ভারতকী প্রধানমন্ত্রী

ফম্বাকথক্তা লেংশিনবিরিবা শক্নাইরবশিং,

ভারত অমসুং মপাল লমদগী লেংবিরক্লিবা মীথুংলেনশিং,

ইচল-ইচে অমসুং মরূপ মপাংশিং,

ৱার্ল্দ সস্তেনেবল দিব্লপমেন্ত সমিৎ হৌদোকপগী থৌরমদা শরুক য়াবা ফংজবা অসিদা ঐহাক নুঙাইবা ফাওই । মপাল লমদগী লেংবিরক্লিবা পুম্নমকপু: ভারত্তা তরাম্না ওকচরি । দিল্লিদা তরাম্না ওকচরি ।

সমিৎ অসিগা লোইননা সহর অসিগী পুৱারি অমসুং ফজরবা শক্তম অসি য়েংনবা মতম অদু অদোমগী মফমদা লৈগনি হায়না ঐহাক্না থাজবা থম্লি । সমিৎ অসি ঐখোয়গী ঙসিগীদমক অমসুং তুংগী মীরোলগীদমক সস্তেনেবল প্লানেত অমগীদমক ভারতকী কমিতমেন্ত অদুগী রি-ইনফোর্সমেন্তনি । ঐখোয়গী শাংলবা পুৱারি অমসুং ইং তপ্লবা মওং মতৌনা মীওইবা জাতি অমসুং মহৌশাগী মরক্তা অফবা মরী থম্লিবা লৈবাক অমগুম ঐখোয়না চাওথোকচৈ । ঐখোয়গী ত্রেদিস্নেল প্রেক্তিসশিং অদুনা সস্তেনেবল ওইবা পুন্সি মহিং অমা ফংহল্লি । ঐখোয়গী পান্দম অসি “মালেম অসি ঐখোয়গী ইমানি অমসুং ঐখোয়না মহাক্কী মচাশিংনি” হায়না ইপা ইপুশিংনা হায়বিরম্বা ৱাহৈ পরেং অসি ঙাক্না চৎপনি । খ্বাইদগী লিরবা ময়েক অমা ওইরিবা আথর্বা বেদদা ইরি

-মাতাভুমি: পুত্রোহনপৃথিব্যা:

মসিনা ঐখোয়গী থৌওংশিং অদুদা হিংদুনা লৈবদা ফিদম্নফম ওইরি । লৈরিবা লন-থুমশিং অমসুং রিসোর্স পুম্নমক মহৌশা অমসুং তাইবং মপুগীনি হায়বা ঐখোয়না থাজবা থম্মি । ঐখোয়দি শুপ্নগী লন-থুম অসিগী ত্রস্তীশিং অমসুং মেনেজরশিংনি । মহাত্মা গান্ধী মশামকশু মসিগী ত্রস্তীশিপকী ওইবা ফিলোসোফী অসিগী মায়কৈদা লৈখি ।

হন্দক্তা ফোংখিবা ২০১৪গী নেস্নেল জিওগ্রাফিক্স গ্রীনদেক্স রিপোর্তকী মতুং ইন্না মসিগী গ্রীনেস্ত কঞ্জুম্পসন পেতর্নগীদমক কঞ্জুমর চোইসকী এনভাইরোনমেন্তেল সস্তেনেবিলিতীদা ভারতনা মকোক থোংবা রেঙ্কতা লৈরে । চহি কয়াদগী, ৱার্ল্দ সস্তেনেবল দিব্লপমেন্ত সমিৎনা মালেমগী মফম খুদিংমক্তা মালেম ইমাগী শেংলবা ফিভম অদু ঙাক্তুনা থম্নবা ঐখোয়গী থবক থৌরমশিং অদু শন্দোক্তুনা য়ৌহল্লি । অমত্তা ওইনা মসিগী অপাম্বা অদু ২০১৫দা পেরিস্তা পাংথোকখিবা সিওপি-২১ দা উৎখি । ঐখোয়গী প্লানেত অসি ঙাক্তুনা থম্নবগী মায়কৈদা অমত্তা ওইনা থবক তৌমিন্ননবা লৈবাকশিংনা অমত্তা ওইনা লেপখি ।

মরূপশিং, ভারতনা ফ্রান্সকা লোইননা ইন্তরনেস্নেল সোলর এলাইন্স হৌদোকখি । হৌজিক্তি লৈবাক চামগা কুনমাথোইনা মসিগী মীহুৎ ওইরে । মতা চারগদি মসিনা পেরিসকী মথংদা অমত্তা ঙাইরবা মরুওইবা গ্লোবেল এচিবমেন্ত ওইগনি । নেস্নেল্লী দিতর্মিন্দ কন্ত্রীব্যুসন্সকী শরুক ওইনা ভারতনা ২০০৫দগী ২০৩০ ফাওবদা মসিগী জিদিপিদা ইমিসন ইন্তেনসিফাইগী চাং ৩৩দগী ৩৫দা হন্থহন্নবা ৱারেপ লৌরে । মহৌশাগী ফিভমদা শোকহল্লকপা য়াবা পোলুসনশিংগীদমক ক্লাইমেত জস্তিজতসু ঐখোয়না খোংথাং লৌখৎখিগনি । ভারত্তা ঐখোয়না ক্লিনর এনভাইরোনমেন্তকী খুত্থাংদা অফবা গবর্নান্স, তংদু লৈতাবা পুন্সি মহিংগী খুত্থাংদা ইজ ওফ লিবিংদা মীৎয়েং থম্লি । ক্লিন ইন্দিয়াগী কেম্পেন অসি দিল্লিগী স্ত্রিতশিংদগী হৌরগা লৈবাক্কী কাচিন কোয়া শিন থুংনা চৎথরি । লু-নানবনা মহিক মনাই চেলহন্দে, হকচাং ফনা লৈহল্লি, হেন্না ফবা ৱার্কিং কন্দিসন ওইহন্দুনা হেন্না ফবা ইনকম অমসুং পুন্সি ওইহল্লি । ঐখোয়গী লৌমীশিংনা এগ্রীকলচরেল ৱেস্তশিং অদু মৈ থাদোক্তুনা মাংহনবগী মহুৎ মগুণলৈবা ন্যুত্রেন্তশিং ওন্থোক্নবা পাক চাওরবা কেম্পেন অমশু হৌদোক্লে । মালেমবু লু নানবা মফম অমা ওইহন্নবা ঐখোয়গী ৱারেপ অমসুং ঐখোয়গী পার্তনরশিপ মখা তানা চৎথবা অদু উৎনবা ৱার্ল্দ এনভাইরোনমেন্ত দে ২০১৮ য়ুম্বু ওইবদশু ঐখোয় নুঙাইবা ফাওই । চাওনা মায়োক্নবা অমা ওইরক্লিবা ইশিং ফংদবগী ইশু অসি ৱারোইশিন পুরকপগী মথৌ তারিবা অদুশু ঐখোয়না খংলে । মরম অদুনা ঐখোয়না পাক চাওরবা নামামি গঙ্গে ইনিসিয়েতিব হৌদোক্লে । প্রোগ্রাম অসিনা ঐখোয়গী খ্বাইদগী মরুওইবা তুরেল ওইরিবা গঙ্গবু হান্নগী ফিভমদা পুরক্লগনি ।

ঐখোগী লৈবাক অসি লৌউবা লৈবাক্নি । লৌউবগীদমক্তা লেপ্পা নাইদনা ইশিং ফংহনবা মরু ওই । লৌবুক খুদিংমক্তা ইশিং ফংহন্নবা প্রধানমন্ত্রী কৃষি সিঞ্চাই য়োজনা হৌদোক্লে । ঐখোয়গী ফিদম্নিঙাই ওইবা ৱাহৈদি ‘মোর ক্রোপ, পর দ্রোপ’নি । য়ুনেস্কোগী মেন এন্দ বাইওস্ফিয়ার প্রোগ্রামগী মখাদা মসিগী বাইওস্ফিয়ার রিজার্ব তরানিপালগী মনুংদা তরাদা ভারতনা ইন্তরনেস্নেল রিকোগনিসন ফংলে ।

মরূপশিং,

মীপুম খুদিংমক্কী মফমদা অফবা গবর্নান্সকী কানবশিং ফংহনবদা ভারতনা মতম পুম্নমক্তা থাজবা থম্লি । ঐখোগী মিসন সবকা সাথ সবকা বিকাস অসি মসিগী ফিলোসোফী অসিগী এক্সতেন্সন অমনি । হৌজিক্তি ইলেক্ত্রিসিতী অমসুং মশা নান্না থোং থাকপগী সোলুসন অসি মরু ওইরে । ভারত অমসুং মপাল লমদা মীওই কয়ানা মসিগী সোলুসনশিং অসিগীদমক লান্থেংনরি । হকচাং শোক্নিঙাই ওইবা থোং থাকপগী মওং মতৌশিং শিজিন্নবনা ইন্দোর এয়ার পোলুসন থোকহল্লি । খুঙ্গংগী লমদমশিংদা চাকখুমগী মৈখুশিংনা হকচাং শোকহল্লি । মসিদা মীৎয়েং থম্দুনা ঐখোয়না ইনিসিয়েতিব অনি লৌখৎলে- উজ্জ্বলা অমসুং সৌভাগ্য । স্কিমশিং অসি হৌদোকখিবদগী মীওই লাখ কয়াগী পুন্সিদা কান্নবা ফংহল্লে । প্রোগ্রাম অনি অসিগা লোইননা, মখোয়গী ইমুং মনুংবু পীজ পীথক তৌনবা ইমাশিংনা উমংদগী অকংবা শীং থিরম্বা নত্রগা শন্থীগী কেক শারম্বা অদু তোকখ্রে । মদুগা মান্নবা মওংদা, সৌভাগ্য স্কিমগী খুত্থাংদা লৈবাক অসিদা লৈরিবা ইমুং খুদিংমকপু মৈ ফংহন্নবগী মায়কৈদা থবক তৌরি । মশা-মউ ফবা লৈবাক খক্তনা দিব্লপমেন্তকী মায়কৈরোমদা চংশিনবা ঙমগনি হায়বা অদু ঐখোয়না খংলে । মসিবু পুক্নিংদা থম্দুনা ঐখোয়না মালেমদা খ্বাইদগী চাওবা সরকারনা ফন্দ পুথোকপা হেল্থ স্কিম অমা হৌদোক্লে । প্রোগ্রাম অসিনা লাইরবা ইমুং লাখ কয়াদা মতেং ওইরগনি ।

মরূপশিং!

ভারত অসি গ্লোবেল কমুনিতীগী শরুক তরুক থোকপগী মনুংদা অমা ওইরি হায়বা ময়াম্না খংবিরে ।  ঐখোয়গী দিব্লপমেন্তকী মথৌ তারিবা অসি য়াম্না পাক চাওই । ঐখোয়গী পোবর্তী অমসুং প্রোসপেরিতীনা গ্লোবেল পোবর্তী অমসুং প্রোসপেরিতীদা মমী তাগনি । থবকশিং অসি পীখিবা মতমগী মাংওইননা অথুবা মতমদা লোইশিন্নবা ঐখোয়না ৱারেপ লৌরে । অদুম ওইনমক, মসি পুম্নমক অসি ঐখোয়না ক্লিনর অমসুং গ্রীনর ৱে অমদা পাংথোক্নবশু হাইরি । ময়ামদা খুদম খরা থমজগে । ঐখোয় অসি নহাশিংগী লমদম্নি । ঐখোয়গী নহাশিংদা থবক পীনবা ভারতপু গ্লোবেল মেনুফেকচরিং হব অমা শেমগৎনবা ঐখোয়না ৱারেপ লৌরে । মসিগীদমক্তা ঐখোয়না মেক ইন ইন্দিয়া কেম্পেন হৌদোক্লে । মালেমগী য়াম্না থুনা চাওখৎলক্লীবা মেজর ইকোনোমী অমা ওইবনা ঐখোয়গী মথৌ তারিবা ইনর্জী অসি য়াম্না পাক চাওই । ইং ২০২২ ফাওবদা রিন্যুয়েবল ইনর্জীদগী গিগা-ৱাট ১৭৫ লৌনবা ঐখোয়না প্লান তৌরি । মসিদা মনুং চল্লিবা অসি সোলর ইনর্জীদগী গিগা-ৱাট ১০০ অমসুং অতোপ্পা গিগা-ৱাট ৭৫ অদুনা নুংশিৎ অমসুং অতোপ্পা সোর্সশিংদগী য়াওরি । সোলর ইনর্জী পুথোকপদা মালেমদা ঐখোয়না খ্বাইদগী চাওবা মঙাশুবা লৈবাক ওইরি । মসিদা নত্তনা রিন্যুয়েবল ইনর্জী পুথোকপদা তরুকশুবা খ্বাইদগী চাওবা লৈবাকশু ওইরি । অর্বনাইজেসন হেঙ্গৎলকপগা লোইননা ঐখোয়গী ত্রান্সপোর্তেসনগী মথৌতাবা অদুশু হেঙ্গৎলক্লি । অদুম ওইনমক ঐখোয়না মাস ত্রান্সপোর্তেসন সিস্তেমশিং অখন্ননা মেত্রো রেল সিস্তেমশিংদা মীৎয়েং থম্লি । অথাপ্পা মফমশিংদা পোৎ থাংদোক থাংজিন তৌনবা ফাওবা ঐখোয়না নেস্নেল ৱাতর-ৱে সিস্তেমশিংদা থবক হৌরে । ঐখোয়গী রাজ্য খুদিংমক্না ক্লাইমেত চেঞ্জগী মায়োক্তা এক্সন প্লান অমা শেম শারে ।    

মরূপশিং,

ঐখোয়না ঙসি মফম অসিদা পুল্লিবা অসি প্লানেত অসিদা অহোংবা খরা পুরকপা ঙমগনি হায়বগী থাজবা অদুগী মখাদনি । প্লানেত অসি, ঐখোয়গী ইমা পৃথীবি অসি অমখক্তনি হায়বা ঐখোয়না খংবা মথৌ তাই । মহাকপু কন্নবা ঐখোয়না খোঞ্জেল হৌনা লাওগদবনি । ৱার্ল্দ সস্তেনেবল দিব্লপমেন্ত সমিৎ অসি চাওনা মায়পাকপা ওইনবা ঐহাক্না ৱিস তৌজরি ।

ময়াম্বু থাগৎচরি ।