দো গজ কী দুরী’, মীয়াম তিনবা মফমশিংদা চংদবা, মরু ওইরি হায়না মহাক্না হায়খি। 

প্রধান মন্ত্রীনা ফোংদোকখি মদুদি হৌখিবা চায়োল খরা অসিদা, ভারত সরকারনা শেন্মীলোনগা মরী লৈনবা শোর্ত-তর্ম অমসুং লোং-তর্মকী ওইবা খুদোংচাদবা কোকহনখি। মীয়ামগী কান্নগদবা অমসুং চাউখৎনবা ৱারেপশিং সমুদ্রদগী স্পেস, লৌবুকশিংদগী ফেক্তরিশিংগী সেক্তরশিংদা লৌখি হায়না মহাক্না হায়খি।অত্মা নির্ভার ভারতনা মরোমদোম লেপচবা ঙম্বা ভারত ওইহন্দুনা ভারত মচা খুদিংমক্কী শেন্মিৎলোন ফগৎহনবা অমসুং চাউখৎবা ঙমহল্লগনি হায়না মহাক্না আশা তৌরি।

 হন্দক্তা নৌনা হৌদোকখিবা প্রধান মন্ত্রী মতস্য  সম্পদা য়োজনাগী মতাংদা পল্লদুনা প্রধান মন্ত্রীনা হায় লুপা কোতি লিশিং কুনগী মথক্কী শেন্থংগা লোয়ননা স্কিম অসিনা ফিসরী সেক্তরদা অওনবা পুরক্লগনি, মপানদা থাদোকপদগী লাকপা শেল হেনগৎলগনি অমসুং মীওই লাখ য়াংখৈ মঙাগী মথক্তা থবক পীরগনি। হেন্নবা ফবা তেক্নোলোজী, ইনফ্রাস্ত্রকচর অমসুং ভেল্যু চেনশিং কনখৎপা ঙম্লগনি হায়না মহাক্না হায়খি। তোঙান তোঙানবা স্কিমশিংদগী কেরালাগী ঙামী ইচিন ইনাওশিংনা কান্নবা ফংলগনি হায়না মহাক্না থাজৈ হায়না মহাক্না ফোংদোকখি।

প্রধান মন্ত্রীনা হায় স্পেসকী সেক্তরদা ইতিহাসিক ওইরবা অওনবা কয়া পুরকপনা স্পেসকী এসেৎশিং অমসুং থবক থৌরমশিং পাকশন্না হেনগৎলগনি। দেতা এক্সেস তৌবা অমসুং তেক্নোলোজী ফগৎহল্লগনি। মহাক্না মখা তারদুনা কেরেলাগী নহা ওইরিবা কয়ানা অমসুং অখন্ননা খা-ভারতকী সাইন্স অমসুং তেক্নোলোজীদা য়াম্না থৱাই য়াওজবশিংনা মসিগী অওনবা অসিদগী কান্নবশিং ফংলগনি।     

প্রধান মন্ত্রীনা হায় ভারত অসি গ্রোথ ইঞ্জিন অমা ওইহন্নবা সরকার অসি খঙ-হৈরবা অমসুং তুং-কোইনা চৎকদবা মিৎয়েংশিংনা লুচিংলি। মহাক্না হায় ৱারেপশিং অসি দিল্লীদা লৈবা সরকারগী লোইশঙদা নুংঙাইনা ফম্লগা লৌবা নত্তে মীয়ামদগী হকথেংননা উনরবা মতুংদা লৌবনি। মসিনা ভারত মচা খুদিংমক্কী বেঙ্ক একাউন্ত অমা লৈহনবা, ইমুং কোতি ৮ হেনবনা মৈখু চেন্দবা চাকশঙশিং ফংহনবা, ময়ুম লৈজদ্রবশিংদা য়ুম কোতি ১.৫কী মথক্তা পীখিবা অমসুং মালেমগী খ্বাইদগী চাউবা হেল্থকেয়র স্কিম অয়ুশ্মান ভারতকী হৌরকফমসু ওইরি।

প্রধান মন্ত্রীনা হায়খ্রে লাইরবগীদমক্তা, মখোয়না লৈরিবা মফম অদুদা রাসনশিং ফংহন্নবা ৱান নেসন-ৱান রেসন কার্দকী স্কিম পুরক্লি। ময়াই ওইবা কাংলুপকীদমক্তা, লাইনা হিংবা ঙম্নবা থৌনা হাপনবা থৌরাং কয়া পুরকখ্রে। লৌমীগীদমক্তা, এম.এস.পি. হেনগৎহনখ্রে অমসুং মখোয়দা চান্নবা মমল ফংহনবা ঙম্লগনি। নুপীশিংগী ওইনা তোঙান তোঙানবা স্কিমশিংগী খুথাংদা মখোয়গী হকশেল ফনা থম্বা অমসুং মেতর্নিতীগী শুতি শাংদোক্তুনা মখোয়গী কেরিয়রগী লম্বেলদা খুদোংচাদবা থোকহল্লোই।

প্রধান মন্ত্রীনা হায়খ্রে ভারত সরকারনা লাইনীং লাইশোল, নুপা নুপী, জাৎ-বীজাৎ নত্ত্রগা লোন্দা খেন্নবা থমদে অমসুং ভারত মচা কোতি ১৩০ এম্পাৱর তৌবগী অপাম্বনা লমজিংলি অমসুং ঐখোয়গী লমজিং মৈরা অসিনা ভারতকী সংভিধান্নি।

ঐখোয়গী থৌওংশিংনা লৈবাক্কী চাউখৎ থৌরাংশিংদা করম্না মতেং পাংবগে খন্থনবা মহাক্না ফোংদোকখ্রে। মহাক্না হায় ঙসি ভারতনা হায়রি – ঐখোয়গী ওইবা পুথোক্কনি অমসুং ঐখোয়গী ওইবা পোত্থোকশিং লৈগনি। মসিনা মীওই কয়াগী য়ুমদা চাউখৎপগী মৈরা চুখৎলগনি।

নুংগী ওইবা ৱারোল: মার থোমাস চর্চ হায়না খঙনবা মালঙ্কারা মার থোমাস সিরিয়ন চর্চ কেরেলাদা লৈবা খ্বাইদগী লীরবা মহৈরোলদগী লৈরক্লবা চর্চশিংগী মরক্তা অমনি। জিজস খ্রিস্তকী শেবোকশিংগী মরক্তা অমা ওইরিবা সেন্ত থোমাস অসি ৫২ এ.দি.দা ভারত্তা লাক্লম্মি অমসুং চর্চ অসি লিংখৎলম্মি হায়না ত্রেদিস্নেল ওইনা থাজনরি। চর্চ অসি হৌখিবা চহি তরাহুমদোইদগী চর্চ অসিগী মকোক ওইদুনা লাক্লিবা মখোয়গী ২১শুবা মলঙ্কারা মেত্রোপোলিতান, রেবরেন্দ দোক্তর জোসেফ মার থোমানা মকোক ওইরি। মার থোমা চর্চনা ভারতকী নীংতমবগী আৱাবা মতম অমসুং মতুংদা ইমর্জেন্সীগী মনুংদা নেস্নেলিজমগী দেমোক্রেতিক ভেল্যুশিং অমসুং থৌনাশিং অৱাংবা থাক্তা থমখি। চর্চ অসি মীওইবা খুনাইগী শেবা তৌবা কত্থোক্লি অমসুং তোঙান তোঙানবা সোসিএল ৱেল্ফিয়র ইন্সতিত্যুসনশিং, কনা লৈজদ্রবশিংগী ময়ুমশিং, হোস্পিতালশিং, কোলেজশিং, মহৈলোয়শঙশিং অমসুং তেক্নিকল ইন্সতিত্যুসনশিং চলাইরি। জ্বার হাবা, ঈশিং চাউবা, সুনামিগুম্বা অৱাবা মতমশিংদা চর্চ অসিনা তোঙান তোঙানবা স্তেৎশিংদা তেংবাং অমসুং রিহেবিতেসনগী থবক থৌরমশিংদা শরুক য়ারি।