ପିଏମଇଣ୍ଡିଆ

2019 ମେ 3ରେ ଝଡ ଫନୀ ଯୋଗୁ ଓଡିଶାରେ ସୃଷ୍ଟି ହୋଇଥିବା ପରିସ୍ଥିତିର ସମୀକ୍ଷା ପାଇଁ ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏହି ରାଜ୍ୟକୁ ଆକାଶ ମାର୍ଗରୁ ସର୍ଭେକ୍ଷଣ କରିଥିଲେ । ସେ ପିପିଲି, ପୁରୀ, କୋଣାର୍କ, ନିମାପଡା ଓ ଭୁବନେଶ୍ୱର ଆଦି ଅଞ୍ଚଳ ଆକାଶମାର୍ଗରୁ ସର୍ଭେକ୍ଷଣ କରିଥିଲେ । ରାଜ୍ୟପାଳ ପ୍ରଫେସର ଗଣେଶୀ ଲାଲ, ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଏବଂ କେନ୍ଦ୍ର ପେଟ୍ରୋଲିୟମ ଓ ପ୍ରାକୃତିକ ବାଷ୍ପ ମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନ ଏହି ସର୍ଭେକ୍ଷଣରେ ପ୍ରଧାନମନ୍ତ୍ରୀଙ୍କ ସହିତ ଯୋଗ ଦେଇଥିଲେ ।

ଏହାପରେ ଝଡ ଦ୍ୱାରା ସୃଷ୍ଟି ହୋଇଥିବା କ୍ଷୟକ୍ଷତିର ଆକଳନ ଏବଂ ସହାୟତା ଓ ପୁନରୁଦ୍ଧାର କାର୍ଯ୍ୟର ସମୀକ୍ଷା ପାଇଁ ପ୍ରଧାନମନ୍ତ୍ରୀ ରାଜ୍ୟ ଓ କେନ୍ଦ୍ର ସରକାରଙ୍କ ବରିଷ୍ଠ ପଦାଧିକାରୀମାନଙ୍କ ସହିତ ଏକ ବୈଠକ କରିଥିଲେ । ରାଜ୍ୟକୁ ସମସ୍ତ ପ୍ରକାରର ସହାୟତା ପ୍ରଦାନ କରିବା ପାଇଁ ପ୍ରଧାନମନ୍ତ୍ରୀ ଆଶ୍ୱାସନା ପ୍ରଦାନ କରିଥିଲେ । ସେ 1000 କୋଟି ଟଙ୍କାର ତୁରନ୍ତ ସହାୟତା ଘୋଷଣା କରିଥିଲେ । ଏହା ହେଉଛି 2019 ଏପ୍ରିଲ 29ରେ ପ୍ରଦାନ କରାଯାଇଥିବା 341 କୋଟି ଟଙ୍କା ବ୍ୟତୀତ ଅତିରିକ୍ତ ସହାୟତା । ଏକ ଆନ୍ତଃ-ମନ୍ତ୍ରୀସ୍ତରୀୟ କେନ୍ଦ୍ରୀୟ ଦଳର ଆକଳନ ପରେ ଆହୁରି ଅଧିକ ସହାୟତା ପ୍ରଦାନ କରିବା ନେଇ ସେ ଆଶ୍ୱାସନା ପ୍ରଦାନ କରିଥିଲେ ।

ଓଡିଶା ଜନସାଧାରଣଙ୍କ ସହ ସମ୍ପୂର୍ଣ୍ଣ ଭାବେ ରହିଥିବା ନେଇ ପ୍ରଧାନମନ୍ତ୍ରୀ ଦୃଢ଼ୋକ୍ତି ପ୍ରକାଶ କରିଥିଲେ । ସେ କହିଲେ ଯେ କେବଳ ତୁରନ୍ତ ସହାୟତା ପ୍ରଦାନ କରିବା ନୁହେଁ ବରଂ ରାଜ୍ୟର ପୁନଃନିର୍ମାଣ ନିଶ୍ଚିତ କରିବା ନେଇ ମଧ୍ୟ କେନ୍ଦ୍ର ସରକାର ସମ୍ପୂର୍ଣ୍ଣ ଭାବେ ସଂକଳ୍ପବଦ୍ଧ । ଜୀବନ ହାନୀ ହ୍ରାସ କରିବାରେ ବୈଷୟିକ ଜ୍ଞାନର ଭୂମିକା ବିଶେଷ କରି ଉପଗ୍ରହ ଛବି ଏବଂ ଅତ୍ୟାଧୁନିକ ପାଣିପାଗ ସୂଚନା ଜ୍ଞାନକୌଶଳକୁ ସେ ପ୍ରଶଂସା କରିଥିଲେ । ସେ କହିଲେ ଯେ ବୈଷୟିକ ଜ୍ଞାନକୌଶଳର ସାମର୍ଥ୍ୟ ଏବଂ ମାନବୀୟ ଇଂଟରଫେସର ସଂଯୋଗ ପ୍ରଭାବିତ ବ୍ୟକ୍ତିମାନଙ୍କ ସହ ଯୋଗାଯୋଗକୁ ସମ୍ଭବ କରିପାରିଛି । 10 ଲକ୍ଷରୁ ଉର୍ଦ୍ଧ୍ଵ ଜନସାଧାରଣଙ୍କୁ ସୁରକ୍ଷିତ ଅଂଚଳକୁ ସ୍ଥାନାନ୍ତରିତ କରାଇବାରେ ରାଜ୍ୟ ସରକାରଙ୍କ ପ୍ରୟାସ ଏବଂ ସଠିକ ପାଣିପାଗ ସୂଚନା ପ୍ରଦାନ କରିବାରେ ଆଇଏମଡିର ପ୍ରୟାସକୁ ପ୍ରଧାନମନ୍ତ୍ରୀ ବିଶେଷ ଭାବେ ପ୍ରଶଂସା କରିଥିଲେ ।

ଉପକୂଳ ଅଂଚଳରେ ବାସକରୁଥିବା ମତ୍ସ୍ୟଜୀବିମାନଙ୍କ ଜୀବନଧାରଣର ସଂଗ୍ରାମକୁ ସେ ପ୍ରଶଂସା କରିଥିଲେ । ଜୀବନ ହାନୀ ହ୍ରାସ କରିବାରେ ସହାୟତା କରିଥିବା କେନ୍ଦ୍ର ଓ ରାଜ୍ୟ ସରକାରଙ୍କ ମଧ୍ୟରେ ଚମକ୍ରାର ସହଯୋଗକୁ ନେଇ ସେ ସନ୍ତୋଷ ପ୍ରକାଶ କରିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ ଏପରି ଏକ ଝଡ କେଉଁ ପରିମାଣରେ ଧ୍ୱଂସ ଓ କ୍ଷୟକ୍ଷତି କରିଥାଏ ସେ ଜାଣିଛନ୍ତି ଯେହେତୁ ସେ ମଧ୍ୟ ଏକ ଉପକୂଳ ରାଜ୍ୟର ମୁଖ୍ୟମନ୍ତ୍ରୀ ଥିଲେ ।

ଭିତିଭୂମି, ଗୃହ, ମତ୍ସ୍ୟଜୀବି ଓ କୃଷିକ୍ଷେତ୍ର ଆଦି କ୍ଷେତ୍ରରେ ହୋଇଥିବା କ୍ଷୟକ୍ଷତିର ଆକଳନ ଏବଂ ରାଜ୍ୟକୁ ପ୍ରଦାନ କରାଯିବାକୁ ଥିବା ସହାୟତା ନେଇ ଖୁବ ଶୀଘ୍ର ଏକ କେନ୍ଦ୍ରୀୟ ଦଳ ରାଜ୍ୟ ଗସ୍ତରେ ଆସିବ ବୋଲି ପ୍ରଧାନମନ୍ତ୍ରୀ ଆଶ୍ୱାସନା ପ୍ରଦାନ କରିଥିଲେ । ଶକ୍ତି, ଟେଲିକମ ଓ ରେଳସେବାକୁ ଯଥାଶୀଘ୍ର ପୁନର୍ବାହାଲ କରିବା ପାଇଁ ସେ ରାଜ୍ୟ ଏବଂ କେନ୍ଦ୍ର ପଦାଧିକାରୀମାନଙ୍କୁ ଆଦେଶ ପ୍ରଦାନ କରିଥିଲେ । ଖରାପ ହୋଇଥିବା ରାସ୍ତାର ମରାମତି କାର୍ଯ୍ୟ ପାଇଁ ଫଳପ୍ରଦ ପଦକ୍ଷେପ ଗ୍ରହଣ କରିବା ଏବଂ ଏ ସଂକ୍ରାନ୍ତରେ ରାଜ୍ୟ ସରକାରଙ୍କୁ ସମସ୍ତ ପ୍ରକାରର ସହାୟତା ପ୍ରଦାନ କରିବା ଲାଗି ମଧ୍ୟ ସେ ଗମନାଗମନ ଓ ପରିବହନ ମନ୍ତ୍ରଣାଳୟକୁ ନିର୍ଦ୍ଦେଶ ପ୍ରଦାନ କରିଥିଲେ । କୃଷକମାନଙ୍କ କୃଷି ବୀମା ଜନିତ ଦାବିର ଆକଳନ କରିବା ଏବଂ ଖୁବ ଶୀଘ୍ର ସେମାନଙ୍କୁ ସହାୟତା ପ୍ରଦାନ କରିବା ନେଇ ତୁରନ୍ତ ସେମାନଙ୍କ ପର୍ଯ୍ୟବେକ୍ଷକମାନଙ୍କୁ ବନ୍ୟା ପ୍ରପୀଡିତ ଅଂଚଳକୁ ପଠାଇବା ପାଇଁ ପ୍ରଧାନମନ୍ତ୍ରୀ ବୀମା କମ୍ପାନୀମାନଙ୍କୁ ନିର୍ଦ୍ଦେଶ ପ୍ରଦାନ କରିଥିଲେ ।

ପ୍ରଧାନମନ୍ତ୍ରୀ ଝଡରେ ପ୍ରାଣ ହରାଇଥିବା ବ୍ୟକ୍ତିମାନଙ୍କ ନିକଟତମ ସମ୍ପର୍କୀୟମାନଙ୍କ ପାଇଁ 2 ଲକ୍ଷ ଟଙ୍କାର ସହାୟତା ରାଶି ଓ ଗୁରୁତର ଭାବେ ଆହତ ହୋଇଥିବା ବ୍ୟକ୍ତିମାନଙ୍କ ପାଇଁ 50 ହଜାର ଟଙ୍କାର ସହାୟତା ରାଶି ଘୋଷଣା କରିଥିଲେ । କେନ୍ଦ୍ର ସରକାର ସେମାନଙ୍କ ସହ କାନ୍ଧକୁ କାନ୍ଧ ମିଳାଇ ଠିଆ ହୋଇଥିବାର ପ୍ରଧାନମନ୍ତ୍ରୀ ରାଜ୍ୟର ଜନସାଧାରଣଙ୍କୁ ଆଶ୍ୱାସନା ପ୍ରଦାନ କରିଥିଲେ ।

**************