ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি সুরত্তা খ্বাইদগী নৌবা সুপর স্পেসিয়েলিতী রসিলাবেন সেবান্তিলাল শাহা ভেনস হোস্পিতাল শঙ্গাখ্রে। মহাক্না নুংঙাইবা ফোংদোকখি মদুদি হোস্পিতাল অসিনা আয়ুশ্মান ভারত স্কিমগী মখাদা মীয়ামগী সেবা তৌরগনি।

মীয়াম তিনখিবা অমদা ৱা ঙাংলদুনা প্রধান মন্ত্রীনা হায়খি মদুদি মহাক্কী সরকারনা মশা মউ ফবা ভারত অমগীদমক থবক তৌরি। লাইরবশিংগীদমক সরকারনা লৌখৎলিবা খোংথাংশিং অদু মহাক্না পনখি। মহাক্না হায়খি মদুদি প্রধান মন্ত্রী সুরক্ষিৎ মাত্রিৎত্ব অভিয়ান অমসুং মিসন ইন্দ্রধনুশকুম্বা অনৌবা খোংথাংশিংনা মী শিবগী চাং হন্থহনবদা অচৌবা থৌদাং অমা লৌরি।
প্রধান মন্ত্রীনা লাল কিলাদগী স্বচ্ছতা অভিয়ানগীদমক লাওথোকখিবদা করেম্নখিবা মখোয়শিং অদুদা মতিক চাবা পাওখুম পীরদুনা মহাক্না হায়খি মদুদি ঙসিদি চাউখ্রবা সেনিতেসন দ্রাইবনা মরম ওইদুনা হৌজিক্তি অপুনবা মীশিংগী চাদা ৯৭না লু-নানবা তোইলেৎশিং শিজিন্নরে। প্রেভেন্তিব হেল্থ কেয়রগী মরুওইবা অদুসু প্রধান মন্ত্রীনা কন্না পনখি অমদি ৱেলনেসকীদমক যোগগী থৌদাং অদু মালেম অসিনা খঙবিরে হায়খি।

প্রধান মন্ত্রীনা হায়খি মদুদি আয়ুশ্মান ভারত স্কিমনা পুন্না অনৌবা ইকোসিস্তেম অমা শেম্লগনি মদুনা ভারতপু হেন্না মশা মউ ফহনবদা মতেং ওইরগনি। স্কিম অসিনা তায়র ২-৩ সহরশিংদা অনৌবা হোস্পিতালশিং লিংখৎপদা ইনোৎ পীরগনি মদুনা হেল্থকেয়র সেক্তরদা থবক ফংহন্নবগী খুদোংচাবসু হেঙ্গৎহল্লগনি হায়না মহাক্না মখা তাখি। মহাক্না হায়খি মদুদি হৌজিক্তি মীয়ামগীদমক্তা জেনেরিক মেদিসিন মশিং য়াম্না ফংহল্লে মদুনা হেল্থকেয়রগী মমল হন্থহনবতা নত্তনা তাংলবা পুন্সী কয়া কনবসু ঙমহল্লগনি।

শেল-থুমগী শোত্থরবা কাংলুপকীদমক চাদা ১০ রিজার্বেসন কোতা অহানবা ওইনা চৎনহনবগীদমকসু প্রধান মন্ত্রীনা গুজরাতপু থাগৎপা ফোংদোকখি।