ভারতকী প্রধানমন্ত্রী

মন্ত্রীমন্দলদা ঐগী খোংলোই ওইরিবা দাক্তর হর্শবর্ধনজী, মালেম পুম্নমক্কী সাইন্তিফিক কম্যুনিতীগা লোইনরিবা মরূপশিং, বিজ্ঞান ভারতীগী মীহুৎশিং, লৈবাক অসিগী তোঙান তোঙানবা মফমশিংদগী পুল্লরিবা স্তুদেন্ত, পার্তিসিপেন্তশিং, ইবেম্মা অমসুং ইবুংঙোশিং!

ঙসি ঐনা ঐগী মরূপশিংবু তেক্নোলোজীগী পাম্বৈনা উনজবা অসিদা য়াম্না নুংঙাইবা পোকই, অদুবু ঐহাক, মফম অসিদগী মসি ফংজরি।

মরূপশা,

ইন্দিয়া ইন্তর্নেস্নেল সাইন্স ফেস্তিবেলগী ৫শুবা এদিশন অসি, জ্ঞান বিজ্ঞানগী লম খুদিংমক্তা মীওইবগী সেবা তৌরিবা অফাওবা মীওইশিংগী পোক্নফম অসিদা পাংথোক্লি। ফেস্তিবেল অসি নবেম্বর ৭তা সি.বি, রমন অমসুং নবেম্বর ৩০দা জগদিস চন্দ্র বোসকী মপোক কুমওন পাংথোক্কদৌরিবা মতম অসিদা পাংথোক্লি।

সাইন্সকী অসিগুম্বা গ্রেত মাস্তরশিংগী লিগেসীবু সেলেব্রেত তৌবা অমসুং ২১শুবা চহি চাদা মখোয়দগী ইথিল লৌজনবগীদমক্তা মসিদগী হেনবা তাঞ্জা অতৈ অমমুক লৈররোই। মরম অসিনা, ফেস্তিবেল অসিগী থীম, রাইজনঃ রিসর্স, ইনোবেসন এন্দ সাইন্স এম্পাৱরিং দ নেসন হায়না থোনবীবগীদমক্তা শিনবী-লাংবীরিবশিংবু ঐগী মাইকৈদগী হন্না হন্না নুংঙাইবা ফোংদোকচরি। থীম অসি ২১শুবা চহি চাগী ভারতকী মতুং ইনবনি অমসুং মসিদা ঐখোয়গী তুংলমচৎকী মহাও অদু চেল্লিবনি।

মরূপশা,

মালেম অসিদা সাইন্স অমসুং তেক্নোলোজী য়াওদনা চাউখৎখিবা লৈবাক অমত্তা লৈতে। ভারতকীসু মসিদা য়াম্না লিরবা মরী য়াওরি, ঐখোয়না মালেমদা অফাও অফাওবা সাইন্তিস্ত কয়ামরুম পীখ্রে। ঐখোয়গী চাউথোকচনীংঙাইনি। ঐখোয়গী হৌজিক্কী মতম অসি সাইন্স অমসুং তেক্নোলোজীগী ইথিলনা পীক থল্লি। পুম্নমকশিং অসিগী মরক্তা ঐখোয়গী থৌদাং শরুক কয়া অমা হেনগৎলক্লি। থৌদাংশিং অসি মীওইবগীসুনি অমসুং মদুদা সাইন্স অমসুং তেক্নোলোজীগা লোইননা চৎপগী অপাম্বসু য়াওই। থৌদাং অসিবু খঙলদুনা সরকারনা ইনভেন্সন অমসুং ইনোবেসন, অনিমক্কীদমক্তা ইন্সতিত্যুস্নেল সপোর্ত পীরি।

মরূপশা, লৈবাক অসিদা সাইন্স অমসুং তেক্নোলোজীগী ইকোসিস্তেম য়াম্না চেৎহনবা তাই। কান্নগদবা অমদি মীরোল অমদগী মীরোল অমদা ইথিল পোকহনগদবা অদুগুম্বা ইকোসিস্তেম অমা ওইগদবনি। ঐখোয় মাইকৈ অসোমদা চংশিল্লি।

তরুকশুবা ক্লাসতগী হৌরগা মহৈরোইশিংনা অতল তিঙ্করিং লেবতা চৎনবা অমসুং কোলেজদগী হেক থোরকপগা মদুবু ইনক্যুবেসনগী, স্তার্তঅপকী ইকোসিস্তেম অমা ফংহন্নবা ঐখোয়না হোৎনরি। ৱাখল্লোন অসিগা লোইননা য়াম্না তেনবা মতমদা লৈবাক অসিদা অতল তিঙ্করিং লেব লিশিং ৫দগী হেন্না শাখ্রে। মসিদা নত্তনা অতল ইনক্যুবেসন সেন্তর ২০০দগী হেনবসু শেম শাখ্রে। ঐখোয়গী মহৈরোইনা, লৈবাক অসিগী শিংনবশিংবু মখোয়গী মওংদা সোল্ব তৌনবা, মসিগীদমক্তা মহৈরোই লাখ লাখতা তোঙান তোঙানবা হেকাথোনশিংদা শরুক য়ানবা তাঞ্জা পীরি। মসিদা নত্তনা কাংলোনশিংগী মতুং ইন্না, শেলগী তেংবাংগী থোংদা স্তার্তঅপ লিশিং কয়াবু সপোর্ত তৌখ্রে।

মরূপশা,

ঐখোয়গী অসিগুম্বা হোৎনবশিং অসিগী মরমদগী হৌখিবা চহি ৩দা গ্লোবেল ইনোবেসন ইন্দেক্সতা ঐখোয় ৮১শুবা রেঙ্কতগী ৫২শুবা রেঙ্কতা য়ৌখ্রে। ঙসি ভারত অসি মালেমগী অহুমশুবা খ্বাইদগী চাউবা সক্সেসফুল স্তার্তঅপ ইকোসিস্তেম ওইখ্রে। মসিদা নত্তনা হায়র এজুকেসন অমসুং রিসর্সকীদমক্তসু অঙকপা তবক তৌরি। ঐখোয়না হায়র এজুকেসনগা মরি লৈনবা অনৌবা সংস্থান শেম্বগা লোইননা মখোয়গী ফংস্নেল ওতোনোমীসু হেনগৎহল্লে।

মরূপশা, ঙসি ঐখোয় পুৱারীগী মরু ওইরবা মাইকৈ অমদা লৈরি। চহি অসিদা ঐখোয়গী সংবিধান অসি চহি ৭০ শুগদৌরি। ঐখোয়গী সংবিধান্না সাইন্তিফিক তেম্পর শেমগৎপা অসি, ইরৈচা পুম্নমক্কী থৌদাংগা মরী লৈনহল্লে।

হায়বদি মসি ঐখোয়গী ফন্দামেন্তেল দ্যুতীগী শরুক অমনি। দ্যুতী অসি পাংথোক্নবগী, মতম পুম্নমক্তা নীংশিংদুনা লৈনবগী, ঐখোয়গী লাক্কদৌরিবা মীরোলশিংদা মসিগী মতাংদা খঙহনবা অসি, ঐখোয় পুম্নমক্কী থৌদাংনি।

সাইন্তিফিক তেম্পরগী মপাঙ্গল হেনগৎলিবা খুন্নাই অদুগী চাউখৎ খোংথাং অদুসু অদুক্কী মতিক খোংজেল য়াংই। সাইন্তিফিক তেম্পরনা অরানবদা থাজববু মাংহল্লি, অরানবদা থাজবা হন্থহল্লি। সাইন্তিফিক তেম্পরনা খুন্নাইদা মথৌ তৌবা হেনগৎহল্লি। সাইন্তিফিক তেম্পরনা চাংয়েং কয়া তৌবদা থৌনা হাপ্পি।

পোৎশক খুদিংমক্তা রিজনিং থি, লোজিক অমসুং ফেক্কী মতুং ইন্না মখোয়গী ৱারেপ পীননবগী ৱাখল পোকহল্লি অমসুং খ্বাইদগী মরু ওইবা ৱাফমদি, মসিদা ফীয়র ওফ অন্নোনবু শিংননবগী থৌনা লৈ। থাইনদগী মসিগী ফীয়র ওফ অন্নোনবু শিংননবগী থৌনা অসিমক্না অনৌবা পোৎলম কয়া পুথোকপদা মতেং পাংলি।

মরূপশা, ঐহাক নুংঙাইবা ফাওজৈ মদুদি ঙসি লৈবাক অসিদা সাইন্তিফিক তেম্পর অসি তোঙানবা থাক অমদা লৈরে। ঐ অদোমদা হন্দক্কী থৌদোক অমগী খুদম পীজগে। ঐখোয়গী সাইন্তিস্তশিংনা চন্দ্রয়ান-২দা য়াম্না কন্না হোৎনখি অমসুং মসিদগী থাজবা কয়া থমখি। অদবু লোইনমক থৌরাংগী মতুং ইন্নদি থোকখিদ্রে, অদুম ওইনমক মিশন অসি মাইদি পাক্লে।

মরূপশা,

মসি মিশন্দগী হেনবা ভারতকী সাইন্তিফিক্কী পুৱারীদা মরু ওইবা মায়োন অমা ওইবা য়াই। করম্না? ঐ অদোমদা হায়জগে। ঐনা সোসিয়েল মীদিয়াদা মহৈরোই কয়াগী মমা মপাশিংগী ত্বিৎ কয়ামরুম উখি। মখোয়না হায় মদুদি মখোয়না চহি য়াম্না নৌরিবা অঙাংশিংবুসু চন্দ্রয়ানগী মরমদা ৱারী শানবা তাখি। কনানা লুনর তোপোগ্রাফীগী মতাংদা ৱারী শানরম্মি, কনানা সেতলাইৎ ত্রেজেক্তরীগী মতাংদা ৱারী শানরম্মি। কনানা থাগী সাউথ পোলদা ঈশিং লৈরম্বা য়াবগী ওইথোকপা মরমশিংদা ৱাহং হংনরম্মি, কনানা লুনর ওর্বিৎকী মতাংদা ৱারী শানরম্মি। মমা মপাশিংদুসু অঙকপা পোক্লম্মি মদুদি অসুক চহি নৌরিবা অঙাংশিং অদুদা মোতিবেসন অসি কদাইদগী লাক্লিবনো। লৈবাক অসিগী অসিগুম্বা মমা মপা ময়াম অসিনা খল্লি মদুদি মখোয়গী মচাশিংদা লাক্লিবা ক্যুরিওসিতী অসিসু চন্দ্রয়ান ২গী মাই পাকপা অদুমক্নি।

সাইন্সকী মতাংদা ঐখোয়গী য়ং স্তুদেন্তশিংদা হৈনবীগী অনৌবা ইচেল অমা লাকপা উরে।

শক্তি অসিবু, ইনর্জী অসিবু ২১শুবা চহি চাগী সাইন্তিফিক এনভাইরনমেন্তেলদা মাইকৈ চুম্না পুবা, প্লেৎফোর্ম পীবা, অসি ঐখোয় পুম্নমক্কী থৌদাংনি।     

মরূপশা,

ঐখোয়গী অসিদা হায়নৈ

তত্ রূপং য়ত্ গুণাঃ

সাইন্স ফোর সোসাইতীগী ৱাহন্থোক করিনো, মসি খঙনবগীদমক ঐখোয় ৱাহং খরগী পাউখুম পীবা তাই। পুম্নমক্না খঙি মদুদি প্লাস্তিক্তগী থোকহনবা পোলুসনগী ফিভম করি ওইবগে।

ঐখোয়গী সাইন্তিস্তশিংনা প্লাস্তিক্কী মহুৎশিনবা ঙমগদবা অসিগুম্বা স্কেলেবল অমসুং কোস্ত এফেক্তিব মেতরিয়েল শাবগী শিংনবা মায়োক্নবা ঙমগদ্রা? ইনর্জীবু, ইলেক্ত্রিক্তসিতীবু স্তোর তৌনবগী হেন্না ফবা থৌওং পুথোকপগী শিংনবা মায়োক্নবা ঙমগদ্রা? সোলর পাৱর শিজিন্নবা হেনগৎহন্নবা অদুগুম্বা পাম্বৈ পুথোকপা ঙমগদ্রা? ইলেক্ত্রিক মোবিলিতীবু মীচম মীয়ামদা য়ৌহন্নবগীদমক বেতরী অমসুং অতোপ্পা ইনফ্রাস্ত্রকচরগা মরি লৈনবা ইনোবেসন ঐখোয়না পাইখৎপা ঙমগদ্রা?

মরূপশা,

ঐখোয় মসি খনবা তাই মদুদি ভারত মচা করোর কয়াগী পুন্সিদা লাইথোকহন্ননবা ঐখোয়না ঐখোয়গী লেবশিংদা করি তৌগনি। ঐখোয়না লম লমগী থাক্তা ঈশিংগী অৱাবশিং অসিগী পাম্বৈ পুথোকপা ঙমগদ্রা? করম্না ঐখোয়না মীয়ামদা থক্ননবা অফবা ঈশিং ফংহনবা ঙমগদগে?

হেল্থকেয়রদা চংবা চাদিং হন্থহনবা ঙম্নবা ঐখোয় করিগুম্বা পোৎ পুথোকপা ঙমগদ্রা? ঐখোয়না পুথোকপা অদুনা লৌমীশিংদা কান্নহনবা ঙমগদ্রা, মখোয়গী চাগা হেনগৎহনবা ঙমগদ্রা, মখোয়গী থবক্তা মতেং পাংবা ঙমগদ্রা?

মরূপশা,

মীয়ামগী পুন্সি লাইথোকহন্নবগীদমক সাইন্স করম্না শিজিন্নবা ঙমগনি হায়বদু ঐখোয় খনগদবনি। অমসুং মরম অসিনা সাইন্স ফোর সোসাইতীগী মগুন য়াম্না লৈ।

সাইন্তিস্ত পুম্নমক্না, লৈবাক মচা পুম্নমক্না ৱাখল্লোন অসিগা লোইননা মাংদা চখৎলবদি লৈবাক অসিগীসু কান্নবা ফংগনি, মীওইবা খুন্নাইগীসু কান্নবা ফংগনি।

মরূপশা,

অতোপ্পা মরু ওইবা ৱাফম অমসু অদোম নীংশিংবীগদবনি। ঙসি ঐখোয় য়াম্না থুবা তাইবং অমদা হিংলি। ঐখোয় মিনিৎ অনিদা নুদল্স অমসুং মিনিৎ ৩০গী মনুংদা পিজ্জা পাম্মি। অদুবু সাইন্তিস্তশিং অমসুং সাইন্সকী থৌওংশিং শিজিন্নদুনা ঐখোয় য়াম্না থুবা চৎনবী লৈবা ৱাখল্লোন থমলুবা য়াবা নত্তে।

মরূপশা, ঐখোয় পুম্নমক্না ময়েক শেংনা খঙই মদুদি সাইন্স অসি পোৎশক অনিখক য়াওদনা ওইবা য়াদে। পোৎশক অনি অদুদি সমস্যা অমসুং তোইনা শিজিন্নবা। করিগুম্বা সমস্যাদুবু লৈত্রবদি, পুম্নমক পর্ফেক্ত ওইরবদি লাংতক্নবা অদু লৈররোই। লাংতক্নবা য়াওদনা অনৌবা পোৎ অমা পুথোকপগী ৱাখল পোক্লোই।

অদুনা, করিগুম্বা থবক অমা ইহান হান্না তৌবা মতমদা মদু পর্ফেক্ত ওইবগী ওইথোকপা য়াম্না নেম্মি। কয়ারক হন্না পুক্নীংনা পামজবা ফল অদু ফংবা ঙমদে। তশেংনমক্তি মসি মাইপাক্তবা নত্তে, মাই পাকপগী খোংচৎতা মরু ওইবা খোংথাং অমনি। মরম অসিনা সাইন্সতা ফেলর লৈতে, শুপ্নগী ইফোর্ত লৈ, এক্সপেরিমেন্ত লৈ, অমসুং মমৈথংদা মাই পাকপা ওই। ৱাফমশিং অসিবু খঙজিনবীরদুনা অদোম্না মাংদা চখৎপীরবদি সাইন্সকী লমদসু অদোমদা খুরৌ থাংলক্লোই অমসুং পুন্সিদসু কৈদৌনুংদসু অপনবা থোক্লোই। তুংলমচৎকীদমক্তা য়াইফ–পাউজেল পীজবগা লোইননা, অমসুং থৌরম অসি মাই পাকপগা লোইননা মখা চৎথবা ওইরসনু, ঐ ঐগী ৱাহৈ মতাং অসিদা লোইশিঞ্জরি।

হন্না হন্না থাগৎচরি!!!