ପିଏମଇଣ୍ଡିଆ

ମହାମହୀମ ରାଷ୍ଟ୍ରପତି ଜନ୍ ମାହାମା,

ଦୁଇ ଦେଶର ପ୍ରତିନିଧିବୃନ୍ଦ,

ଗଣମାଧ୍ୟମର ସମସ୍ତ ସହଯୋଗୀଗଣ,

ଆପଣମାନଙ୍କୁ ନମସ୍କାର!

ଦୀର୍ଘ ଦିନି ଦଶନ୍ଧିର ବ୍ୟବଧାନ ପରେ ଏହା କୌଣସି ଜଣେ ଭାରତୀୟ ପ୍ରଧାନମନ୍ତ୍ରୀଙ୍କର ପ୍ରଥମ ଘାନା ଗସ୍ତ ।

ମୋତେ ଏହି ସୁଯୋଗ ମିଳିଥିବାରୁ ଏହା ମୋ ପାଇଁ ଅତ୍ୟନ୍ତ ଗର୍ବର ଅବସର ।

“ଆୟା ମୋ ଆନେଜେ ସେ ମେୱାହା!”

ଘାନା ଆଗମନ ସମୟରେ ଆମମାନଙ୍କୁ ଯେଉଁ ଉଷ୍ମତା, ଭବ୍ୟ ଏବଂ ସମ୍ମାନର ସହିତ ସ୍ୱାଗତ କରାଯାଇଛି ସେଥିପାଇଁ ମୁଁ ଆପଣମାନଙ୍କ ନିକଟରେ କୃତଜ୍ଞ ।

ଘାନା ରାଷ୍ଟ୍ରପତି ସ୍ୱୟଂ ବିମାନ ବନ୍ଦରକୁ ଆସି ମୋତେ ସ୍ୱାଗତ କରିବା ମୋ ପାଇଁ ବେଶ୍ ଗୌରବର ବିଷୟ ।

୨୦୨୪ ମସିହା ଡିସେମ୍ବର ମାସର ସାଧାରଣ ନିର୍ବାଚନରେ ରାଷ୍ଟ୍ରପତି ମାହାମା ଦ୍ୱିତୀୟ ଥର ନିମନ୍ତେ ଦେଶର ରାଷ୍ଟ୍ରପତି ଭାବରେ ନିର୍ବାଚିତ ହୋଇଛନ୍ତି । ତାଙ୍କର ଏହି ଉଲ୍ଲେଖନୀୟ ବିଜୟ ନିମନ୍ତେ ମୁଁ ତାଙ୍କୁ ପୁଣି ଥରେ ଅଭିନନ୍ଦନ ଜ୍ଞାପନ କରୁଛି ।

ତାଙ୍କ ନେତୃତ୍ୱ ଏବଂ ଦୂରଦୃଷ୍ଟିସମ୍ପନ୍ନ ଚିନ୍ତାଧାରା ଉପରେ ଘାନାବାସୀ ଗଭୀର ବିଶ୍ୱାସ ଓ ଆସ୍ଥା ପ୍ରକଟ କରିଛନ୍ତି, ଏହି ନିର୍ବାଚନ ଫଳାଫଳ ତାହାର ପ୍ରତୀକ ।

ବନ୍ଧୁଗଣ,

ଭାରତ- ଘାନା ବନ୍ଧୁତାର ମୂଳରେ ରହିଛି ଆମର ମିଳିତ ମୂଲ୍ୟବୋଧ, ସଂଗ୍ରାମ ଏବଂ ଏକ ସାମଗ୍ରିକ ଭବିଷ୍ୟତର ମିଳିତ ସ୍ୱପ୍ନ ।

ଆମ ଦେଶର ସ୍ୱାଧୀନତା ସଂଗ୍ରାମ ବିଶ୍ୱର ଅନେକ ରାଷ୍ଟ୍ରଙ୍କୁ ପ୍ରେରଣା ଯୋଗାଇଛି ।

ଆଜି ମଧ୍ୟ- ପଶ୍ଚିମ ଆଫ୍ରିକାରେ ଘାନା ଏକ ସ୍ପନ୍ଦିତ ତଥା ଜୀବନ୍ତ ଗଣତାନ୍ତ୍ରିକ ରାଷ୍ଟ୍ର ଭାବରେ ଅନ୍ୟ ରାଷ୍ଟ୍ରମାନଙ୍କ ସକାଶେ ‘ଆଶାର ସୂର୍ଯ୍ୟାଲୋକ’ ପାଲଟିଛି ।

ଆଜି ରାଷ୍ଟ୍ରପତି ଏବଂ ମୁଁ ଆମର ଦ୍ୱିପାକ୍ଷିକ ସହଭାଗିତାକୁ ଏକ ‘ବ୍ୟାପକ ସହଭାଗିତା’ରେ ପରିଣତ କରିବାକୁ ସିଦ୍ଧାନ୍ତ ଗ୍ରହଣ କରିଛୁ ।

ଘାନାର ରାଷ୍ଟ୍ର ଗଠନର ଏହି ନିରବଚ୍ଛିନ୍ନ ଯାତ୍ରାରେ ଭାରତ କେବଳ ଅଂଶୀଦାର ନୁହେଁ ବରଂ ସହଯାତ୍ରୀ ଭାବରେ ରହିଆସିଛି ।

ଏହି ଭବ୍ୟ ଜୁବିଲି ହାଉସ, ବୈଦେଶିକ ସେବା ପ୍ରତିଷ୍ଠାନ, କୋମଣ୍ଡୋ ଚିନି କାରଖାନା, ଭାରତ- ଘାନା କୋଫି ଆନ୍ନାନ ଆଇ.ସି.ଟି କେନ୍ଦ୍ର ଏବଂ ‘ଟେମା ପକ୍ୱାନ ରେଳ ଲାଇନ’ –ଏହିସବୁ କେବଳ ଇଟା ଓ ପଥରର ସୌଧ ନୁହେଁ, ବରଂ ଏହା ଆମର ସଫଳ ଭାଗୀଦାରିତାର ପ୍ରତୀକ ।

ଆମର ଦ୍ୱିପାକ୍ଷିକ ବାଣିଜ୍ୟ କାରବାର ପ୍ରାୟ ୩ ନିୟୁତ ଡଲାରକୁ ପାର କରିଛି ।

ଭାରତୀୟ କମ୍ପାନୀମାନେ ଘାନାରେ  ପ୍ରାୟ ୯୦୦ଟି କମ୍ପାନୀରେ ପ୍ରାୟ ୨ ବିଲିୟନ ଡଲାର ପୁଂଜି ନିବେଶ କରିଛନ୍ତି ।

ଆଜି ଆମେ ଆସନ୍ତା ପାଞ୍ଚ ବର୍ଷ ମଧ୍ୟରେ ଦ୍ୱିପାକ୍ଷିକ ବାଣିଜ୍ୟ କାରବାରକୁ ଦ୍ୱିଗୁଣିତ କରିବା ନିମନ୍ତେ ଲକ୍ଷ୍ୟ ଧାର୍ଯ୍ୟ କରିଛୁ ।

ଫିନଟେକ୍ କ୍ଷେତ୍ରରେ ଭାରତ – ଘାନା ସହ ୟୁ.ପି.ଆଇ. ଡିଜିଟାଲ ପେମେଣ୍ଟର ଅଭିଜ୍ଞତା ବାଣ୍ଟିବାକୁ ନିଜକୁ ପ୍ରସ୍ତୁତ କରୁଛି ।

ବନ୍ଧୁଗଣ,

ବିକାଶ ଭାଗିଦାରୀ କ୍ଷେତ୍ରରେ ଆମର ପାରସ୍ପରିକ ସହଯୋଗ ହେଉଛି ଏକ ମୌଳିକ ସ୍ତମ୍ଭ ।

ଆମେ ରାଷ୍ଟ୍ରପତି ମାହାମାଙ୍କ ‘ଆର୍ଥିକ ପୁନର୍ଗଠନ’ ପ୍ରୟାସରେ ଭାରତର ପୂର୍ଣ୍ଣ ସମର୍ଥନ ଏବଂ ସହଯୋଗ ନିମନ୍ତେ ପ୍ରତିଶ୍ରୁତି ପ୍ରଦାନ କରୁଛୁ ।

ଆଜି ଆମେ ଘାନା ପାଇଁ ଆଇ.ଟି.ଇ.ସି. ଏବଂ ଆ.ସି.ସି.ଆର. ବୃତ୍ତିକୁ ଦୁଇ ଗୁଣ କରିବାକୁ ସିଦ୍ଧାନ୍ତ ଗ୍ରହଣ କରିଛୁ ।

ଯୁବବର୍ଗଙ୍କୁ ଧନ୍ଦାମୂଳକ ଶିକ୍ଷା ପ୍ରଦାନ ନିମନ୍ତେ ଦକ୍ଷତା ବିକାଶ କେନ୍ଦ୍ର ପ୍ରତିଷ୍ଠା କରିବା ଦିଗରେ କାର୍ଯ୍ୟ କରାଯିବ ।

କୃଷି କ୍ଷେତ୍ରରେ ରାଷ୍ଟ୍ରପତି ମାହାମାଜୀଙ୍କ ‘ଫିଡ୍ ଘାନା’ କାର୍ଯ୍ୟକ୍ରମରେ ସହଯୋଗ କଲେ ଆମେ ଖୁସି ଅନୁଭବ କରିବୁ ।

ଜନ ଔଷଧି କେନ୍ଦ୍ର ମାଧ୍ୟମରେ ଭାରତ ଘାନାର ନାଗରିକମାନଙ୍କୁ ସୁଲଭ ମୂଲ୍ୟରେ ସ୍ୱାସ୍ଥ୍ୟସେବା, ବିଶ୍ୱସନୀୟ ସେବା ପ୍ରଦାନ କରିବା ନିମନ୍ତେ ପ୍ରସ୍ତାବ ଦେଇଛୁ ।

ଟିକା ଉତ୍ପାଦନରେ ସହଯୋଗ କରିବା ନିମନ୍ତେ ଆମେ ଆଲୋଚନା କରିଥିଲୁ ।

ପ୍ରତିରକ୍ଷା ଏବଂ ନିରାପତ୍ତା କ୍ଷେତ୍ରରେ ଆମେ  ‘ନିରାପତ୍ତା ମାଧ୍ୟମରେ ଦୃଢ଼ତା’ ମନ୍ତ୍ରର ସହ ଆଗକୁ ଅଗ୍ରସର ହେବୁ ।

ସଶସ୍ତ୍ର ବାହିନୀ ପ୍ରଶିକ୍ଷଣ, ସାମୁଦ୍ରିକ ସୁରକ୍ଷା, ପ୍ରତିରକ୍ଷା ସାମଗ୍ରୀ ଯୋଗାଣ ଏବଂ ସାଇବର ନିରାପତ୍ତା ଭଳି କ୍ଷେତ୍ରରେ ପାରସ୍ପରିକ ସହଯୋଗ ବୃଦ୍ଧି କରାଯିବ ।

ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥର ଅନୁସନ୍ଧାନ ଓ ଖନନରେ ଭାରତୀୟ କମ୍ପାନୀମାନେ ଘାନାକୁ ସହଯୋଗ କରିବେ ।

ଆନ୍ତର୍ଜାତିକ ସୌର ମେଣ୍ଟ ଏବଂ ଭାରତ ଓ ଘାନା ବିପର୍ଯ୍ୟୟ ପ୍ରତିରୋଧୀ ଭିତ୍ତିଭୂମି ଭଳି ମଞ୍ଚରେ ସହଯୋଗ କରିସାରିଛନ୍ତି ।

ଅକ୍ଷୟ ଶକ୍ତି, ବିଶେଷ ଭାବରେ ସ୍ୱଚ୍ଛ ରୋଷେଇ ବାଷ୍ପ ନିମନ୍ତେ ଘାନାର ପ୍ରୟାସକୁ ସମର୍ଥନ କରିବା ଲାଗି ଆମେ ସେମାନଙ୍କୁ ବୈଶ୍ୱିକ ଜୈବ ଇନ୍ଧନ ସହଯୋଗିତାରେ ଯୋଗ ଦେବାକୁ ଆମନ୍ତ୍ରଣ ଜଣାଇଥିଲୁ ।

ବନ୍ଧୁଗଣ,

ଆମେ ଦୁଇ ରାଷ୍ଟ୍ର ବୈଶ୍ୱିକ ଦକ୍ଷିଣ ଗୋଲାର୍ଦ୍ଧର ସଦସ୍ୟ ଏବଂ ଏହାର ପ୍ରାଥମିକତା ପ୍ରତି ସମ୍ପୂର୍ଣ୍ଣ ବଚନବଦ୍ଧ ।

ଭଏସ ଅଫ୍ ଗ୍ଲୋବାଲ୍ ସାଉଥ (ଦକ୍ଷିଣ ଗୋଲାର୍ଦ୍ଧର ସ୍ୱର) ଶିଖର ସମ୍ମିଳନୀରେ ସକାରାତ୍ମକ ଅଂଶଗ୍ରହଣ ପାଇଁ ଆମେ ଘାନାକୁ ଆମର ହୃଦୟର କୃତଜ୍ଞତା ଜଣାଉଛୁ ।

ଏହା ଭାରତ ନିମନ୍ତେ ଗର୍ବର ବିଷୟ ଯେ ଭାରତର ଜି-୨୦ ଅଧ୍ୟକ୍ଷତା ଅବସରରେ ଆଫ୍ରିକୀୟ ସଂଘ ଜି-୨୦ ସଂଗଠନର ସ୍ଥାୟୀ ସଦସ୍ୟତା ହାସଲ କରିଛି ।

ଆମେ ସାହେଲ କ୍ଷେତ୍ର ସମେତ ଅନ୍ୟାନ୍ୟ ଆଞ୍ଚଳିକ ଏବଂ ଆନ୍ତର୍ଜାତିକ ପ୍ରସଙ୍ଗ ଉପରେ ମଧ୍ୟ ଆଲୋଚନା କରିଛୁ ।

ଆତଙ୍କବାଦ ମାନବିକତାର ଶତ୍ରୁ ବୋଲି ଆମେ ମିଳିତ ଭାବରେ ସହମତ ପୋଷଣ କରିଛୁ ।

ଆତଙ୍କବାଦ ବିରୋଧରେ ସଂଗ୍ରାମ ନିମନ୍ତେ ସହଯୋଗ କରିଥିବାରୁ ଆମେ ଘାନାକୁ ଆମର ଧନ୍ୟବାଦ ଜ୍ଞାପନ କରୁଛୁ ।

ଏହି ପରିପ୍ରେକ୍ଷୀରେ ଆତଙ୍କବାଦ ମୁକାବିଲା କ୍ଷେତ୍ରରେ ଆମର ସହଯୋଗକୁ ଅଧିକ ମଜଭୁତ କରିବା ନିମନ୍ତେ ଆମେ ସିଦ୍ଧାନ୍ତ ଗ୍ରହଣ କରିଛୁ ।

ମିଳିତ ଜାତିସଂଘ ସଂଘ ପ୍ରତି ଆମର ଦୁଇ ଦେଶର ଆଭିମୁଖ୍ୟ ସମାନ ।

ପଶ୍ଚିମ ଏସିଆ ଏବଂ ୟୁରୋପରେ ଚାଲିଥିବା ସଂଘର୍ଷ ପରିପ୍ରେକ୍ଷୀରେ ଆମେ ଦୁହେଁ ଗଭୀର ଉଦବେଗ ପ୍ରକଟ କରିଛୁ ।

ଆମର ଦୃଢ଼ ବିଶ୍ୱାସ ଯେ ଏହା ଯୁଦ୍ଧର କାଳ ନୁହେଁ ।

କେବଳ ଆଲୋଚନା ଏବଂ କୂଟନୀତି ମାଧ୍ୟମରେ ସମସ୍ୟାର ସମାଧାନ ହେବା ଏକାନ୍ତ ଜରୁରି ।

ସାଥୀଗଣ,

ଘାନାରେ ବସବାସ କରୁଥିବା ଭାରତୀୟ ସମ୍ପ୍ରଦାୟ ଏବଂ ଭାରତୀୟ ଲୋକଙ୍କ ମଧ୍ୟରେ ସମ୍ପର୍କର ଏକ ସ୍ୱତନ୍ତ୍ର ସଂଯୋଗ ରହିଛି ।

ଦୀର୍ଘ ଦିନ ଧରି ଘାନାରେ ଭାରତୀୟ ଶିକ୍ଷକ, ଡାକ୍ତର ଏବଂ ଇଞ୍ଜିନିୟରମାନେ କାର୍ଯ୍ୟ କରିଆସୁଛନ୍ତି ।

ଭାରତୀୟ ସମୁଦାୟ ଘାନାର ଅର୍ଥନୈତିକ ଓ ସାମାଜିକ ପ୍ରଗତିରେ ମଧ୍ୟ ଗଠନମୂଳକ ଯୋଗଦାନ ଦେଇ ଆସୁଛନ୍ତି ।

ମୁଁ ଆସନ୍ତାକାଲି ଭାରତୀୟ ସମୁଦାୟଙ୍କ ସହିତ ମୋର ସାକ୍ଷାତ ଓ ଭାବ ବିନିମୟକୁ ଉତ୍କଣ୍ଠାର ସହିତ ଅପେକ୍ଷା କରିରହିଛି ।

ରାଷ୍ଟ୍ରପତି ମହୋଦୟ,

ଆପଣ ଭାରତର ଜଣେ ଘନିଷ୍ଠ ବନ୍ଧୁ । ଆପଣ ଭାରତ ସହିତ ଉତ୍ତମ ଭାବରେ ପରିଚିତ ।

ମୁଁ ଆପଣଙ୍କ ଆଗାମୀ ଭାରତ ଗସ୍ତ ପାଇଁ ଆପଣଙ୍କୁ ଆମନ୍ତ୍ରଣ ଜଣାଉଛି । ମୋର ଦୃଢ଼ ବିଶ୍ୱାସ ଯେ ଆପଣମାନେ ଆମକୁ ଭାରତରେ ଆପଣଙ୍କୁ ଭବ୍ୟ ସ୍ୱାଗତ କରିବାର ସୁଯୋଗ ପ୍ରଦାନ କରିବେ ।

ପୁଣି ଥରେ ମୁଁ ଆପଣମାନଙ୍କୁ ଏବଂ ଘାନାର ସମସ୍ତ ଜନସାଧାରଣଙ୍କୁ ଆପଣଙ୍କ ଆତିଥେୟତା ନିମନ୍ତେ ହୃଦୟରୁ କୃତଜ୍ଞତା ଜଣାଉଛି ।

************