ପିଏମଇଣ୍ଡିଆ

ଆମ ଯୁବଶକ୍ତି ଭାରତର ଭବିଷ୍ୟତ ପାଇଁ ଗଭୀର ବିଶ୍ୱାସ ସୃଷ୍ଟି କରୁଛି: ପ୍ରଧାନମନ୍ତ୍ରୀ

ଆଜିର ଯୁବବର୍ଗ ‘ବିକଶିତ ଭାରତ’ର ସ୍ୱପ୍ନକୁ ସାକାର କରିବାର ଆଶା ରଖିଛି; ବିକଶିତ ଭାରତ ପାଇଁ ଅଭିନବ ଚିନ୍ତାଧାରା ଓ ସମାଧାନ କେବଳ ଭାରତ ନୁହେଁ, ବରଂ ସମଗ୍ର ବିଶ୍ୱର ଭବିଷ୍ୟତକୁ ଗଢ଼ିବ: ପ୍ରଧାନମନ୍ତ୍ରୀ

ଭାରତରେ ଉପଲବ୍ଧ ଅସୀମ ସୁଯୋଗକୁ ଦୃଷ୍ଟିରେ ରଖି, ପ୍ରତ୍ୟେକ ଯୁବକଯୁବତୀ ଏହି ବିଶାଳ ସୁଯୋଗର ପରିସରରେ ନିଜ ଭବିଷ୍ୟତ ଦେଖନ୍ତୁ ବୋଲି ମୁଁ ଚାହେଁ। କାରଣ, ଏହା ଆପଣମାନଙ୍କ ସମୟ, ଏହା ଆପଣମାନଙ୍କ ସୁଯୋଗ: ପ୍ରଧାନମନ୍ତ୍ରୀ

ମହାନ ସନ୍ଥ ତିରୁବଲ୍ଲୁଭରଙ୍କୁ ମଧ୍ୟ ମୁଁ ସ୍ମରଣ କରୁଛି, ତାଙ୍କର ଶିକ୍ଷା ସମସ୍ତ ଛାତ୍ରଛାତ୍ରୀଙ୍କ ପାଇଁ ଅତ୍ୟନ୍ତ ମହତ୍ତ୍ୱପୂର୍ଣ୍ଣ; ନିକଟରେ ମୋତେ ରୁଷିଆର ରାଷ୍ଟ୍ରପତି ପୁଟିନଙ୍କୁ ‘ତିରୁକ୍କୁରଳ’ର ରୁଷୀୟ ଅନୁବାଦ ପୁସ୍ତକ ଉପହାର ଦେବାର ସୁଯୋଗ ମିଳିଥିଲା: ପ୍ରଧାନମନ୍ତ୍ରୀ

ଜୀବନସାରା ନୂଆ ନୂଆ ବିଷୟ ଶିଖିବାକୁ ଇଚ୍ଛା କରୁଥିବା ସମସ୍ତଙ୍କ ପାଇଁ ତିରୁକ୍କୁରଳ ଏକ ଉତ୍କୃଷ୍ଟ ମାର୍ଗଦର୍ଶକ: ପ୍ରଧାନମନ୍ତ୍ରୀ

ତିରୁବଲ୍ଲୁଭର ତାଙ୍କର ଏକ ପ୍ରସିଦ୍ଧ ‘କୁରାଲ୍’ରେ ଶିକ୍ଷା ଦେଇଛନ୍ତି ଯେ, କେବଳ କିଛି ଶିଖିବା ଯଥେଷ୍ଟ ନୁହେଁ, ତାହାକୁ ନିଜ ଜୀବନରେ ମଧ୍ୟ ଅବଲମ୍ବନ କରିବା ଆବଶ୍ୟକ: ପ୍ରଧାନମନ୍ତ୍ରୀ

ଭାରତ ୨୦୩୦ ମସିହାରେ ରାଜ୍ୟଗୋଷ୍ଠୀ କ୍ରୀଡ଼ା ଆୟୋଜନ ପାଇଁ ପ୍ରସ୍ତୁତି କରୁଥିବାବେଳେ, ୨୦୩୬ ମସିହା ଅଲିମ୍ପିକ୍ସ ଆୟୋଜନ କରିବାର ସ୍ୱପ୍ନ ଦିଗରେ ମଧ୍ୟ ଆଗକୁ ବଢ଼ୁଛି: ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ତାମିଲନାଡୁର ଚେନ୍ନାଇସ୍ଥିତ ‘ଜୟଗୋପାଳ ଗାରୋଡିଆ ହିନ୍ଦୁ ବିଦ୍ୟାଳୟ ମାଟ୍ରିକୁଲେସନ୍ ଉଚ୍ଚ ମାଧ୍ୟମିକ ବିଦ୍ୟାଳୟ’ର ସୁବର୍ଣ୍ଣ ଜୟନ୍ତୀ ସମାରୋହରେ ଅଂଶଗ୍ରହଣ କରିଥିଲେ। ଏହି ଦିନର ଆଧ୍ୟାତ୍ମିକ ମହତ୍ତ୍ୱ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ନବରାତ୍ରିର ପ୍ରଥମ ଦିନରେ ଶିବ ଓ ଶକ୍ତିଙ୍କ ପବିତ୍ର ଭୂମିକୁ ଆସି ସେ ଅତ୍ୟନ୍ତ ଆନନ୍ଦିତ। ମା’ ସରସ୍ୱତୀଙ୍କ ଭକ୍ତମାନଙ୍କୁ ଭେଟିବା ସହ ଯୁବପିଢ଼ିଙ୍କ ମଧ୍ୟରେ ସକାରାତ୍ମକ ଶକ୍ତି, ଉତ୍ସାହ ଓ ଉଦ୍ଦୀପନା ଅନୁଭବ କରିବା ଏହି ପର୍ବର ଏକ ଅତ୍ୟନ୍ତ ଶୁଭାରମ୍ଭ ବୋଲି ସେ ଉଲ୍ଲେଖ କରିଥିଲେ। ଶ୍ରୀ ମୋଦୀ କହିଥିଲେ, “ଆପଣମାନଙ୍କ ସମସ୍ତଙ୍କ ଆଖିରେ ମୁଁ ଭାରତର ଭବିଷ୍ୟତ ଦେଖିପାରୁଛି।”

ଯୁବପିଢ଼ିଙ୍କ ଅପାର ସମ୍ଭାବନାକୁ ସ୍ୱୀକାର କରି ପ୍ରଧାନମନ୍ତ୍ରୀ କହିଥିଲେ ଯେ, ଆଜିର ଯୁବବର୍ଗ ‘ବିକଶିତ ଭାରତ’ର ସଂକଳ୍ପକୁ ସାକାର କରିବାରେ ପ୍ରମୁଖ ଶକ୍ତି ହେବାକୁ ଦୃଢ଼ ଇଚ୍ଛା ରଖିଛନ୍ତି। ଏହି ଜାତୀୟ ଲକ୍ଷ୍ୟ ହାସଲ କରିବା ପାଇଁ ଆବଶ୍ୟକ ନୂତନ ଚିନ୍ତାଧାରା ଓ ସମାଧାନ କେବଳ ଦେଶର ଭାଗ୍ୟ ନୁହେଁ, ବରଂ ସମଗ୍ର ବିଶ୍ୱର ଭବିଷ୍ୟତକୁ ମଧ୍ୟ ଆକାର ଦେବ। “ଆଜି ସମଗ୍ର ବିଶ୍ୱ ସମାଧାନର ସନ୍ଧାନରେ ରହିଛି ଏବଂ ସେହି ସମାଧାନ ପ୍ରଦାନ କରିବାର ସାମର୍ଥ୍ୟ ଆପଣମାନଙ୍କ ପାଖରେ ରହିଛି”, ବୋଲି ଶ୍ରୀ ମୋଦୀ କହିଥିଲେ।

ଛାତ୍ରଛାତ୍ରୀମାନଙ୍କୁ ବଡ଼ ସ୍ୱପ୍ନ ଦେଖିବାକୁ ଉତ୍ସାହିତ କରି ପ୍ରଧାନମନ୍ତ୍ରୀ ପ୍ରତ୍ୟେକ ଯୁବକ-ଯୁବତୀଙ୍କୁ ଦେଶରେ ସୃଷ୍ଟି ହେଉଥିବା ଅସୀମ ସୁଯୋଗର ବିଶାଳ କ୍ଷେତ୍ର ମଧ୍ୟରେ ନିଜର ଭବିଷ୍ୟତର କଳ୍ପନା କରିବାକୁ ଆହ୍ୱାନ ଦେଇଥିଲେ। ଅଭୂତପୂର୍ବ ସମ୍ଭାବନାର ଏହି ଯୁଗରେ ଦେଶର ଏହି ସାମୂହିକ ସ୍ୱପ୍ନକୁ ସାକାର କରିବା ସମ୍ପୂର୍ଣ୍ଣ ଭାବେ ଯୁବପିଢ଼ିଙ୍କ ହାତରେ ରହିଛି ବୋଲି ସେ ଦୃଢ଼ ବିଶ୍ୱାସ ପ୍ରକାଶ କରିଥିଲେ। “ଆମେ ଏକାଠି ମିଶି ଏହାକୁ ସଫଳ କରି ଦେଖାଇବୁ”, ବୋଲି ଶ୍ରୀ ମୋଦୀ ଦୃଢ଼ୋକ୍ତି ପ୍ରକାଶ କରିଥିଲେ।

ଏକ ବ୍ୟକ୍ତିଗତ ଅନୁଭୂତି ବର୍ଣ୍ଣନା କରି ପ୍ରଧାନମନ୍ତ୍ରୀ ନିଜର ଏହି ଗସ୍ତ ପଛରେ ଥିବା ଏକ ଆକର୍ଷଣୀୟ ପ୍ରେରଣା ସମ୍ପର୍କରେ ଜଣାଇଥିଲେ। ସେ କିଛି ମାସ ପୂର୍ବେ ନାଗରକୋଇଲରେ ଗିରିଜା ଆମ୍ମା ଏବଂ ଅନେକ ପିଲାଙ୍କ ସହ ହୋଇଥିବା ସାକ୍ଷାତକୁ ସ୍ମରଣ କରିଥିଲେ। “ଦେଶର ଭବିଷ୍ୟତ ପ୍ରତି ତାଙ୍କର ଗଭୀର ନିଷ୍ଠା, ଆତ୍ମବିଶ୍ୱାସ ଏବଂ ଅଟଳ ସମର୍ପଣ ମୋ ମନରେ ଏକ ଅଭୂତପୂର୍ବ ଛାପ ଛାଡ଼ିଥିଲା”, ବୋଲି ଶ୍ରୀ ମୋଦୀ କହିଥିଲେ।

ସେହି ପ୍ରାରମ୍ଭିକ ସାକ୍ଷାତ ସମୟରେ ଦେଇଥିବା ପ୍ରତିଶ୍ରୁତି ପୂରଣ କରି ପ୍ରଧାନମନ୍ତ୍ରୀ କହିଥିଲେ ଯେ, ଗିରିଜା ଆମ୍ମାଙ୍କ ସ୍ନେହପୂର୍ଣ୍ଣ ଆତିଥ୍ୟ ଏବଂ ଏହି ଐତିହାସିକ ଶିକ୍ଷାନୁଷ୍ଠାନ ପ୍ରତି ତାଙ୍କର ଗଭୀର ସମ୍ମାନ ତାଙ୍କୁ ସୁବର୍ଣ୍ଣ ଜୟନ୍ତୀ ସମାରୋହରେ ଯୋଗଦେବା ପାଇଁ ତାଙ୍କ ନିମନ୍ତ୍ରଣ ଗ୍ରହଣ କରିବାକୁ ପ୍ରେରିତ କରିଥିଲା। “ଏହି ଗୌରବମୟ ୫୦ ବର୍ଷର ଯାତ୍ରା ପାଇଁ ବିଶ୍ୱ ହିନ୍ଦୁ ବିଦ୍ୟା କେନ୍ଦ୍ର ଏବଂ ସମଗ୍ର ହିନ୍ଦୁ ବିଦ୍ୟାଳୟ ପରିବାରକୁ ମୁଁ ହୃଦୟର ସହିତ ଅଭିନନ୍ଦନ ଜଣାଉଛି”, ବୋଲି ଶ୍ରୀ ମୋଦୀ କହିଥିଲେ।

ଏହି ଶିକ୍ଷାନୁଷ୍ଠାନର ଅତ୍ୟନ୍ତ ପ୍ରେରଣାଦାୟକ ଯାତ୍ରା ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ, ୧୯୭୫ ମସିହାରେ ଚେନ୍ନାଇର ‘ଓ୍ୱେଷ୍ଟ ମାମ୍ବଲମ୍‌’ଠାରେ ମାତ୍ର ୭ ଜଣ ଛାତ୍ରଛାତ୍ରୀ ଏବଂ ସୀମିତ ସମ୍ବଳକୁ ନେଇ ଏକ ଛୋଟ ବିଦ୍ୟାଳୟ ଭାବେ ବିଶ୍ୱ ହିନ୍ଦୁ ବିଦ୍ୟା କେନ୍ଦ୍ରର ଆରମ୍ଭ ହୋଇଥିଲା। ପ୍ରାରମ୍ଭିକ ଅସୁବିଧା ସତ୍ତ୍ୱେ ଦୃଢ଼ ଇଚ୍ଛାଶକ୍ତି ଏବଂ ଅତୁଟ ସେବା ମନୋଭାବକୁ ଆଧାର କରି ଏହି ଅନୁଷ୍ଠାନର ପ୍ରତିଷ୍ଠାତାମାନେ କିପରି ଏହାକୁ ଆଗକୁ ବଢ଼ାଇଥିଲେ, ପ୍ରଧାନମନ୍ତ୍ରୀ ତାହାର ପ୍ରଶଂସା କରିଥିଲେ। ଆଧୁନିକ ସୁବିଧା କିମ୍ବା ନିଜସ୍ୱ ସ୍ଥାୟୀ କୋଠା ନଥିବା ସତ୍ତ୍ୱେ ସେମାନେ ଅସୁବିଧାର ମୁକାବିଲା କରିଥିଲେ। “ସେଥିପାଇଁ ସମସ୍ତ ପ୍ରତିବନ୍ଧକ ସତ୍ତ୍ୱେ ଏହି ଅନୁଷ୍ଠାନ ନିରନ୍ତର ଆଗକୁ ବଢ଼ି ଚାଲିଥିଲା”, ବୋଲି ଶ୍ରୀ ମୋଦୀ କହିଥିଲେ।

ସେହି ସାଧାରଣ ଆରମ୍ଭରୁ ଏକ ବିଶାଳ ଶିକ୍ଷା ଆନ୍ଦୋଳନରେ ପରିଣତ ହୋଇଥିବା ଏହି ଅନୁଷ୍ଠାନର ଅଭୂତପୂର୍ବ ସମ୍ପ୍ରସାରଣକୁ ଉଲ୍ଲେଖ କରି ପ୍ରଧାନମନ୍ତ୍ରୀ ଏହାର ପ୍ରଶଂସା କରିଥିଲେ। ଦଶନ୍ଧି ଦଶନ୍ଧି ଧରି ଏହି ଛୋଟ ପ୍ରୟାସ କିପରି ଏକ ବିଶାଳ ଶିକ୍ଷା ଆନ୍ଦୋଳନରେ ପରିଣତ ହୋଇଛି, ତାହା ସେ ଉତ୍ସାହର ସହିତ ଉଲ୍ଲେଖ କରିଥିଲେ। ବର୍ତ୍ତମାନ ସମଗ୍ର ରାଜ୍ୟରେ ଏହି ଅନୁଷ୍ଠାନର ବ୍ୟାପକ ପ୍ରସାରକୁ ମଧ୍ୟ ସେ ପ୍ରଶଂସା କରିଥିଲେ। “ଆଜି ତାମିଲନାଡୁର ବିଭିନ୍ନ ସ୍ଥାନରେ ଆପଣମାନଙ୍କର ୧୫ଟି ଶିକ୍ଷାନୁଷ୍ଠାନ ରହିଛି”, ବୋଲି ଶ୍ରୀ ମୋଦୀ କହିଥିଲେ।

ଏହି ଅନୁଷ୍ଠାନର ମୂଳଦୁଆ ପକାଇଥିବା ମହାନ ବ୍ୟକ୍ତିତ୍ୱମାନଙ୍କୁ ସମ୍ମାନ ଜଣାଇ ପ୍ରଧାନମନ୍ତ୍ରୀ ବିଦ୍ୟାଳୟର କୋଠା ନିର୍ମାଣରେ ଶ୍ରୀ ଜୟଗୋପାଳ ଗାରୋଡିଆଙ୍କ ଗୁରୁତ୍ୱପୂର୍ଣ୍ଣ ଅବଦାନକୁ ସ୍ମରଣ କରିଥିଲେ। ‘ହିନ୍ଦୁ ବିଦ୍ୟାଳୟ’ର ଏହି ଯାତ୍ରାକୁ ଅତ୍ୟନ୍ତ ସଫଳ କରିବା ପାଇଁ ନିଜ ଜୀବନ ଉତ୍ସର୍ଗ କରିଥିବା ସମସ୍ତ ଶିକ୍ଷକ, କର୍ମଚାରୀ, ଅଭିଭାବକ ଓ ପୁରାତନ ଛାତ୍ରଛାତ୍ରୀଙ୍କ ପ୍ରତି ସେ ଗଭୀର କୃତଜ୍ଞତା ଜ୍ଞାପନ କରିଥିଲେ। “ସମର୍ପଣର ୫୦ ବର୍ଷ, ପ୍ରତିବଦ୍ଧତାର ୫୦ ବର୍ଷ ଏବଂ ଯୁବପିଢ଼ିଙ୍କ ଜୀବନକୁ ଗଢ଼ିବାର ୫୦ ବର୍ଷ”, ବୋଲି ଶ୍ରୀ ମୋଦୀ କହିଥିଲେ।

ଶିକ୍ଷାଦାନ ସହିତ ଦୃଢ଼ ଦେଶପ୍ରେମର ମୂଲ୍ୟବୋଧକୁ ସଫଳତାର ସହ ଯୋଡ଼ିପାରିଥିବା ଏହି ଅନୁଷ୍ଠାନର ପ୍ରଶଂସା କରି ପ୍ରଧାନମନ୍ତ୍ରୀ ନିଜର ‘ମନ୍ କି ବାତ୍’ କାର୍ଯ୍ୟକ୍ରମରେ ଗିରିଜା ଆମ୍ମାଙ୍କ ଉଲ୍ଲେଖ କରିଥିବା କଥା ମନେ ପକାଇଥିଲେ। ଦେଶର ସୈନିକମାନଙ୍କ ପାଇଁ ପ୍ରତିଦିନ ମାତ୍ର ଗୋଟିଏ ଟଙ୍କା ସଞ୍ଚୟ କରିବାକୁ ସେ ପିଲାମାନଙ୍କୁ ଅତି ଚମତ୍କାର ଭାବେ ଅନୁପ୍ରାଣିତ କରିଥିଲେ। ହଜାର ହଜାର ପିଲା ଏହି ସଂକଳ୍ପରେ ସାମିଲ ହୋଇ ୪୦ ଲକ୍ଷ ଟଙ୍କା ସଂଗ୍ରହ କରିବାରେ ସଫଳ ହୋଇଥିବାରୁ ପ୍ରଧାନମନ୍ତ୍ରୀ ଏହି ସାମୂହିକ ପ୍ରୟାସର ପ୍ରଶଂସା କରିଥିଲେ। “ବାସ୍ତବରେ, ଏହା କେତେ ପ୍ରେରଣାଦାୟକ ଉଦାହରଣ!” ବୋଲି ଶ୍ରୀ ମୋଦୀ କହିଥିଲେ।

କ୍ରମାଗତ ଛୋଟ ଛୋଟ ପ୍ରୟାସର ଅପାର ଶକ୍ତି ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ କହିଥିଲେ ଯେ, ସାମାନ୍ୟ ଅବଦାନ ମଧ୍ୟ ସମାଜରେ ବ୍ୟାପକ ସକାରାତ୍ମକ ପ୍ରଭାବ ସୃଷ୍ଟି କରିପାରେ। ପ୍ରାକୃତିକ ବିପର୍ଯ୍ୟୟ ସମୟରେ ଅସହାୟଙ୍କୁ ସହାୟତା କରିବା ହେଉ କିମ୍ବା ସ୍ୱଚ୍ଛତା ଅଭିଯାନରେ ସକ୍ରିୟ ଅଂଶଗ୍ରହଣ କରିବା ହେଉ – ମୂଲ୍ୟବୋଧର ଏକ ମହାନ ପରମ୍ପରାକୁ ସକ୍ରିୟ ଭାବେ ବଜାୟ ରଖିଥିବାରୁ ସେ ‘ହିନ୍ଦୁ ବିଦ୍ୟାଳୟ’ ପରିବାରର ପ୍ରଶଂସା “ଗୋଟିଏ ଛୋଟ ପ୍ରୟାସ ମଧ୍ୟ ବହୁତ ବଡ଼ ପ୍ରଭାବ ସୃଷ୍ଟି କରିପାରେ”, ବୋଲି ଶ୍ରୀ ମୋଦୀ ମତବ୍ୟକ୍ତ କରିଥିଲେ।

ପ୍ରାଚୀନ ଜ୍ଞାନ ଓ ପରମ୍ପରାକୁ ସ୍ମରଣ କରି ପ୍ରଧାନମନ୍ତ୍ରୀ ମହାନ ସନ୍ଥ ତିରୁବଲ୍ଲୁଭରଙ୍କ ପ୍ରତି ଶ୍ରଦ୍ଧାଞ୍ଜଳି ଜଣାଇଥିଲେ। ଆଜିର ଛାତ୍ରଛାତ୍ରୀଙ୍କ ପାଇଁ ତାଙ୍କର ଶିକ୍ଷାର ଅତ୍ୟନ୍ତ ପ୍ରାସଙ୍ଗିକତା ରହିଛି ବୋଲି ସେ କହିଥିଲେ। ନିକଟରେ ରୁଷିଆର ରାଷ୍ଟ୍ରପତି ପୁଟିନଙ୍କୁ ‘ତିରୁକ୍କୁରାଲ୍’ର ରୁଷୀୟ ଅନୁବାଦ ପୁସ୍ତକ ଉପହାର ଦେଇଥିବା ସମ୍ପର୍କରେ ମଧ୍ୟ ସେ ଉଲ୍ଲେଖ କରିଥିଲେ। “ଆପଣମାନଙ୍କ ପରି ସମସ୍ତ ଛାତ୍ରଛାତ୍ରୀଙ୍କ ପାଇଁ ତାଙ୍କର ଶିକ୍ଷା ଅତ୍ୟନ୍ତ ମହତ୍ତ୍ୱପୂର୍ଣ୍ଣ”, ବୋଲି ଶ୍ରୀ ମୋଦୀ କହିଥିଲେ।

‘ତିରୁକ୍କୁରାଲ୍’ର ଚିରନ୍ତନ ମାର୍ଗଦର୍ଶନ ସମ୍ପର୍କରେ ଆଲୋକପାତ କରି ପ୍ରଧାନମନ୍ତ୍ରୀ ଏହାକୁ ଜୀବନସାରା ଶିଖିବାକୁ ଆଗ୍ରହୀ ବ୍ୟକ୍ତିଙ୍କ ପାଇଁ ଏକ ଉତ୍କୃଷ୍ଟ ମାର୍ଗଦର୍ଶକ ବୋଲି ଅଭିହିତ କରିଥିଲେ। ତିରୁବଲ୍ଲୁଭରଙ୍କ ଏକ ପ୍ରସିଦ୍ଧ କୁରଲର ଉଦାହରଣ ଦେଇ ସେ କହିଥିଲେ ଯେ, ଶିଖିଥିବା ଜ୍ଞାନକୁ ଦୈନନ୍ଦିନ ଜୀବନରେ ପ୍ରୟୋଗ କରିବା ଅତ୍ୟନ୍ତ ଜରୁରୀ। ଛାତ୍ରଛାତ୍ରୀଙ୍କ ପାଇଁ ଏହା ଏକ ମହତ୍ତ୍ୱପୂର୍ଣ୍ଣ ଶିକ୍ଷା ବୋଲି ସେ କହିଥିଲେ। “କିଛି ଶିଖିବା ସହିତ ତାହାକୁ ନିଜ ଜୀବନରେ ଅବଲମ୍ବନ କରିବା ମଧ୍ୟ ଅତ୍ୟନ୍ତ ଆବଶ୍ୟକ”, ବୋଲି ଶ୍ରୀ ମୋଦୀ କହିଥିଲେ।

ଦେଶକୁ ଏକତ୍ର ବାନ୍ଧି ରଖିଥିବା ଗଭୀର ସାଂସ୍କୃତିକ ସମ୍ପର୍କ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ, ମହାକବି ଭାରତିୟାର କାଶୀରେ ଅନୁଭବ କରିଥିବା ଆଧ୍ୟାତ୍ମିକତା ଓ ଜାତୀୟ ଚେତନା ଦ୍ୱାରା ଗଭୀର ଭାବେ ପ୍ରଭାବିତ ହୋଇଥିଲେ। ସେହି ମହାନ୍‌ କବିଙ୍କ ବ୍ୟାପକ ଜୀବନ ଓ ଦର୍ଶନ ପଢ଼ି ସେଥିରୁ ପ୍ରେରଣା ନେବାକୁ ପ୍ରଧାନମନ୍ତ୍ରୀ ଛାତ୍ରଛାତ୍ରୀମାନଙ୍କୁ ଉତ୍ସାହିତ କରିଥିଲେ। “ଆଧ୍ୟାତ୍ମିକତା ଓ ଜାତୀୟ ଚେତନାରେ ପରିପୂର୍ଣ୍ଣ କାଶୀର ପରିବେଶ ତାଙ୍କ ଚିନ୍ତାଧାରା ଉପରେ ଗଭୀର ପ୍ରଭାବ ପକାଇଥିଲା”, ବୋଲି ଶ୍ରୀ ମୋଦୀ କହିଥିଲେ।

ନିଜର ସଂସଦୀୟ ନିର୍ବାଚନମଣ୍ଡଳୀ କାଶୀକୁ ଏହି ସାମୂହିକ ଐତିହ୍ୟ ସହ ଯୋଡ଼ି ପ୍ରଧାନମନ୍ତ୍ରୀ କହିଥିଲେ ଯେ, ଆଜି ମଧ୍ୟ କାଶୀର ଲୋକମାନେ ମହାକବି ଭାରତିୟାରଙ୍କୁ ଶ୍ରଦ୍ଧାର ସହ ସ୍ମରଣ କରନ୍ତି। କବିଙ୍କ ପ୍ରସିଦ୍ଧ ମନ୍ତ୍ର ‘ଅଚ୍ଚମିଲ୍ଲାଇ, ଅଚ୍ଚମିଲ୍ଲାଇ’ (ଭୟ ନାହିଁ, ଭୟ ନାହିଁ)କୁ ଆପଣାଇ ନିଜର ଚିନ୍ତାଧାରା ଓ ସ୍ୱପ୍ନକୁ ସାକାର କରିବା ପାଇଁ ସାହସର ସହ ଆଗକୁ ବଢ଼ିବାକୁ ସେ ଯୁବପିଢ଼ିଙ୍କୁ ଆହ୍ୱାନ ଦେଇଥିଲେ। “ବଡ଼ ସ୍ୱପ୍ନ ଦେଖନ୍ତୁ, ଭିନ୍ନ ଭାବେ ଚିନ୍ତା କରନ୍ତୁ ଏବଂ ନିର୍ଭୀକ ହୁଅନ୍ତୁ”, ବୋଲି ଶ୍ରୀ ମୋଦୀ କହିଥିଲେ।

ନିଜ ଜୀବନର ଅନୁଭୂତିକୁ ସ୍ମରଣ କରି ପ୍ରଧାନମନ୍ତ୍ରୀ କହିଥିଲେ ଯେ, ଦେଶର ବିଭିନ୍ନ ଅଞ୍ଚଳକୁ ବ୍ୟାପକ ଭ୍ରମଣ କରିବା ଏବଂ ସେଠାକାର ଲୋକଙ୍କଠାରୁ ସିଧାସଳଖ ଶିଖିବା ଦ୍ୱାରା ଦେଶ ସମ୍ପର୍କରେ ତାଙ୍କର ଗଭୀର ବୁଝାମଣା ଗଢ଼ିଉଠିଥିଲା। ୧୯୯୦ ଦଶକର ପ୍ରାରମ୍ଭରେ କନ୍ୟାକୁମାରୀରୁ କାଶ୍ମୀର ପର୍ଯ୍ୟନ୍ତ ଆୟୋଜିତ ‘ଏକତା ଯାତ୍ରା’ରେ ନିଜର ଅଂଶଗ୍ରହଣକୁ ସେ ସ୍ନେହର ସହ ସ୍ମରଣ କରିଥିଲେ। ସେହି ସମୟରେ ହିଁ ଗିରିଜା ଆମ୍ମାଙ୍କ ସହ ତାଙ୍କର ପରିଚୟ ଆରମ୍ଭ ହୋଇଥିଲା। “ସେବେଠାରୁ ଆମର ଏହି ପରିଚୟ ଅତୁଟ ରହିଛି”, ବୋଲି ଶ୍ରୀ ମୋଦୀ କହିଥିଲେ।

ଜାତୀୟ ଏକତାକୁ ସୁଦୃଢ଼ କରିବାରେ ସକ୍ରିୟ ଭୂମିକା ନେବାକୁ ଛାତ୍ରଛାତ୍ରୀମାନଙ୍କୁ ଉତ୍ସାହିତ କରି ପ୍ରଧାନମନ୍ତ୍ରୀ ଯୁବପିଢ଼ିଙ୍କୁ ଦେଶର ବିଭିନ୍ନ ସ୍ଥାନକୁ ଭ୍ରମଣ କରିବା ସହ ଗର୍ବର ସହ ତାମିଲ ସଂସ୍କୃତିର ପ୍ରଚାର କରିବାକୁ ଆହ୍ୱାନ ଦେଇଥିଲେ। ତାମିଲ କବିତା, କାହାଣୀ ଓ ପରମ୍ପରାକୁ ଅନ୍ୟମାନଙ୍କ ସହ ବାଣ୍ଟିବା ସହ ଭିନ୍ନ ଭିନ୍ନ ପୃଷ୍ଠଭୂମିର ଲୋକଙ୍କ ସହ ବନ୍ଧୁତା ସ୍ଥାପନ କରି ଦେଶର ଏକତାକୁ ମଜଭୁତ କରିବାକୁ ସେ ପରାମର୍ଶ ଦେଇଥିଲେ। “ଆପଣମାନେ ସ୍ଥାପନ କରୁଥିବା ବନ୍ଧୁତା ହିଁ ଆମ ଦେଶର ଏକତାକୁ ଗଢ଼ିଥାଏ”, ବୋଲି ଶ୍ରୀ ମୋଦୀ କହିଥିଲେ।

ଦେଶର ଶିକ୍ଷା କ୍ଷେତ୍ରରେ ଘଟୁଥିବା ଅଭୂତପୂର୍ବ ଢାଞ୍ଚାଗତ ପରିବର୍ତ୍ତନ ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ ନୂତନ ପିଢ଼ି ପାଇଁ ସୃଷ୍ଟି ହୋଇଥିବା ବ୍ୟାପକ ସୁଯୋଗ ଉପରେ ଆଲୋକପାତ କରିଥିଲେ। ସେ କହିଥିଲେ ଯେ, ୨୦୧୪ ମସିହାରେ ଦେଶରେ ବିଶ୍ୱବିଦ୍ୟାଳୟ ସଂଖ୍ୟା ୭୫୦ ଥିବାବେଳେ ଏବେ ଏହା ୧,୩୦୦ରୁ ଅଧିକ ହୋଇଛି। ସେହିପରି ମହାବିଦ୍ୟାଳୟ ସଂଖ୍ୟା ୩୮,୦୦୦ରୁ ବୃଦ୍ଧି ପାଇ ୫୨,୦୦୦ରୁ ଅଧିକ ହୋଇଛି। ଏହା ସହିତ ଅନେକ ନୂତନ ଆଇଆଇଟି, ଆଇଆଇଏମ୍‌, ଆଇଆଇଆଇଟି ଏବଂ ଏମ୍ସ ପ୍ରତିଷ୍ଠା କରାଯାଇଛି। “ଆଜି ଦେଶର ଶିକ୍ଷା କ୍ଷେତ୍ରର ସମଗ୍ର ଚିତ୍ର ବଦଳିଯାଉଛି”, ବୋଲି ଶ୍ରୀ ମୋଦୀ କହିଥିଲେ।

ନୂତନ ଶିକ୍ଷା ନୀତି ଯୋଗୁଁ ଶିକ୍ଷା କ୍ଷେତ୍ରରେ ଆସିଥିବା ଗୁଣାତ୍ମକ ଉନ୍ନତି ଉପରେ ଗୁରୁତ୍ୱ ଦେଇ ପ୍ରଧାନମନ୍ତ୍ରୀ ଭାରତୀୟ ଶିକ୍ଷାନୁଷ୍ଠାନଗୁଡ଼ିକର ବଢ଼ୁଥିବା ବିଶ୍ୱସ୍ତରୀୟ ସ୍ୱୀକୃତିକୁ ପ୍ରଶଂସା କରିଥିଲେ। ସେ କହିଥିଲେ ଯେ, କ୍ୟୁଏସ୍‌ ରାଙ୍କିଂରେ ସ୍ଥାନ ପାଇଥିବା ଭାରତୀୟ ବିଶ୍ୱବିଦ୍ୟାଳୟ ସଂଖ୍ୟା ୨୦୧୫ ମସିହାରେ ମାତ୍ର ୧୪ ଥିବାବେଳେ ସଦ୍ୟତମ ରାଙ୍କିଂରେ ଏହା ୫୨କୁ ବୃଦ୍ଧି ପାଇଛି। ଫଳରେ ଛାତ୍ରଛାତ୍ରୀଙ୍କ ପାଇଁ ଶିକ୍ଷାର ବିକଳ୍ପ ଓ ସୁଯୋଗ ବ୍ୟାପକ ଭାବେ ବୃଦ୍ଧି ପାଇଛି। “ଅଧିକ ଶିକ୍ଷାନୁଷ୍ଠାନ, ଅଧିକ ବିକଳ୍ପ ଏବଂ ଆପଣମାନଙ୍କ ପାଇଁ ଅଧିକ ସୁଯୋଗ”, ବୋଲି ଶ୍ରୀ ମୋଦୀ କହିଥିଲେ।

ଯୁବବର୍ଗଙ୍କ ବିଭିନ୍ନ ଆକାଂକ୍ଷା ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ, ଅନେକ ଛାତ୍ରଛାତ୍ରୀ ପାରମ୍ପରିକ ବୃତ୍ତିଠାରୁ ଭିନ୍ନ କ୍ଷେତ୍ରରେ, ବିଶେଷକରି କ୍ରୀଡ଼ାରେ ନିଜର କ୍ୟାରିୟର ଗଢ଼ିବାକୁ ଚାହୁଁଛନ୍ତି। କ୍ରୀଡ଼ାକୁ କେବଳ ମନୋରଞ୍ଜନ ନୁହେଁ, ବରଂ ଏକ ସମ୍ଭାବନାପୂର୍ଣ୍ଣ ବୃତ୍ତି ଭାବେ ଗଢ଼ିତୋଳିବା ପାଇଁ ଦେଶରେ ନୂତନ କ୍ରୀଡ଼ା ଭିତ୍ତିଭୂମି ବିକଶିତ କରାଯାଉଛି ଏବଂ ଉନ୍ନତ ପ୍ରଶିକ୍ଷଣ ଓ ସହାୟତା ଯୋଗାଇ ଦିଆଯାଉଛି ବୋଲି ସେ ଆଶ୍ୱାସନା ଦେଇଥିଲେ। ଏହା ଅନ୍ତର୍ଜାତୀୟ ସ୍ତରରେ ଦେଶର ମର୍ଯ୍ୟାଦାକୁ ମଧ୍ୟ ବୃଦ୍ଧି କରୁଛି। “ଯୁବ କ୍ରୀଡ଼ାବିତ୍‌ମାନେ ଏବେ ଉନ୍ନତ ପ୍ରଶିକ୍ଷଣ ଓ ସହାୟତା ପାଇ ପାରୁଛନ୍ତି”, ବୋଲି ଶ୍ରୀ ମୋଦୀ କହିଥିଲେ।

ଦେଶର ଉଚ୍ଚାଭିଳାଷୀ କ୍ରୀଡ଼ା ଲକ୍ଷ୍ୟ ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ ଘୋଷଣା କରିଥିଲେ ଯେ, ଭାରତ ୨୦୩୦ ମସିହାରେ ରାଜ୍ୟଗୋଷ୍ଠୀ କ୍ରୀଡ଼ା ଆୟୋଜନ ପାଇଁ ଜୋରଦାର ପ୍ରସ୍ତୁତି କରୁଛି ଏବଂ ୨୦୩୬ ମସିହାରେ ଅଲିମ୍ପିକ୍ସ ଆୟୋଜନ କରିବାର ମହତ୍ତ୍ୱାକାଂକ୍ଷୀ ସ୍ୱପ୍ନ ଦିଗରେ ମଧ୍ୟ ଆଗକୁ ଅଗ୍ରସର ହେଉଛି। ଆଗାମୀ ଦିନରେ ଅନେକ ବଡ଼ ଅନ୍ତର୍ଜାତୀୟ କ୍ରୀଡ଼ା ଆୟୋଜନର ସୁଯୋଗ ଆସୁଥିବାରୁ ଯୁବବର୍ଗଙ୍କ ପାଖରେ ଏବେ ଉପଯୁକ୍ତ ମଞ୍ଚ, ସାମର୍ଥ୍ୟ ଏବଂ ସରକାରଙ୍କ ପୂର୍ଣ୍ଣ ସମର୍ଥନ ରହିଛି ବୋଲି ସେ କହିଥିଲେ। “ସୁଯୋଗର କୌଣସି ସୀମା ନାହିଁ। ମୋର ବିଶ୍ୱାସ ଯେ, ଆପଣମାନଙ୍କ ପିଢ଼ି କ୍ରୀଡ଼ା କ୍ଷେତ୍ରରେ ମଧ୍ୟ ଭାରତକୁ ବିଶ୍ୱରେ ନୂତନ ଉଚ୍ଚତାକୁ ନେଇଯିବ”, ବୋଲି ଶ୍ରୀ ମୋଦୀ କହିଥିଲେ।

ଯୁବବର୍ଗଙ୍କ ଉପରେ ନିଜର ଦୃଢ଼ ବିଶ୍ୱାସ ପ୍ରକାଶ କରି ପ୍ରଧାନମନ୍ତ୍ରୀ କହିଥିଲେ ଯେ, ଛାତ୍ରଛାତ୍ରୀଙ୍କ ସହ ଆଲୋଚନା କରିବା ଏବଂ ସେମାନଙ୍କ ଉତ୍ସାହପୂର୍ଣ୍ଣ ସ୍ୱପ୍ନକୁ ଅନୁଭବ କରିବା ଦ୍ୱାରା ଦେଶର ଉଜ୍ଜ୍ୱଳ ଭବିଷ୍ୟତ ପ୍ରତି ତାଙ୍କର ବିଶ୍ୱାସ ଆହୁରି ଦୃଢ଼ ହୋଇଛି। ଆଗାମୀ ଯୁଗକୁ ଗଢ଼ିବା ଓ ନୂତନ ପରିଚୟ ଦେବାରେ ଯୁବବର୍ଗ ହିଁ ପ୍ରମୁଖ ଭୂମିକା ନେବେ ବୋଲି ସେ କହିଥିଲେ। “ଭାରତର ଭବିଷ୍ୟତ ଅତ୍ୟନ୍ତ ଗୌରବମୟ ହେବ ଏବଂ ସେହି ଭବିଷ୍ୟତର ସବୁଠାରୁ ବଡ଼ ନାୟକ ହେଉଛନ୍ତି ଆପଣମାନେ”, ବୋଲି ଶ୍ରୀ ମୋଦୀ କହିଥିଲେ।

ଯୁବବର୍ଗଙ୍କ ସାମର୍ଥ୍ୟ ଉପରେ ନିଜର ଅତୁଟ ବିଶ୍ୱାସକୁ ଦୋହରାଇ ପ୍ରଧାନମନ୍ତ୍ରୀ ଉପସ୍ଥିତ ଛାତ୍ରଛାତ୍ରୀଙ୍କ ଅପାର ପ୍ରତିଭା, ଆତ୍ମବିଶ୍ୱାସ ଓ ଦକ୍ଷତାକୁ ପ୍ରଶଂସା କରିଥିଲେ। ଦେଶ ପାଇଁ କିଛି ବଡ଼ ଓ ଐତିହାସିକ ସଂକଳ୍ପ ନେବାକୁ ସେ ଯୁବବର୍ଗଙ୍କୁ ଆହ୍ୱାନ ଦେଇଥିଲେ। “ଆଜି ମୁଁ ଆପଣମାନଙ୍କ ସହ କିଛି ବଡ଼ ସଂକଳ୍ପକୁ ପୁଣିଥରେ ଦୋହରାଇବାକୁ ଚାହୁଁଛି”, ବୋଲି ଶ୍ରୀ ମୋଦୀ କହିଥିଲେ।

ନିଜର ଅଭିଭାଷଣର ଶେଷରେ ପ୍ରଧାନମନ୍ତ୍ରୀ ଏକ ଉତ୍ସାହପୂର୍ଣ୍ଣ ସାମୂହିକ ଶପଥ କାର୍ଯ୍ୟକ୍ରମର ନେତୃତ୍ୱ ନେଇଥିଲେ। ଏଥିରେ ବିଶାଳ ଜନସମାଗମ “ଆମେ ଏହା କରିବୁ!” ବୋଲି ଏକସ୍ୱରରେ ଘୋଷଣା କରି ଦେଶର ମହାନ ଲକ୍ଷ୍ୟଗୁଡ଼ିକୁ ସାକାର କରିବା ପାଇଁ ସଂକଳ୍ପ ନେଇଥିଲେ। ୨୦୪୭ ସୁଦ୍ଧା ବିକଶିତ ଭାରତ ଗଠନ, ବିଶ୍ୱର ଶ୍ରେଷ୍ଠ ତିନିଟି ଅର୍ଥନୀତି ମଧ୍ୟରେ ସ୍ଥାନ ପାଇବା, ଆତ୍ମନିର୍ଭରଶୀଳ ବିଶ୍ୱ ଉତ୍ପାଦନ କେନ୍ଦ୍ର ଗଠନ, ଅଲିମ୍ପିକ୍ସ ଆୟୋଜନ ଏବଂ ଜଣେ ଭାରତୀୟଙ୍କୁ ଚନ୍ଦ୍ରପୃଷ୍ଠକୁ ପଠାଇବା ଭଳି ଲକ୍ଷ୍ୟ ହାସଲ ପାଇଁ ଯୁବବର୍ଗଙ୍କୁ ସମ୍ପୂର୍ଣ୍ଣ ସମର୍ପଣ ଭାବନାର ସହ କାର୍ଯ୍ୟ କରିବାକୁ ସେ ଆହ୍ୱାନ ଦେଇଥିଲେ।

*****

MT