ভারতকী প্রধানমন্ত্রী

ঐগী নুংশিরবা ইরৈচাশিং,

অমুক হন্না ‘মন কি বাত’ তা তরাম্না ওকচরি। চহি ১২ গী মমাংদা, বিজয়দশমীগী শেংলবা থৌরমদা, ঐখোয়না মন কি বাত হৌখি। মতম অদুদগী হৌনা, ঐখোয়গী খোঙচৎ অসি অমুক্ত ফাওবা লেপ্তনা মখা চৎথরক্লি। লম্বী অসিদা অদোম ঐগী খোঙলোয়শিং অমসুং ঐগী লমজিংবশিং অনিমক্নি। ঐগী ওইনা, মন কি বাত অসি থবক কন্না শুবা, থৌনা ফবা, হায়দোকখিবা ৱ ঙাকপা, কৎথোকপা অমসুং ঐখোয়গী লৈবাক্কী মীয়ামগী থবক তৌনবা ৱাখল্লোনগী হরাওবা ফোঙদোক্নবা শেংলবা খুদোংচাবা অমা ওইরে। ঐখোয়গী লৈবাক অসি চহি কয়া শুরবা তির্থ ষাত্রাগী চৎনবী অমা লৈরি। ঐগীদমক, মন কি বাত অসি, লাইফমশিং কোয়বদগী হেন্না মরুওই- ঐখোয়গী মীয়ামগী থবকশিং মমুৎ তানা খঙনবা অমসুং মখোয়না পাংথোকখিবা থবকশিংদা ইকায়খুম্নবা উৎনবা খোঙচৎ অমনি। খুন্নাইগী অমসুং লৈবাক্কীদমক হিংলিবা মীওইশিং, তির্থ অমগুম্বনি। চহি ১২ হেন্না, লৈবাক অসিগী লনাই মীওই কয়া মাংলোমদা চোংথোরকখি-মখোয়গী অচম্বা থবকশিং খুন্নাইনা মশক খঙখিদে। অসিগুম্বা মশিং থিঙমদ্রবা থবকশিং, অদোম ময়ামদা পুক্নিং থৌগৎপা ৱারিশিং, মন কি বাতনা পুরকখি।

মরুপশিং,

থৌরম অসিগী খুৎথাংদা, ঐনা মীয়ামগী অপুনবা শক্তি; ঐখোয়গী মীয়ামগী শক্তিদা  কোক নোঞ্জরি। লৈবাক অসিগী ইমুং খুদিংমক্ক পাউ ফাওন্নবা খুদোংচাবা অমা ঐঙোন্দা পীরে। মন কি বাত আবা মীওইশিংগী মেসেজ লিশিং কয়া ঐনা ফংবদগী মখোয়গী ইমুং-মনুংগী মীওই অমগুম্না ঐ মখোয়গী মরক্ত লৈবগী মখোয়দা ফাওহনখি। ঐগীদমক, মসিগী অচেৎপা মরী অমসুং অদোমগী – ঐগী থৌরম তারিবশিংনা উৎখিবা মীনুংশি অসি মমল নাইদ্রবা লন অমনি।

ঐগী নুংশিরবা ইরৈচাশিং,

মীরোল কয়া ঐখোয়গী শক্তমগী শরুক অমা ওইদুনা লাক্লবা মমাংঙৈগী হৈথোই-শিংথোইবা কয়া ঐখোয়গী লৈবাক্ত লৈরি। হায়রিবা চৎনবীশিং অদু হৌজিক অনৌবা থবক কয়াগা পুনশিল্লে, মখোয় অহোংবা পুরকপা য়াহল্লে অমসুং হৌজিক্কী মতম অসিগা চুনহনবা উবদা হরাওই। অসিগুম্বা থবক অমা চহি খর অসিদা পঞ্জাবতা পায়খৎলে; খেতি বিরাসাত মিসন কৌবা লুপ অমনা ওর্গনিক ফার্মিং অমসুং মহৌশাগী ওইবা লৌউ শিংউগী থবকশিং অমুক হিঙ্গৎহল্লে। পঞ্জাবকী মলৱা লমদমদা লশিং থাবগী থবক য়োকখৎনবা লুপ অসিনা পান্দম থম্লি। থবক অসিগী মমিং ‘নব-ত্রিঞ্জান’ কৌই।

প্রোজেক অসিগী মখাদা, কেমিকেলশিং অমতা শীজিন্নদনা ওর্গনিক ওইবা লশিং থারে। মখোয়গী মশাগী ওইনা মচু শঙলবা লশিং থারে, লং নত্ত্রগা ফিদা মচু শঙনবা অহেনবা কেমিকেলশিং হাপচিনবা দরকার ওইদ্রে। মসিনা মহৌশাগী অকোয়গী ফিবম ঙাক-শেনবদা কয়া য়াম্না মতেং পাংবগে হায়বা অদোম খন্দুনা য়েংউ।

মরুপশিং,

তুংগী মীরোলদা ফি শাবা হৈহন্নবা পান্দমগা লোয়ননা চহি খরগী মমাংদা, নব-ত্রিঞ্জান’ না ফি শাবা তম্নবা স্কুল অমসু লিংখৎলে। স্কুল অসিনা নুপী কয়াগী পুন্সিদা অওনবা পুরক্লে। রামন্দিপ কৌর জি খুদম অমনি; মমাংদা মহাক শিন্মী ওইনা থবক শুরমখি, অদুবু স্কুলদা ত্রেনিং শরুক য়ারবা মতুংদা, মহাক হৌজিক হৈশিংলবা ফিশাবী অমা ওইনা খঙনরে। ত্রেনিং পাংথোক্ত্রিঙৈ মমাংদা, রেখা রানি জি অমুক্ত য়োংখম অমতা উখিদ্রি। মমাঙদা ইমুং-মনুংগী থবক শুরম্বী সুনেহা দেবী জি, হৌজিক ফিশাকোল অমদা ফজরবা ফি কয়া শারে। রজনি কৌর জি, মতম অমদা লৌবুক্ত থবক শুদুনা হিংলমখি, মহাক্কী ইমুং পুনবা মপুংফানা মতেং পাংবা অনৌবা স্কিলশিং মহাক লৈরে।

স্কুলদগী ত্রেনিং ফংলবা মতুংদা, অসিগুম্বা নুপীশিংনা মমাংঙৈগী ওর্গনিক লশিংদগী শুংবা লং শীজিন্নদুনা হৌজিক সালশিং, তাউৱেলশিং অমসুং অতোপ্পা তেক্সতাইলশিং শারে। থবকশিং অসিনা মখোয়গী পুন্সি নুংঙাইহল্লে। থা খরগী মমাংদা, নেসনেল হেন্দলুম দে থৌরমদা, ঐনা কাংবু অসি উনবগী খুদোংচাবা ফংখ্রে। উনখিবা অদুদা, মখোয়গী থবকশিংদা মখোয়না পামজবা অমসুং কৎথোকপা ঐনা উবা ফংখি। অফবা তুংলমচৎ অমা লৈনবগীদমক অপুনবা কাংবু অদুদা ঐনা ঐগী য়াইফ পাউজেল পীজরি।

ঐগী নুংশিরবা ইরৈচাশিং,

মহৌশাগী অকোয়বা ফিবম ইকায়খুম্নবগী কুইরবা চৎনবী অমা ঐখোয়গী লৈরি। ঐখোয়গী অকোয়বশিং লু-নান্না থম্বা অমসুং ঈশিং ফংফমশিং শেন্নবা অসি ঐখোয়গী থৌদাংনি হায়না ঐখোয়গী অহল-লমনশিংনা ঐখোয়দা তম্বীখি। লৈবাক অসিগী মীওই কয়া মসিগী ৱাখল্লোন অসি চেনবা উবদা ঐ হরাওই। চপ মান্নবা ৱাখল্লোন অসি উত্তরখন্দগী তেহরি গর্হৱাল লমদমদা উবা ফংলি। মফম অদুদা, হেবাল তুরেল অমুক হিঙ্গৎনবা থবক অমদা মীয়াম অমতা ওইনা পুনখি। মতম খরগী মমাংদা, হেবাল তুরেলগী ঈশিং ময়েং তারকখি… অকোয়বদা লৈবা মহৌশাগী ওইবা ঈশিং ফংদমশিংসু কংবা হৌরকখি। ফিবম অসিদা, হেবাল তুরেল কন্নবা খোঙজং অমা হৌদোক্নবা মফম অদুগী লৈঙাক অমসুং খুঞ্জাশিং পুনখি।

নোংগী ঈশিং লোকশিন্নবা, লৈনুংগী ঈশিং অমুক হেনগৎহন্নবা থবক কয়া পায়খৎলে অমসুং মশিং য়াম্লবা উ পাম্বীশিং থারে। ঙসি, থবকশিং অসি থাগৎলি, হেবাল তুরেল অমুক হিঙ্গৎলে অমসুং মতম অমতদা ঈশিং ফংফম কয়ানা মখোয় অমুক হিঙ্গৎনবা মতেং ফংলে।

মরুপশিং,

অসিগুম্বা ৱাখল্লোন অমদা খুন্না অমা পুনবা মতমদা, শোইদনা অহোংবা পুরকপা ঙম্মী। ঐখোয়গী কুহ্মৈশিংদসু ঐখোয়না শক্তম অমা উবা ফংলে। নুমিৎ খরগী মতুংদা, দিৱালি অমসুং ছাথকী শেংলবা কুহ্মৈশিং লাক্লগনি। মদুগীদমক, মফম কয়াদা লম-তু শেংবগী থবক পায়খৎলি। ঐখোয়না লৈরিবা মফমশিং ঐখোয়না লু-নান্না থম্বা অসি তঙাইফদে। ঐখোয়গী অপীকপা, লনাই থবকশিং খক্তনা ঐখোয়গী অকোয়বশিং অহোংবা পুরকপা ঙমগনি।

ঐগী নুংশিরবা ইরৈচাশিং,

কুহ্মৈগী মতম অসিদা, অদোমগী অকোয়বশিংদা অহোংবা অমা লাকপা অদোম উরমগনি। পোৎ-চৈ লৈবা মতমদা হৌজিক মীয়াম্না লমদম অসিদা শাবা পোৎথোকশিং মরুওইনা লৌরে। মসিগী ভোকেল ফোর লোকেলগী ৱাখল্লোন অসি হৌজিক ঐখোয়গী পোৎথোকশিং মালেমগী কৈথেলশিংদা য়ৌহল্লে।

খুদম ওইনা, হৌজিক বিহারগী পুরনিয়াগী থাজিং মরু গ্রিস য়ৌরে অমসুং কর্নাতকাগী কালাবুরাগীদগী অহার দাল মালদিপসতা থাদোক্লে- মসিনা তাক্লিবদি, ভারতকী লৌমীশিংগী অনৌবা কৈথেলশিং ফংলে হায়বনি। পোৎথোক অমা য়োম্বা হায়বসি পোৎথোক অদুগী মগুম্না য়াম্না মরুওই। ঐখোয়না কৈথেলদা পোৎলম অমা উবা মতমদা, মসিগী পেকেজিং অদুনা ঐখোয়গী পুক্নিং চিংশিন্দুনা ঐখোয়না মদু লৌখৎলি। পোৎলম অমগী পেকেত্ত য়েংদুনা ঐখোয়না পোৎথোক অমগী মরমদা খঙবা পাম্মী। মদু খঙলদুনা, হৌজিক পেকেজিংগী মরুওইবা হেনগৎলক্লি।

মরুপশিং,

মহারাষ্ট্রাদা, ত্রাইবেলশিংনা মখোয়না পুথোকপা পোৎথোকশিং পেকেজিংগী অকনবা মীৎয়েং অমা থমখি। ‘সাবারি নেচরেলস’ কৌবা থবক অমগী খুৎথাংদা, খোইহি, মহুৱা, চিরোঞ্জি অমসুং ৱাগী পোৎথোকশিং কৈথেলদা ফংলে- মখোয়গী পেকেজিংদা ত্রাইবেল আর্তকী মমি তাখি। মসিগী পেকেজিং অসি জপানগী লেমজনিঙাই ওইরবা ‘গুদ দিজাইন এৱার্দ’ ফংলবা তাবদা অদোম হরাওগনি। ঐখোয়গী নহারোলশিংসু হিরম অসিদা অনৌবা থবক চাংয়েং তৌরে; কর্নাতকাদা ‘বেম্বু’ ষ্টার্দ-অপ অমনা ৱা অমসুং লৌউ-শিংউগী অরেম্বশিংদগী পেকেজিংগী মচাকশিং পুথোক্লে।

মরুপশিং,

ঐখোয়না লমদম অসিগী পোৎথোকশিংগী ৱারি শানবা মতমদা, খাদিগী মরমদা খন্নবা অসি মহৌশানি। হন্দক্কী গান্ধী জয়েন্তিদা, নোংমদা খাদি গ্রাম উদ্যোগনা লুপা করোর ২৮ হেন্না য়োনখি। মসি হৌখিবা চহিদগী লুপা করোর ১.৫ হেনগৎলবনি। মসিনা তাক্লিবদি খাদি পাম্নবা মখা তানা হেনগৎলক্লি হায়বনি অমসুং মসিগী কান্নবশিং খাদি অমসুং তোঙান তোঙানবা ইয়োংগী পোৎথোকশিং পুথোকপা হৈথোই-শিংথোইবা অমসুং শুবা কনবা লৌমীশিংনা ফংলে।

মরুপশিং,

কুহ্মৈ মতম মনুংদা, ঐখোয়গী ইমুং-মনুংশিং অমসুং কনাগুম্বা নুংশিজবা মীওইশিংগীদমক ঐখোয়না পোৎলম কয়া লৈ। হন্দকসু, লমদম অসিগী খুৎহৈবশিংনা শাবা পোৎথোকশিং লৈবীয়ু; অদোম্না লৈবা অদুনা মখোয়গী থৌনা হাপকনি। মসিনা মখা তানা ভোকেল ফোর লোকেলগী খোঙজং ফগৎহনগনি। খোঙজং অসি মপাঙ্গল কনখৎলকপা লোয়ননা, অত্মনির্ভার ভারতকী মঙলান য়াংনা মঙফাওনগনি। মদুগীদমক, লমদম অসিগী খুৎহৈবশিংনা পুথোকপা পোৎথোকশিং মরুওইনা লৌনবা ঐনা অদোমদা হায়জরি।

ঐগী নুংশিরবা ইরৈচাশিং,

ঐখোয়গী মীয়ামগী অঙকপা গুন অমা লৈরি… ঐখোয়না য়াম্না য়াংনা অনৌবা তেক্নোলোজি লৌশিনবা ঙম্মী। ঐখোয়না মশা মরোমদোম তেক্নোলোজি অসি ঐখোয়গী নুমিৎ খুদিংগী পুন্সিদা পুশিনখি- ই-সঞ্জিবানি অসি মসিগী অফবা খুদম অমনি। মীয়ামগী পুন্সি হেন্না লাইহনবদা কমদৌনা তেক্নোলোজি ফজনা শীজিন্নবা য়াবগে হায়বা মসিনা তাক্লে। হৌজিক ফাওবদা প্লেতফোর্ম অসিগী খুৎথাংদা তেলি-কন্সলতেন্সন করোর ৫০ রোম পাংথোকখিবদা ঐ অপেনবা ফাওই। মসি তেক্নোলোজিগী তৌবা ঙম্বা, ঐখোয়গী দোক্তরশিংগী কৎথোকপগী ৱাখল্লোন অমসুং ঐখোয়গী মীয়াম্না থবক অসিদা থাজবা থম্বগী অফবা খুদম অমনি।

মরুপশিং,

ঙসিদি, ই-সঞ্জিবানিগী থবক লৈবাক অসিগী খ্বাইদগী মনুং-হুঞ্জিনবা মফমশিং ফাওবদা য়ৌরে। মসিগী কান্নবা ফংলবা মীওইশিংগী ৱারিনা অদোম পুক্নিং নুংশিহনগনি। অন্দমান অমসুং নিকোবর ইথৎশিংদা, বারাতাং ইথৎতা লৈবা জৱারা ত্রাইবকী ওহো-তাহানে লাইহৌ য়াম্না কন্না হৌখি… শ্বর হোনবসু য়াম্না ৱাখি। তাঞ্জা অদুদা, লমদম অদুগী হেল্থ ৱার্করশিংনা দোক্তর অমগা তান্নবা ই-সঞ্জিবানি শীজিন্নখি। অঙাং অদু ন্যুমোনিয়া লৈখি; মহাক দোক্তরনা হেক য়েংবা হৌবদগী, মহাক্কী ফিবম য়াংনা ফগৎলকখি।

মরুপশিং,

লক্ষদ্বিপকী কালপেনিদা চহি ৬০ রোম শুরবা কুনহি কোয়া কৌবা নুপা অমা খঙহৌদনা নারকখি। ই-সঞ্জিবানিগী খুৎথাংদা সমুদ্র লান্না কবারাত্তিদা লৈবা অফবা দোক্তর অমগা পাউ ফাওনখি। দোক্তর অদুনা লোকেল মেদিকেল তিম লমজিংখি, মদুনা কুনহি কোয়াগী অনাবা খর ফবদা মতেং পাংখি। লাদাখকী জান্সকরদা মহাক্না মীরোল্লিঙৈদা কুনজাং দোলমা খুদোংচাদবা খর মায়োক্নখি, ফিবম অদুগী মনুংদা, মহাক্কীদমক ই-সঞ্জিবানিনা থবক তৌখি, খুদক্ত অহৈবা দোক্তর অমনা মতেং পাংখি। নাগালেন্দগী পেরেন্দা মুসেম কৌবা চহি ১২ শুরবা নুপামচা অমা নাকোং নাবদগী লাইহৌ তৌখি, মহাকসু ই-সঞ্জিবানিগী কান্নবা লৌখি। দোক্তরনা মহাক্কী ফিবম ফজনা খঙদোকপা ঙমখি অমসুং চুনবা হিদাক থাখি।

মরুপশিং,

অচম্বা হকচাং চেক তৌনবা দোক্তর অমগী মনাক্ত চৎপদা মতম চঙবা অমসুং অৱাবা কয়া মায়োক্নবা মতম অমা লৈরমখি। ঙসিদি, লৈবাক শীনবা থুংনা অয়ুস্মান অরোগ্যা মন্দির ১৯০,০০০ রোম্না মীয়ামগী পুন্সিদা অনৌবা খুদোংচাবশিং ফংহল্লে। হায়রিবা অরোগ্যা মন্দিরশিং অসি লম্বী অমদা, খুঙ্গংগী পঞ্চয়তশিংগীদমক ৱেলনেস সেন্তরশিং ওন্থোক্লে।

হৌজিক খুঙ্গংগী মীয়াম্না হকচাং ফনা লৈনবা চাংনাইনা চেক অপ তৌবদা ই-সঞ্জিবানিনা মরুওইবা থৌদাং অমা লৌরে।

ঐগী নুংশিরবা ইরৈচাশিং,

থা অসিগী অঙনবা শরুক্ত ঐ চেন্নাইদা চৎখি। মফম অদুদা ঐনা লৈবাক অসিগী সাইন্তিষ্টশিং, থিজিল্লোয়শিং অমসুং নহা ওইরিবা হৈথোই-শিংথোইরবা মীওইশিং উনখি। তুংদা মীওইবা খুন্নাইদা অওনবা পুরকপা ঙমগদবা হিরমশিংদা হৌজিক ঐখোয়গী নহারোলশিং থবক শুরি; অসিগুম্বা হিরম অমদি ‘ব্রেন রিছার্স’ নি। মসিগা মরী লৈনবা, ‘সুধা গোপালকৃষ্ণন ব্রেন সেন্তর’ আই.আই.তি মাদ্রাসদা ঐনা শঙ্গাখ্রে। সেন্তর অদু মালেমগী থাক্ত লৈবা ব্রেন-ইমেজিং তেক্নোলোজি প্লেতফোর্ম অমা ওইনা শেমগৎলে। মসিগী খুৎথাংদা, মীওইবগী ব্রেন ১০০ মেপ লৌনবা অমসুং থিজিন্নবা পান্দমগা লোয়ননা মমি য়াম্না শেংবা মীওইবগী ব্রেনগী ৩-দি ইমেজশিং পুথোক্কনি। মসি মালেমদা অহানবনি অমসুং মসিদা পরাম শক্তি সুপরকম্পুতর শীজিন্নরি।

মরুপশিং,

ব্রেন সেন্তর অসি লিংখৎপদা সরকারগা লোয়ননা পুন্না থবক তৌমিন্নবদা লৈবাক অসিগী উদ্যোগনা অচৌবা থৌদাং অমা লৌখি। রিছার্স সেন্তর অসি মতেং পাংনবা আই.আই.তি এলুম্নাই অমসুং ওজা কয়া পুনখি। মীওইবগী ব্রেন অসি অচৌবা সাইন্তিফিক অমা হিরম অমা ওইবনা প্রোজেক অসি য়াম্না মরুওই। হৌজিক ফাওবা, অলজাইমরস অমসুং দেমেনসিয়াগুম্বা ফিবমশিং লাইয়েংবা ঙমদ্রি। মরম অদুনা, কমদৌনা মীওইবগী থোপনা থবক তৌবগে হায়না সাইন্তিফিক ওইনা হেন্না মমুৎ তানা খঙবা অসিনা তুংদা খুদোংচাবা কয়া পীগনি। মীওইবগী থোপ ১০০ দগী ফংলকপা দেতা অসি তোঙান তোঙানবা থিজিনবা হিরমশিংগীদমক লেম্না ফংহনগনি।

মরুপশিং,

অৱাংবা থাক্কী থিজিনবদা হকচাং কয়াৎ কৎথোকপনা মরুওইবা থৌদাং অমা লৌরি। লৈখিদ্রবা মতুংদা মখোয়গী হকচাং কয়াৎশিং কৎথোক্নবা ৱারেপ লৌরবা মীওইশিংনা অতোপ্পা কয়াগী পুন্সি কনবা খক নত্তনা থিজিনবগী থবকসু পাংথোকপা ঙমহল্লে। অসিগুম্বা খুদম অমদি মধ্য প্রদেসকী নরমাদাপুরমদগী সিবানি জিনি। সিবানি জি লম্বীগী খুদোংথিবা অমা থোকখি; মসিনা মহাক্কী ইমুং য়াম্না ৱাহনখি, অসিগুম্বা ফিবম অসিদা ফাওবা, সিবানি জিগী হকচাং কয়াৎ কৎথোক্নবা ৱারেপ লৌখিবা অসিনা ঐখোয় খুদিংমক পুক্নিং থৌগৎলে। সিবানি জিগী ইমুংনা লৌখিবা ৱারেপ অসিনা খুন্নাই অমসুং লৈবাক অসিদা শক্তি লৈরবা পাউজেল অমা পীরে। মীওইবগী খনবা অসিগুম্বা খোঙথাং অমনা ইমুং অমগী পুন্সিদা হরাওবা পুরক্কনি, লোয়ননা থিজিনবগী থবকশিংদা মতেং চাউনা পাংগনি।

ঐগী নুংশিরবা ইরৈচাশিং,

ঐগী চেন্নাই খোঙচৎকী থৌদোক অতোপ্পা থৌদোক খরসু ঐ লিগে। ঐনা আই.আই.তি মাদ্রাসদা চৎপদা মেত্রোদা ঐনা অহানবা ওইনা নহারোলশিংগা উনখি। খুদোংচাদবশিং কোকহন্নবা অনৌবা পাম্বৈশিং পুথোক্নবা কমদৌনা ঐখোয়গী নহারোলশিংনা থবক তৌরিবগে হায়বা উবদা তশেংনা থম্মোয় পেনখি। ঐনা উনখিবা ষ্টার্দঅপশিংগী মনুংদা অমনা সনা লৈবা মতমদা য়ানশিনবা থিংবদা মতেং পাংনবা সনা মগুন লেপ্পদা মীৎয়েং চঙবা ঐনা থেংনখি। অতোপ্পা নহারোল কাংবু অমনা নমথাক তৌদুনা বেঙ্কদগী শেন লৌথোকখিবা য়াংনা অমুক লৌশিনবা ঙম্বা প্লেতফোর্ম অমা পুথোক্নবা হোৎনখি। অতোপ্পা কাংবু অমনা সর্ভাইকেল কেন্সর খঙদোকপদা কমদৌনা এ.আইনা মতেং পাংগনি হায়বা থিদোকখি।

মরুপশিং,

আই.আই.তিদা খন্নবদা ‘দিপ-তেক্ত’ মীৎয়েং থমখি। আই.আই.তি মাদ্রাসদা ইনকুবেসনগী থবক্না হায়রিবা ষ্টার্দ-অপশিং শৌগৎলে। মখোয়গী মরক্ত ষ্টার্দ-অপ অমনা সমুদ্র মথক্ত পাইবা ঙম্বা ইলেক্ত্রিক গারি অমা শেমগৎলি। অতোপ্পা ষ্টার্দ-অপনা দ্রোনশিং অমসুং ইলেক্ত্রিক গারিশিংগী ফাষ্ট-চার্জিং বেত্তরিশিং শেমগৎলি। অতোপ্পা কাংবু অমনা দিফেন্স তেক্নোলোজিদা এ.আই শীজিন্নবগী মতাংদা থবক পায়খৎলি।

মরুপশিং, 

মখোয়না অফবা ফিবম অমসুং মতেং ফংবদগী ঙসি ঐখোয়গী নহারোলশিংনা অসিগুম্বা অফবা থবকশিং পাংথোকপা ঙম্লিবনি। মসি পাংথোক্লমদ্রবদি ঐখোয়গী লৈবাক্ত হৈথোই-শিংথোইবা মীওইগী অৱাৎপা অমা লৈরমগনি। ওক্তোবর ৩১ দা, ঐখোয়না ভারতকী শক্নাইরবা সাইন্তিষ্ট নরিন্দর সিংহ কপানিগী ১০০শুবা মপোক কুমওন পাংথোক্কনি। মালেম্না মহাক ‘ফাদর ওফ ফাইবর ওপ্তিক্স’ হায়না খঙনরি। মহাক পঞ্জাবকী মোগা জিলাদা পোকখি। অপাবা ফাইবরশিং ফাওদুনা মঙাল থাবগী তেক্নোলোজিদা মহাক্না থিজিনবদগী ই-পাউ ফাওনবগী লমদা অনৌবা মাইকৈ অমা লাকখি। ফাইবর ওপ্তিক্সশিং য়াওদনা ঙসি ঐখোয়না হিংলিবা ইন্তরনেত অমসুং দিজিতেল কম্মুনিকেসনগী যুগ অসি ৱাখলদা ফাওবা খনবা য়াম্না ৱাগনি।

থৌরম অসিদা ঐখোয়না নরিন্দর সিংহ কপানিদা ইকায়খুম্নবা উৎখি। মহাকগুম্বা সাইন্তিষ্টকী মরমদা পানবা অমসুং তম্নবা ঐখোয়গী নহারোলশিংদা ঐনা তকশিল্লি অমসুং মখোয়দগী ইথিল লৌগদবনি।

মরুপশিং,

ওক্তোবর ৩১ দা সরদার ভাল্লভবাই পতেলগী মপোক নুমিত্ত লৈবাক অসিনা এক্ত দিবস পাংথোক্কনি। থৌরম অসিদা লৈবাক শীনবা থুংনা অপুনবগী লমজেল পাংথোক্কনি। অপুনবগী লমজেল অসিনা লৈবাক অসিদা ঐখোয়গী অপুনবা অমসুং ঐখোয়গী ৱাশক অমুক হন্না উৎনবা মরুওইবা খুদোংচাবা অমা পীরে। অদোমগী ইমুং-মনুং, মরুপশিং অমসুং অদোমগী অকোয়বদা লৈবা মীওইশিংগা লোয়ননা চহি অসিগী অপুনবগী লমজেল শরুক য়ানবা ঐনা ময়ামদা হায়জরি।

মরুপশিং,

ভারতনা তকশিনবদগী, ২০২৩ দা মালেমগী মিল্লেতশিংগী চহি হায়না থৌরম পাংথোকখিবা অদু অদোম নিংশিংলমগনি। মসি মালেম শীনবা থুংনা থৱায় য়াওনা শরুক য়াখি। থবক অসিগী খুৎথাংদা, কমদৌনা মিল্লেতশিং ঐখোয়গী চৎনবীদা মরা তাবগে হায়বা মীয়াম খঙলে। অৱাং-নোংপোক্তসু, মিল্লেত থাবগী ইনাকখুল্লবা চৎনবী অমা মতম কয়াগী মমাংদগী লৈরক্লি; অদুবু মতমগী মতুংইন্না, মীয়াম্না মসিদগী লাপথোকপা হৌরক্লে। হৌজিক ফিবম অসি অহোংবা লাক্লে।

মরুপশিং,

মেঘালয়গী ৱেষ্ট জেন্তিয়া হিলস জিলাদা খান্দুলি কৌবা খুঙ্গং অমা লৈ। মীরোল কয়া মিল্লেতশিং মখোয়গী চীঞ্জাক্কী তৎন-থানবা য়াদ্রবা শরুক অমা ওইদুনা লাক্লি। অদুবু মতম খর, মখোয় থাবা লৌমী মশিং হন্থরকখি। লৌমীশিংগী মরক্ত, খুঙ্গং অদুদগী নুপী অনিনা অনৌবা থবক অমা হৌদোকখি; মখোয়না মিল্লেত্তগী অনৌবা পোৎথোকশিং শাবদা মীৎয়েং থমখি। মিল্লেতশিং মগুন হেনগৎহন্দুনা, মখোয়না কুকিশিং, কেকশিং, মুফফিনশিং অমসুং অঙাংগী চীঞ্জাক ফাওবা পুথোকখি। মসিদগী মিল্লেতশিংনা শাবা পোৎথোকশিং পোৎশিৎ হেনগৎলকখি অমসুং মিল্লেতশিং পাম্নবা হেনগৎলকখি।

লৌমীশিংগী মরক্ত অমুক হন্না মিল্লেতশিং থাবসু হৌরে। মেঘালয়গী ৱেষ্ট গারো হিলস জিলাদা লৈবা সাদোলপারাদা অনৌবা থবক খর পায়খৎলি। মফম অদুগী লৌমী চেকজিং সঙমানা মিল্লেতশিংগী মরুওইবা খঙখি, অনৌবা পাম্বৈশিং শীজিন্নদুনা মিল্লেতশিং থাবা হৌখি। মসিনা শেন্থোক লম্বী হেনগৎহনবতা নত্তনা খুঙ্গং মনুংদা ৱাখল তাবসু হেনগৎহল্লে। নাগালেন্দগী কোহিমাদা কেজোমা কৌবা খুঙ্গং অমদা চহি ১০ হেন্না মিল্লেতশিং থাবা লেপখ্রে।

মসিগী ফল ওইনা, অপুনবা মীরোল অমা মহৈ-মরোং অসি মশক খঙদ্রে…মতম অমদা মখোয়গী মপা-মপুশিংনা থারম্বা মহৈ-মরোং অমা খুঞ্জাশিংনা কাউরে। ২০২৪ দা মফম অদুগী মীয়াম্না মিল্লেতশিং থাবা অমুক হৌখি অমসুং ২০২৫ দা কেজোমাদা খুঙ্গং অসিগী অহানবা মিল্লেত ফেষ্টিবেল পাংথোকখ্রে। হৌজিক লমদম অসিদা মিল্লেতনা শাবা পোৎথোকশিং পাম্নবা য়াংনা হেনগৎলক্লি।

মরুপশিং,

মিল্লেত থাবগা মরী লৈনবা খুদমশিংনা মরুওইবা পাউজেল অমা চেল্লি। কমদৌনা ঐখোয়গী নহারোলশিংনা থায়নগী মহৈ-মরোশিংগা অনৌবা খুদোংচাবশিংগা শম্নহনবগে হায়বা অমসুং মখোয়গী হেরিতেচ ঙাকপগা লোয়ননা কমদৌনা ঐখোয়গী খুঙ্গংসিং নুংঙাই য়াইফবগী লম্বীদা চঙশিনবগে হায়বা খুদমশিং অসিনা উৎলে।

ঐগী নুংশিরবা ইরৈচাশিং,

হয়েং ওক্তোবর ২৬ দা মহর্ষি বাল্মীকিগী মপোক কুমওন থোক্লে। চহি লিশিং কয়া হৌখ্রবসু, মহর্ষি বাল্মীকিগী রমায়ান্না মখা তানা ঐখোয়গী অনৌবা লৌশিং কয়া পীরি।

রমায়ানগী খুৎথাংদা, মহর্ষি বাল্মীকিনা ঐখোয়দা পুন্সিগী মরুওইবা পারাশিং তম্বীখি… অমরোমদা লেপ্তনা হোৎনবগী কান্নবা মহাক্না তম্বীখি; অমরোমদা মীয়ামগী থবক তৌবা, মীওইবগী মীনুংশি অমসুং খুন্নাই নুংশিন্না হিংমিন্নবগী মরুওইবসু মহাক্না পনখি। বালমিকি রমায়ান্দা ভগবান রাম অসি অসিগুম্বা গুনশিংনা য়োমখি-ভগবান রাম্না মাতা সাবারিগী নুংশিবা অমসুং কৎথোকপা লৌশিনখি… নিসাদ্রজগা মহাক্ক লৈনবা মরুপ-মপাংগী মরী ইকায়খুম্নখি।

খুদিংমক্কা পুন্না চৎমিন্নবগী ৱাখল্লোন- হায়রিবা অচুম্বা ফিদমশিং অসিনা মখা তানা ঙসি ফাওবা ঐখোয় লমজিংলি। মসিগী ৱাখল্লোন অসি অয়োধ্যাদা লৈবা অচৌবা রাম মন্দিরদা মমি তারে, লাইশঙশিং অসি মহর্ষি বাল্মীকি, নিসাদ্রাজ অমসুং মাতা সাবারিদা কৎথোক্লে। অয়োধ্যাদা এয়রপোর্তকী মমিং মহর্ষি বাল্মীকিগী লৌদুনা থোনবদা ঐ অপেনবা ফাওই। অসিগুম্বা থবকশিং অসিনা মীয়ামগী থবক তৌবা, খুন্নাইগী নুংশিনবা অমসুং মীওইবগী অৱাবা খঙবগী ঐখোয়গী অচৌবা চৎনবী মপাঙ্গল কনখৎহল্লে।

ঐগী নুংশিরবা ইরৈচাশিং,

মুৎপা নাইদ্রবা দাগফম অমা থম্লম্বা অসিগুম্বা শক্নাইরবা মীওই কয়া ভারতকী লৈবাক লৈহাওদা পোকখ্রে। অসিগুম্বা শক্নাইরবা মীওই অমদি ভাই পরমানন্দ জিনি। নবেম্বর ৪ দা, ঐখোয়না মহাক্কী ১৫০ শুবা মপোক কুমওন থৌরম পাংথোক্কনি।

ভাই পরমানন্দ জিগীদমক ইথিল অমসুং অচুম্বা ফিদমশিংগী মরুওইবা হৌরকফম অমদি মহাক্না অর্য়া সমাজগা অচেৎপা মরী লৈনবা অসিনি। ২০শুবা চহিচাগী অঙনবদা, অর্য়া সমাজগী থবক তৌনবা মহাক খা অফ্রিকাদা চৎপদা মহাক্না বাপু থেংনখি। মহাক্না গিনিয়াদা গিরমিতিয়া কাংলুপ মরক্ত থবক তৌখি, মসি মতম অদুদা অর্য়া সমাজগী মরুওইবা মফম অমনি। গিনিয়াদা ঐনা চৎপদা, ঐনা অর্য়া সমাজ মেমোরিয়েলদা চৎপগী খুদোংচাবা ফংখি।

মরুপশিং,

নিংতম ইহৌদা ভাই পরমানন্দ জিনা মরুওইবা থৌদাং অমা লৌখি। লাল হর দয়াল জি অমেরিকাদা চৎনবা ভাই পরমানন্দ জিনা তকশিনখি হায়রি। মহাক ঘাদার পার্তিগী ফাউন্দিং মেম্বরশিংগী মরক্ত অমনি। নিংতম্নবা ইহৌদা মহাক্না অকনবা ইথিল পীবদগী বৃতিসনা মহাক কালা পানিদা থাখি। মহাক্না ‘অপবেতি: কালে পানি কি করাবাস কহানি’ কৌবা লাইরিক অমা ইখি। নিংতম লান্মীশিংগী কৎথোকপা নিংথিনা খঙনবা লাইরিক অসি শোইদনা পাগদবনি। মহাক্কী ফাদোক লোইরবা মতুংদা, ভাই পরমানন্দ জিনা লাইরিক-লাইশুগী হিরমদা মাই ওনশিনখি। মহাক্না বীর ভগৎ সিংহ ফাওবা তম্বীখি হায়বা খঙবদা অদোম অঙকপা ফাওগনি।

মতুং তারকপা চহিশিংদা, মহাক্না চহি কয়া হিন্দু মহাসভাগা পুনখি। মহাক্না গিনিয়াদা গান্ধীজিগা উনখিদগী হৌরগা ঘাদার ইহৌদগী অন্দমানদা লৈবা ফাওবদা, মহাক্কী গুনশিং ইথিলগী অচৌবা হৌরকফম অমা ওইনা লৈখি। ঐনা ভাই পরমানন্দ জিগী মফমদা ইকায়খুম্নবা উৎচরি। মখোয়গী মরমদা খঙনবা অমসুং অতোপ্পশিং ইথিল পীনবা ঐনা নহারোলশিংদা তকশিল্লি।

ঐগী নুংশিরবা ইরৈচাশিং,

লাক্লিবা নুমিৎশিং দিৱালি, ছাথ অমসুং অতোপ্পা কুহ্মৈশিংগী হরাও-তয়াম্বনা থল্লগনি। হকচাং ফনা অমসুং অশোই-অঙাম য়াওদনা লৈবগা লোয়ননা অদোমগী অপুনবা ইমুং-মনুংগা লোয়ননা হায়রিবা কুহ্মৈশিং অসি শরুক য়াবীয়ু অমসুং হরাওবদা অতোপ্পশিং য়াওহল্লু। লাক্লিবা কুহ্মৈশিংগীদমক অদোম ময়ামগী মফমদা ঐনা ঐগী য়াইফ পাউজেল পীজরি।

মতম পুম্নমক্ত, অদোমগী মেসেজশিং অমসুং পাউতাকশিং লৌনবা ঐ ঙাইরি। অদোমগী পাউতাকশিংনা মন কি বাত্ত অনৌবা হিরমশিং অমসুং অনৌবা মাইওনশিং পী। ঐগী ইরৈচাশিংদগী অনৌবা থবক অমসুং পুক্নিং থৌগৎনিঙাই ওইরবা ৱারিশিংগা লোয়ননা ঐখোয় অমুক মথংগী থাদা উনরসি।

অদোম থাগৎচরি।

খুরুমজরি।

***