ପିଏମଇଣ୍ଡିଆ

ବିକାଶ ଏବଂ ପରିବେଶଗତ ସ୍ଥାୟୀତ୍ୱ କିପରି ଏକାସାଙ୍ଗରେ ଆଗକୁ ବଢ଼ିପାରିବ, ତାହା ଭାରତ ଦେଖାଇଛି: ପ୍ରଧାନମନ୍ତ୍ରୀ

କାର୍ବନ ନିର୍ଗମନ ପାଇଁ ବିକାଶଶୀଳ ଦେଶଗୁଡ଼ିକୁ ଅନେକ ସମୟରେ ଅନ୍ୟାୟ ଭାବେ ଦାୟୀ କରାଯାଇଛି; ଐତିହାସିକ ତଥ୍ୟ ଅନୁଯାୟୀ ଆଜି ମଧ୍ୟ ଭାରତର ମୁଣ୍ଡପିଛା କାର୍ବନ ନିର୍ଗମନ ବିଶ୍ୱ ହାରର ଅଧାରୁ କମ୍: ପ୍ରଧାନମନ୍ତ୍ରୀ

ଗତ ୧୨ ବର୍ଷ ମଧ୍ୟରେ ପରିବେଶ ସହ ଜଡ଼ିତ ପ୍ରତ୍ୟେକ କ୍ଷେତ୍ରରେ ଭାରତ ଉଲ୍ଲେଖନୀୟ ପ୍ରଗତି କରିଛି; ଅକ୍ଷୟ ଶକ୍ତି ଉପରେ ଆମର ବିଶେଷ ଗୁରୁତ୍ୱ ପରିବେଶ ସୁରକ୍ଷାରେ ଗୁରୁତ୍ୱପୂର୍ଣ୍ଣ ଭୂମିକା ନେଇଛି: ପ୍ରଧାନମନ୍ତ୍ରୀ

ଜି–୨୦ ମଧ୍ୟରେ, ଭାରତ ଏକମାତ୍ର ଦେଶ ଯିଏ ପ୍ୟାରିସରେ ସିଓପି–୨୧ ଶିଖର ସମ୍ମିଳନୀରେ କରାଯାଇଥିବା ପ୍ରତିଶ୍ରୁତିଗୁଡ଼ିକୁ ସମୟ ପୂର୍ବରୁ ପୂରଣ କରିଛି : ପ୍ରଧାନମନ୍ତ୍ରୀ

ଆମର ବିକାଣ ଉଭୟ ଦ୍ରୁତ ଏବଂ ସ୍ଥାୟୀ : ପ୍ରଧାନମନ୍ତ୍ରୀ

ନୂଆଦିଲ୍ଲୀର ବିଜ୍ଞାନ ଭବନଠାରେ ଆଜି “ପରିବେଶ ଓ ଜଳବାୟୁ ଗତିଶୀଳତାର ଭବିଷ୍ୟତ” ଶୀର୍ଷକ ଅନ୍ତର୍ଜାତୀୟ ସମ୍ମିଳନୀର ଉଦ୍‌ଘାଟନ କରିଛନ୍ତି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ। ଏହି ଅବସରରେ ସମ୍ବୋଧନ ଦେଇ ପ୍ରଧାନମନ୍ତ୍ରୀ ପ୍ରକୃତି ସହ ଭାରତର ଗଭୀର ଐତିହାସିକ ସମ୍ପର୍କ ଉପରେ ଆଲୋକପାତ କରିଥିଲେ। ପ୍ରାଚୀନ ସାଂସ୍କୃତିକ ଜ୍ଞାନ କିପରି ଆଧୁନିକ ଜଳବାୟୁ ସମାଧାନକୁ ଆକାର ଦେବା ସହ ବିଶ୍ୱସ୍ତରରେ ସାମୂହିକ ପଦକ୍ଷେପ ପାଇଁ ପ୍ରେରଣା ଯୋଗାଉଛି, ସେ ସମ୍ପର୍କରେ ସେ ଉଲ୍ଲେଖ କରିଥିଲେ। ଏହି ଗୁରୁତ୍ୱପୂର୍ଣ୍ଣ ଅଭିଯାନକୁ ଦୃଢ଼ତାର ସହ ଆଗେଇ ନେଉଥିବା ଜାତୀୟ ସବୁଜ ଟ୍ରିବ୍ୟୁନାଲ୍‌ (ଏନଜିଟି)ର ପ୍ରୟାସକୁ ସେ ପ୍ରଶଂସା କରିବା ସହ ଆୟୋଜକମାନଙ୍କୁ ଅଭିନନ୍ଦନ ଜଣାଇଥିଲେ। “ଆଧୁନିକ ଜଳବାୟୁ ଆହ୍ୱାନର ସମାଧାନ ଏବେ ଭାରତ ପ୍ରଦାନ କରୁଛି,” ବୋଲି ଶ୍ରୀ ମୋଦୀ କହିଥିଲେ।

କାର୍ବନ ଫୁଟ୍‌ପ୍ରିଣ୍ଟ୍ ସମ୍ପର୍କରେ ତ୍ରୁଟିପୂର୍ଣ୍ଣ ବିଶ୍ୱ ବର୍ଣ୍ଣନାକୁ ସମ୍ବୋଧିତ କରି ପ୍ରଧାନମନ୍ତ୍ରୀ ଦର୍ଶାଇଥିଲେ ଯେ ବିକଶିତ ଦେଶଗୁଡ଼ିକ ଭାରତ ତୁଳନାରେ ମୁଣ୍ଡପିଛା ଛଅ ଗୁଣ ଅଧିକ କାର୍ବନ ନିର୍ଗମନ କରୁଛନ୍ତି। ଏହା ସତ୍ତ୍ୱେ ବିକାଶଶୀଳ ରାଷ୍ଟ୍ରଗୁଡ଼ିକୁ ଅନ୍ୟାୟ ଭାବରେ ଦୋଷ ଦିଆଯାଉଛି। ସିଓପି–୨୧ ରେ “ସୁବିଧାଜନକ କାର୍ଯ୍ୟ- ପରିବର୍ତ୍ତନ ପାଇଁ ନିରନ୍ତରତା”( କନଭିନିଏଣ୍ଟ ଆକ୍ସନ – କଣ୍ଟିନ୍ୟୁଟି ଫର ଚେଞ୍ଜ) ପୁସ୍ତକର ଉନ୍ମୋଚନ ଏବଂ ଏକ ସୂର୍ଯ୍ୟ, ଏକ ବିଶ୍ୱ, ଏକ ଗ୍ରୀଡ୍, ଅନ୍ତର୍ଜାତୀୟ ସୌର ମେଣ୍ଟ, ସିଡିଆରଆଇ, ବିଶ୍ୱ ଜୈବ ଇନ୍ଧନ ମେଣ୍ଟ ଏବଂ ଅନ୍ତର୍ଜାତୀୟ ବଡ ବିଲେଇ ମେଣ୍ଟ ଭଳି ପ୍ଲାଟଫର୍ମ ସୃଷ୍ଟିକୁ ମନେ ପକାଇଥିଲେ। ଏହି ଐତିହାସିକ ସତ୍ୟକୁ ଜାହିର କରିବା ଏବଂ ଏହାର ପାରମ୍ପରିକ ପରିବେଶଗତ ଶକ୍ତି ପ୍ରଦର୍ଶନ କରିବା ପାଇଁ ଅନ୍ତର୍ଜାତୀୟ ପ୍ଲାଟଫର୍ମଗୁଡ଼ିକୁ କିପରି ଦେଶ ବ୍ୟବହାର କରେ ସେ ବିଷୟରେ ବିସ୍ତୃତ ଭାବରେ ବର୍ଣ୍ଣନା କରିଥିଲେ। ଆମେ ବିଶ୍ୱକୁ ସାଙ୍ଗରେ ନେଇ ପରିବେଶ ସୁରକ୍ଷା ପାଇଁ ନୂତନ ମାନଦଣ୍ଡ ସ୍ଥାପନ କରୁଛୁ ବୋଲି ଶ୍ରୀ ମୋଦୀ କହିଥିଲେ।

ପ୍ରାଚୀନ ଦର୍ଶନକୁ ଆଧୁନିକ କାର୍ଯ୍ୟାନ୍ୱୟନ ସହିତ ସଂଯୋଗ କରି, ପ୍ରଧାନମନ୍ତ୍ରୀ ଗତ ୧୨ ବର୍ଷ ମଧ୍ୟରେ ପରିବେଶ କ୍ଷେତ୍ରରେ ହୋଇଥିବା ପ୍ରତ୍ୟେକ ଅସାଧାରଣ ପ୍ରଗତି ବିଷୟରେ ବିସ୍ତୃତ ଭାବରେ ବର୍ଣ୍ଣନା କରିଥିଲେ। ବିଶେଷ କରି ନବୀକରଣୀୟ ଶକ୍ତି ପ୍ରତି ଏକ ବିଶାଳ ରଣନୈତିକ ଦିଗ ଉପରେ ଉଲ୍ଲେଖ କରିଥିଲେ। ସେ ଗର୍ବର ସହିତ କହିଥିଲେ ଯେ ଦେଶ ନିର୍ଦ୍ଧାରିତ ସମୟ ପୂର୍ବରୁ ଏହାର ସିଓପି – ୨୧ ପ୍ରତିଶ୍ରୁତି ହାସଲ କରି ଜି–୨୦ ମଧ୍ୟରେ ଏକ ଅନନ୍ୟ ସ୍ଥାନ ଅଧିକାର କରିଛି, ଅଣ-ଜୀବାଶ୍ମ ଇନ୍ଧନ ଏବଂ ସୌର କ୍ଷମତାରେ ବିଶ୍ୱ ମାନଦଣ୍ଡ ସ୍ଥାପନ କରିଛି। ପ୍ରତ୍ୟେକ ପାରାମିଟରରେ ଭାରତର ପ୍ରଦର୍ଶନ ଆଜି ବିଶ୍ୱରେ ଆଲୋଚନାର ବିଷୟ।

ଦେଶର ସୌର କ୍ରାନ୍ତିର ସ୍ପଷ୍ଟ ପ୍ରମାଣ ଉପସ୍ଥାପନ କରି ପ୍ରଧାନମନ୍ତ୍ରୀ ପିଏମ୍ ସୂର୍ଯ୍ୟ ଘର ମାଗଣା ବିଜୁଳି ଯୋଜନା ଦ୍ୱାରା ପ୍ରାୟ ୧୨ ବର୍ଷ ପୂର୍ବେ ମାତ୍ର ୨ ଗିଗାୱାଟ କ୍ଷମତାରୁ ୧୬୦ ଗିଗାୱାଟରୁ ଅଧିକ ଲମ୍ଫ ପ୍ରଦାନ କରିବା କଥା ଉଲ୍ଲେଖ କରିଥିଲେ। ଯାହା ଦ୍ଵାରା ପ୍ରତି ପରିବାରକୁ ୮୦,୦୦୦ ଟଙ୍କା ପର୍ଯ୍ୟନ୍ତ ଆର୍ଥିକ ସହାୟତା ସହିତ ୫୦ ଲକ୍ଷରୁ ଅଧିକ ଘରକୁ ସୌରଶକ୍ତିକରଣ କରାଯାଇଛି। କୁସୁମ ଯୋଜନା ଅଧୀନରେ ୩୦ ଲକ୍ଷ ଚାଷୀ ସୌର ପମ୍ପ ପାଇଛନ୍ତି, ସମ୍ପୂର୍ଣ୍ଣ ହୋଇଥିବା ଏକ ରାଷ୍ଟ୍ର-ଏକ ଗ୍ରୀଡ୍ ପ୍ରକଳ୍ପ ୨୦୦ ମିଲିୟନ୍ ଟନ୍ କାର୍ବନ ନିର୍ଗମନକୁ ସଫଳତାର ସହିତ ରୋକିଛି। ଆମେ ଘରକୁ ସୌରଶକ୍ତି ଉତ୍ପାଦନର କେନ୍ଦ୍ର କରିବା ପାଇଁ ଏକ ମିଶନ ଆରମ୍ଭ କରିଛୁ ବୋଲି ଶ୍ରୀ ମୋଦୀ କହିଥିଲେ।

ସ୍ୱଚ୍ଛ ଶକ୍ତି କ୍ଷେତ୍ରରେ ବ୍ୟାପକ ପଦକ୍ଷେପକୁ ବିସ୍ତାର କରି ପ୍ରଧାନମନ୍ତ୍ରୀ ପବନ ଶକ୍ତି କ୍ଷମତାରେ ତିନିଗୁଣ ବୃଦ୍ଧି, ଗୁରୁତ୍ୱପୂର୍ଣ୍ଣ ଜଳ ଶକ୍ତି ବିସ୍ତାର ଏବଂ ପରମାଣୁ ଶକ୍ତି ଉତ୍ପାଦନ ଉପରେ ଏକ ନୂତନ ଭାବରେ ଗୁରୁତ୍ୱାରୋପ ଉପରେ ଆଲୋକପାତ କରିଥିଲେ ଯାହା ବର୍ତ୍ତମାନ ଘରୋଇ ଉଦ୍ୟୋଗୀମାନଙ୍କୁ ସ୍ୱାଗତ କରୁଛି। ଏହି ମିଳିତ ପ୍ରୟାସ ଦେଶର ଅଣ-ଜୀବାଶ୍ମ ଶକ୍ତି କ୍ଷମତାକୁ ପ୍ରାୟ ଚାରିଗୁଣ କରିଛି ଏବଂ କୋଇଲା ଗ୍ୟାସିଫିକେସନ୍ ଭଳି ସ୍ୱଚ୍ଛ ପ୍ରଯୁକ୍ତିବିଦ୍ୟାକୁ ଆଗକୁ ବଢାଇଛି। ଭାରତ ସ୍ୱଚ୍ଛ ଶକ୍ତିର ଅନ୍ୟାନ୍ୟ କ୍ଷେତ୍ରରେ ମଧ୍ୟ ପ୍ରମୁଖ ସଫଳତା ହାସଲ କରିଛି।

ଉନ୍ନତ ତଥା ପରିବେଶ–ଅନୁକୂଳ ପରିବହନ ବ୍ୟବସ୍ଥାର ଶୁଭାରମ୍ଭକୁ ପାଳନ କରି, ପ୍ରଧାନମନ୍ତ୍ରୀ ଗର୍ବର ସହ ଦେଶର ପ୍ରଥମ ହାଇଡ୍ରୋଜେନ୍ ଟ୍ରେନ୍‌ର ଶୁଭାରମ୍ଭ ବିଷୟରେ ଘୋଷଣା କରିଥିଲେ। ଏହି ଟ୍ରେନ୍ ବିଶ୍ୱର ସବୁଠାରୁ ଲମ୍ବା ହାଇଡ୍ରୋଜେନ୍ ଟ୍ରେନ୍ ହେବାର ରେକର୍ଡ ମଧ୍ୟ ଅଧିକାର କରିଛି। ସେ ଏହି ବୈଷୟିକ ଅଗ୍ରଗତିକୁ ସବୁଜ ପରିବହନ ବ୍ୟବସ୍ଥାର ଭବିଷ୍ୟତ ପାଇଁ ଏକ ମୂଳଦୁଆ ସ୍ୱରୂପ ମାଇଲଖୁଣ୍ଟ ବୋଲି ବର୍ଣ୍ଣନା କରିଥିଲେ। ଏହା ପରିବେଶ–ଅନୁକୂଳ ପରିବହନ ବ୍ୟବସ୍ଥାର ଏକ ନୂତନ ଯୁଗର ଆରମ୍ଭ ଅଟେ।

ସବୁଜ ଯାନବାହନର ବ୍ୟାପକ ବ୍ୟବହାର ବିଷୟରେ ବିସ୍ତୃତ ଭାବରେ ବର୍ଣ୍ଣନା କରି ପ୍ରଧାନମନ୍ତ୍ରୀ ଇଲେକ୍ଟ୍ରିକ୍ ଯାନରେ ୯୫୦ ଗୁଣ ବୃଦ୍ଧି ଉପରେ ଆଲୋକପାତ କରିଥିଲେ। ୨୦୧୪ ପୂର୍ବରୁ ଏହାର ବିକ୍ରି ତିନି ହଜାରରୁ କମ୍ ଥିଲା ଏବଂ ଗତ ବର୍ଷ ପ୍ରାୟ ୨୫ ଲକ୍ଷରେ ପହଞ୍ଚିଛି। ରାଜପଥ ଏବଂ ଏକ୍ସପ୍ରେସୱେରେ ଆଧୁନିକ ଫାସଟ୍ୟାଗ୍ ବ୍ୟବସ୍ଥା ଟୋଲ୍ ବୁଥ୍‌ରେ ଅପେକ୍ଷା ସମୟକୁ ହ୍ରାସ କରି ଇନ୍ଧନ ଅପଚୟକୁ ବହୁ ପରିମାଣରେ ହ୍ରାସ କରିଛି। ଭାରତ ଇଭି ବିପ୍ଳବର ଏହି ସୁଯୋଗକୁ ପୂର୍ଣ୍ଣ ଶକ୍ତି ସହିତ ଗ୍ରହଣ କରୁଛି।

ସାର୍ବଜନୀନ ପରିବହନ ଭିତ୍ତିଭୂମିର ବ୍ୟାପକ ଆଧୁନିକୀକରଣକୁ ପ୍ରଦର୍ଶନ କରି ପ୍ରଧାନମନ୍ତ୍ରୀ ୨୦୧୪ ମସିହାର ପାଞ୍ଚଟି ସହରରେ ୨୫୦ କିଲୋମିଟର ବିଶିଷ୍ଟ ମେଟ୍ରୋ ନେଟୱାର୍କକୁ ଆଜିର ୨୦ ରୁ ଅଧିକ ସହରରେ କାର୍ଯ୍ୟକ୍ଷମ ବିସ୍ତାରିତ ବ୍ୟବସ୍ଥା ସହିତ ତୁଳନା କରିଥିଲେ। ଭାରତ ବିଶ୍ୱର ସେହି ଦେଶମାନଙ୍କ ମଧ୍ୟରେ ସାମିଲ ହୋଇଛି ଯେଉଁମାନଙ୍କର ମେଟ୍ରୋ ନେଟୱାର୍କ ଏକ ହଜାର କିଲୋମିଟରରୁ ଅଧିକ ଅଛି ।

ଭାରୀ ଲଜିଷ୍ଟିକ୍ସର ପରିବେଶ ଅନୁକୂଳ ପରିବର୍ତ୍ତନକୁ ଗୁରୁତ୍ୱ ଦେଇ ପ୍ରଧାନମନ୍ତ୍ରୀ କହିଥିଲେ ଯେ, ରେଳବାଇର ପ୍ରାୟ ସମ୍ପୂର୍ଣ୍ଣ ବିଦ୍ୟୁତୀକରଣ ଦ୍ୱାରା କୋଟି କୋଟି ଲିଟର ଡିଜେଲ ପୋଡ଼ିବାକୁ ରୋକା ଯାଇପାରିଛି। ସେ ନୂତନ ଭାବରେ ଉଦ୍ଘାଟିତ ୩୦୦୦ କିଲୋମିଟର ଡେଡିକେଟେଡ୍ ଫ୍ରେଟ୍ କରିଡରର ବ୍ୟାପକ ପରିବେଶଗତ ଲାଭ ଉପରେ ଆଲୋକପାତ କରିଥିଲେ। ଏବେ ଐତିହାସିକ ଡବଲ-ଷ୍ଟାକ୍ କଣ୍ଟେନର ଟ୍ରେନ୍ ପ୍ରତି ଯାତ୍ରାରେ ଶହ ଶହ ପ୍ରଦୂଷଣକାରୀ ଟ୍ରକ୍ ବଦଳରେ ପରିବହନ କରୁଛନ୍ତି। ଆପଣ କଳ୍ପନା କରିପାରିବେ ଯେ ଏହା ପରିବେଶକୁ କେତେ ବଡ଼ ପରିମାଣରେ ସାହାଯ୍ୟ କରୁଛି ବୋଲି ଶ୍ରୀ ମୋଦୀ କହିଥିଲେ।

ପରିବେଶ– ଅନୁକୂଳ ବିକଳ୍ପ ପରିବହନ ବ୍ୟବସ୍ଥା ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ ଦେଶବ୍ୟାପୀ ପ୍ରାୟ ୫,୦୦୦ କିଲୋମିଟର ଦୀର୍ଘ ଅଭ୍ୟନ୍ତରୀଣ ଜଳପଥର କାର୍ଯ୍ୟକ୍ଷମତାକୁ ପ୍ରଶଂସା କରିଥିଲେ। ସେ ବୁଝାଇଥିଲେ ଯେ ଏହି ଜଳପଥରେ ଚଳାଚଳ କରୁଥିବା ଗୋଟିଏ ମାନକ ଅଭ୍ୟନ୍ତରୀଣ ଜଳଯାନ ଦ୍ୱାରା ଡଜନ ଡଜନ ଟ୍ରକ୍‌ର ବୋଝ ସହିତ ସମାନ ପରିମାଣର ସାମଗ୍ରୀ ପରିବହନ କରାଯାଇପାରିବ। ଏହା ମଧ୍ୟ ପରିବେଶ ସଂରକ୍ଷଣ କ୍ଷେତ୍ରରେ ବଡ଼ ସହାୟତା ପ୍ରଦାନ କରୁଛି।

ପରିବହନ ବ୍ୟବସ୍ଥାରେ କରାଯାଇଥିବା ଏହି ଉନ୍ନତିକରଣର ସାମୂହିକ ପ୍ରଭାବ ଉପରେ ଆଲୋକପାତ କରି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ, ସମଗ୍ର ଗମନାଗମନ କ୍ଷେତ୍ରରେ ହୋଇଥିବା ବ୍ୟାପକ ପରିବର୍ତ୍ତନ ଦେଶର ସନ୍ତୁଳିତ ବିକାଶ ଧାରାର ଏକ ଅକାଟ୍ୟ ପ୍ରମାଣ ଅଟେ। ଦ୍ରୁତ ଅଗ୍ରଗତି ପରିବେଶ ସଂରକ୍ଷଣ ସହିତ ସମ୍ପୂର୍ଣ୍ଣ ଭାବେ ସମନ୍ୱିତ ଅଟେ। ଶ୍ରୀ ମୋଦୀ ଦୃଢ଼ତାର ସହ କହିଥିଲେ, “ଆମର ବିକାଶ ଦ୍ରୁତ ହେବା ସହିତ ସ୍ଥାୟୀ ଅଟେ।“

ଜଳ ସଂରକ୍ଷଣ କ୍ଷେତ୍ରରେ ଅଭୂତପୂର୍ବ ଜନ–ଅଂଶଗ୍ରହଣର ପ୍ରଶଂସା କରି ପ୍ରଧାନମନ୍ତ୍ରୀ ‘କ୍ୟାଚ୍ ଦି ରେନ୍‘ ଅଭିଯାନ ଅଧୀନରେ ୭୦,୦୦୦ରୁ ଅଧିକ ‘ଅମୃତ ସରୋବର‘ ଏବଂ ୧.୫ କୋଟି ବର୍ଷାଜଳ ସଂଗ୍ରହ ଭିତ୍ତିଭୂମି ନିର୍ମାଣକୁ ଉତ୍ସାହର ସହ ଉଲ୍ଲେଖ କରିଥିଲେ। ସେ କହିଥିଲେ ଯେ ‘ପ୍ରଧାନମନ୍ତ୍ରୀ କୃଷି ସିଞ୍ଚାଇ ଯୋଜନା‘ ଏବଂ ‘ପର ଡ୍ରପ୍, ମୋର୍ କ୍ରପ୍‘ (ପ୍ରତି ବୁନ୍ଦାରେ ଅଧିକ ଫସଲ) ଅଧୀନରେ ଥିବା ଆଧୁନିକ ଜଳସେଚନ ପଦ୍ଧତିଗୁଡ଼ିକ ୨ କୋଟିରୁ ଅଧିକ କୃଷକଙ୍କ ପାଇଁ ସକ୍ରିୟ ଭାବେ ଜଳ ସଞ୍ଚୟ କରୁଛି। ଭାରତରେ ଜଳ ସଂରକ୍ଷଣ ଦିଗରେ ଅଭୂତପୂର୍ବ କାର୍ଯ୍ୟ କରାଯାଉଛି।

ମିଲେଟ୍‌ ବା ମୋଟା ଶସ୍ୟର ବିଶ୍ୱସ୍ତରୀୟ ପୁନରୁଦ୍ଧାର ଅଭିଯାନକୁ ଆଗେଇ ନେଇ, ପ୍ରଧାନମନ୍ତ୍ରୀ ବୁଝାଇଲେ ଯେ କମ୍ ପାଣି ଆବଶ୍ୟକ କରୁଥିବା ‘ଶ୍ରୀ ଅନ୍ନ‘ର ଚାଷକୁ ପ୍ରୋତ୍ସାହିତ କରିବା ଦ୍ୱାରା କିପରି ଘରୋଇ ଉତ୍ପାଦନ ବୃଦ୍ଧି ପାଇଛି ଏବଂ ରପ୍ତାନି ପରିମାଣ ୧.୫ ଲକ୍ଷ ଟନ୍‌ରେ ପହଞ୍ଚିଛି। ଏହା ସହିତ ଏହା କିପରି ଅର୍ଥନୈତିକ ସୁଯୋଗ ସୃଷ୍ଟି କରିବା ସହ ଜଳ ସଂରକ୍ଷଣରେ ମଧ୍ୟ ସହାୟକ ହୋଇଛି। ଏହି ନିରନ୍ତର ଜାତୀୟ ପ୍ରୟାସ ଯୋଗୁଁ ହିଁ ୨୦୨୩ ବର୍ଷକୁ ‘ଆନ୍ତର୍ଜାତୀୟ ମିଲେଟ୍‌ ବର୍ଷ‘ ଭାବେ ପାଳନ କରିବା ପାଇଁ ବିଶ୍ୱସ୍ତରରେ ପ୍ରେରଣା ମିଳିପାରିଛି। ଏହି ମଡେଲ୍‌ ଯୋଗୁଁ ବିଶ୍ୱ ମଧ୍ୟ ଆମ ସହିତ ଯୋଡ଼ି ହେଉଛି।

ପରିବେଶ–ଅନୁକୂଳ କୃଷିର ବିଶାଳ ପରିସର ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ ‘ଜାତୀୟ ପ୍ରାକୃତିକ କୃଷି ମିଶନ୍‘ ଅଧୀନରେ ୧୨.୫ ଲକ୍ଷ ହେକ୍ଟର ଜମିରେ ୨୪,୦୦୦ ପ୍ରାକୃତିକ କୃଷି କ୍ଲଷ୍ଟର ପ୍ରତିଷ୍ଠା ସମ୍ପର୍କରେ ବିସ୍ତୃତ ବିବରଣୀ ପ୍ରଦାନ କରିଥିଲେ। ସେ ଜଳବାୟୁ ପରିବର୍ତ୍ତନର ମୁକାବିଲା କରିବାରେ ସକ୍ଷମ ୩,୦୦୦ ଫସଲ ପ୍ରଜାତିର ସଫଳ ବିକାଶ ଏବଂ ପରିବେଶ ଉପରେ ପଡ଼ୁଥିବା ନକାରାତ୍ମକ ପ୍ରଭାବ (କାର୍ବନ ଫୁଟ୍‌ପ୍ରିଣ୍ଟ୍) ହ୍ରାସ କରିବା ପାଇଁ କୃଷି–ବନୀକରଣର ରଣନୈତିକ ପ୍ରସାର ଉପରେ ମଧ୍ୟ ଆଲୋକପାତ କରିଥିଲେ। କୃଷି–ବନୀକରଣକୁ ପ୍ରୋତ୍ସାହିତ କରିବା ଦ୍ୱାରା ଆମେ କାର୍ବନ ଫୁଟ୍‌ପ୍ରିଣ୍ଟ୍ ମଧ୍ୟ ହ୍ରାସ କରୁଛୁ।

ଦେଶର ପରିବେଶଗତ ପ୍ରୟାସର ବ୍ୟାପକ ପ୍ରକୃତିକୁ ଦର୍ଶାଇ ପ୍ରଧାନମନ୍ତ୍ରୀ କହିଛନ୍ତି ଯେ ଗତ ୧୨ ବର୍ଷ ମଧ୍ୟରେ ଘନ ଜଙ୍ଗଲ ଆଚ୍ଛାଦନ ୨୨ ପ୍ରତିଶତରୁ ଅଧିକ ବୃଦ୍ଧି ପାଇଛି। ସେ ଦେଶବ୍ୟାପୀ ନିରନ୍ତର ଅଭିଯାନରେ କୋଟି କୋଟି ଗଛ ଲଗାଇବା ପାଇଁ ନାଗରିକମାନଙ୍କୁ ପ୍ରେରଣା ଦେବା ପାଇଁ ଚାଲିଥିବା ‘ଏକ ପେଡ୍ ମା କେ ନାମ’ ଅଭିଯାନକୁ ପ୍ରଶଂସା କରିଥିଲେ।

ପ୍ଲାଷ୍ଟିକ୍ ପ୍ରଦୂଷଣର ଗୁରୁତ୍ୱପୂର୍ଣ୍ଣ ଆହ୍ଵାନକୁ ସମ୍ବୋଧିତ କରି ପ୍ରଧାନମନ୍ତ୍ରୀ ଏକକ-ବ୍ୟବହାର ପ୍ଲାଷ୍ଟିକ୍ ଉପରେ ଜାତୀୟ ନିଷେଧ ଏବଂ ହଜାର ହଜାର ଟନ୍ ଦୈନିକ ଅପଚୟ ହ୍ରାସ, ପୁନଃବ୍ୟବହାର ଏବଂ ପୁନଃଚକ୍ରଣ ଉପରେ ଆଧାରିତ ଏକ ବୃତ୍ତାକାର ଅର୍ଥନୀତି ଆଡ଼କୁ ଦୃଢ଼ ପଦକ୍ଷେପକୁ ଦୋହରାଇଥିଲେ। ସେ ଗୋବର୍ଦ୍ଧନ ଯୋଜନାକୁ “ୱେଲ୍ଥ ଫ୍ରମ୍ ୱେଷ୍ଟ ମଡେଲ” ମାଧ୍ୟମରେ ଗ୍ରାମୀଣ ଜୈବ ଅପଚୟକୁ ମୂଲ୍ୟବାନ ସମ୍ପଦରେ ପରିଣତ କରିବାର ଏକ ପ୍ରମୁଖ ଉଦାହରଣ ଭାବରେ ଉଲ୍ଲେଖ କରିଥିଲେ। “ଆମର ପ୍ରୟାସ ହେଉଛି ଅପଚୟକୁ ଏକ ସମସ୍ୟା ଭାବରେ ବ୍ୟବହାର କରିବା ପରିବର୍ତ୍ତେ ଏହାକୁ ଏକ ସମ୍ପଦରେ ପରିଣତ କରାଯିବା ଉଚିତ୍ ବୋଲି ଶ୍ରୀ ମୋଦୀ ଦୃଢ଼ୋକ୍ତି ପ୍ରକାଶ କରିଥିଲେ।

ଦେଶର ପରିବେଶଗତ ସଫଳତାର ଗୁରୁତ୍ୱକୁ ଉପସ୍ଥାପନ କରି ପ୍ରଧାନମନ୍ତ୍ରୀ କହିଥିଲେ ଯେ, ଏହି ଠୋସ୍ ପରିସଂଖ୍ୟାନ କେବଳ ଦେଶର ଅଗ୍ରଗତିଠାରୁ ବହୁ ଅଧିକ କିଛିକୁ ସୂଚିତ କରେ। ସେ ଦେଶର ବିକାଶମୂଳକ ତଥ୍ୟକୁ ସମଗ୍ର ମାନବଜାତିର ସ୍ଥିତି ଓ ସମୃଦ୍ଧି ଦିଗରେ ଏକ ବିଶାଳ ତଥା ପ୍ରତ୍ୟକ୍ଷ ଅବଦାନ ଭାବରେ ବର୍ଣ୍ଣନା କଲେ। ଏଗୁଡ଼ିକ ମାନବଜାତିର ଭବିଷ୍ୟତ ପାଇଁ ଭାରତର ଅବଦାନର ସୂଚକ ମଧ୍ୟ ଅଟେ।

ପ୍ରଧାନମନ୍ତ୍ରୀ ଏହି ଦାୟିତ୍ୱପୂର୍ଣ୍ଣ କାର୍ଯ୍ୟଗୁଡ଼ିକୁ ପ୍ରେରଣା ଦେଉଥିବା ପୃଥିବୀ ଏବଂ ଏହାର ବାସିନ୍ଦାଙ୍କ ମଧ୍ୟରେ ଗଭୀର ସମ୍ପର୍କକୁ ଗୁରୁତ୍ୱାରୋପ କରିଥିଲେ। ସେ ଏକ ଆଶାପୂର୍ଣ୍ଣ ମତ ଦେଇ ତାଙ୍କର ଅଭିଭାଷଣ ଶେଷ କରିଥିଲେ, ସମ୍ମିଳନୀ ଆଲୋଚନାରୁ ଅଭିନବ ସମାଧାନ ମିଳିବ ବୋଲି ଗଭୀର ବିଶ୍ୱାସ ପ୍ରକାଶ କରିଥିଲେ ଏବଂ ତାଙ୍କର ଶେଷ ଅଭିନନ୍ଦନ ଜଣାଇଥିଲେ। ଭାରତ ଏକ ଦାୟିତ୍ୱପୂର୍ଣ୍ଣ ଏବଂ ସ୍ଥାୟୀ ଭବିଷ୍ୟତ ଗଠନ ପାଇଁ ମଧ୍ୟ କାର୍ଯ୍ୟ କରୁଛି ବୋଲି ସେ କହିଥିଲେ।।

****

SSP